daśaślokī · Chapter 1

// atha daśaślokī //
na bhūmirna toyaṃ na tejo na vāyuḥ
na khaṃ nendriyaṃ vā na teṣāṃ samūhaḥ /
anekāntikatvāt suṣuptyekasiddaḥ
tadeko'vaśiṣṭaḥ śivaḥ kevalo'ham

na varṇā na varṇāśramācāradharmā
na me dhāraṇādhyānayogādayopi /
anātmāśrayāhaṃmamādhyāsahānāt
tadeko'vaśiṣṭaḥ śivaḥ kevalo'ham

na mātā pitā vā na devā na lokā
na vedā na yajñā na tīrtha bruvanti /
suṣaptau nirastātiśūnyātmakatvāt
tadeko'vaśiṣṭaḥ śivaḥ kevalo'ham

na sākhyaṃ na śaivaṃ na tatpāñcarātraṃ
na jainaṃ na mīmāṃsakādermataṃ vā /
viśiṣṭānubhūtyā viśuddhātmakatvāt
tadeko'vaśiṣṭaḥ śivaḥ kevalo'ham

na cordhva na cādho na cāntarna bāhyaṃ
na madhyaṃ na tiryaṃ na pūrvā'parā dik /
viyadvyāpakatvādakhaṇḍaikarūpaḥ
tadeko'vaśiṣṭaḥ śivaḥ kevalo'ham

na śuklaṃ na kṛṣṇaṃ na raktaṃ na pītaṃ
na kubjaṃ na pīnaṃ na hrasvaṃ na dīrgham /
arūpaṃ tathā jyotirākārakatvāt
tadeko'vaśiṣṭaḥ śivaḥ kevalo'ham

na śāstā na śāstraṃ na śiṣyo na śikṣā
na ca tvaṃ na cāhaṃ na cāyaṃ prapañcaḥ /
svarūpāvabodho vikalpāsahiṣṇuḥ
tadeko'vaśiṣṭaḥ śivaḥ kevalo'ham

na jāgran na me svapnako vā suṣuptiḥ
na viśvau na vā taijasaḥ prājñako vā /
avidyātmakatvāt trayāṇaṃ turīyaḥ
tadeko'vaśiṣṭaḥ śivaḥ kevalo'ham

api vyāpakatvāt hitatvaprayogāt
svataḥ siddhabhāvādananyāśrayatvāt /
jagat tucchametat samastaṃ tadanyat
tadeko'vaśiṣṭaḥ śivaḥ kevalo'ham

na caikaṃ tadanyad dvitīyaṃ kutaḥ syāt
na kevalatvaṃ na cā'kevalatvam /
na śūnyaṃ na cāśūnyamadvaitakatvāt
kathaṃ sarvavedāntasiddhaṃ bravīmi

// iti śrīmad śaṃkarācāryaviracitaṃ daśaślokī samāptaṃ //