Devi Bhagavata Purana · Chapter 3.3

vimānasthairharādibhirdevīdarśanam
brahmovāca
vimānaṃ tanmanovegaṃ yatra sthānāntare gatam /
na jalaṃ tatra paśyāmo vismitāḥ smo vayaṃ tadā

vṛkṣāḥ sarvaphalā ramyāḥ kokilārāvamaṇḍitāḥ /
mahī mahīdharāḥ kāmaṃ vanānyupavanāni ca

nāryaśca puruṣāścaiva paśavaśca saridvarāḥ /
vāpyaḥ kūpāstaḍāgāśca palvalāni ca nirjharāḥ

purato nagaraṃ ramyaṃ divyaprākāramaṇḍitam /
yajñaśālāsamāyuktaṃ nānāharmyavirājitam

pratyabhijñā tadā jātāpyasmākaṃ prekṣya tatpuram /
svargo'yamiti kenāsau nirmitosti tadād‌bhutam

rājānaṃ devasaṅkāśaṃ vrajantaṃ mṛgayāṃ vane /
asmābhiḥ saṃsthitā dṛṣṭā vimānopari cāmbikā

kṣaṇāccacāla gagane vimānaṃ pavaneritam /
muhūrtādvā tataḥ prāptaṃ deśe cānye manohare

nandanaṃ ca vanaṃ tatra dṛṣṭamasmābhiruttamam /
pārijātatarucchāyāsaṃśritā surabhiḥ sthitā

caturdanto gajastasyāḥ samīpe samavasthitaḥ /
apsarasāṃ tatra vṛndāni menakāprabhṛtīni ca

krīḍanti vividhairbhāvairgānanṛtyasamanvitaiḥ /
gandharvāḥ śataśastatra yakṣā vidyādharāstathā

mandāravāṭikāmadhye gāyanti ca ramanti ca
dṛṣṭaḥ śatakratustatra paulomyā sahitaḥ prabhuḥ

vayaṃ tu vismitāścāsma dṛṣṭvā traiviṣṭapaṃ tadā /
yādaḥpatiṃ kuberaṃ ca yamaṃ sūryaṃ vibhāvasum

vilokya vismitāścāsma vayaṃ tatra surānsthitān /
tadā vinirgato rājā purāttasmātsumaṇḍitāt

devarāja ivākṣobhyo naravāhyāvanau sthitaḥ /
vimānasthā vayaṃ tacca cacāla tarasāgatam

brahmalokaṃ tadā divyaṃ sarvadevanamaskṛtam /
tatra brahmāṇamālokya vismitau harakeśavau

sabhāyāṃ tatra vedāśca sarve sāṅgāḥ svarūpiṇaḥ /
sāgarāḥ saritaścaiva parvatāḥ pannagoragāḥ

māmūcatuścaturvaktraḥ ko'yaṃ brahmā sanātanaḥ /
tāvavocamahaṃ naiva jāne sṛṣṭipatiṃ patim

ko'haṃ ko'yaṃ kimarthaṃ vā bhramo'yaṃ mama ceśvarau /
kṣaṇādatha vimānaṃ taccacālāśu manojavam

kailāsaśikhare prāptaṃ ramye yakṣagaṇānvite /
mandāravāṭikāramye kīrakokilakūjite

vīṇāmurajavādyaiśca nādite sukhade śive /
yadā prāptaṃ vimānaṃ tattadaiva sadanācchubhāt

nirgato bhagavāñchambhurvṛṣārūḍhastrilocanaḥ /
pañcānano daśabhujaḥ kṛtasomārdhaśekharaḥ

vyāghracarmaparīdhāno gajacarmottarīyakaḥ /
pārṣṇirakṣau mahāvīrau gajānanaṣaḍānanau

