બ્રહ્મવૈવર્ત પુરાણ · અધ્યાય 3.46

નારાયણ ઉવાચ ॥
સ્તુત્વા તાં પર્શુરામોઽસૌ હર્ષસંફુલ્લમાનસઃ ॥
સ્તોત્રેણ હરિણોક્તેન સ તુષ્ટાવ ગણાધિપમ્

પૂજાં ચકાર ભક્ત્યા ચ નૈવેદ્યૈર્વિવિધૈરપિ ॥
ધૂપૈર્દીપૈશ્ચ ગન્ધૈશ્ચ પુષ્પૈશ્ચ તુલસીં વિના

સમ્પૂજ્ય ભ્રાતરં ભક્ત્યા સ રામઃ શંકરાજ્ઞયા ॥
ગુરુપત્નીં ગુરું નત્વા ગમનં કર્તુમુદ્યતઃ

નારદ ઉવાચ ॥
પૂજાં ભગવતશ્ચક્રે રામો ગણપતેર્યદા ॥
નૈવદ્યૈર્વિવિધૈઃ પુષ્પૈસ્તુલસીં ચ વિના કથમ્

તુલસી સર્વપુષ્પાણાં માન્યા ધન્યા મનોહરા ॥
કથં પૂજાં સારભૂતાં ન ગૃહ્ણાતિ ગણેશ્વરઃ

નારાયણ ઉવાચ ॥
શૃણુ નારદ વક્ષ્યેઽહમિતિહાસં પુરાતનમ્ ॥
બ્રહ્મકલ્પસ્ય વૃત્તાન્તં નિગૂઢં ચ મનોહરમ્

એકદા તુલસી દેવી પ્રોદ્ભિન્નનવયૌવના ॥
તીર્થં ભ્રમન્તી તપસા નારાયણપરાયણા

દદર્શ ગઙ્ગાતીરે સા ગણેશં યૌવનાન્વિતમ્ ॥
અતીવ સુન્દરં શુદ્ધં સસ્મિતં પીતવાસસમ્

ચન્દનોક્ષિતસર્વાંગં રત્નભૂષણભૂષિતમ્ ॥
ધ્યાયન્તં કૃષ્ણપાદાબ્જં જન્મમૃત્યુજરાપહમ્

જિતેન્દ્રિયાણાં પ્રવરં યોગીન્દ્રાણાં ગુરોર્ગુરુમ્ ॥
સુરૂપહાર્ય્યં નિષ્કામં સકામા તમુવાચ હ

તુલસ્યુવાચ ॥
અહો ધ્યાયસિ કિં દેવ શાન્તરૂપ ગજાનન ॥
કથં લમ્બોદરો દેહો ગજવક્ત્રં કથં તવ

એકદન્તઃ કથં વક્ત્રે વદામુત્ર ચ કારણમ્ ॥
ત્યજ ધ્યાનં મહાભાગ સાયંકાલ ઉપસ્થિતઃ

ઇત્યુક્ત્વા તુલસી દેવી પ્રજહાસ પુનઃ પુનઃ ॥
પરં ચેતસિ દગ્ધા સા કામબાણૈઃ સુદારુણૈઃ

ગણેશસ્ય પ્રધાનાંગે દત્ત્વા કિઞ્ચિજ્જલં મુને ॥
જઘાન તર્જન્યગ્રેણ નિષ્પન્દં કૃષ્ણમાનસમ્

બભૂવ ધ્યાનભગ્નં ચ તસ્ય નારદ ચેતનમ્ ॥
દુઃખં ચ ધ્યાનભેદેન તદ્વિચ્છેદો હિ શોકદઃ

ધ્યાનં ત્યક્ત્વા હરિં સ્મૃત્વા ચાપશ્યત્કામિનીં પુરઃ ॥
નવયૌવનસમ્પન્નાં સસ્મિતાં કામપીડિતામ્ ॥

લમ્બોદરશ્ચ તાં દૃષ્ટ્વા પરં વિનયપૂર્વકમ્ ॥
ઉવાચ સસ્મિતઃ શાન્તઃ શાન્તાં કામાતુરાં વશી

