ekākṣaropaniṣat · Chapter 1

ekākṣaropaniṣat
ekākṣarapadārūḍhaṃ sarvātmakamakhaṇḍitam / sarvavarjitacinmātraṃ tripānnārāyaṇaṃ bhaje // ॐ saha nāvavatu saha nau bhunaktu / saha vīryaṃ karavāvahai / tejasvināvadhītamastu mā vidviṣāvahai // ॐ śāntiḥ śāntiḥ śāntiḥ //
hariḥ ॐ
ekākṣaraṃ tvakṣare'trāsti some suṣumnāyāṃ ceha dṛḍhī sa ekaḥ /
tvaṃ viśvabhūrbhūtapatiḥ purāṇaḥ parjanya eko bhuvanasya goptā

viśve nimagnapadavīḥ kavīnāṃ tvaṃ jātavedo bhuvanasya nāthaḥ /
ajātamagre sa hiraṇyaretā yajñaistvamevaikavibhuḥ purāṇaḥ

prāṇaḥ prasūtirbhuvanasya yonirvyāptaṃ tvayā ekapadena viśvam /
tvaṃ viśvabhūryonipāraḥ svagarbhe kumāra eko viśikhaḥ sudhanvā

vitatya bāṇaṃ taruṇārkavarṇaṃ vyomāntare bhāsi hiraṇyagarbhaḥ /
bhāsā tvayā vyomni kṛtaḥ sutārkṣyastavaṃ vai kumārastvamariṣṭanemiḥ

tvaṃ vajrabhṛdbhūtapatistvameva kāmaḥ prajānāṃ nihito'si some /
svāhā svadhā yacca vaṣaṭ karoti rudraḥ paśūnāṃ guhayā nimagnaḥ

dhātā vidhātā pavanaḥ suparṇo viṣṇurvarāho rajanī rahaśca /
bhūtaṃ bhaviṣyatprabhavaḥ kriyāśca kālaḥ kramastvaṃ paramākṣaraṃ ca

ṛco yajūṃśi prasavanti vaktrātsāmāni samrāḍvasuvantarikṣam /
tvaṃ yajñanetā hutabhugvibhuśca rudrāstatha daityagaṇā vasuśca

sa eṣa devo'mbaragaśca cakre anye'bhyadhiṣṭheta tamo nirundhyaḥ /
hiraṇmayaṃ yasya vibhāti sarvaṃ vyomāntare raśmimivāṃśunābhiḥ

sa sarvavettā bhuvanasya goptā tābhiḥ prajānāṃ nihitā janānām /
protā tvamotā vicitiḥ kramāṇāṃ prajāpatiśchandamayo vigarbhaḥ

sāmaiścidanto virajaśca bāhūṃ hiraṇmayaṃ vedavidāṃ variṣṭham /
yamadhvare brahmavidaḥ stuvanti sāmairyajurbhiḥ kratubhistvameva

tvaṃ strī pumāṃstvaṃ ca kumāra ekastvaṃ vai kumārī hyatha bhūstvameva /
tvameva dhātā varuṇaśca rājā tvaṃ vatsaro'gnyaryama eva sarvam

mitraḥ suparṇaścandra indro rudrastvaṣṭā viṣṇuḥ savitā gopatistvam /
tvaṃ viṣṇurbhūtāni tu trāsi daityāṃstvayāvṛtaṃ jagadudbhavagarbhaḥ

tvaṃ bhūrbhuvaḥ svastvaṃ hi svayambhūratha viśvatomukhaḥ /
ya evaṃ nityaṃ vedayate guhāśayaṃ prabhuṃ purāṇaṃ sarvabhūtaṃ hiraṇmayam

hiraṇmayaṃ buddhimatāṃ parāṃ gatiṃ sa buddhimānbuddhimatītya tiṣṭhatītyupaniṣat //
ॐ saha nāvavatu saha nau bhunaktu /
saha vīryaṃ karavāvahai /
tejasvināvadhītamastu mā vidviṣāvahai //
ॐ śāntiḥ śāntiḥ śāntiḥ //
ityekākṣaropaniṣatsamāptā //
adhikādhyayanāya