Garga Samhita · Chapter 7.13

śālva-mālava-laṅkāvijayam
śrīnārada uvāca -
kṛtamālāṃ tāmraparṇīṃ snātvā śrīyādaveśvaraḥ //
yadubhiḥ sainikaiḥ sārddhaṃ rājan rājapuraṃ yayau

śālvo rājapurādhīśaḥ śrutvā manmukhato yadūn //
āgatān sa yayau śīghraṃ dvividaṃ vānarādhipam

dvivido hyatisaṃkruddho vīro mitrasahāyakṛt //
śaṃbarāribalaṃ prāgāccālayan vasudhātalam

vidadāra nakhairdaṃtaiḥ patākādhvajapaṭṭakān //
kāśmīrakaṃbalairyuktānsāmudrānsvarṇabhūṣitān

rathānutpātayāmāsa gajānāruhya vegataḥ //
aśvānvidrāvayāmāsa bhrūbhaṃgairvānarasvanaiḥ

itthaṃ kolāhale jāte pradyumno dhanvināṃ varaḥ //
ājagāma rathenāsau dhanuṣṭaṃkārayan muhuḥ

dvividastad‌rathasyārāduccakrāma madotkaṭaḥ //
chatraṃ dhvajaṃ svapucchena kaṃpayansahayaṃ ratham

pradyumnaḥ svadhanuṣkoṭyā dhṛtvā kaṇṭhe cakarṣa ha //
kapistadātikupito muṣṭinā taṃ tatāḍa ha

pradyumno dhanurādaya sajjaṃ kṛtvā vidhānataḥ //
ākṛṣya karṇaparyantaṃ viśikhena tatāḍ tam

viśikhī bhrāmayitvā taṃ gagane śatayojanam //
praharārddhena rājendra laṃkāyā saṃnyapātayat

rakṣobhiḥ saha tadyuddhaṃ babhūva ghaṭikādvayam //
nyapātayatsa rakṣāṃsi pradyumno'tha yadūttamaḥ

nādayandundubhiṃ rājan vijitya jagṛhe balim //
dakṣiṇāṃ mathurāṃ dṛṣṭvā trikūṭaṃ cāruroha ha

proccakrāma trikūṭātsa mainākaśikharopari //
mainākātsiṃhalaṃ caitya bhārataṃ cāyayau punaḥ

śanaiḥ śanairvānareṃdro himācalagiriṃ gataḥ //
himācalasya śikharātprāgjyotiṣapuraṃ yayau

matsāradeśādhipatiṃ pradyumno yādaveśvaraḥ //
mahākṣetraṃ rāmakṛṣṇaṃ prayayau setubaṃdhanam

śatayojanavistīrṇaṃ samudraṃ makarālayam //
vīkṣya kārṣṇirmahāvīrastasthau velāṃ sametya saḥ

sāṃbādīnsa samāhūyākrūrādyān yādavānsvakān //
sabhāyāmuddhavaṃ prāha kārṣṇiryogeśvareśvaraḥ

pradyumna uvāca -
bibhīṣaṇo dvīpapatirmahojjvalo
laṃkāpatiḥ kauṇapavṛndamukhyaḥ //
vadātha kiṃ bhojavarāya maṃtri-
nna ced‌baliṃ yacchati me vadāśu

uddhava uvāca -
tvaṃ devadevaḥ puruṣottamottamaḥ
śrīkṛṣṇcandraḥ paramastvameva hi //
tvaṃ pṛcchase loka iva prabho māṃ
māyāpi te yogivarairduratyayā

brahmādayo yasya parānuśāsanaṃ
vahanti mūrdhnā satataṃ pradharṣitāḥ //
sa eva sākṣātpuruṣo'si bhūman
dāsānudāso'smi vadāmi kiṃ te

śrīnārada uvāca -
ityuktaḥ paśyatāṃ teṣāṃ pradyumno bhagavānhariḥ //
patraṃ gṛhītvā vyalikhatsaṃdeśaṃ maithileśvara

śrībhojarājāya baliṃ prayaccha
balānna cenme vacanaṃ śṛṇu tvam //
kodaṃḍamuktairviśikhaiśca setuṃ
baddhvā''gamiṣyāmi sasainyasaṃghaḥ

likhitvedaṃ samādāya kodaṇḍaṃ caṇḍavikramaḥ //
bāṇe patraṃ samādhāya karṇāṃtaṃ taṃ tatāna ha

prasphuṭaṃ sphoṭate naiva ṭaṃkāro'bhūttaḍitsvanaḥ //
nanāda tena brahmāṇḍaṃ saptalokairbilaiḥ saha

kodaṇḍamukto viśikho dyotayanmaṇḍalaṃ diśām //
vibhīṣaṇasabhāmadhye saṃpapāta taḍitsvanaḥ

tadaiva rākṣāsāḥ sarve protthitāścakitā iva //
sakaṃcukāni śastrāṇi jagṛhurvegataḥ khalāḥ

patraṃ bāṇātsamākṛṣya paṭhitvātha bibhīṣaṇaḥ //
vismito'bhūtsabhāmadhye rākṣaseṃdro mahābalaḥ

prāptaṃ tadaiva sadasi śukrācāryaṃ bibhīṣaṇaḥ //
pūjayāmāsa pādyādyairnatvā prāha kṛtāṃjaliḥ

bibhīṣaṇa uvāca -
bhagavankasya bāṇo'yaṃ bhojarājastu kaḥ kṣitau //
kiṃ balaṃ tasya me brūhi tvaṃ sākṣāddivyadarśanaḥ

