Devi Bhagavata Purana · Chapter 8.2

bhuvanakośaprasaṅge devyā manave varadānavarṇanam
śrīnārāyaṇa uvāca
evaṃ mīmāṃsatastasya padmayoneḥ parantapa /
manvādibhirmunivarairmarīcyādyaiḥ samantataḥ

dhyāyatastasya nāsāgrādvirañceḥ sahasānagha /
varāhapoto niragādekāṅgulapramāṇataḥ

tasyaiva paśyataḥ khasthaḥ kṣaṇena kila nārada /
karimātraṃ pravavṛdhe tadad‌bhūtatamaṃ hyabhūt

marīcimukhyairviprendraiḥ sanakādyaiśca nārada /
tad‌dṛṣṭvā saukaraṃ rūpaṃ tarkayāmāsa padmabhūḥ

kimetatsaukaravyājaṃ divyaṃ sattvamavasthitam /
atyāścaryamidaṃ jātaṃ nāsikāyā viniḥsṛtam

dṛṣṭo'ṅguṣṭhaśiromātraḥ kṣaṇācchailendrasannibhaḥ /
āhosvid‍bhagavānkiṃ vā yajño me khedayanmanaḥ

iti tarkayatastasya brahmaṇaḥ paramātmanaḥ /
varāharūpo bhagavāñjagarjācalasannibhaḥ

virañciṃ harṣayāmāsa saṃhatāṃśca dvijottamān /
svagarjaśabdamātreṇa dikprāntamanunādayan

te niśamya svakhedasya kṣayituṃ ghurdhurasvanam /
janastapaḥsatyalokavāsino'maravaryakāḥ

chandomayaiḥ stotravarairṛksāmātharvasambhavaiḥ /
vacobhiḥ puruṣaṃ tvādyaṃ dvijendrāḥ paryavākiran

teṣāṃ stotraṃ niśamyādyo bhagavān harirīśvaraḥ /
kṛpāvalokamātreṇānugahītvāpa āviśat

tasyāntarviśataḥ krūrasaṭāghātaprapīḍitaḥ /
samudro'thābravīddeva rakṣa māṃ śaraṇārtihan

ityākarṇya samudroktaṃ vacanaṃ harirīśvaraḥ /
vidārayañjalacarāñjagāmāntarjale vibhuḥ

itastato'bhidhāvansan vicinvanpṛthivīṃ dharām /
āghrāyāghrāya sarveśo dharāmāsādayacchanaiḥ

anarjalagatāṃ bhūmiṃ sarvasattvāśrayāṃ tadā /
bhūmiṃ sa devadeveśo daṃṣṭrayodājahāra tām

tāṃ samuddhṛtya daṃṣṭāgre yajñeśo yajñapūrūṣaḥ /
śuśubhe diggajo yadvaduddhṛtyātha supadmīnīm

taṃ dṛṣṭvā devadeveśo virañciḥ samanuḥ svarāṭ /
tuṣṭāva vāgbhirdeveśaṃ daṃṣṭroddhatavasundharam

brahmovāca
jitaṃ te puṇḍarīkākṣa bhaktānāmārtināśana /
kharvīkṛtasurādhāra sarvakāmaphalaprada

iyaṃ ca dharaṇī deva śobhate vasudhā tava /
padyinīva supatrāḍhyā mataṅgajakaroddhṛtā

idaṃ ca te śarīraṃ vai śobhate bhūmisaṅgamāt /
uddhṛtāmbujaśuṇḍāgrakarīndratanusannibham

namo namaste deveśa sṛṣṭisaṃhārakāraka /
dānavānāṃ vināśāya kṛtanānākṛte prabho

agrataśca namaste'stu pṛṣṭhataśca namo namaḥ /
sarvāmarādhārabhūta bṛhaddhāma namo'stu te

tvayāhaṃ ca prajāsarge niyukta: śaktibṛṃhitaḥ /
tvadājñāvaśataḥ sargaṃ karomi vikaromi ca

tvatsahāyena deveśā amarāśca purā hare /
sudhāṃ vibhejire sarve yathākālaṃ yathābalam

indrastrilokīsāmrājyaṃ labdhavāṃstannideśata: /
bhūnakti lakṣmīṃ bahulāṃ surasaṃghaprapūjita:

vahniḥ pāvakatāṃ labdhvā jāṭharādivibhedataḥ /
devāsuramanuṣyāṇāṃ karotyāpyāyanaṃ tathā

dharmarājo'tha pitṛṇāmadhipaḥ sarvakarmadṛka /
karmaṇāṃ phaladātāsau tvanniyogādadhīśvaraḥ

nairṛto rakṣasāmīśo yakṣo vighnavināśana: /
sarveṣāṃ prāṇināṃ karmasākṣī tvattaḥ prajāyate

varuṇo yādasāmīśo lokapālo jalādhipaḥ /
tvadājñābalamāśritya lokapālatvamāgataḥ

vāyurgandhavaha: sarvabhūtaprāṇanakāraṇam /
jātastava nideśena lokapālo jagad‌guruḥ

kuberaḥ kinnarādīnāṃ yakṣāṇāṃ jīvanāśrayaḥ /
tvadājñāntargataḥ sarvalokapeṣu ca mānyabhū

īśāna: sarvarudrāṇāmīśvarāntakaraḥ prabhūḥ /
jāto lokeśavandyo'sau sarvadevādhipālakaḥ

namastubhyaṃ bhagavate jagadīśāya kurmahe /
yasthāṃśabhāgāḥ sarve hi jātā devāḥ sahasraśaḥ

nārada uvāca
eva stuto viśvasṛjā bhagavānādipūruṣa: /
līlāvalokamātreṇāpyanugrahamavāsṛjat

tatraivābhyāgataṃ daityaṃ hiraṇyākṣaṃ mahāsuram /
rundhānamadhvano bhīmaṃ gadayātāḍayaddhari:

tad‌raktapaṅkadigdhāṅgo bhagavānādipūruṣaḥ /
uddhṛtya dharaṇīṃ devo daṃṣṭrayā līlayāpsu tām

niveśya lokanātheśo jagāma sthānamātmanaḥ /
etad‌bhagavataścitraṃ dharaṇyuddharaṇaṃ param

śṛṇūyādya: pumān yaśca paṭheccaritamuttamam /
sarvapāpavinirmukto vaiṣṇavīṃ gatimāpnuyāt

-
iti śrīmaddevībhāgavate mahāpurāṇeaṣṭādaśasāhasryāṃ
saṃhitāyāmaṣṭamaskandhe dharaṇyuddhāravarṇana nāma dvitīyo'dhyāyaḥ