Devi Bhagavata Purana · Chapter 10.8

manūtpattivarṇanam
śaunaka uvāca
ādyo manvantaraḥ prokto bhavatā cāyamuttamaḥ /
anyeṣāmud‍bhavaṃ brūhi manūnāṃ divyatejasām

sūta uvāca
evamādyasya cotpattiṃ śrutvā svāyambhuvasya hi /
anyeṣāṃ kramaśasteṣāṃ sambhūtiṃ paripṛcchati

nāradaḥ paramo jñānī devītattvārthakovidaḥ /
nārada uvāca
manūnāṃ me samākhyāhi sūtpattiṃ ca sanātana

śrīnārāyaṇa uvāca
prathamo'yaṃ manuḥ svāyambhuva ukto mahāmune /
devyārādhanato yena prāptaṃ rājyamakaṇṭakam

priyavratottānapādau manuputrau mahaujasau /
rājyapālanakartārau vikhyātau vasudhātale

dvitīyaśca manuḥ svārociṣa ukto manīṣibhiḥ /
priyavratasutaḥ śrīmānaprameyaparākramaḥ

sa svārociṣanāmāpi kālindīkūlato manuḥ /
nivāsaṃ kalpayāmāsa sarvasattvapriyaṅ‌karaḥ

jīrṇapatrāśano bhūtvā tapaḥ kartumanuvrataḥ /
devyā mūrtiṃ mṛṇmayīṃ ca pūjayāmāsa bhaktitaḥ

evaṃ dvādaśa varṣāṇi vanasthasya tapasyataḥ /
devī prādurabhūttāta sahasrārkasamadyutiḥ

tataḥ prasannā deveśī stavarājena suvratā /
dadau svārociṣāyaiva sarvamanvantarāśrayam

ādhipatyaṃ jagaddhātrī tāriṇīti prathāmagāt /
evaṃ svārociṣamanustāriṇyārādhanāttataḥ

ādhipatyaṃ ca lebhe sa sarvārātivivarjitam /
dharmaṃ saṃsthāpya vidhivad‌rājyaṃ putraiḥ samaṃ vibhuḥ

bhuktvā jagāma svarlokaṃ nijamanvantarāśrayāt /
tṛtīya uttamo nāma priyavratasuto manuḥ

gaṅ‌gākūle tapastaptvā vāgbhavaṃ sañjapan rahaḥ /
varṣāṇi trīṇyupavasan devyanugrahamāviśat

stutvā devīṃ stotravarairbhaktibhāvitamānasaḥ /
rājyaṃ niṣkaṇṭakaṃ lebhe santatiṃ cirakālikīm

rājyotthānyāni saukhyāni bhuktvā dharmānyugasya ca /
so'pyājagāma padavīṃ rājarṣivarabhāvitām

caturthastāmaso nāma priyavratasuto manuḥ /
narmadādakṣiṇe kūle samārādhya jaganmayīm

maheśvarīṃ kāmarājakūṭajāpaparāyaṇaḥ /
vāsante śārade kāle navarātrasaparyayā

toṣayāmāsa deveśīṃ jalajākṣīmanūpamām /
tasyāḥ prasādamāsādya natvā stotrairanuttamaiḥ

akaṇṭakaṃ mahad‌rājyaṃ bubhuje gatasādhvasaḥ /
putrānvaloddhatāñchūrāndaśa vīryaniketanān

utpādya nijabhāryāyāṃ jagāmāmbaramuttamam /
pañcamo manurākhyāto raivatastāmasānujaḥ

kālindīkūlamāśritya jajāpa kāmasaṃjñakam /
bījaṃ paramavāgdarpadāyakaṃ sādhakāśrayam

etadārādhanādāpa svārājyarddhimanuttamām /
balamaprahataṃ loke sarvasiddhividhāyakam

santatiṃ cirakālīnāṃ putrapautramayīṃ śubhām /
dharmānvyasya vyavasthāpya viṣayānupabhujya ca /
jagāmāpratimaḥ śūro mahendrālayamuttamam

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ daśamaskandhe manūtpattivarṇanaṃ nāmāṣṭamo'dhyāyaḥ