Garga Samhita · Chapter 3.2

girirājakhaṇḍa - dvitīyo'dhyāyaḥ
girirājamahotsavavarṇanam -
śrīnārada uvāca -
śrutvā vaco nandasutasya sākṣā-
cchrīnandasannandavarā vrajeśāḥ /
suvismitāḥ pūrvakṛtaṃ vihāya
pracakrire śrīgirirājapūjām

nītvā balīnmaithila nandarājaḥ
sutau samānīya ca rāmakṛṣṇau /
yaśodayā śrīgiripūjanārthaṃ
samutsako gargayutaḥ prasannaḥ

tvaraṃ samāruhya mahonnataṃ gajaṃ
vicitravarṇaṃ dhṛtahemaśṛṅkhalam /
govardhanāntaṃ prayayau gavāṃ gaṇaiḥ
śaradghanaiḥ śakra iva priyāyutaḥ

nandopanandā vṛṣabhānavaśca
putraiśca pautraiśca sahāṃganābhiḥ /
samāyayuḥ śrīgirirājapārśvaṃ
sarvaṃ samānīya ca yajñabhāram

sahasrabālārkaparisphuraddyuti-
māruhya rādhā śibikāṃ sakhīgaṇaiḥ /
śacīva divyāmbararat‍nabhūṣaṇā
babhau cakorībhramarīsamākulā

samāgate pārśvagate svalaṃkṛte
rājansakhīkoṭisamāvṛte pare /
sakhyau vibhāte lalitāviśākhe
candrānane cālitacārucāmare

evaṃ ramā vai virajā ca mādhavī
māyā ca kṛṣṇā nṛpa jahnunaṃdinī /
dvātriṃśadaṣṭau ca tathā hi ṣoḍaśa
sakhyaśca tāsāṃ kila yūtha āgataḥ

śrīmaithilānāṃ kila kosalānāṃ
tathā śrutīnāṃ ṛṣirūpakāṇām /
tathā tvayodhyāpuravāsinīnāṃ
śrīyajñasītāvanavāsinīnām

ramādivaikuṇṭhanivāsinīnāṃ
tathordhvavaikuṇṭhanivāsinīnām /
mahojjvaladvīpanivāsinīnāṃ
dhruvādilokācalavāsinīnām

samudrajādivyaguṇatrayāṇā-
madivyavaimānikajauṣadhīnām /
jālaṃdharīṇāṃ ca samudrakanyā-
barhiṣmatījāsutalasthitānām

tathāpsaraḥsarvaphaṇīndrajānā-
māsāṃ ca yūthāvrajavāsinīnām /
samāyayuḥ śrīgirirājapārśvaṃ
svalaṃkṛtāḥ pāṇibalipradīpāḥ

gopāśca vṛddhāḥ śiśavo yuvānaḥ
pītāmbaroṣṇīṣakabarhamaṃḍitāḥ /
śrīhāraguṃjāvanamālikābhī
rejuḥ sametā navayaṣṭiveṇubhiḥ

śrutvotsavaṃ śailavarasya manmukhā-
d‌gaṅgādharo baddhakapardamaṃḍalaḥ/
kapālabhṛnnasthijabhasmarūṣitaḥ
sarpālimālāvalayairvibhūṣitaḥ

dhattūrabhaṃgāviṣapānavihvalo
himādriputrīsahito gaṇāvṛtaḥ /
āruhya nandīśvaramādivāhanaṃ
samāyayau śrīgirirājamaṇḍalam

rājarṣiviprarṣisurarṣayaśca
siddheśayogeśvarahaṃsamukhyāḥ /
ājagmurārād‌giridarśanārthaṃ
sahasraśo vipragaṇā sametāḥ

govardhano rat‍naśilāmayo'bhū-
tsuvarṇaśṛṅgaiḥ paritaḥ sphurad‌bhiḥ /
mattālibhirnirjharasundarībhi-
rdarībhiruccāṃgakarīva rājan

tadaiva śailāḥ kila mūrtimaṃtaḥ
sopāyanā meruhimācalādyāḥ /
nemurgiriṃ maṃgalapāṇayastaṃ
govardhanaṃ rūpadharaṃ girīndrāḥ

dvijaiśca govardhanadevapūjanaṃ
kṛtvā'cyutoktaṃ dvijavahnigodhanam /
sampūjya dhṛtvā sudhanaṃ mahādhanaṃ
baliṃ dadau śrīgiraye vrajeśvaraḥ

nandopanandairvṛṣabhānubhiśca
gopīgaṇairgopagaṇaiḥ praharṣitaḥ /
gāyad‌bhirānartanavādyatatparai-
ścakāra kṛṣṇo'drivarapradakṣiṇām

deveṣu varṣatsu ca puṣpavarṣaṃ
janeṣu varṣatsu ca lājasaṅgham /
reje mahārāja ivādhvare janai-
rgovardhano nāma girīndrarājarāṭ

kṛṣṇo'pi sākṣād‌vrajaśailamadhyā-
ddhṛtvā'tidīrghaṃ kila cānyarūpam /
śailo'smi lokāniti bhāṣayansan
jaghāsa sarvaṃ kṛtamannakūṭam

gopālagopīgaṇavṛndamukhyā
ūcuḥ svayaṃ vīkṣya gireḥ prabhāvam /
dātuṃ varaṃ tatra samudyataṃ taṃ
suvismitā harṣitamānasāste

jñāto'si gopairgirirājadevaḥ
pradarśito nandasutena sākṣāt /
no godhanaṃ vā kila bandhuvaryo
vṛddhiṃ samāyātu dine dine kau

tathā'stu coktvā girirājarājo
govardhano divyavapurdadhānaḥ /
kirīṭakeyūramanoharāṅgaḥ
kṣaṇena tatrāntaradhīyatārāt

nandopanandā vṛṣabhānavaśca
balaḥ sucandro vṛṣabhānurājaḥ /
śrīnandarājaśca hariśca gopā
gopyaśca sarvā nijagodhanaiśca

dvijāśca yogeśvarasiddhasaṅghāḥ
śivādayaścānyajanāśca sarve /
natvā'tha sampūjya giriṃ prasannāḥ
svaṃ svaṃ gṛhaṃ jagmuranicchayā ca

śrīkṛṣṇacandrasya paraṃ caritraṃ
girīndrarājasya mahotsavaṃ ca /
mayā tavāgre kathitaṃ vicitraṃ
nṝṇāṃ mahāpāpaharaṃ pavitram

iti śrīgargasaṃhitāyāṃ śrīgirirājakhaṇḍe śrīnāradabahulāśvasaṃvāde
girirājamahotsavavarṇanaṃ nāma dvitīyo'dhyāyaḥ

hariḥ ॐ tatsacchrīkṛṣṇārpaṇamastu //
vargaḥ :garga saṃhitā