Garga Samhita · Chapter 10.62

aśvamedhakhaṇḍaḥ - dviṣaṣṭitamo'dhyāyaḥ
sumerusaṃpūrti -
garga uvāca -
tapaḥ kṛtaṃ purā yena durjjaraṃ pūrvajanmani /
iha loke ca tasyāśu gurorbhaktirhi jāyate

guroḥ sevāṃ na kurute svaguruṃ yo na manyate /
yaḥ samarthaśca patati kuṃbhīpāke ca sarvadā

gurorabhaktaṃ pragataṃ dṛṣṭvā goghno bhavennaraḥ /
snātvā gaṃgāṃ ca yamunāṃ tadā bhavati nirmalaḥ

dravyalābhastu śiṣyasya bhavedvai yatra yatra ca /
daśāṃśaṃ ca gurostasmingṛhadravye tathā hi naḥ

taṃ bhuṃjati balācchiṣyo na dāsyati guruṃ pṛthak /
sa mahārauravaṃ yāti hīnaḥ sarvasukhairiha

harau kurvanti ye nityaṃ bhaktiṃ ca navalakṣaṇam /
saṃsārasāgaraṃ rājaṃste taraṃti sukhena vai

jñātiṃ vidyāṃ mahattvaṃ ca rūpaṃ yauvanameva ca /
yat‍nena parivarjeta paṃcaite bhaktikaṃṭakāḥ

bhaktyā kṛṣṇasya rājendra prasādaṃ caraṇodakam /
ye gṛhṇanti bhaveyurbhūpāvanā nātra saṃśayaḥ

gaṃgā pāpaṃ śaśī tāpaṃ dainyaṃ kalpatarurharet /
pāpaṃ tāpaṃ tathā dainyaṃ sadyaḥ sādhusamāgamaḥ

tāvad‌bhramanti saṃsāre pitaraḥ piṃḍatatparāḥ /
yāvad‌vaṃśe sutaḥ kṛṣṇabhaktiyukto na jāyate

sa kiṃ guruḥ sa kiṃ tātaḥ sa kiṃ putra sa kiṃ sakhā /
sa kiṃ rājā sa kiṃ baṃdhurna dadyādyo harau matim

vidyādhanāgārakalābhimānino
rūpādidārāsutanityabuddhayaḥ /
dṛṣṭvānyadevānphalakāminaśca
jīvanmṛtāste na bhajanti keśavam

hayamedhacaritrasya sumeruḥ kathito mayā /
vyāsaḥ kṛṣṇacaritraiśca tavāgre nṛpasattama

yasya śravaṇamātreṇa kṛṣṇabhaktirbhaviṣyati /
narāṇāṃ nṛpaśārdūla śokamohabhayāpahā

anena caritenāpi labhate vāṃchitaṃ phalam /
dhanaṃ dhānyaṃ sutaṃ bhaktiṃ tathā śatrukṣayaṃ naraḥ

tasmād‌bhajāśu rājendra śrīkṛṣṇaṃ jagadīśvaram /
bhaktyā gṛhe vā vipine jñātvā viśvaṃ manomayam

āyuste naravīra vardhatu sadā hemaṃtarātriryathā
lokānāṃ priyadarśano bhava sadā hemaṃtasūryo yathā /
śatrūṇāmatiduḥsaho bhava sadā hemaṃtatoyaṃ yathā
nāśaṃ yāṃtu tavārayo'pi satataṃ hemaṃtapadmaṃ yathā

sūta uvāca -
iti śrutvā vajranābhirharṣitaḥ premavihvalaḥ /
smarankṛṣṇasya māhātmyaṃ natvā gurumathābravīt

dhanyo'haṃ ca kṛtārtho'haṃ bhavatā karuṇātmanā /
śrutvā kṛṣṇasya māhātmyaṃ lagnaṃ kṛṣṇe ca no manaḥ

sūta uvāca -
ityuktvā pūjayāmāsa gargācāryaṃ nṛpottamaḥ /
gandhākṣataiḥ puṣpahāraistathā jālakamālayā

gajai rathaisturaṃgaiśca śibikābhiśca maṃdiraiḥ /
raupyāṇāṃ caiva bhāraiśca svarṇabhāraiśca śaunaka

tathā rat‍naiśca grāmaiśca hyātmanā harṣapūritaḥ /
pradakṣiṇāpraṇāmaiśca tathā nīrājanādibhiḥ

tataśca garga utthāya dattvā vajrāya cāśiṣam /
bhūpena vaṃditaḥ so'pi yayau dakṣiṇayā yutaḥ

sa gatvā yamunātīre tīrthe viśrāṃtisaṃjñake /
māthurebhyaśca viprebhyo muniḥ sarvaṃ dhanaṃ dadau

gargavākyāttato vajro mathurāyāṃ munīśvaraiḥ /
cakāra hayamedhaṃ vai yathā nāgapureśvaraḥ

tataḥ sa mathurāyāṃ ca dīrghaviṣṇuṃ ca keśavam /
vṛndāvane ca goviṃdaṃ haridevaṃ girīśvare

gokule gokuleśaṃ ca gokulādyojane balam /
sthāpayāmāsa vajrastu hareśca pratimāśca ṣaṭ

balasya pratimāścānyāḥ pañca vai vrajamaṇḍale /
nṛṇāṃ śubhāya vajrastu sthāpayāmāsa harṣitaḥ

abdāścatuḥsahasrāṇi kalau pañca śatāni ca /
gate girivare hi śrīnāthaḥ prādurbhaviṣyati

taṃ pūjayiṣyati vraje viṣṇusvāmī ravestanuḥ /
vallabhādyāśca tacchiṣyāścānye gokulasvāminaḥ

