Brahmavaivarta Purana · Chapter 4.67

athā saptaṣaṣṭitamo'dhyāyaḥ
nārāyaṇa uvāca
virahavyākulāṃ dṛṣṭvā māminīṃ kāmamohanaḥ /
kṛtvā vakṣasi tāṃ kṛṣṇo yayau krīḍāsarovaram

rājarājeśvarī rādhā kṛṣṇavakṣasi rājate /
saudāminīva jalade nadīne gagane mune

reme sa ramayā sārdhaṃ kṛpayā ca kṛpānidhiḥ /
dvayordvayoryathā svarṇaṃmaṇyormārakato maṇiḥ

ratnanirmāṇaparyaṅke ratnendrasāranirmite /
natnapradīpe jvalati ratnabhūṣaṇabhūṣitaḥ

ratnabhūṣābhūṣitayā rāsaratnaśca kautukāt /
rasaratnākare ramye nimagno rasikeśvaraḥ

rāse rāseśvarī rādhā rāmeśvaramuvāca sā /
suratau viratau satyāṃ virate na manorathe

rādhikovāca
praphullā'haṃ tvayā nātha mṛtā mlānā ca tvāṃ vinā /
yathā mahauṣadhigaṇaḥ prabhāte bhāti bhāskare

naktaṃ dīpaśikhevāhaṃ tvayā sārdhaṃ tvayā vinā /
dine dine yathā kṣīṇā kṛṣṇapakṣe vidhoḥ kalā

tava vakṣasi me dīptiḥ pūrṇaṃcandraprabhāsamā /
sadyo mṛtā tvayā tyaktā kuhvāṃ candrakalā yathā

jvaladagniśikhevāhaṃ ghṛtāhutyā tvayā saha /
tvayā vinā'haṃ nirvāṇā śiśire padminī yathā

cintājvarajarāgrastā mattastvayi gate'pyaham /
astaṃgate ravau candre dhvāndagrastā dharā yathā

bhraṣṭo veṣastvāṃ vinā me rupayauvanacetanam /
tārāvalī paribhraṣṭā sūryasūtodaye yathā

tvamevā''tmā ca sarveṣāṃ mama nātho viśeṣataḥ /
tanuryathā''tmanā tyaktā tathā'haṃ ca tvayā vinā

pañcaprāṇātmakastvaṃ me mṛtā'haṃ ca tvayā vinā /
dṛṣṭeśca golakau jadvaddṛṣṭiḥ puttalikāṃ vinā

sthalaṃ yathā citrayuktaṃ tvayā sārdhamahaṃ tathā /
asaṃskṛtā tvayā hīnā tṛṇācchannā yathā mahī

tvayā sārdhamahaṃ kṛṣṇa citrayukteva mṛnmayī /
tvāṃ vinā jaladhautā'haṃ virūpā mṛnmayīva ca

gopāṅganānāṃ śobhā ca tvayā rāseśvareṇa ca /
hāre svarṇavikāre ca śvetena maṇinā saha

vrajarāja tvayā sārdha rājante rājarājayaḥ /
yathā candreṇa nabhasi tārārājirvirājate

tvayā śobhā yaśodāyā nandasya nandanandana /
yathā śākhāphalaskandhaistarurājirvirājate

tvayā kārdha gokuleśa sobhā gokulavāsinām /
yathā sarvā lokarājī rājendreṇa virājate

rāmasyāpi ca rāseśa tvayā śobhā manoharā /
rājate devarājena yathā svarge'marāvatī

vṛndāvanasya vṛkṣāṇāṃ tvaṃ ca śobhā patirgatiḥ /
anyoṣāṃ ca vanānāṃ ca balavānkesarī yathā

tvayā vinā yaśodā ya nimagnā śokasāgare /
aprāpya vatsaṃ murabhiḥ krośantī vyākulā yathā

āndolayanti nandasya prāṇā dagdhaṃ ca mānasam /
tvayā vinā taptapātre yathā dhānyasamūhakaḥ

ityuktvā paramapremṇā sā patantī hareḥ pade /
punarādhyātmikenaiva bodhayāmāsa tāṃ vibhuḥ

ādhyātmiko mahāyogī mohasaṃchedakāraṇam /
yathā parśuśca vṛkṣāṇāṃ tīkṣṇadhāraśca nārada

nārada uvāca
ādhyātmikaṃ mahāyogaṃ vada vedavidāṃ vara /
śokacchedaṃ ca lokānāṃ śrotuṃ kautuhalaṃ mama

nārāyaṇa uvāca
ādhyātmiko mahāyogo na jñāto yogināmavi /
sa ca nānāprakāraśca sarvaṃ vetti hariḥ svayam

kiṃcidādhyātmikaṃ caiva gonoke rādhikeśvaraḥ /
suprītaḥ kathāyāmāsa tripurāriṃ yathā mune

sahasrendranipātāntaṃ tapaḥ kurvantamīśvaram /
śreṣṭhaṃ jyeṣṭhaṃ vaiṣṇavānāṃ variṣṭhaṃ ca tapasvinām

puṣkare duṣkaraṃ taptvā pādme pādmaṃ ca padmajaḥ /
dṛṣṭvā taṃ sādaraṃ kṛṣṇa uvāca kiṃcidevatam

