Scripture Library

Devi Bhagavata Purana · Chapter 11.20

11.20.1

brahmayajñādikīrtanam
śrīnārāyaṇa uvāca
trirācamya dvijaḥ pūrvaṃ dvirmārjanamathācaret /
upaspṛśetsavyapāṇiṃ pādau ca prokṣayettataḥ

11.20.2

śirasi cakṣuṣi tathā nāsāyāṃ śrotradeśake /
hṛdaye ca tathā maulau prokṣaṇaṃ samyagācaret

11.20.3

deśakālau samuccārya brahmayajñamathācaret /
dvau darbhau dakṣiṇe haste vāme trīnāsane sakṛt

11.20.4

upavīte śikhāyāṃ ca pādamūle sakṛtsakṛt /
vimuktaye sarvapāpakṣayārthaṃ caivameva hi

11.20.5

sūtroktadevatāprītyai brahmayajñaṃ karomyaham /
gāyatrīṃ trirjapetpūrvaṃ cāgnimīḻe tataḥ param

11.20.6

yadaṅ‌geti tataḥ procya agnirvai iti kīrtayet /
atha mahāvrataṃ caiva panthā etacca kīrtayet

11.20.7

athātaḥ saṃhitāyāśca vidā maghavadityapi /
mahāvratasyeti tathā iṣe tvorje itīva hi

11.20.8

agna āyāhi cetyevaṃ śanto devīritīti ca /
atha tasya samāmnāyo vṛddhirādaijitīva hi

11.20.9

atha śikṣāṃ pravakṣyāmi pañcasaṃvatsareti ca /
mayarasatajabhanetyeva gaurgmā ityeva kīrtayet

11.20.10

athāto dharmajijñāsā athāto brahma ityapi /
tacchaṃyoriti ca procya brahmaṇe nama ityapi

11.20.11

tarpaṇaṃ caiva devānāṃ tataḥ kuryātpradakṣiṇam /
prajāpatiśca brahmā ca vedā devāstatharṣayaḥ

11.20.12

sarvāṇi caiva chandāṃsi tathoṅ‌kārastathaiva ca /
vaṣaṭkāro vyāhṛtayaḥ sāvitrī ca tataḥ param

11.20.13

gāyatrī caiva yajñāśca dyāvāpṛthivī ityapi /
antarikṣaṃ tvahorātrāṇi ca sāṃkhyā ataḥ param

11.20.14

siddhāḥ samudrā nadyaśca girayaśca tataḥ param /
kṣetrauṣadhivanaspatyo gandharvāpsarasastathā

11.20.15

nāgā vayāṃsi gāvaśca sādhyā viprāstathaiva ca /
yakṣā rakṣāṃsi bhūtānītyevamantāni kīrtayet

11.20.16

atho nivītī bhūtvā ca ṛṣīnsantarpayedapi /
śatarcino mādhyamāśca gṛtsamadastathaiva ca

11.20.17

viśvāmitro vāmadevo'trirbharadvāja eva ca /
vasiṣṭhaśca pragāthaśca pāvamānyastataḥ param

11.20.18

kṣudrasūktā mahāsūktāḥ sanakaśca sanandanaḥ /
sanātanastathaivātra sanatkumāra eva ca

11.20.19

kapilāsurināmānau vohaliḥ pañcaśīrṣakaḥ /
prācīnāvītinā tacca kartavyamatha tarpaṇam

11.20.20

sumanturjaiminirvaiśampāyanaḥ pailasūtrayuk /
bhāṣyabhāratapūrvaṃ ca mahābhārata ityapi

11.20.21

dharmācāryā ime sarve tṛpyantviti ca kīrtayet /
jānanti bāhavigārgyagautamāścaiva śākalaḥ

11.20.22

bābhravyamāṇḍavyayutomāṇḍūkeyastataḥ param /
gārgī vācaknavī caiva vaḍavā prātitheyikā

11.20.23

sulabhāyuktamaitreyī kaholaśca tataḥ param /
kauṣītakaṃ mahākauṣītakaṃ vai tarpayettataḥ

11.20.24

bhāradvājaṃ ca paiṅ‌gyaṃ ca mahāpaiṅ‌gyaṃ suyajñakam /
sāṃkhyāyanamaitareyaṃ mahaitareyameva ca

11.20.25

bāṣkalaṃ śākalaṃ caiva sujātavaktrameva ca /
audavāhiṃ ca saujāmiṃ śaunakaṃ cāśvalāyanam

11.20.26

ye cānye sarva ācāryāste sarve tṛptimāpnuyuḥ /
ye ke cāsmatkule jātā aputrā gotriṇo mṛtāḥ

11.20.27

te gṛhṇantu mayā dattaṃ vastraniṣpīḍanodakam /
evaṃ te brahmayajñasya vidhirukto mahāmune

11.20.28

yaścāyaṃ kurute brahmayajñasya vidhimuttamam /
sarvavedāṅ‌gapāṭhasya phalamāpnoti sādhakaḥ

11.20.29

vaiśvadevaṃ tataḥ kuryānnityaśrāddhaṃ tathaiva ca /
atithibhyo'nnadānaṃ ca nityameva samācaret