śrīśukra uvāca -
atraivodāharantīmamitihāsaṃ purātanam //
yasya śravaṇamātreṇa rājanpāpaṃ praśāmyati

purā hi brahmaṇaḥ putrāḥ sanakādyā divaṃ gatāḥ //
viṣṇorlokaṃ yayurdivyaṃ caranto bhuvanatrayam

digaṃbarāñchiśūnmatvā jayo vijaya eva tān //
dvārapālau rurudhaturvetreṇāṃtaḥpurasthitau

aśapaṃstau ca te kruddhāḥ kṛṣṇadarśanalālasāḥ //
bhūyāstāmasurau duṣṭau śuddhau hi janmabhistribhiḥ

evaṃ śaptau svabhavanātpatantau bhūmimaṇḍale //
jajñāte tau diteḥ putrau daityadānavapūjitau

hiraṇyakaśipurjyeṣṭho hiraṇyākṣo'nujastathā //
bhagavān yajñavārāho bhūtvā kṣmāmuddharañjalāt

jaghāna muṣṭinā daityaṃ hiraṇyākṣaṃ mahābalam //
hiraṇyakaśipuṃ sākṣānnṛsiṃhaścaṇḍavikramaḥ

dadāra jaṭhare taṃ vai kāyādhavasahāyakṛt //
bhrātarau tau punarjātau keśinyāṃ viśravaḥsutau

rāvaṇaḥ kumbhakarṇaśca sarvalokaikatāpanau //
sāyakai rāghavasyāpi petaturyuddhamaṃḍale

rākṣaseṃdrau mahāvegau sasainyau paśyatastava //
tṛtīye'sminbhave jātau kṣatriyāṇāṃ kule kila

śiśupālo dantavaktro vartamānau mahābalau //
paripūrṇatamaḥ sākṣācchrīkṛṣṇo bhagavānsvayam

asaṃkhyabrahmāṇḍapatirgolokeśaḥ parātparaḥ //
jātastayorvadhārthāya yaduvaṃśe hariḥ svayam

yādaveṃdro bhūrilīlo dvārakāyāṃ virājate //
yudhiṣṭhiramahāyajñe yuddhe śālvasya mādhavaḥ

śiśupālaṃ dantavaktraṃ haniṣyati na saṃśayaḥ //
tasya putraḥ śaṃbarārirdigjayārthaṃ vinirgataḥ

vijeṣyati nṛpānsarvāñjaṃbūdvīpasthitānnṛpān //
jiteṣu satsu deveṣu dvārakāyāṃ yadūttamaḥ //
ugraseno bhojarājo rājasūyaṃ kariṣyati

tasyaiva kodaṇḍavinirgato balā-
tpracaṇḍavego viśikhastvihāgataḥ //
tannāmacihno'titaḍitsvano babhau
pradyotayan rākṣasamaṇḍalaṃ diśām

śrīnārada uvāca -
śrīrāmabhakto'tha bibhīṣaṇo'sau
vijñāya kṛṣṇaṃ nṛpa rāmacandram //
nītvā baliṃ kauṇapavṛṃdamukhyaḥ
samāyayau suṃdaraśatrusenām

tadā'vatīryārśu mahāṃbarātsphura-
dghanadyutirdīghavapurjayekṣaṇaḥ //
pradakṣiṇīkṛtya hareḥ sutaṃ punaḥ
kṛtāṃjaliḥ saṃmukha āsthito'bhūt

vibhīṣaṇa uvāca -
namo bhagavate tubhyaṃ vāsudevāya vedhase //
pradyumnāyāniruddhāya namaḥ saṃkarṣaṇāya ca

namo matsāya kūrmāya varāhaya namo namaḥ //
namaḥ śrīrāmacaṃdrāya bhārgavāya namo namaḥ

vāmanāya namastubhyaṃ nṛsiṃhāya namo namaḥ //
namo buddhāya śuddhāya kalkaye cārtihāriṇe

śrīnārada uvāca -
ityuktvā śrīhareḥ putraṃ pūjayāmāsa mānadaḥ //
upacāraiḥ ṣoḍaśabhirbhaktyā paramayā''rdravāk

tasmai tuṣṭaḥ śaṃbarārirdadau jñānaṃ viraktimat //
bhaktiṃ śāṃtikarīṃ sākṣādyāṃti duṣpremalakṣaṇām

brahmadattaṃ mahādivyaṃ padmarāgaṃ śiromaṇim //
paulastyena purā dattaṃ rat‍namālāṃ sphuratprabhām

candrakāntamaṇiṃ tasmai candradattaṃ dadau punaḥ //
pītāṃbaraṃ paraṃ sākṣātpradyumnaḥ paramaḥ prabhuḥ

bibhīṣaṇo'tha pradyumnaṃ natvā datvā baliṃ tataḥ //
jagāma laṃkāṃ sagaṇo rākṣaseṃdro mahābalaḥ

iti śrīgargasaṃhitāyāṃ śrīviśvajitkhaṇḍe śrīnāradabahulāśvasaṃvāde
śālvamatsāralaṃkāvijayo nāma trayodaśo'dhyāyaḥ