śatendrapātaparyantaṃ kaṭhoreṇa kṛśodaram /
niśceṣṭamasthisāraṃ ca kṛpayā ca kṛpānidhiḥ

siṃhakṣetre purā dharmaṃ mattātaṃ dharmiṇāṃ varam /
caturdaśendrāvacchinnaṃ tapastaptvā kṛśodaram

papāṭhā''yātmikaṃ kiṃcitkṛpayā ca kṛpānidhiḥ /
kicicchatendrāvacchinnaṃ māṃ tapantamuvāca saḥ

kiṃcitsanatkumāraṃ ca tapantaṃ suciraṃ param /
sutapantamanantaṃ ca kiṃciccovāca nārada

ciraṃ tapantaṃ kapilaṃ himaśaile tapasvinam /
puṣkare bhāskare kiṃcittapantaṃ duṣkaraṃ tapaḥ

uvāca kiṃcitprahlādaṃ kiṃciddurvāsasaṃ bhṛgum /
evaṃ nigūḍhaṃ bhaktaṃ ca kṛpyā bhaktavatsalaḥ

krīḍākanovare ramye yaduvāca kṛpānidhiḥ /
śokārtāṃ rādhikāṃ tacca kathāyāmi niśāmaya

virasaṃ rasikāṃ dṛṣṭvā vāsayitvā ca vakṣasi /
uvācā''dhyātmikaṃ kiṃcidyoginīṃ yogināṃ guruḥ

śrīkṛṣṇa uvāca
jātismare smarā''tmānaṃ kathaṃ vismarasi priye /
sarvaṃ golokavṛttāntaṃ sudāmnaḥ śāpameva ca

śāpātkiṃciddinaṃ dīne tvadvicchedo mayā saha /
bhaviṣyati mahābhāge melanaṃ punarāvayoḥ

punareva gamiṣyāmi golokaṃ taṃ nijālayam /
gatvā gopāṅganābhiśca gopairgolokavāsibhiḥ

adhunā''dhyātmikaṃ kiṃcittavāṃ vadāmi niśāmaya /
śokadhnaṃ harṣadaṃ sāraṃ sukhadaṃ mānasasya ca

ahaṃ sarvāntarātmā ca nirliptaḥ sarvakarmasu /
vidyamānaśca sarveṣu sarvatrādṛṣṭa eva ca

vāyuścarati sarvatra yathaiva sarvavastuṣu /
na ca liptastathaivāhaṃ sākṣī ca sarvakarmaṇām

jīvo matpratibimbaśca sarvatra sarvajīviṣu /
bhoktā śubhāśubhānāṃ ca kartā ca karmaṇāṃ sadā

yathā calaghaṭeṣveva maṇḍalaṃ candramuryayoḥ /
bhagneṣu teṣu saṃśliṣṭastayoreva tathā mayi

jīvaḥ śliṣṭastathā kāle mṛteṣu jīviṣu priye /
āvāṃ ca vidyamānau ca satataṃ sarvajantuṣu

ādhāraścāhamādheyaṃ kārya ca kāraṇaṃ vinā /
aye sarvāṇi dravyāṇi naśvarāṇi ca sundari

āvirbhāvādhikāḥ kutra kutracinnyūnameva ca /
mamāṃśāḥ ke'pi devāśca keciddevāḥkalāstathā

kecitkalāḥ kalāṃśāṃśāstadaṃśāṃśāśca kecana /
madaṃśā prakṛtiḥ sūkṣmā sāca mūrtyāca pañcadhā

sarasvatī ca kamalā durgā tvaṃ cāpi vedasūḥ /
sarve devāḥ prākṛtikā yāvanto mūrtidhāriṇaḥ

ahamātmā nityadehī bhaktadhyānānurodhataḥ /
ye ye prakṛtikā rādhe te naṣṭāḥ prākṛte laye

ahamevā''samevāgre paścādapyahameva ca /
yathā'haṃ ca tathā tvaṃ ca yathā dhāvalyadugdhayoḥ

bhedaḥ kadā'pi na bhavenniścitaṃ ca tathā''vayoḥ /
ahaṃ mahānvirāṭ suṣaṭau viśvāni yasya lomasu

aṃśastvaṃ tatra mahatī svāṃśena tasya kāminī /
āhaṃ kṣudravirāṭ sṛṣṭau viśvaṃ yannābhipadmataḥ

ayaṃ viṣṇorlomakūpe vāso me cāṃśataḥ sati /
tasya strī tvaṃ ca bṛhatī svāśane subhagā tathā

tasya viśve ca pratyekaṃ brahmaviṣṇuśivādayaḥ /
brahmaviṣṇuśivā aṃśāścānye cāpi ca matkalāḥ

matkalāṃśāṃśakalayā sarve devi carācarāḥ /
vaikuṇṭhe tvaṃ mahālakṣmīrahaṃ tatra caturbhujaḥ

sa ca viśvādbahiścordhvaṃ yathā goloka eva ca /
sarasvatī tvaṃ satye ca sāvitrī brahmaṇaḥ priyāḥ

