Garga Samhita · Chapter 2.19

rāsakrīḍā varṇanam -
bahulāśva uvāca -
rādhāyai darśanaṃ dattvā kṛtvā premaparīkṣaṇam /
agre cakāra kāṃ līlāṃ bhagavānātmalīlayā

śrīnārada uvāca -
mādhavo mādhave māsi mādhavībhiḥ samākule /
vṛṃdāvane samārebhe rāsaṃ rāseśvaraḥ svayam

vaiśākhamāsi paṃcamyāṃ jāte candrodaye śubhe /
yamunopavane reme rāseśvaryā manoharaḥ

purā maithila golokād bhūmiryā kau samāgatā /
sarvā babhūva sauvarṇapadmarāgamayī tvaram

vṛndāvanaṃ divyavapuḥ dadhat kāmadughairdrumaiḥ /
mādhavībhirlatābhiśca prākṣipannandanandanam /
rat‍nasopānasaṃpannā sphuratsauvarṇatolikā /
rarāja yamunā rājan haṃsapadmādisaṃkulā

rat‍nadhātumayaḥ śrīmad‌rat‍naśṛṅgasphuraddyutiḥ /
sapakṣigaṇasaṃyukto latāpuṣpamanoharaḥ

nirjharaiḥ sundarībhiśca darībhirbhramarīvṛtaḥ /
reje govardhano nāma girirājaḥ karīndravat

sarve nikuṃjāḥ parito rejurdivyavapurdharāḥ /
sabhāmaṇḍapavīthībhiḥ prāṃgaṇastaṃbhapaṃktibhiḥ

patatpatākairdivyābhaiḥ sauvarṇaiḥ kalaśairnṛpa /
svetāruṇaiḥ puṣpadalaiḥ puṣpamandiravartibhiḥ

vasantamādhuryadharāḥ kūjatkokilasārasāḥ /
pārāvatairmayūraiśca yatra tatra nikūjitāḥ

rādhākṛṣṇakathāṃ puṇyāṃ gāyamānairmadhuvrataiḥ /
patad‌bhirmadhumattaiśca kuṃjāḥ sarve virājitāḥ

puline śītalo vāyuḥ mandagāmī vahatyalam /
sahasradalapadmānāṃ rajo vikṣepayanmuhuḥ

kāścid‌golokavāsinyaḥ kāścicchayyopakārikāḥ /
śṛṅgāraprakarāḥ kāścitkāścitvai dvārapālikāḥ

pārṣadākhyāḥ sakhijanāḥ chatracāmarapāṇayaḥ /
puṣpābharaṇakāriṇyaḥ śrīvṛndāvanapālikāḥ

govardhananivāsinyaḥ kāścitkuṃjavidhāyikāḥ /
tannikuṃjanivāsinyo nartakyo vādyatatparāḥ

sarvā vai candravadanāḥ kiśoravayasā nṛpa /
āsāṃ dvādaśayūthāścā jagmuḥ śrīkṛṣṇasannidhim

tathaiva yamunā sākṣād‌yūthībhūtvā samāyayau /
śvetāmbarā śvetavarṇā muktābharaṇabhūṣitā

tathā''yayau kṛṣṇapat‍nī nāmnā yā madhumādhavī /
padmavarṇā puṣpabhūṣā yūthībhūtvā śubhāṃbarā

tathaiva virajā sākṣād‌yūthībhūtvā samāyayau /
harid‌vastrā gauravarṇā rat‍nālaṃkārabhūṣitā

lalitāyā viśākhāyā māyāyūthaḥ samāyayau /
evaṃ svaṣṭasakhīnāṃ ca sakhīnāṃ kila ṣoḍaśa

dvātriṃśacca sakhīnāṃ ca yūthā sarve samāyayuḥ /
rarāja bhagavān rājan strīgaṇai rāsamaṇḍale

vṛndāvane yathā''kāśe caṃdrastārāgaṇairyathā /
pītavāsaḥparikaro naṭaveṣo manoharaḥ

vetrabhūd‌vādayan vaṃśīṃ gopīnāṃ prītimāvahan /
mayūrapakṣabhṛnmaulī sragvī kuṇḍalamaṇḍitaḥ

rādhayā śuśubhe rāse yathā ratyā ratīśvaraḥ /
evaṃ gāyan hariḥ sākṣātsundarīgaṇasaṃvṛtaḥ

yamunāpulinaṃ puṇyamāyayau rādhayā yutaḥ /
gṛhītvā hastapādena padmābhaṃ svapriyākaram

niṣasāda hariḥ kṛṣṇātīre nīramanohare /
punarjalpan sumadhuraṃ paśyan vṛndāvanaṃ priyam

calan hasan rādhikayā kuṃjaṃ kuṃjaṃ cacāra ha /
kuṃje nilīyamānaṃ taṃ tvaraṃ tyaktvā priyākaram

vilokya śākhāntaritaṃ rādhā jagrāha mādhavam /
rādhā dudrāva taddhastājjhaṃkāraṃ kurvatī pade

nilīyamānā kuṃjeṣu paśyato mādhavasya ca /
dhāvan harirgato yāvattāvad‌rādhā tato gatā

vṛkṣapārśve hastamātrāditaścetaśca dhāvatī /
tamālo hemavallyeva ghanaścaṃcalayā yathā

hemakhanyeva nīlādrī reje rādhikayā hariḥ /
rādhayā viśvamohinyā babhau madanamohanaḥ

vṛndāvane rāsaraṃge ratyeva madano yathā /
dhṛtvā rūpāṇi tāvanti yāvanti vrajayoṣitaḥ

nanarta rāsaraṃge'sau raṃgabhūmyāṃ naṭo yathā /
gāyantyaścāpi nṛtyantyaḥ sarvā gopyo manoharāḥ

virejuḥ kṛṣṇacandraiśca yathā śakraiḥ surāṃganāḥ /
vārāṃ vihāraṃ kṛṣṇāyāṃ cakāra madhusūdanaḥ

sarvairgopīgaṇaiḥ sārdhaṃ yakṣībhiryakṣarāḍiva /
kabarīkeśapāśābhyāṃ prasūnaiḥ pracyutaiḥ śubhaiḥ /
citravarṇairbabhau kṛṣṇo yathoṣṇiṅ‌mudritā tathā

mṛdaṃgatālairmadhuradhvanisvanai-
rjaguryaśastā madhusūdanasya /
prāpurmudaṃ pūrṇamanorathāścala-
tprasūnahārā hariṇā gatavyathāḥ

śrīhastasaṃtāḍitavāribiṃdubhiḥ
sphārāsamasphūrjitaśīkaradyubhiḥ /
vṛndāvaneśo vrajasuṃdarībhī
reje gajībhirgajarāḍiva svayam

vidyādharyo devagaṃdharvapat‍nyaḥ
paśyantyastā rāsaraṃgaṃ divisthāḥ /
devaiḥ sārdhaṃ cakrire puṣpavarṣaṃ
mohaṃ prāptāḥ praślathad‌vastranīvyaḥ

iti śrīgargasaṃhitāyāṃ vṛndāvanakhaṇḍe
rāsakrīḍāvarṇanaṃ nāmaikonaviṃśo'dhyāyaḥ