Garga Samhita · Chapter 7.24

yakṣa-yuddham
śrīnārada uvāca -
śastrāṃdhakāre saṃjāte maṇigrīvo mahābalaḥ //
bibhedāribalaṃ bāṇaiḥ kuvākyairmitratāmiva

maṇigrīvasya bāṇaughairgajāśvarathapattayaḥ //
nipetuḥ sakṣatā bhūmau vṛkṣā vātahatā iva

caṃdrabhānurhareḥ putro satyabhāmā''tmajo balī //
maṇigrīvasya kodaṃḍaṃ paṃcabāṇaistadācchinat

daśabhīstad‌rathaṃ bhitvā jagarja ghanavad‌balī //
maṇigrīvo'pi cikṣepa śaktiṃ svāṃ candrabhānave

bhāsayaṃtī diśaḥ śaśvanmaholkāmiva maithila //
agrahīccaṃdrabhānustāṃ vāmahastena līlayā

tayā jaghāna samare maṇigrīvaṃ mahābalam //
punarjagarja samare caṃdrabhānurmahābalaḥ

tatprahāreṇa patite maṇigrīve pramūrchite //
candrabhānuṃ bāṇajālairnalakūbaranoditāḥ

chādayāmāsurasurā varṣādityaṃ yathāṃbudāḥ //
dīptimānkṛṣṇaputrastu khaḍgamudyamya vegavān

viveśa yakṣasenāsu nīhāreṣu yathā raviḥ //
tasya khaḍgaprahāreṇa kecidyakṣā dvidhābhavan

kecidvai chinnaśirasaśchinnapādāṃsabāhavaḥ //
bhinnahastāśchinnakarṇāśchinnoṣṭhāḥ peturāhave

teṣāṃ śirobhirbībhatsaiḥ sakirīṭaiḥ sakuṃḍalaiḥ //
saśirastraiḥ sravad‌raktairmahāmārīva bhūrbabhau

śeṣā vidudruvuryakṣāḥ sakṣatā bhayavihvalāḥ //
hāhākārastadā jāto yakṣasenāsu maithila

dhanuṣṭaṃkārayanprāpto daṃśito nalakūbaraḥ //
rathenātipatākena mā bhaiṣṭetyabhayaṃ dadau

paṃcabhiḥ kṛtavarmāṇamarjunaṃ daśabhiḥ śaraiḥ //
dīptimaṃtaṃ ca viṃśatyā tatāḍa nalakūbaraḥ

kṛtavarmā mahābāhurjaghāna nalakūbaram //
paṃcabhirviśikhai rājannādayanmaṃḍalaṃ diśām

te bāṇāḥ kavacaṃ bhitvā tanuṃ bhitvā dharātalam //
viviśuḥ paśyatāṃ teṣāṃ valmīke phaṇino yathā

vīkṣya tad‌bāṇabhinnāṃgaṃ mūrcchitaṃ nalakūbaraṃ //
apovāha raṇātsūto hemamālīti nāmabhāk

ghaṃṭānādaḥ pārśvamauliḥ kuberasya ca maṃtriṇau //
jaghnaturbāṇapaṭalairyadūnāmud‌bhaṭaṃ balam

svarṇapuṃkhaistīkṣṇamukhairgṛdhrapakṣairmanojavaiḥ //
dyotayad‌bhirdiśaḥ sarvā mārtaṃḍakiraṇairiva

tato'rjuno mahāvīraḥ pratibāṇānsamādadhe //
bāṇasaṃgharṣajā yuddhe visphuliṃgā sahasraśaḥ

virejurnṛpa khadyotacaṃcalālātacakravat //
sarvaṃ tad‌bāṇapaṭalaṃ kṣaṇamātreṇa cācchinat

gāṃḍīvamuktaviśikhairgāṃḍīvī raṇadurmadaḥ //
yojanadvayamātreṇa tad‌ratho sadhvajo balāt

arjuno bāṇapaṭalaiścakāra śarapaṃjare //
hatāvimāviti jñātvā sarve puṇyajanāstvaram

dudruvuḥ svaṃ raṇaṃ tyaktvā paraṃ hāheti vādinaḥ //
tadā tu bhūtāvalayaḥ koṭiśaścāyayurmṛdhe

ḍākinyaḥ koṭiśo rājaṃścikṣipurvāraṇānmṛdhe //
bhakṣayaṃtyo narānaśvām̐ścarvayaṃtyo rathānpṛthak

nare nare pṛthagbhūtā dhāvaṃto daśabhirdaśa //
pramathāḥ pātayāmāsuḥ khaṭvāṃgena janānmuhuḥ

yātudhānāścarvayantaḥ śirāṃsi raṇamaṃḍale //
vetālāśca kapālena pibaṃto rudhiraṃ bahu

vināyakāśca nṛtyaṃtaḥ pretā gāyaṃta eva hi //
kūṣmāṃḍāśca tathonmādāḥ śirāṃsi jagṛhurmṛdhe

śivasya muṃḍamālārthaṃ vīrāṇāṃ svargagāminām //
tathā mātṛgaṇā brahmarākṣasā bhairavā mṛdhe

