cidambaraṃ śrīnaṭarājastutī · Chapter 1

cidambaraṃ śrīnaṭarājastutī //
namaste rūdra manyava utota iṣave namaḥ /
namaste astu dhanvane karābhyāṃ te namo namaḥ

yāte rudra śivā tanūḥ śāntā tasyai namo namaḥ /
namo'stu nīlagrīvāya sahasrākṣāya te namaḥ

sahasrapāṇaye tubhyaṃ mīḍhuṣṭamāya te namaḥ /
kapardine namastubhyaṃ kālarūpāya te namaḥ

namaste cāttaśastrāya namaste śūlapāṇaye /
hiraṇyapāṇaye tubhyaṃ hiraṇyapataye namaḥ

namaste vṛkṣarūpāya harikeśāya te namaḥ /
paśūnāṃ pataye tubhyaṃ pathīnāṃ pataye namaḥ

puṣṭānāṃ pataye tubhyaṃ kṣetrāṇāṃ pataye namaḥ /
ātatāvisvarūpāya vanānāṃ pataye namaḥ

rohitāya stapataye vṛkṣāṇāṃ pataye namaḥ /
namaste mantriṇe sākṣāt kakṣāṇāṃ pataye namaḥ

oṣadhīnāṃ ca pataye namaḥ sākṣātparātmane /
uccairghoṣāya devāya pattīnāṃ pataye namaḥ

satvānāṃ pataye tubhyaṃ ghanānāṃ pataye namaḥ /
sahamānāya śāntāya śaṅkarāya namo namaḥ

ādhīnāṃ pataye tubhyaṃ vyādhīnaṃ pataye namaḥ /
kakubhāya namastubhyaṃ namaste'stu niṣaṅgiṇe

stenānāṃ pataye tubhyaṃ dhanānāṃ pataye namaḥ /
taskarāṇāṃ namastubhyaṃ pataye pāpahāriṇe

vañcate parivañcate stāyūnāṃ pataye namaḥ /
namo nicerave tubhyaṃ araṇyānāṃ pataye namaḥ

uṣṇīṣiṇe namastubhyaṃ namaste paramātmane /
vistṛtāya namastubhyaṃ āsīnāya namonamaḥ

śayanāya namstubhyaṃ suṣuptāya namo namaḥ /
prabuddhāya namastubhyaṃ sthirāya paramātmane

sabhārūpāya te nityaṃ sabhāyāḥ pataye namaḥ /
namaḥ śivāya sāmbāya brahmaṇe sarvasākṣiṇe

// iti sūtasaṃhitāyāṃ muktikāṇḍe sabhāpatistutiḥ sampūrṇam //