11.20.30

gogrāsaṃ ca tato dattvā bhuñjīta brāhmaṇaiḥ saha /
ahnastu pañcame bhāge prakuryādetaduttamam

11.20.31

itihāsapurāṇādyaiḥ ṣaṣṭhasaptamakau nayet /
aṣṭame lokayātrā tu bahiḥ sandhyāṃ tataḥ punaḥ

11.20.32

atha sāyantanīṃ sandhyāṃ pravakṣyāmi mahāmune /
yadanuṣṭhānamātreṇa mahāmāyā prasīdati

11.20.33

ācamya prāṇānāyamya sādhakaḥ sthiramānasaḥ /
baddhapadmāsano yogī sāyaṃkāle sthiro bhavet

11.20.34

śrutismṛtyādikarmādau sagarbhaḥ prāṇasaṃyamaḥ /
agarbho dhyānamātraṃ tu sa cāmantraḥ prakīrtitaḥ

11.20.35

bhūtaśuddhyādikaṃ kṛtvā nānyathā karma kīrtitam /
salakṣo devatāṃ dhyātvā pūrakumbhakarecakaiḥ

11.20.36

dhyānaṃ prakuryātsandhyāyāṃ sāyaṃkāle vicakṣaṇaḥ /
vṛddhāṃ sarasvatīṃ devīṃ kṛṣṇāṅ‌gīṃ kṛṣṇavāsasam

11.20.37

śaṅ‌khacakragadāpadmahastāṃ garuḍavāhanām /
nānārat‍nalasad‍bhūṣāṃ kvaṇanmañjīramekhalām

11.20.38

anarghyarat‍namukuṭāṃ tārahārāvalīyutām /
tāṭaṅ‌kabaddhamāṇikyakāntiśobhikapolakām

11.20.39

pītāmbaradharāṃ devīṃ saccidānandarūpiṇīm /
sāmavedena sahitāṃ saṃyutāṃ sattvavartmanā

11.20.40

vyavasthitāṃ ca svarloke ādityapayhagāminīm /
āvāhayāmyahaṃ devīmāyāntīṃ sūryamaṇḍalāt

11.20.41

evaṃ dhyātvā ca tāṃ devīṃ sandhyāsaṅ‌kalpamācaret /
āpo hi ṣṭheti mantreṇa agniśceti tathaiva ca

11.20.42

vidadhyādācamanakaṃ śeṣaṃ pūrvavadīritam /
gāyatrīmantramukccārya śrīnārāyaṇaprītaye

11.20.43

arghyaṃ dadyācca sūryāya sādhakaḥ śuddhamānasaḥ /
ubhau pādau samau kṛtvā haste dhūtvā jalāñjalim

11.20.44

devaṃ dhyātvā maṇḍalasthaṃ kṣipedarghyaṃ tataḥ kramāt /
arghyaṃ dadyāttu yo nīre mūḍhātmā jñānavarjitaḥ

11.20.45

ullaṅghya smṛtimantrāṃśca prāyaścittī bhaved‌dvijaḥ /
tataḥ sūryamupasthāyāpyasāvādityamantrataḥ

11.20.46

gāyatryāśca japaṃ kuryādupaviśya tato bṛsīm /
sahasraṃ vā tadardhaṃ vā śrīdevīdhyānapūrvakam

11.20.47

yathā prātaḥ punastadvadupasthānādikaṃ caret /
sāyaṃ sandhyātarpaṇe ca krameṇa parikīrtayet

11.20.48

vasiṣṭho ṛṣirevātra sarasvatyāḥ prakīrtitaḥ /
devatā viṣṇurūpā sā chandaścaiva sarasvatī

11.20.49

sāyaṃkālīnasandhyāyāstarpaṇe viniyogakaḥ /
svarityuktvā ca puruṣaṃ sāmavedaṃ tathaiva ca

11.20.50

maṇḍalaṃ ceti samprocya hiraṇyagarbhakaṃ tathā /
tathaiva paramātmānaṃ tato'pi ca sarasvatīm

11.20.51

vedamātaramevātra saṅ‌kṛtiṃ tadvadeva ca /
sandhyāṃ vṛddhāṃ tathā viṣṇurūpiṇīmuṣasīṃ tathā

11.20.52

nirmṛjīṃ ca tathā sarvasiddhīnāṃ kāriṇīṃ tathā /
sarvamantrādhipatikāṃ bhūrbhuvaḥ svaśca pūruṣam

11.20.53

ityevaṃ tarpaṇaṃ kāryaṃ sandhyāyāḥ śrutisammatam /
sāyaṃ sandhyāvidhānaṃ ca kathitaṃ pāpanāśanam

11.20.54

sarvaduḥkhaharaṃ vyādhināśakaṃ mokṣadaṃ tathā /
sadācāreṣu sandhyāyāḥ prādhānyaṃ munipuṅ‌gava /
sandhyācaraṇato devī bhaktābhīṣṭaṃ prayacchati

11.20.20

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ
ekādaśaskandhe brahmayajñādikīrtanaṃ nāma viṃśo'dhyāyaḥ

Original text: devībhāgavatapurāṇam · Sanskrit Wikisource contributors · Sanskrit Wikisource · CC BY-SA 4.0