Devi Bhagavata Purana · Chapter 5.4

bhayāturendrādidevaiḥ suraguruṇā saha parāmarśavarṇanam
vyāsa uvāca
gate dūte surendro'pi samāhūya surānatha /
yamavāyudhanādhyakṣavaruṇānidamūcivān

mahiṣo nāma daityendro rambhaputro mahābalaḥ /
varadarpamadonmatto māyāśatavicakṣaṇaḥ

tasya dūto'dya samprāptaḥ preṣitastena bhoḥ surāḥ /
svargakāmena lubdhena māmuvācedṛśaṃ vacaḥ

tyaja devālayaṃ śakra yathecchaṃ vraja vāsava /
sevāṃ vā kuru daityasya mahiṣasya mahātmanaḥ

dayāvāndānavendro'sau sa te vṛttiṃ vidhāsyati /
nateṣu bhṛtyabhūteṣu na kupyati kadācana

nocedyuddhāya deveśa senodyogaṃ kuru svayam /
gate mayi sa daityendrastvaritaḥ samupeṣyati

ityuktvā sa gato dūto dānavasya durātmanaḥ /
kiṃ kartavyamataḥ kāryaṃ cintayadhvaṃ surottamāḥ

durbalo'pi na copekṣyaḥ śatrurbalavatā surāḥ /
viśeṣeṇa sadodyogī balavānbaladarpitaḥ

udyamaḥ kila kartavyo yathābuddhi yathābalam /
daivādhīno bhavennūnaṃ jayo vātha parājayaḥ

sandhiyogo na cātrāsti khale sandhirnirarthakaḥ /
sarvathā sādhubhiḥ kāryaṃ vicārya ca punaḥ punaḥ

yānamapyadhunā naiva kartavyaṃ sahasā punaḥ /
prekṣakāḥ preṣaṇīyāśca śīghragāḥ supraveśakāḥ

iṅ‌gitajñāśca niḥsaṅgā niḥspṛhāḥ satyavādinaḥ /
senābhiyogaṃ prasthānaṃ balasaṃkhyāṃ yathārthataḥ

vīrāṇāṃ ca parijñānaṃ kṛtvāyāntu tvarānvitāḥ /
jñātvā daityapatestasya sainyasya ca balābalam

kariṣyāmi tatastūrṇaṃ yānaṃ vā durgasaṃgraham /
vicārya khalu kartavyaṃ kāryaṃ buddhimatā sadā /
sahasā vihitaṃ kāryaṃ duḥkhadaṃ sarvathā bhavet

tasmādvimṛśya kartavyaṃ sukhadaṃ sarvathā budhaiḥ /
nātra bhedavidhirnyāyyo dānaveṣu ca sarvathā

ekacitteṣu kārye'smiṃstasmāccārā vrajantu vai /
jñātvā balābalaṃ teṣāṃ paścānnītirvicārya ca

vidheyā vidhivattajjñaisteṣu kāryapareṣu ca /
anyathā vihitaṃ kāryaṃ viparītaphalapradam

sarvathā tad‌bhavennūnamajñātamauṣadhaṃ yathā /
vyāsa uvāca
iti sañcintya taiḥ sarvaiḥ praṇidhiṃ kāryavedinam

preṣayāmāsa devendraḥ parijñānāya pārthiva /
dūtastu tvarito gatvā samāgamya surādhipam

nivedayāmāsa tadā sarvasainyabalābalam /
jñātvā tad‌balamudyogaṃ turāṣāḍativismitaḥ

devānacodayattūrṇaṃ samāhūya purohitam /
mantraṃ mantravidāṃ śreṣṭhaṃ cakāra tridaśeśvaraḥ

uvācāṅ‌girasaśreṣṭhaṃ samāsīnaṃ varāsane /
indra uvāca
bho bho devaguro vidvankiṃ kartavyaṃ vadasva naḥ

sarvajño'si samutpanne kārye tvaṃ gatiradya naḥ /
dānavo mahiṣo nāma mahāvīryo madānvitaḥ

yoddhukāmaḥ samāyāti bahubhirdānavairvṛtaḥ /
tatra pratikriyā kāryā tvayā mantravidādhunā

teṣāṃ śukrastathā tvaṃ me vighnahartā susaṃyataḥ /
vyāsa uvāca
tacchrutvā vacanaṃ prāha turāsāhaṃ bṛhaspatiḥ

