Brahmavaivarta Purana · Chapter 3.46

nārāyaṇa uvāca //
stutvā tāṃ parśurāmo'sau harṣasaṃphullamānasaḥ //
stotreṇa hariṇoktena sa tuṣṭāva gaṇādhipam

pūjāṃ cakāra bhaktyā ca naivedyairvividhairapi //
dhūpairdīpaiśca gandhaiśca puṣpaiśca tulasīṃ vinā

sampūjya bhrātaraṃ bhaktyā sa rāmaḥ śaṃkarājñayā //
gurupatnīṃ guruṃ natvā gamanaṃ kartumudyataḥ

nārada uvāca //
pūjāṃ bhagavataścakre rāmo gaṇapateryadā //
naivadyairvividhaiḥ puṣpaistulasīṃ ca vinā katham

tulasī sarvapuṣpāṇāṃ mānyā dhanyā manoharā //
kathaṃ pūjāṃ sārabhūtāṃ na gṛhṇāti gaṇeśvaraḥ

nārāyaṇa uvāca //
śṛṇu nārada vakṣye'hamitihāsaṃ purātanam //
brahmakalpasya vṛttāntaṃ nigūḍhaṃ ca manoharam

ekadā tulasī devī prodbhinnanavayauvanā //
tīrthaṃ bhramantī tapasā nārāyaṇaparāyaṇā

dadarśa gaṅgātīre sā gaṇeśaṃ yauvanānvitam //
atīva sundaraṃ śuddhaṃ sasmitaṃ pītavāsasam

candanokṣitasarvāṃgaṃ ratnabhūṣaṇabhūṣitam //
dhyāyantaṃ kṛṣṇapādābjaṃ janmamṛtyujarāpaham

jitendriyāṇāṃ pravaraṃ yogīndrāṇāṃ gurorgurum //
surūpahāryyaṃ niṣkāmaṃ sakāmā tamuvāca ha

tulasyuvāca //
aho dhyāyasi kiṃ deva śāntarūpa gajānana //
kathaṃ lambodaro deho gajavaktraṃ kathaṃ tava

ekadantaḥ kathaṃ vaktre vadāmutra ca kāraṇam //
tyaja dhyānaṃ mahābhāga sāyaṃkāla upasthitaḥ

ityuktvā tulasī devī prajahāsa punaḥ punaḥ //
paraṃ cetasi dagdhā sā kāmabāṇaiḥ sudāruṇaiḥ

gaṇeśasya pradhānāṃge dattvā kiñcijjalaṃ mune //
jaghāna tarjanyagreṇa niṣpandaṃ kṛṣṇamānasam

babhūva dhyānabhagnaṃ ca tasya nārada cetanam //
duḥkhaṃ ca dhyānabhedena tadvicchedo hi śokadaḥ

dhyānaṃ tyaktvā hariṃ smṛtvā cāpaśyatkāminīṃ puraḥ //
navayauvanasampannāṃ sasmitāṃ kāmapīḍitām //

lambodaraśca tāṃ dṛṣṭvā paraṃ vinayapūrvakam //
uvāca sasmitaḥ śāntaḥ śāntāṃ kāmāturāṃ vaśī

gaṇeśvara uvāca //
kā tvaṃ vatse kasya kanyā mātarmā brūhi kiṃ śubhe //
pāpado'śubhadaḥ śaśvaddhyānabhaṃgastapasvinām

kṛṣṇaḥ karotu kalyāṇaṃ hantu vighnaṃ kṛpānidhiḥ //
taddhyānabhaṃgajāddoṣānnāśubhaṃ syāttu te śubhe

gaṇeśavacanaṃ śrutvā tamuvāca smarāturā //
sasmitaṃ sakaṭākṣaṃ ca devaṃ madhurayā girā

tulasyuvāca //
dharmātmajasya kanyā'hamaprauḍhā ca tapasvinī //
tapasyā me svāmino'rthe tvaṃ svāmī bhava me prabho

tulasīvacanaṃ śrutvā gaṇeśaḥ śrīhariṃ smaran //
tāmuvāca mahāprājñaḥ prājñīṃ madhurayā girā

gaṇeśa uvāca //
he mātarnāsti me vācchā ghore dāraparigrahe //
dāragraho hi duḥkhāya na sukhāya kadācana

haribhaktervyavāyaśca tapasyānāśakārakaḥ //
mokṣadvārakapāṭaśca bhavabandhanapāśakaḥ

garbhavāsakaraḥ śaśvattattvajñānanikṛntakaḥ //
saṃśayānāṃ samārambho yastyājyo vṛṣalairapi

geho'yaṃ kāraṇānāṃ ca sarvamāyākaraṇḍakam //
sāhasānāṃ samūhaśca doṣāṇāṃ ca viśeṣataḥ