śirāṃsi kaṃdukānīva kṣepayaṃto muhurmuhuḥ //
hasaṃtaḥ prahasaṃtaśca sāṭṭahāsaṃ samākulāḥ

piśācā vikalāsyāśca kūrdantaḥ ke'pi kutsitam //
piśācyaḥ kṣatajaṃ tūṣṇaṃ pāyayaṃtyaḥ śiśūnmṛdhe

mā rodīriti vādinyo netrāṇyapi dadāma ut //
itthaṃ gaṇabalaṃ dṛṣṭvā baladevānujo balī

gado gadāṃ samādāya jagarja ghanavad‌balī //
lakṣabhārabhṛtā maurvyā gadayā tad‌balaṃ mahat

pothayāmāsa hi gado vajreṇeṃdro yathā girīn //
kūṣmāṃḍonmādavetālāḥ piśācā brahmarākṣasāḥ

nipeturmūrchitā bhūmau tad‌gadābhinnamastakāḥ //
ḍākinībhinnadaṃtāśca pramathābhinnakaṃdharāḥ

yātudhānāṃśchinnamukhāṃścakāra samare gadaḥ //
gadayā marditāḥ pretā dudruvuste diśo daśa

vārāhadaṃṣṭrayā bhagnā laye daityā yathā nṛpa //
palāyite bhūtagaṇe vīrabhadraḥ samāgataḥ

gadaṃ tatāḍa gadayā baladevānujaṃ balī //
gadopari gadāṃ nītvā gadaḥ svāṃ prāhīṇod‌gadām

tayoryuddhamabhūd‌ghoraṃ gadābhyāṃ maithileśvara //
visphuliṃgān kṣaraṃtyo dve gade cūrṇibabhūvatuḥ

mallayuddhaṃ tayorāsīnnodayaṃtaṃ parasparam //
bhujaiśca jānubhiḥ pādaiḥ pātayaṃto girīn bahūn

karavīraṃ samutpāṭya vīrabhadro giriṃ balāt //
aṭṭahāsaṃ tadā kurvan gadopari samakṣipat

gado giriṃ saṃgṛhītvā tasyopari samākṣipat //
gṛhītvātha gadaṃ vīraṃ vīrabhadro balād‌balī

cikṣepa caujasā rājannākāśe lakṣayojanam //
gado'pi patito bhūmau kiṃcidvyākulamānasaḥ

gṛhītvā vīrabhadrākhyaṃ bhrāmayitvā mahābalaḥ //
ojasā prākṣipacchīghramākāśe lakṣayojanam

vīrabhadrastu patitaḥ kailāsaśikharopari //
gadāprahāravyathito mūrchito ghaṭikādvayam

kārtikeyastadā prāptaḥ śaktimudyamya vegavān //
aniruddhāya sāṃbāya śaktiṃ cikṣepa satvaram

aniruddharathaṃ bhitvā sāṃbaṃ sāṃbarathaṃ punaḥ //
gajān rathānsahasraṃ ca vīralakṣaṃ mṛdhāṃgaṇe

bhitvā nadaṃtī sphūrjaṃtī capaleva dīśo daśa //
viveśa bhūmau phūtkāraṃ kurvatī pannagīva sā

tadā kruddho mahābāhuḥ sāṃbo jāmbavatīsutaḥ //
kṛtvātha siṃjinīghoṣaṃ niṣaṃgād‌bāṇamādade

eko'pi sad‍bahistūṇāddaśarūpī babhūva ha //
cāpe śataṃ karṣaṇe ca sahasraṃ rūpamādadhe

mokṣaṇe lakṣarūpāṇi koṭirūpāṇi koṭiṣu //
anekarūpī viśikhaḥ śikhinaṃ śikhivāhanam

bhitvā bibheda vīrāṇāṃ koṭiśaḥ koṭiśo raṇe //
kārtikeye ca bhinnāṃge kiṃcidvyākulamānase //
gaṇeśvarastadā prāpto mūṣakastho gajānanaḥ

gomūtrapatramṛganābhivicitrakuṃbhaṃ
śrīkuṃkumākalitasuṃdaravakratuṃḍam //
siṃdūrapūritakapolamanoharābhaṃ
karpūradhūlidhavalīkṛtakarṇavarṇam

vyālolakarṇahatamattamadhuvrataistaiḥ
śrīgaṃḍajātamadirāmadavihvalāṃgai //
saṃgītatālakusumākaragītarāgaiḥ
saṃsevitaṃ gaṇapatiṃ kṛtabhālacaṃdram

bālārkavarṇamamalāṃgadahemahāra-
graiveyamaulikiraṇaiḥ paritaḥ sphuraṃtam //
ākhusthamekadaśanaṃ gajabhavyamūrtiṃ
pāśāṃkuśāṃbujakuṭhāracayaṃ dadhānam

prāṃśuṃ caturbhujamatīva mṛdhe pravṛttaṃ
kāṃścitpragṛhya ca kareṇa dhṛtāṃkuśena //
saṃmardayaṃtamurudhāraparaśvadhena
śrībhārgavendramiva śastrabhṛtaḥ samastān

vīrebhavājirathasaṃghabalaṃ nipātya
sāṃbaṃ pragṛhya sarathaṃ pradhanātkṣipaṃtam //
taṃ vīkṣya vismitamanāḥ sagaṇo'tha kārṣṇiḥ
putraṃ subuddhimaniruddhamuvāca samyak

iti śrīgargasaṃhitāyāṃ śrīviśvajitkhaṇḍe śrīnāradabahulāśvasaṃvāde
yakṣayuddhavarṇanaṃ nāma caturviṃśo'dhyāyaḥ