vicintya manasā kāmaṃ kāryasādhanatatparaḥ /
gururuvāca
svastho bhava surendra tvaṃ dhairyamālambya māriṣa

vyasane ca samutpanne na tyājyaṃ dhairyamāśu vai /
jayājayau surādhyakṣa daivādhīnau sadaiva hi

sthātavyaṃ dhairyamālambya tasmād‌ buddhimatā sadā /
bhavitavyaṃ bhavatyeva jānanneva śatakrato

udyamaḥ sarvathā kāryo yathāpauruṣamātmanaḥ /
munayo'pi hi muktyarthamudyamaikaratāḥ sadā

daivādhīnaṃ ca jānanto yogadhyānaparāyaṇāḥ /
tasmātsadaiva kartavyo vyavahāroditodyamaḥ

sukhaṃ bhavatu vā mā vā daive kā paridevanā /
vinā puruṣakāreṇa kadācitsiddhimāpnuyāt

andhavatpaṅguvatkāmaṃ na tathā mudamāvahet /
kṛte puruṣakāre'pi yadi siddhirna jāyate

na tatra dūṣaṇaṃ tasya daivādhīne śarīriṇi /
kāryasiddhirna sainye'sti na mantre na ca mantraṇe

na rathe nāyudhe nūnaṃ daivādhīnā surādhipa /
balavāñkleśamāpnoti nirbalaḥ sukhamaśnute

buddhimānkṣudhitaḥ śete nirbuddhirbhogavānbhavet /
kātaro jayamāpnoti śūro yāti parājayam

daivādhīne tu saṃsāre kāmaṃ kā paridevanā /
udyame yojayennūnaṃ bhavitavyaṃ surādhipa

duḥkhade sukhade vāpi tatra tau na vicintayet /
duḥkhe duḥkhādhikānpaśyetsukhe paśyetsukhādhikam

ātmānaṃ harṣaśokābhyāṃ śatrubhyāmiva nārpayet /
dhairyamevāvagantavyaṃ harṣaśokod‌bhave budhaiḥ

adhairyādyādṛśaṃ duḥkhaṃ na tu dhairye'sti tādṛśam /
durlabhaṃ sahanatvaṃ vai samaye sukhaduḥkhayoḥ

harṣaśokod‌bhavo yatra na bhaved‌ buddhiniścayāt /
kiṃ duḥkhaṃ kasya vā duḥkhaṃ nirguṇo'haṃ sadāvyayaḥ

caturviṃśātirikto'smi kiṃ me duḥkhaṃ sukhaṃ ca kim /
prāṇasya kṣutpipāse dve manasaḥ śokamūrchane

jarāmṛtyū śarīrasya ṣaḍūrmirahitaḥ śivaḥ /
śokamohau śarīrasya gaṇau kiṃ me'tra cintane

śarīraṃ nāhamathavā tatsambandhī na cāpyaham /
saptaikaṣoḍaśādibhyo vibhinno'haṃ sadā sukhī

prakṛtirvikṛtirnāhaṃ kiṃ me duḥkhaṃ sadā punaḥ /
iti matvā sureśa tvaṃ manasā bhava nirmamaḥ

upāyaḥ prathamo'yaṃ te duḥkhanāśe śatakrato /
mamatā paramaṃ duḥkhaṃ nirmamatvaṃ paraṃ sukham

santoṣādaparaṃ nāsti sukhasthānaṃ śacīpate /
athavā yadi na jñānaṃ mamatvanāśane kila

tato vivekaḥ kartavyo bhavitavye surādhipa /
prārabdhakarmaṇāṃ nāśo nābhogāllakṣyate kila

yad‌bhāvi tad‌bhavatyeva kā cintā sukhaduḥkhayoḥ /
suraiḥ sarvaiḥ sahāyairvā buddhyā vā tava sattama

sukhaṃ kṣayāya puṇyasya duḥkhaṃ pāpasya māriṣa /
tasmātsukhakṣaye harṣaḥ kartavyaḥ sarvathā budhaiḥ

athavā mantrayitvādya kuru yat‍naṃ yathāvidhi /
kṛte yat‍ne mahārāja bhavitavyaṃ bhaviṣyati

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ pañcamaskandhe
bhayāturendrādidevaiḥ suraguruṇā saha parāmarśavarṇanaṃ nāma caturtho'dhyāyaḥ