Devi Bhagavata Purana · Chapter 8.19

atalavitalasutalalokavarṇanam
śrīnārāyaṇa uvāca
prathame vivare vipra atalākhye manorame /
mayaputro balo nāma vartate'kharvagarvakṛt

ṣaṇṇavatyo yena sṛṣṭā māyāḥ sarvārthasādhikāḥ /
māyāvino yāśca sadyo dhārayanti ca kāścana

jṛmbhamāṇasya yasyaiva balasya balaśālinaḥ /
strīgaṇā upapadyante trayolokavimohanāḥ

puṃścalyaścaiva svairiṇyaḥ kāminyaśceti viśrutāḥ /
yā vai bilāyanaṃ preṣṭhaṃ praviṣṭaṃ puruṣaṃ rahaḥ

rasena hāṭakākhyena sādhayitvā prayat‍nataḥ /
svavilāsāvalokānurāgasmitavigūhanaiḥ

saṃlāpavibhramādyaiśca ramayantyapi tāḥ striyaḥ /
yasminnupayukte jano manute bahudhā svayam

īśvaro'hamahaṃ siddho nāgāyutabalo mahān /
ātmānaṃ manyamānaḥ sanmadāndha iva kathyate

evaṃ proktā sthitiścātra atalasya ca nārada /
dvitīyavivarasyātra vitalasya nibodhata

bhūtalādhastale caiva vitale bhagavānbhavaḥ /
hāṭakeśvaranāmāyaṃ svapārṣadagaṇairvṛtaḥ

prajāpatikṛtasyāpi sargasya bṛṃhaṇāya ca /
bhavānyā mithunībhūya āste devādhipūjitaḥ

bhavayorvīryasambhūtā hāṭakī sariduttamā /
samiddho marutā vahnirojasā pibatīva hi

tanniṣṭhyūtaṃ hāṭakākhyaṃ suvarṇaṃ daityavallabham /
daityāṅganā bhūṣaṇārhaṃ sadā taṃ dhārayanti hi

tadbilādhastalātproktaṃ sutalākhyaṃ bileśvaram /
puṇyaśloko balirnāmā āste vairocanirmune

mahendrasya ca devasya cikīrṣuḥ priyamuttamam /
trivikramo'pi bhagavān sutale balimānayat

trailokyalakṣmīmākṣipya sthāpitaḥ kila daityarāṭ /
indrādiṣvapyalabdhā yā sā śrīstamanuvartate

tameva devadeveśamārādhayati bhaktitaḥ /
vyapetasādhvaso'dyāpi vartate sutalādhipaḥ

bhūmidānaphalaṃ hyetatpātrabhūte'khileśvare /
varṇayanti mahātmāno naitadyuktaṃ ca nārada

vāsudeve bhagavati puruṣārthaprade harau /
etaddānaphalaṃ vipra sarvathā nahi yujyate

yasyaiva devadevasya nāmāpi vivaśo gṛṇan /
svakīyakarmabandhīyaguṇānvidhunute'ñjasā

yatkleśabandhahānāya sāṃkhyayogādisādhanam /
kurvate yatayo nityaṃ bhagavatyakhileśvare

na cāyaṃ bhagavānasmānanujagrāha nārada /
māyāmayaṃ ca bhogānāmaiśvaryaṃ vyatanotparam

sarvakleśādhihetuṃ tadātmānusmṛtimoṣaṇam /
yaṃ sākṣād‍bhagavān viṣṇuḥ sarvopāyavidīśvaraḥ

yāñjāchalenāpahṛtaṃ sarvasvaṃ dehaśeṣakam /
aprāptānyopāya īśaḥ pāśairvāruṇasaṃbhavaiḥ

bandhayitvāvamucyāpi giridaryāmivābravīt /
asāvindro mahāmūḍho yasya mantrī bṛhaspatiḥ

prasannamimamatyarthamayācallokasampadam /
trailokyamidamaiśvaryaṃ kiyadevātitucchakam

āśiṣāṃ prabhavaṃ muktvā yo mūḍho lokasampadi /
asmatpitāmahaḥ śrīmān prahlādo bhagavatpriyaḥ

dāsyaṃ vavre vibhostasya sarvalokopakārakaḥ /
pitryamaiśvaryamatulaṃ dīyamānaṃ ca viṣṇunā

pitaryuparate vīre naivaicchad‍bhagavatpriyaḥ /
tasyātulānubhāvasya sarvalokopadhīmataḥ

asmadvidho nālpapakvetaradoṣo'vagacchati /
evaṃ daityapatiḥ so'yaṃ baliḥ paramapūjitaḥ

sutale vartate yasya dvārapālo hariḥ svayam /
ekadā digvijaye rājā rāvaṇo lokarāvaṇaḥ

praviśansutale yena bhaktānugrahakāriṇā /
pādāṅguṣṭhena prakṣipto yojanāyutamatra hi

evaṃbhūtānubhāvo'yaṃ baliḥ sarvasukhaikabhuk /
āste sutalarājastho devadevaprasādataḥ

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāmaṣṭamaskandhe
atalavitalasutalalokavarṇanaṃ nāmaikonaviṃśo'dhyāyaḥ