śivena saha putrau dvau vrajamānau virejatuḥ /
nandiprabhṛtayaḥ sarve gaṇapāśca varāśca te

jayaśabdaṃ prayuñjānā vrajanti śivapṛṣṭhagāḥ /
taṃ vīkṣya śaṅkaraṃ cānyaṃ vismitāstatra nārada

mātṛbhiḥ saṃśayāviṣṭastatrāhaṃ nyavasaṃ mune /
kṣaṇāttasmād‌gireḥ śṛṅgādvimānaṃ vātaraṃhasā

vaikuṇṭhasadanaṃ prāptaṃ ramāramaṇamandiram /
asambhāvyā vibhūtiśca tatra dṛṣṭā mayā suta

visiṣmiye tadā viṣṇurdṛṣṭvā tatpuramuttamam /
sadanāgre yayau tāvaddhariḥ kamalalocanaḥ

atasīkusumābhāsaḥ pītavāsāścaturbhujaḥ /
dvijarājādhirūḍhaśca divyābharaṇabhūṣitaḥ

vījyamānastadā lakṣmyā kāminyā cāmaraiḥ śubhaiḥ /
taṃ vīkṣya vismitāḥ sarve vayaṃ viṣṇuṃ sanātanam

parasparaṃ nirīkṣantaḥ sthitāstasmin varāsane /
tataścacāla tarasā vimānaṃ vātaraṃhasā

sudhāsamudraḥ samprāptau miṣṭavārimahormimān /
yādogaṇasamākīrṇaścaladvīcivirājitaḥ

mandārapārijātādyaiḥ pādapairatiśobhitaḥ /
nānāstaraṇasaṃyukto nānācitravicitritaḥ

muktādāmaparikliṣṭo nānādāmavirājitaḥ /
aśokabakulākhyaiśca vṛkṣaiḥ kurubakādibhiḥ

saṃvṛtaḥ sarvataḥ sau‌myaiḥ ketakīcampakairvṛtaḥ /
kokilārāvasaṅghuṣṭo divyagandhasamanvitaḥ

dvirephātiraṇatkārairañjitaḥ paramād‌bhutaḥ /
tasmindvīpe śivākāraḥ paryaṅkaḥ sumanoharaḥ

rat‍nālikhacito'tyarthaṃ nānārat‍navirājitaḥ /
dṛṣṭo'smābhirvimānasthairdūrataḥ parimaṇḍitaḥ

nānāstaraṇasaṃchanna indracāpasamanvitaḥ /
paryaṅkapravare tasminnupaviṣṭā varāṅganā

raktamālyāmbaradharā raktagandhānulepanā /
suraktanayanā kāntā vidyutkoṭisamaprabhā

sucāruvadanā raktadantacchadavirājitā /
ramākoṭyadhikā kāntyā sūryabimbanibhākhilā

varapāśāṅkuśābhīṣṭadharā śrībhuvaneśvarī /
adṛṣṭapūrvā dṛṣṭā sā sundarī smitabhūṣaṇā

hrīṅkārajapaniṣṭhaistu pakṣivṛndairniṣevitā /
aruṇā karuṇāmūrtiḥ kumārī navayauvanā

sarvaśṛṅgāraveṣāḍhyā mandasmitamukhāmbujā /
udyatpīnakucadvandvanirjitāmbhojakuḍ‌malā

nānāmaṇigaṇākīrṇabhūṣaṇairupaśobhitā /
kanakāṅgadakeyūrakirīṭapariśobhitā

kanakacchrīcakratāṭaṅkaviṭaṅkavadanāmbujā /
hṛllekhā bhuvaneśīti nāmajāpaparāyaṇaiḥ

sakhīvṛndaiḥ stutā nityaṃ bhuvaneśī maheśvarī /
hṛllekhādyābhiramarakanyābhiḥ pariveṣṭitā

anaṅgakusumādyābhirdevībhiḥ pariveṣṭitā /
devī ṣaṭ‌koṇamadhyasthā yantrarājopari sthitā

