Brahmavaivarta Purana · Chapter 4.101

athaikādhikaśatatamodhyāyaḥ
nārāyaṇa uvāca
saṃstūya devā munayo viremurnahi mānase /
dadṛśuḥ prāṅgaṇe kṛṣṇaṃ śobhitaṃ pītavāsasā

yathā saudāminīyuktaṃ navīnajaladaṃ mune /
bakapaṅ ktiyutaṃ caiva mālatīmālayā tathā

kapāle maṇḍalākārakastūrīyuktacandanam /
sakalaṅkaṃ mṛgāṅkaṃ ca śobhitaṃ jalade tathā

dvibhujaṃ śyāmalaṃkāntaṃ rādhākāntaṃ manoharam /
īṣaddhāsyaprasannāsyaṃ bhaktānugrahavigraham

ratnakeyūravalayaratnamañjīrarañjitam /
rudantaṃ piturutsaṅge balena sahitaṃ param

atha maṅgalakāle ca śubhalagne manorame /
saṃpīkṣite grahaiḥ saumyairjāṃgrallagnādhipe sthite

asadgrahairadṛṣṭe ca sadgrahekṣita eva ca /
śubhakarmasamārambhaṃ svastivācanapūrvakam

cakāra vasudevaścāpyājñayā suraviprayoḥ /
dattvā suvarṇaśatakaṃ brāhmaṇāya ca sādaram

devendrāṃśca munīndrāśca namaskṛtya purohitam /
gaṇeśaṃ ca dineśaṃ ca vahniṃ ca śaṃkaraṃ śivām

saṃpūjya devaṣaṭkaṃ ca sākṣatairdevasaṃsadi /
upacāraiḥ ṣoḍaśabhiḥ saṃyato bhaktipūrvakam

putrādhivāsanaṃ cakrai vedamantreṇa saṃsadi /
saṃpūjya nānādevāṃśca dikpālāṃśca navagrahān

dattvā pañcopacārāṃśca bhaktyā ṣoḍaśamātṛkāḥ /
dattvā ca vasudhārāṃ ca saptavārānghṛtena ca

cedirājaṃ vasuṃ natvā saṃpūjya prayayau punaḥ /
vṛddhiśrāddhaṃ sunirvāpya yatkiṃciddaivikaṃ tathā

yajñaṃ kṛtvā tu vedoktaṃ yajñasūtraṃ dadau mudā /
valadevāgracāyaiva kṛṣṇāya paramātmane

gāyatrī ca dadau tābhyāṃ muniḥ sāṃdīpanistathā /
bhikṣāṃ dadau ca prathamaṃ pārvatī paramādarāt

amūlyaratnapātrasthaṃ muktāmāṇikyahīrakam /
hīrasāravinirmāṇaṃ pitrā dattaṃ ca hārakam

śubhāśiṣaṃ ca pradadau śuklapuṣpeṇā dūrvayā /
tato'ditirditiścaiva munipatnyaśca devakī

yaśodā rohiṇī hṛṣṭā sāvitrī ca sarasvatī /
pratyekaṃ pradadau bhikṣāṃ maṇikāñcanabhūṣitām

devakanyā nāgakanyā rājakanyāḥ pativratāḥ /
kāminyo bāndhavānāṃ ca sasmitāḥ snigdhalocanāḥ

indrāṇī varuṇānī ca pavanānī ca rohiṇī /
kuberapatnīṃ svāhā ca ratiḥ kāmasya kāminī

pratyekaṃ pradadau bhikṣāṃ ratnabhūṣaṇabhūṣitām /
bhikṣāṃ gṛhītvā bhagavānsabalo bhaktipūrvakam

kiṃciddadau ca gargāya kicitsvagurave tathā /
vaidikaṃ karma nirvāpya gargāya dakṣiṇāṃ dadau

devāṃśca bhojayāmāsa brāhmaṇāṃścāpi sādaram /
ye ye samāyayuryajñe teca dattvā śubhāśiṣam

kṛṇṇāya baladevāya prahṛṣṭāḥ prayayṛrguham /
nandaḥ sabhāryo nirvāpya śubhakarma sutasya vai

kroḍe kṛtvā balaṃ kṛṣṇaṃ cucumba vadanaṃ tayoḥ /
ucacai ruroda nandaśca yaśodā ca pativratā
śrīkṛṣṇastaṃ samāśvāsya bodhayāmāsa yatnataḥ

śrīkṛṣṇa uvāca
sānandaṃ gaccha he mātaryaśode tātamatvaram /
tvameva mātā poṣṭrī tvaṃ pitā ca paramārthataḥ

avantinagaraṃ tāta yāsyāmi sabalo'dhunā /
muneḥ sāṃdīpaneḥ sthānaṃ vedapāṭhārthamīpsitam

tata āgatya suciraṃ kāle bhavati darśanam /
kāmaḥ karoti kalanaṃ sa ca bhedaṃ karoti ca

sarvaṃ kālakṛtaṃ mātarbhedaṃ saṃmīlanaṃ nṛṇām /
sukhaṃ duḥkhaṃ ca harṣaṃ ca śokaṃ ca maṅgalālayam

mayā dattaṃ ca tattvaṃ ca yogināmapi durlabham /
sarvaṃ nandaśca sānandaṃ tvāmeva kathayiṣyati

ityuktvā jagatāṃ nātho vasudevasabhāṃ yayau /
tadājñayā kṣaṇaṃ prāpya yayau saṃdīpanergūham

vasudevaṃ devakīṃ ca saṃbhāṣya vinayena ca /
nandaḥ sabhāryaḥ prayayau hṛdayena vidūyatā

muktāmaṇiṃ suvarṇa ca māṇikyaṃ hīrakaṃ tathā /
vahniśuddhāṃśukaṃ ratnaṃ nandāya devakī dadau

śvetāśvaṃ ca gajendraṃ ca suvarṇarathamuttamam /
nandāya kṛṣṇaḥ pradadau vasudevaśca sādaram

tayoranuvrajanviprā devakīpramukhāḥ striyaḥ /
vasudevastathā'krūro'pyuddhavaśca yayau mudā

kālindīnikaṭaṃ gatvā te sarve ruruduḥ śucā /
parasparaṃ ca saṃbhāṣya te sarve svālayaṃ yayuḥ

kuntī saputrā vidhavā vasudevājñayā mune /
nānāratnamaṇiṃ prāpya prayayau svaralayaṃ mudā

vasutevo devakī ca putrakalyāṇahetave /
nānāratnamaṇiṃ vastraṃ muvarṇaṃ rajataṃ tathā

muktāmāṇikyacahāraṃ ca miṣṭānnaṃ ca sudhopamam /
bhaṭṭemyo brāhmaṇebhyaśca pradadau sādaraṃ mudā

mahotsavaṃ vedapāṭhaṃ harernāmaikamaṅgalam /
viprāṇāṃ bhojanaṃ caiva kārayāmāsa yatnataḥ

jñātīnāṃ bāndhavānāṃ ca puraskāraṃ yathocitam /
cakāra maṇimāṇikyamuktāvastrairmanoharaiḥ

iti śrībrahmao mahāo śrīkṛṣṇajanmakhao nārādanāo uttao bhagavadupanayanaṃ
nāmaikādhikaśatatamo'dhyāyaḥ