Garga Samhita · Chapter 8.4

balabhadrakhaṇḍaḥ - caturtho'dhyāyaḥ
revatī upākhyānam -
śrīmahānaṃta uvāca -
atha jyotiṣmatīṃ śatacaṃdrapratīkāśāṃ navayauvanāṃ
suṃdarīṃ tapasvinīṃ vīkṣya śakrayamadhanadāgni-
varuṇasomasūryamaṃgalabudhabṛhaspatiśukraśanayaḥ sarve
tad‌rūpoddīpitakāmasaṃmohita cittāstadāśrametya tāmucuḥ

he suṃdarī raṃbhoru dhanyā'si kasyārthaṃ tapaḥ karoṣi
te vayastapayogyaṃ nāsti mano'bhiprāyaṃ svakamasmākaṃ
vadeti tacchrutvā jyotiṣmatyuvāca bhagavānanaṃtaḥ
sahasravadano mama bhartā bhūyādetarthaṃ tapastapāmīti tadvacaḥ
śrutvā sarve jahasuḥ pṛthak pṛthak teṣāṃ pūrvamiṃdra idamāha

iṃdra uvāca -
sarparājaṃ varaṃ kartuṃ kiṃ vṛthā tapase śubhe //
devarājaṃ varaya māṃ svataḥ prāptaṃ śatakratum

yama uvāca -
yamarājaṃ varaya māṃ daṇḍanetāramāgatam //
sarvottamā tvaṃ matpat‍nī pitṛloke bhaviṣyasi

dhanada uvāca -
rājarājaṃ hi māṃ viddhi nidhīśaṃ he varāṃgane //
tvaṃ bhajāśu viśālākṣi tyaja saṃkarṣaṇe ratim

agniruvāca -
sarvadevamukhaṃ viddhi sarvayajñapratiṣṭhitam //
bhaja māṃ tvaṃ viśālākṣi vihāyānyatra vāsanām

varuṇa uvāca -
lokapālaṃ varaya māṃ pāśinaṃ yadasāṃ patim //
saptānāṃ hi samudrāṇāṃ vaibhavaṃ paśya bhāmini

sūrya uvāca -
jagaccakṣuḥ sadā'haṃ vai caṃḍāṃśuścākṣuṣātmaje //
vihāya pātālagatiṃ vara māṃ svarṇabhūṣaṇam

soma uvāca -
dvijarājaścauṣadhīśo nakṣatreśaḥ sudhākaraḥ //
kāminībalado'haṃ vai bhaja māṃ gajagāmini

maṃgala uvāca -
iyaṃ mahī hi me mātā pitā sākṣādurukramaḥ //
maṃgalaṃ bhaja māṃ bhadre bhūtvā bhūri bhavārthinī

budha uvāca -
budho'haṃ buddhimān vīraḥ kāminīrasavarddhanaḥ //
visṛjya sarvanākeśān ramasva tvaṃ mayā saha

bṛhaspatiruvāca -
gīṣpatirdhiṣaṇo'haṃ vai surācāryo bṛhaspatiḥ //
sākṣāddevagururloke bhaja māṃ manyase śubhe

śukra uvāca -
sākṣāddaityaguruḥ kāvyo bhārgarvo'haṃ mahāmate //
svaśreyastu vicāryyaivaṃ bhava mad‌bhāminī bhṛśam

śaniruvāca -
sarveṣāṃ balavān bhadre ahaṃ devopari sthitaḥ //
tyaja śokaṃ varaya māṃ lokabhasmakaraṃ dṛśā

mahānanta uvāca -
atha jyotiṣmatī teṣāṃ vacāṃsi śrutvā'ruṇanetrā
sphuradadharacalad‍bhrūbhaṃgā prodyad‌roṣāgniprakarṣocchalacchaṭā
māṃ paraṃ sasmāra paraṃ krodhaṃ ca cakāra

tena sakhaṃḍaṃ mahīmaṃḍalaṃ brahmāṃḍamapi paraṃ
cābrahmalokān dṛḍhamejatsarvato mahad‌bhayaṃ babhūva

tadaiva śakrādyāḥ śāpabhayabhītāḥ prakampitāḥ
kṛtabalipāṇayaḥ pādapadme pārito nipetuḥ
pāhi pāhīti jagustairitthaṃ śāṃtā'pi
jyotiṣmati pṛthak pṛthak tān śaśāpa

jyotiṣmatyuvāca -
chalayitumiha māṃ samāgatastvaṃ
bhava khala paṃguradhaḥsamīkṣaṇaśca //
kṛśatanuratikṛṣṇakutsitābho
bhava sahasā'sitamāṣatailabhakṣī

he śukra akṣṇā bhava kāṇa āśu
strīsaṃjñakastvaṃ bhava gīṣpate'tra //
he saumya te vāradinaṃ hi śūnyaṃ
vadanti gacchanti na ke kadācit

he maṃgala tvaṃ bhava vānarānano
niśākara tvaṃ bhava rājayakṣmavān //
tvaṃ bhagnadanto bhava bho divākara
pāśin ruciste bhavatāñjalaṃdharī

tvaṃ sarvabhakṣo bhavatāduṣarbudha
manuṣyadharman hṛtapuṣpako bhava //
vaivasvasta tvaṃ bahumānabhaṅgo
bhavāśu yuddhe prabalena rakṣasā

māṃ hartumāgatya surādhama sthitaḥ
karoṣi niṃdāṃ paramātmano girā //
tava priyāṃ ko'pi nṛpo hariṣyati
kariṣyati svargasukhaṃ gate tvayi

pāśena baddhaṃ yudhi nirjitaṃ tvāṃ
balād‍gṛhītvā khalu ko'pi rākṣāsaḥ //
laṃkāṃ purīmetya divaspate vai
kārāgṛhe'ndhe kila kārayiṣyati

