Garuda Purana · Chapter 1.133

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe budhāṣṭamīvratanirūpaṇaṃ nāma dvātriṃśaduttaraśatatamo 'dhyāyaḥ
śrīgaruḍamahāpurāṇam- 133
brahmovāca /
aśokakalikā hyaṣṭau ye pibanti punarvasau /
caitre māsi sitāṣṭamyāṃ na te śokamavāpnuyuḥ

tvāmaśoka ! harābhīṣṭa ! madhumāsasamudbhava /
pibāmi śokasantapto māmaśokaṃ sadā kuru

(ityaśokāṣṭamīvratam) /
brahmovāca /
śuklāṣṭamyāmāśvayuje uttarāṣāḍhayā yutā /
sā mahānavamītyuktā snānadānādi cākṣayam

navamī kevalā cāpi durgāṃ caiva tu pūjayet /
mahāvrataṃ mahāpuṇyaṃ śaṅkarādyairanuṣṭhitam

ayācitādi ṣaṣṭhyādau rājā śatrujayāyā ca /
japahomasamāyuktaḥ kanyāṃ vā bhojayetsadā

durgedurge rakṣiṇi svāhā mantro 'yaṃ pūjanādiṣu /
dīrghākārādimātrābhirnava devyo namo 'ntikāḥ

ṣaḍbhiḥ padairnamaḥ svāhā vaṣaḍādihṛdādikam /
aṅguṣṭhādikaniṣṭhāntaṃ nyasya vai pṛjayecchivām

aṣṭamyāṃ nava gehāni dārujānyekameva vā /
tasmindevī prakartavyā haimī vārājatāpi vā

śūle khaṅge pustake vā paṭe vā maṇḍale (pe) yajet /
kapālaṃ kheṭakaṃ ghaṇṭāṃ darpaṇaṃ tarjanīṃ dhanaḥ

dhvajaṃ ḍamarukaṃ pāśaṃ vāmahasteṣu bibhratī /
śaktiṃ ca mudgaraṃ śūlaṃ vajraṃ khaṅgaṃ tathāṅkuśam

śaraṃ cakraṃ śalākāṃ ca durgāmāyudhasaṃyutām /
śeṣāḥ ṣoḍaśahastāṃ syurañjanaṃ ḍamaruṃ vinā

rudracaṇḍā pracaṇḍā ca caṇḍogrā caṇḍanāyikā /
caṇḍā caṇḍavatī caiva caṇḍarūpāticaṇḍikā

navamī cogracaṇḍā ca madhyamāgniprabhākṛtiḥ /
rocanā tvaruṇā kṛṣṇā nīlaṃ dhūmrā ca śukrakā

pātā ca pāṇḍurā proktā ālīḍhaṃ haritaṃ tathā /
ma (mā) hiṣo 'sya sa khaḍgāgraprakacagrahamuṣṭikaḥ

japtvā daśākṣarīṃ vidyāṃ nāsau kenāpi badhyate /
pañca (ñcā) daśāṅgulaṃ khaḍgaṃ triśūlaṃ ca tato yajet /
liṅgasyāṃ pūjayedvāpi pāduke 'tha jale 'pi vā

vicitrāṃ rakṣayetpūjāmaṣṭamyāmupavāsayet /
pañcābdaṃ mahiṣaṃ bastaṃ rātriśeṣe ca ghātayet

vidhivatkālikālīti taduttharudhirādikam /
nerṛtyāṃ pūtanāṃ caiva vāyavyāṃ pāparākṣasīm

dadyāccarakyai caiśānyāmāgneyyāṃ ca vidārikām