nivartasva mahābhāge paśyānyaṃ kāmukaṃ patim //
kāmukenaiva kāmukyāḥ saṃgamo guṇavānbhaveta

ityevaṃ vacanaṃ śrutvā kopātsā taṃ śaśāpa ha //
dārāste bhavitā'sādhvī gaṇeśvara na saṃśayaḥ

ityākarṇya suraśreṣṭhastāṃ śaśāpa śivātmajaḥ //
devi tvamasuragrastā bhaviṣyasi na saṃśayaḥ

tatpaścānmahatāṃ śāpādvṛkṣastvaṃ bhaviteti ca //
mahātapasvītyuktvā tāṃ virarāma ca nārada

śāpaṃ śrutvā tu tulasī sā ruroda punaḥ punaḥ //
tuṣṭāva ca suraśreṣṭhaṃ sa prasanna uvāca tām

gaṇeśvara uvāca //
puṣpāṇāṃ sārabhūtā tvaṃ bhaviṣyasi manorame //
kalāṃśena mahābhāge svayaṃ nārāyaṇapriyā

priyā tvaṃ sarvadevānāṃ śrīkṛṣṇasya viśeṣataḥ //
pūjā vimuktidā nṝṇāṃ mayā bhogyā na nityaśaḥ // ३३'//
ityuktvā tāṃ suraśreṣṭho jagāma tapase punaḥ //
harerārādhanavyagro badarīsannidhiṃ yayau

jagāma tulasī devī hṛdayena vidūyatā //
nirāhārā tapaścakre puṣkare lakṣavarṣakam

paścānmunīndraśāpena gaṇeśasya ca nārada //
sā priyā śaṃkhacūḍasya babhūva suciraṃ mune

tataḥ śaṅkaraśūlena sa mamārāsureśvaraḥ //
sā kalāṃśena vṛkṣatvaṃ yayau nārāyaṇapriyā

kathitaścetihāsaste śruto dharmamukhātpurā //
mokṣapradaśca sāraśca purāṇena prakīrtitaḥ

tataḥ paraśurāmo'sau jagāma tapase vanam //
praṇamya śaṅkaraṃ durgāṃ saṃpūjya ca gaṇeśvaram

pūjito vanditaḥ sarvaiḥ surendramunipuṅgavaiḥ //
pārvatīśivasānnidhye sukhaṃ tasthau gaṇeśvaraḥ

idaṃ gaṇapateḥ khaṇḍaṃ yaḥ śṛṇoti samāhitaḥ //
sa rājasūyayajñasya phalamāpnoti niścitam

aputro labhate putraṃ śrīgaṇeśaprasādataḥ //
dhīraṃ vīraṃ ca dhaninaṃ guṇinaṃ cirajīvinam

yaśasvinaṃ putriṇaṃ ca vidvāṃsaṃ sukavīśvaram //
jitendriyāṇāṃ pravaraṃ dātāraṃ sarvasampadām

suśīlaṃ ca sadācāraṃ praśaṃsyaṃ vaiṣṇavaṃ labhet //
ahiṃsakaṃ dayāluṃ ca tattvajñānaviśāradam

bhaktyā gaṇeśaṃ saṃpūjya vastrālaṅkāracandanaiḥ //
śrutvā gaṇapateḥ khaṇḍaṃ mahāvandhyā prasūyate

mṛtavatsā kākavandhyā brahmanputraṃ labheddhruvam //
adūṣyadūṣaṇaparā śuddhā caiva labhetsutam

saṃpūrṇaṃ brahmavaivartaṃ śrutvā yallabhate phalam //
tatphalaṃ labhate martyaḥ śrutvedaṃ khaṇḍamuttamam

vāñchāṃ kṛtvā tu manasi śṛṇoti paramāsthitaḥ//
tasmai dadāti sarveṣṭaṃ suraśreṣṭho gaṇeśvaraḥ

śrutvā gaṇapateḥ khaṇḍaṃ vighnanāśāya yatnataḥ //
svarṇayajñopavītaṃ ca śvetacchatraṃ ca mālyakam

pradīyate vācakāya svastikaṃ tilalaḍḍukān //
paripakvaphalānyeva deśakālodbhavāni ca

iti śrībrahmavaivartte mahāpurāṇe tṛtīye gaṇapatikhaṇḍe nāradanārāyaṇasaṃvāde paraśurāmāgamanaitatkhaṇḍaśravaṇaphalavarṇanaṃ nāma ṣaṭcatvāriṃśattamo'dhyāyaḥ

iti śrībrahmavaivartte mahāpurāṇe tṛtīyaṃ gaṇapatikhaṇḍaṃ samāptam //