durgāstutiḥ · Chapter 1

namāmi devīṃ kamalāyatākṣīṃ
surendrabṛndādi natāṃghriyugmām /
samunnatāśeṣasuraprapālinīṃ
namāmi durgāṃ duritāpahantrīm

kirīṭakoṭyullikhitābjapādāṃ
manojavāṃ tāṃ parameśabhāminīm /
śaśāṃkarekhānvitamastakāgrāṃ
sureśvarīṃ tāṃ praṇamāmi durgām

mūlaśrībhairavātmatrividhapadamahādevatābhiḥ parīte
divye siṃhāsanendre sthitamakhilakalābodhakaṃ deśikeśam /
tasyāṅke sanniṣaṇṇāmaruṇarucicayā rañjitāśāvakāśāṃ
devīmānandapūrṇāmamṛtakaratalāmāśraye'bhīṣṭasiddhyai

kalpāntānalakoṭikoṭisadṛśaṃ ghoraṃ triśūlāyudhaṃ
pāṇibhyāṃ parigṛhya pañcavadanaskandhe'dhiruhya sthitām /
viśvāsāvṛtavīraśaktivividhakrīḍāviśeṣāravaiḥ
tattatkṣudrasamastaśatrunivahāṃ vande mahāśūlinīm

bhāsākundaśaśāṅkaśaṃkhasadṛśāṃ kaṇṭhīravādhyāsinīṃ
kodāṇḍeṣukapālapustakajapasrak śūladānābhayām /
sarveśīṃ nikhilāghasaṃghaśamanīṃ bhaktānukampāparāṃ
devīṃ viśvamanorathaikavaradāṃ dhyāyetparāmambikām

meghaśyāmalakomalāṃ smitamukhīṃ siṃhāsanāṃ śāṅkarīṃ
cāpajyodgatavāruṇāstragalitairāpūritāśāṣṭakaiḥ /
toyairbhaktaviruddhasainikagaṇaṃ saṃstambhayantyanvahaṃ
viśvākāraniyāpanaṃ vidadhatīṃ dhyāyenmahāśūlinīm

āruhya siṃhamasikheṭarathāṅgaśaṃkha-
cāpeṣvabhītivaradāṅkuśapāśahastā /
pathyagratassakalavairimadāpahaya
gacchāniśaṃ vijayaśūlini viśvabhūtyai

viśvajyotiprakāśe vividhatanumaye viśvahṛtpadmavāse
viśvavyāpārabhedānuguṇavividhairviśvaśikṣaikadakṣe /
viśvadrohaṃ kṣamasvākhilavidhaduritaṃ nāśayatvāśu śaśvat
trāhi śrīśūlinīśe sahajakaruṇayā santataṃ sannidhehi