Brihat Parashara Hora Shastra · Chapter 20

atha bhāgyabhāvaphalādhyāyaḥ

āyurbhāvaphalaṃ cā'tha kathayāmi dvijottama/
āyuḥsthānādhipaḥ kendre dīrghamāyuḥ prayacchati

āyusthānādhipaḥ pāpaiḥ saha tatraiva saṃsthitaḥ/
karotyalpāyuṣaṃ jātaṃ lagneśo'pyatra saṃsthitaḥ

evaṃ hi śaninā cintā kāryā tarkairvicakṣaṇaiḥ/
karmādhipena ca tathā cintanaṃ kāryamāyuṣaḥ

ṣaṣṭhe vyaye'pi ṣaṣṭheśo vyayādhīśo ripau vyaye/
lagne'ṣṭame sthito vā'pi dīrghamāyuḥ prayacchati

svasthāne svāṃśake vā'pi mitreśe mitramandire/
dīrghāyuṣaṃ karotyeva lagneśo'ṣṭamapaḥ punaḥ

lagnāṣṭamapakarmeśamandāḥ kendratrikoṇayoḥ/
lābhe vā saṃsthitāstadvad‌ diśeyurdīrghamāyuṣam‌

evaṃ bahuvidhā vidvannāyuryogāḥ prakīrtitāḥ/
eṣu yo balavāṃstasyā'nusārādāyurādiśet‌

aṣṭamādhipatau kendre lagneśe balavarjate/
viṃśadvarṣāṇyasau jīved‌ dvātriṃśatparamāyuṣam‌

randhreśe nīcarāśisthe randhre pāpagrahairyute/
lagneśe durbale janturalpāyurbhavati dhruvam‌

randhreśe pāpasaṃyukte randhre pāpagrahairyute/
vyaye krūragrahākrānte jātamātraṃ mṛtirbhavet‌

kendratrikoṇagāḥ pāpāḥ śubhāḥ ṣaṣṭhāṣṭagā yadi/
lagne nīcastharandhreśo jātaḥ sadyo mṛto bhavet‌

pañcame pāpasaṃyukte randhreśe pāpasaṃyute/
randhre pāpagrahairyukte svalpamāyuḥ prajāyate

randhreśe randhrarāśisthe candre pāpasamanvite/
śubhadṛṣṭivihīne ca māsānte ca mṛtirbhavet‌

lagneśe svoccarāśisthe candre lābhasamanvite/
randhrasthānagate jīve dīrghamāyurna saṃśayaḥ

lagneśo'tibalī dṛṣṭaḥ kendrasaṃsthaiḥ śubhagrahaiḥ/
dhanaiḥ sarvaguṇaiḥ sārdhaṃ dīrghamāyuḥ prayacchati