dṛṣṭvā tāṃ vismitāḥ sarve vayaṃ tatra sthitā'bhavan /
keyaṃ kāntā ca kiṃ nāma na jānīmo'tra saṃsthitāḥ

sahasranayanā rāmā sahasrakarasaṃyutā /
sahasravadanā ramyā bhāti dūrādasaṃśayam

nāpsarā nāpi gandharvī neyaṃ devāṅganā kila /
iti saṃśayamāpannāstatra nārada saṃsthitāḥ

tadā'sau bhagavānviṣṇurdṛṣṭvā tāṃ cāruhāsinīm /
uvācāmbāṃ svavijñānātkṛtvā manasi niścayam

eṣā bhagavatī devī sarveṣāṃ kāraṇaṃ hi naḥ /
mahāvidyā mahāmāyā pūrṇā prakṛtiravyayā

durjñeyā'lpadhiyāṃ devī yogagamyā durāśayā /
icchā parātmanaḥ kāmaṃ nityānityasvarūpiṇī

durārādhyā'lpabhāgyaiśca devī viśveśvarī śivā /
vedagarbhā viśālākṣī sarveṣāmādirīśvarī

eṣā saṃhṛtya sakalaṃ viśvaṃ krīḍati saṃkṣaye /
liṅgāni sarvajīvānāṃ svaśarīre niveśya ca

sarvabījamayī hyeṣā rājate sāmprataṃ surau /
vibhūtayaḥ sthitāḥ pārśve paśyatāṃ koṭiśaḥ kramāt

divyābharaṇabhūṣāḍhyā divyagandhānulepanāḥ /
paricaryāparāḥ sarvāḥ paśyatāṃ brahmaśaṅkarau

dhanyā vayaṃ mahābhāgāḥ kṛtakṛtyāḥ sma sāmpratam /
yadatra darśanaṃ prāptaṃ bhagavatyāḥ svayaṃ tvidam

tapastaptaṃ purā yat‍nāttasyedaṃ phalamuttamam /
anyathā darśanaṃ kutra bhavedasmākamādarāt

paśyanti puṇyapuñjā ye ye vadānyāstapasvinaḥ /
rāgiṇo naiva paśyanti devīṃ bhagavatīṃ śivām

mūlaprakṛtirevaiṣā sadā puruṣasaṅgatā /
brahmāṇḍaṃ darśayatyeṣā kṛtvā vai paramātmane

draṣṭā'sau dṛśyamakhilaṃ brahmāṇḍaṃ devatāḥ surau /
tasyaiṣā kāraṇaṃ sarvā māyā sarveśvarī śivā

kvāhaṃ vā kva surāḥ sarve rambhādyāḥ surayoṣitaḥ /
lakṣāṃśena tulāmasyā na bhavāmaḥ kathañcana

saiṣā varāṅganā nāma yā vai dṛṣṭā mahārṇave /
bālabhāve mahādevī dolayantīva māṃ mudā

śayanaṃ vaṭapatre ca paryaṅke susthire dṛḍhe /
pādāṅguṣṭhaṃ kare kṛtvā niveśya mukhapaṅkaje

lelihantañca krīḍantamanekaibālaceṣṭitaiḥ /
ramamāṇaṃ komalāṅgaṃ vaṭapatrapuṭe sthitam

gāyantī dolayantī ca bālabhāvānmayi sthite /
seyaṃ suniścitaṃ jñātaṃ jātaṃ me darśanādiva

kāmaṃ no jananī saiṣā śṛṇu taṃ pravadāmyaham /
anubhūtaṃ mayā pūrvaṃ pratyabhijñā samutthitā

iti śrīdevībhāgavate mahāpurāṇe'ṣṭādaśasāhasryāṃ saṃhitāyāṃ
tṛtīyaskandhe vimānasthairharādibhirdevīdarśanaṃ nāma tṛtīyo'dhyāyaḥ