śrīmahānanta uvāca -
atha ha vāva tayā śaptānāṃ devānāṃ madhye kupitaḥ
śakro'pi tāṃ śaśāpa // kopakāriṇi saṃkarṣaṇaṃ varamapi
prāpyatra janmani hyanyatra vā kadācittava putrotsavo mābhūt //
evamuktvā śakro'pi tattejasā dharṣītaḥ sarvadevagaṇaiḥ
saha svargaṃ jagāma // punaḥ sā tapastepe

atha tattapo dṛṣṭvā brahmā brahmavid‌bhirbrāhmaṇairbrāhmayādibhiḥ
saṃvṛtaḥ sarvajagatkāraṇabhūtaḥ svabhavanāddhaṃsayānenāgatavān

aṃbare sthitvā tāmāha he jyotiṣmati cākṣuṣātmaje tvattapaḥ
saphalaṃ jātaṃ tena siddhā'si paramahaṃ prasanno'smi varaṃ brūhīti

tacchrutvā''kaṇṭhajalādvinirgatya brahmāṇaṃ
praṇipatya stutvā kṛtāṃjalirityabravīt //
he bhagavan yadi prasanno'si kileha saṃkarṣaṇo
bhagavān sahasravadano mama varo bhūyāditi
śrutvā ha vāva vibudharṣabhaḥ pratyuvāca

he putri tava manoratho durlabho'sti tathāpi
pūrṇa kariṣyāmyadyaiva vaivasvatamanvataraḥ
prāpto'sti hyasya trinavacaturyugavikalpite
kāle sati tatra varaḥ saṃkarṣaṇo bhagavān bhaviṣyati

tacchrutvā jyotiṣmatī brahmāṇamāha devadeva bhagavān
mahān kālo vartate mama manorathaḥ śīghraṃ bhūyātvaṃ
kartuṃ samarthaḥ na cettubhyaṃ śāpaṃ dāsyāmi yathā devebhyo dattaḥ

iti prokto brahmā śāpabhītaḥ kṣaṇaṃ vicārya punarāha -
he rājaputri tvamānartapatereva tasya kuśasthalyāṃ putrī bhava //
tasmin janmani trinavacaturyugavikalpitaḥ
kālaḥ kenacitkāraṇena kṣaṇavad‌bhaviṣyati
iti tasyai varaṃ datvā brahmā tatraivāṃtaradhīyata

atha sā'pyānarteṣu kuśasthalīpure revatasya
bhāryāyāṃ janma lebhe // tatra jyotiṣmatī revatī nāma
rupaudāryyaguṇamaṇḍitā navaśaratkaṃjanetrā vivāhayogyā babhūva

tāṃ revataḥ snehenāṃtaḥpure sabhārya uvāca kīdṛśaṃ
varamicchasīti vacaḥ śrutvā sā tadovāca
sarveṣāṃ balavānsa me varo bhūyāt

iti śrutvā rājā revataḥ sabhāryo'pi sutāṃ
nītvā divyaṃ rathamāruhya balavantaṃ varaṃ dīrghāyuṣaṃ
paripraṣṭuṃ lokānullaṃghya brahmalokaṃ gatavān

tatra kṣaṇamāsthito'bhūttena kṣaṇena bhūloke'dyaiva
trinavacaturyugavikalpitaḥ kālo jātaḥ //
sā'dyaiva brahmaloke vartate raṃbhoru tasyā tvaṃ saṃlīnā
bhūtvā''veśāvatāriṇī dvārakāṃ prāpya ramasva

prāḍ‌vipāka uvāca -
itthaṃ tadvākyaṃ śrutvā nāgalakṣmīḥ saṃkarṣaṇaṃ bhartāramanujñāpya
brahmalokametya revatīvigrahe svāveśaṃ cakāra

atha saṃkarṣaṇaॊ bhagavān bhūri bhūmibhāraharaṇārthaṃ
lokanamaskṛtād‌golokadhāmasakāśādavatatāredaṃ
balabhadrasya bhagavata āgamanaṃ mayā te kathitaṃ
sarvaduritāpaharaṇaṃ maṃgalāyanaṃ yuvarāja
kauraveṃdra kiṃ bhūyaḥ śrotumicchasīti

iti śrīgargasaṃhitāyāṃ balabhadrakhaṇḍe
jyotiṣmatyupākhyāne revatyupākhyānaṃ nāma caturtho'dhyāyaḥ

hariḥ ॐ tatsat śrīkṛṣṇārpaṇamastu //
vargaḥgarga saṃhitā