Garga Samhita · Chapter 5.12

cāṇūrādīnāṃ pūrvajanmakathā
bahulāśva uvāca -
cāṇūrādyāśca ye mallāste ke pūrvamihāgatāḥ /
aho śrīkṛṣṇacandreṇa yeṣāṃ yuddhaṃ babhūva ha

śrīnārada uvāca -
rājan purā'marāvatyāmutathyo'sti mahāmuniḥ /
tasyābhavan paṃca putrāḥ kāmadevasamaprabhāḥ

hitvā vidyāṃ cādhyayanaṃ japaṃ tena sahaiva te /
gatvā balermallayuddhaṃ sadā'śikṣan madoddhatāḥ

brahmakarmaparibhraṣṭānvedādhyayanavarjitān /
ruṣā prāha sa tānmattānutathyo munisattamaḥ

utathya uvāca -
śamo damastapaḥ śaucaṃ kṣāṃtirārjavameva ca /
jñānaṃ vijñānamāstikyaṃ brahmakarma svabhāvajam

śauryaṃ tejo dhṛtirdākṣyaṃ yuddhe cāpyapalāyanam /
dānamīśvarabhāvaśca kṣātraṃ karma svabhāvajam

kṛṣigorakṣyavāṇijyaṃ vaiśyakarmasvabhāvajam /
paricaryātmakaṃ karma śūdrasyāpi svabhāvajam

brahmakarma parityaktā bhavaṃto brahmaṇaḥ sutāḥ /
mallayuddhaṃ kṣātrayuddhaṃ kathaṃ kuruta durjanāḥ

tasmād‌bhavaṃto śrūyāsurmallā vai bhāratājire /
asurāṇāṃ prasaṃgena durjanā bhavatāśu hi

śrīnārada uvāca -
utathyasya sutāste vai jātā mallā mahītale /
śrīkṛṣṇāṃgasparśamātrātparaṃ mokṣaṃ yayurnṛpa

cāṇūro muṣṭikaḥ kūṭaḥ śalastośala eva ca /
eṣāṃ caritraṃ kathitaṃ kiṃ bhūyaḥ śrotumicchasi

bahulāśva uvāca -
kaṃsānujā bhrātaro'ṣṭau kaṃkanyagrodhakādayaḥ /
te ke pūrvaṃ vada mune ye'pi mokṣaṃ paraṃ gatāḥ

śrīnārada uvāca -
alakāyāṃ purā yakṣo devayakṣa iti smṛtaḥ /
jñānī jñānaparo mānyaḥ śivabhaktyā mahādyutiḥ

tasya cāṣṭau sutā jātā devakūṭo mahāgiriḥ /
gaṃḍo daṇḍaḥ pracaṇḍaśca khaṃḍadaṇḍaḥ pṛthustathā

ekadā śivapūjāyāṃ devayakṣeṇa noditāḥ /
sahasraṃ puṃḍarīkāṇi cāhartumaruṇodaye

puṣpāṇi mānasānnītvā śabditāni madhuvrataiḥ /
āghrāya gaṃdhalobhena daduste janakāya vai

ucchiṣṭīkṛtadoṣeṇa śivapūjā tiraskṛtā /
āsurīṃ yonimāpannā mūḍhāste janmabhistribhiḥ

hastābhyāṃ śaṃkarābhyāṃ ca baladevasya maithila /
paraṃ mokṣaṃ gatāste vai doṣānmuktā videharāṭ

kaṃsānujānāṃ vyākhyānaṃ pūrvajanmabhavaṃ nṛpa /
idaṃ mayā te kathitaṃ kiṃ bhūyaḥ śrotumicchasi

śrībahulāśva uvāca -
koyaṃ purā paṃcajano daityaḥ śaṃkhavapurdharaḥ /
tasya śaṅkho babhau brahman śrīkṛṣṇakarapaṅkaje

śrīnārada uvāca -
puraivaitānyupāṃgāni cakrādīni videharāṭ /
trailokyanāthasya harerbabhūvustejasā hatāḥ

teṣāṃ śaṃkhaḥ pāṃcajanyaḥ prāpto rājanmahatpadam /
papau tanmukhalagno'sau śrīkṛṣṇasyādharāmṛtam

akaroccaikadā mānaṃ manasi prāha śaṃkharāṭ /
gṛhīto'haṃ hi hariṇā rājahaṃsasamadyutiḥ

śrīkṛṣṇo dakṣiṇāvartaṃ daghmau māṃ vijaye sati /
yad‍durlabhaṃ cābdhiputryāḥ śrīkṛṣṇasyādharāmṛtam

tattasmātsarvamukhyo'smi pibāmyahamaharniśam /
iti mānayutaṃ śaṃkhaṃ pāṃcajanyaṃ videharāṭ

śaśāpa lakṣmīstaṃ krodhāttvaṃ daityo bhava durmate /
so'yaṃ paṃcajano nāma daityo'bhūtsaritāṃ patau

vairabhāvena deveśaṃ punaḥ prāpto dareśvaraḥ /
jyotirlīnaṃ tu deveśe vapuryasya kare vabhau /
ahobhāgyaṃ viddhi tasya kiṃ bhūyaḥ śrotumicchasi

iti śrīgargasaṃhitāyāṃ mathurākhaṃḍe śrīnāradabahulāśvasaṃvāde
cāṇūrādikaṃsabhrātṛpaṃcajanapūrvākhyānaṃ nāma dvādaśo'dhyāyaḥ