gaṅgāṣṭakam · Chapter 1

śrīgaṇeśāya namaḥ //
katyakṣīṇi karoṭayaḥ kati kati dvīpidvipānāṃ tvacaḥ
kākolāḥ kati pannagāḥ kati sudhādhāmnaśca khaṇḍā kati /
kiṃ ca tvaṃ ca kati trilokajananitvadvāripūrodare
majjajjantukadambakaṃ samudayatyekaikamādāya yat

devi tvatpulināṅgaṇe sthitijuṣāṃ nirmānināṃ jñānināṃ
svalpāhāranibaddhaśuddhavapuṣāṃ tārṇaṃ gṛhaṃ śreyase /
nānyatra kṣitimaṇḍaleśvaraśataiḥ saṃrakṣito bhūpateḥ
prāsādo lalanāgaṇairadhigato bhogīndrabhogonnataḥ

tattattīrthagataiḥ kadarthanaśataiḥ kiṃ tairanarthāśritai-
rjyotiṣṭomamukhaiḥ kimīśavimukhairyajñairavajñāddatai /
sūte keśavavāsavādivibudhāgārābhirāmāṃ śriyaṃ gaṅge
devi bhavattaṭe yadi kuṭīvāsaḥ prayāsaṃ vinā

gaṅgātīramupetya śītalaśilāmālambya hemācalīṃ
yairākarṇi kutūhalākulatayā kallolakolāhalaḥ /
te śṛṇvanti suparvaparvataśilāsiṃhāsanādhyāsanāḥ
saṅgītāgamaśuddhasiddharamaṇīmañjīradhīradhvanim

dūraṃ gaccha sakacchagaṃ ca bhavato nālokayāmo
mukhaṃ re pārāka varāka sākamitarairnākapradairgamyatām /
sadyaḥ prodyatamandamārutarajaḥprāptā kapolasthale
gaṅgāmbhaḥkaṇikā vimuktagaṇikāsaṅgāya sambhāvyate

viṣṇoḥ saṅgatikāriṇī harajaṭājūṭāṭavīcāriṇī
prāyaścittanivāriṇī jalakaṇaiḥ puṇyaudhavistāriṇī /
bhūbhṛtkandaradāriṇī nijajale majjajjanottāriṇī
śreyaḥ svargavihāriṇī vijayate gaṅgā manohāriṇī

vācālaṃ vikalaṃ khalaṃ śritamalaṃ kāmākulaṃ vyākulaṃ
cāṇḍālaṃ taralaṃ nipītagaralaṃ doṣāvilaṃ cākhilam /
kumbhīpākagataṃ tamantakakarādākṛṣya kastārayen-
mātarjahnunarendranandini tava svalpodabinduṃ vinā

śleṣamaśleṣaṇayānale'mṛtabile śākākule vyākule
kaṇṭhe ghargharaghoṣanādamaline kāye ca sammīlati /
yāṃ dhyāyannpi bhārabhaṅguratarāṃ prāpnoti muktiṃ naraḥ
snātuśvetasi jāhnvī nivasatāṃ saṃsārasantāpahṛt

iti śrīmatkālidāsaviracitaṃ gaṅgāṣṭakastotraṃ sampūrṇam //
namaste'stu gaṅge tvadaṅgaprasaṅgādbhujaṃ gāsturaṅgāḥ kuraṅgāḥ plavaṅgāḥ /
anaṅgāriraṅgāḥ sasaṅgāḥ śivāṅgā bhujaṅgādhipāṅgīkṛtāṅgā bhavanti

namo jahnukanye na manye tvadanyairnisargenducihnādibhirlokabhartuḥ /
ato'haṃ nato'haṃ sato gauratoye vasiṣṭhādibhirgīyamānābhidheye

tvadāmajjanātsajjano durjano vā vimānaiḥ samānaḥ samānairhi mānaiḥ /
samāyāti tasminpurārātiloke puradvārasaṃruddhadikpālaloke

svarāvāsadambholidambhopi rambhāparīrambhasambhāvanādhīracetāḥ /
samākāṅkṣate tvattaṭe vṛkṣavāṭīkuṭīre vasannetumāyurdināni

trilokasya bharturjaṭājūṭabandhātsvasīmāntabhāge manākpraskhalantaḥ /
bhavānyā ruṣā proḍhasāpantabhāvātkareṇāhatāstavattaraṅgā jayanti

jalonmajjadairāvatoddānakumbhasphuratpraskhalatsāndrasindūrarāge /
kkacitpadminīreṇubhaṅge prasaṅge manaḥ khelatāṃ jahnukanyātaraṅge

bhavattīravānīravātotthadhūlīlavasparśatastatkṣaṇaṃ kṣīṇapāpaḥ /
jano'yaṃ jagatpāvane tvatprasādātpade pauruhūte'pi dhatte'vahelām

trisandhyānamallekhakoṭīranānāvidhānekaratnāṃśubimbaprabhābhiḥ /
sphuratpādapīṭhe haṭhenāṣṭamūrterjaṭāajūṭavāse natāḥ smaḥ padaṃ te

idaṃ yaḥ paṭhedaṣṭakaṃ jahnuputryāsrikālaṃ kṛtaṃ kālidāsena ramyam /
samāyāsyatīndrādibhirgīyamānaṃ padaṃ kaiśavaṃ śaiśavaṃ no labhetsaḥ

iti śrīkālidāsakṛtaṃ gaṅgāṣṭakastotraṃ sampūrṇam //