śivaloke śivā tvraṃ ca mūlaprakṛtirīśvarī /
vināśya durgaṃ durgā ca sarvadurgatināśinī

sa eva dakṣakanyā ca sā eva śailakanyakā /
kailāse pārvatī tena saubhāgyā śivavakṣasi

svāṃśena tvaṃ sindhukanyā kṣīrode viṣṇuvakṣasi /
ahaṃ svāśena sṛṣṭau ca brahmaviṣṇumaheśvarāḥ

tvaṃ ca lakṣmī śivā dhātrī sāvitrī ca pṛthakpṛthak /
goloke ca svayaṃ rādhā rāse rāseśvarī sadā

vṛndā dṛndāvane ramye virajā virajātaṭe /
sā tvaṃ sudāmaśāpena bhārataṃ puṇyamāgatā

pūtaṃ kartuṃ bhārataṃ ca vṛndāraṇyaṃ ca sundari /
tvatkalāṃśāṃśakalayā viśveṣu sarvayoṣitaḥ

yāyoṣitsā ca bhavatī yaḥ pumānso'hameva ca /
ahaṃ ca kalayā vahnistvaṃ svāhā dāhikā priyā

tvayā saha samartho'haṃ nālaṃ dagdhuṃ ca tvāṃ vinā /
ahaṃ dīptimatāṃ sūryaḥ kalayā tvaṃ prabhākarī

saṃjñā tvaṃ ca tvayā bhāmi tvāṃ vinā'haṃ na dīptimān /
ahaṃ ca kalayā candrastvaṃ ca śobhā ca rohiṇī

manoharastvayā sārdhaṃ tvāṃ na ca sundaraḥ /
ahamindraśca kalayā svargalakṣmīśca tvaṃ śacī

tvayā sārdhaṃ devarājo hataśrīśca tvayā vinā /
ahaṃdharmaśca kalayā tvaṃ ca mūrtiśca dharmiṇī

nāhaṃ śakto dharmakṛtyo tvāṃ ca dharmakriyāṃ vinā /
ahaṃ yajñaśca kalayā tvaṃ ca svāṃśena dakṣiṇā

tvayā sārdhaṃ ca phalado'pyakamarthastvayā vinā /
kalayā pidṛloko'haṃ svāṃśena tvaṃ svadhā satī

tvayā'laṃ kavyadāne ca sadā nālaṃ tvayā vinā /
ahaṃ pumāṃstvaṃ prakṛtirna sraṣṭā'haṃ tvayā vinā

tvaṃ ca saṃvatsvarūpā'hamīśvaraśca tvayā saha /
lakṣmīyuktastvayā lakṣmayā niḥ śrīkaśca tvayā dinā

yathā nālaṃ kulālaśca ghaṭaṃ kartuṃ mṛdā vinā /
ahaṃ śeṣaśca kalayā svāṃśena tvaṃ vasuṃdharā

tvāṃ sasyaratnādhārāṃ ca bibharmi mūrdhni sundari /
tvaṃ ca kāntiśca śāntiśca bhūtirmūrtimatī satī

tuṣṭiḥ puṣṭiḥ kṣamā lajjā kṣudhā tṛṣṇā parā dayā /
nidrā śraddhā ca tandrā ca mūrcchā ca saṃnatiḥ kriyā

mūrtirūpā bhaktirūpā dehināṃ deharūpiṇī /
mamā''dhārā sadā tvaṃ ca tavā'tmā'haṃ parasparam

yathā tvaṃ ca tathā'haṃ ca samau prakṛtipūruṣau /
na hi sṛṣṭirbhaveddevi dvayorekataraṃ vinā

ityuktvā paramātmā ca rādhāṃ prāṇādhikāṃ priyām /
kṛtvā vakṣasi suprīto bodhayāmāsa nārada

sa ca kīḍāniyuktaśca babhūva ratnamandire /
tathā ca rādhāyā sārdhaṃ kāmukyā saha kāmukaḥ

iti śrībrahmao mahāo śrīkṛṣṇajanmakhao uttao nāradanāo ādhyatmika-
yogakathanaṃ nāma saptaṣaṣṭitamo'dhyāyaḥ