śrīmad‌bhāgavatānmuktiṃ dṛṣṭvā vajraḥ parīkṣitaḥ /
vairāgyeṇāpi munayo rājyaṃ tyaktuṃ mano dadhe

tadāyayau caupagavirnaranārāyaṇāśramāt /
pādukāṃ mastake bibhratkṛṣṇacandrasya vaiṣṇavaḥ

bhūpena vaṃditaḥ so'pi pratyutthānāsanādibhiḥ /
kathayāmāsa vajrāgre śrīmad‌bhāgavataṃ mudā

śrutvoddhavād‌bhāgavataṃ vajraḥ provāca harṣitaḥ /
śrutā mayā purā tāta susabhāyāṃ parīkṣitaḥ

samādhibhāṣā vyāsasya śukadevena varṇitā /
punastvayāpi kathitā kṛtārtho'haṃ babhūva ha

ityuktvā vajranābhistu svarājyaṃ pratibāhave /
dattvā jagāma golokaṃ vimānenāpi coddhavaḥ

cakāra rājyaṃ dharmeṇa mathurāyāṃ ca dakṣiṇe /
pratibāhuḥ sutastasya cottare janamejayaḥ

agre kaliyugo brahmannāgamiṣyati dāruṇaḥ /
paraṃtu caikaṃ nirvāhaṃ dṛśyate pāpanāśanam

yāvad‌bhāgavataṃ śāstraṃ yāvad‌gokulasvāminaḥ /
yāvad‌govardhano gaṃgā tāvatkaliyugaṃ na hi

bhāratānāṃ ca khaṇḍānāṃ jaṃbūdvīpe yathā mune /
madhye saṃrājate meruḥ sauvarṇaḥ padmapuṣpavat

tathā golokakhaṇḍānāṃ saṃhitāyāṃ mahāmune /
hayamedhacaritrasya madhye merurvirājate

asya śravaṇamātreṇa viprahā gurutalpagaḥ /
strīrājapitṛgohantā mucyate sarvapātakaiḥ

viprastu labhate vidyāṃ rājyaṃ rājanya eva ca /
śravaṇācca dhanaṃ vaiśyo dharmaṃ śūdrastathaiva ca

nadīṣu ca yathā gaṃgā deveṣu bhagavānyathā /
tīrtheṣu vai rīrtharāja iyaṃ vai saṃhitāsu ca

asyāḥ śravaṇamātreṇa tṛptiṃ yāti narotamaḥ /
na sajjetānyaśāstreṣu yathā bhāgavatānmune

tasmād‌bhajata pādābjaṃ śrīkṛṣṇasya mahātmanaḥ /
kalyāṇārthaṃ ca munayo bhaktaduḥkhaharasya ca

śrīgarga uvāca -
iti śrutvā śaunakādyā munayaścaritaṃ hareḥ /
ślāghāṃ vai sūtaputrasya cakrurharṣitamānasāḥ

saṃsārasāgare magnaṃ dīnaṃ māṃ karuṇānidhe /
kālagrahagṛhītāṃgaṃ trāhi viṣṇo namo'stu te

anugṛhṇīṣva naḥ sādho tvaṃ hyanāthasya vallabhaḥ /
trailokyasyābhayaṃ dadyādyathā svāmī tathā kuru

śrīguroḥ kṛpayā hi śrīmadanamohanasevayā /
babhūva vāṅ‌mama harestasyā caritamīritam

vālmīkyādyāśca vyāsādyā laghūktāṃ kavitāṃ mama /
paśyantu dṛṣṭvā yūyaṃ cāparādhaṃ kṣaṃtumarhatha

śrīmādhavaṃ vrajapatiṃ navameghagātraṃ
rādhāpatiṃ surapatiṃ muralīdharañca /
bhaktārtihañca paramārthamanantadevaṃ
kṛṣṇaṃ namāmi śirasā manasā ca bhaktyā

ṣaḍ‌viṃśacca śatā rāmā trisaptāśītisupriyāḥ /
ślokāścaritramerorvai śrīkṛṣṇasya mahātmanaḥ

iti śrīmad‌gargasaṃhitāyāmaśvamedhakhaṇḍesumerusaṃpūrtirnāma dviṣaṣṭitamo'dhyāyaḥ

aśvamedhakhaṇḍaḥ samāptaḥ
samāpto'yaṃ graṃthaḥ
hariḥ ॐ tatsat śrīkṛṣṇārpaṇamastu //
vargaḥ :garga saṃhitā