ગણેશ્વર ઉવાચ ॥
કા ત્વં વત્સે કસ્ય કન્યા માતર્મા બ્રૂહિ કિં શુભે ॥
પાપદોઽશુભદઃ શશ્વદ્ધ્યાનભંગસ્તપસ્વિનામ્

કૃષ્ણઃ કરોતુ કલ્યાણં હન્તુ વિઘ્નં કૃપાનિધિઃ ॥
તદ્ધ્યાનભંગજાદ્દોષાન્નાશુભં સ્યાત્તુ તે શુભે

ગણેશવચનં શ્રુત્વા તમુવાચ સ્મરાતુરા ॥
સસ્મિતં સકટાક્ષં ચ દેવં મધુરયા ગિરા

તુલસ્યુવાચ ॥
ધર્માત્મજસ્ય કન્યાઽહમપ્રૌઢા ચ તપસ્વિની ॥
તપસ્યા મે સ્વામિનોઽર્થે ત્વં સ્વામી ભવ મે પ્રભો

તુલસીવચનં શ્રુત્વા ગણેશઃ શ્રીહરિં સ્મરન્ ॥
તામુવાચ મહાપ્રાજ્ઞઃ પ્રાજ્ઞીં મધુરયા ગિરા

ગણેશ ઉવાચ ॥
હે માતર્નાસ્તિ મે વાચ્છા ઘોરે દારપરિગ્રહે ॥
દારગ્રહો હિ દુઃખાય ન સુખાય કદાચન

હરિભક્તેર્વ્યવાયશ્ચ તપસ્યાનાશકારકઃ ॥
મોક્ષદ્વારકપાટશ્ચ ભવબન્ધનપાશકઃ

ગર્ભવાસકરઃ શશ્વત્તત્ત્વજ્ઞાનનિકૃન્તકઃ ॥
સંશયાનાં સમારમ્ભો યસ્ત્યાજ્યો વૃષલૈરપિ

ગેહોઽયં કારણાનાં ચ સર્વમાયાકરણ્ડકમ્ ॥
સાહસાનાં સમૂહશ્ચ દોષાણાં ચ વિશેષતઃ

નિવર્તસ્વ મહાભાગે પશ્યાન્યં કામુકં પતિમ્ ॥
કામુકેનૈવ કામુક્યાઃ સંગમો ગુણવાન્ભવેત

ઇત્યેવં વચનં શ્રુત્વા કોપાત્સા તં શશાપ હ ॥
દારાસ્તે ભવિતાઽસાધ્વી ગણેશ્વર ન સંશયઃ

ઇત્યાકર્ણ્ય સુરશ્રેષ્ઠસ્તાં શશાપ શિવાત્મજઃ ॥
દેવિ ત્વમસુરગ્રસ્તા ભવિષ્યસિ ન સંશયઃ

તત્પશ્ચાન્મહતાં શાપાદ્વૃક્ષસ્ત્વં ભવિતેતિ ચ ॥
મહાતપસ્વીત્યુક્ત્વા તાં વિરરામ ચ નારદ

શાપં શ્રુત્વા તુ તુલસી સા રુરોદ પુનઃ પુનઃ ॥
તુષ્ટાવ ચ સુરશ્રેષ્ઠં સ પ્રસન્ન ઉવાચ તામ્

ગણેશ્વર ઉવાચ ॥
પુષ્પાણાં સારભૂતા ત્વં ભવિષ્યસિ મનોરમે ॥
કલાંશેન મહાભાગે સ્વયં નારાયણપ્રિયા

પ્રિયા ત્વં સર્વદેવાનાં શ્રીકૃષ્ણસ્ય વિશેષતઃ ॥
પૂજા વિમુક્તિદા નૄણાં મયા ભોગ્યા ન નિત્યશઃ ॥ ૩૩ઽ॥
ઇત્યુક્ત્વા તાં સુરશ્રેષ્ઠો જગામ તપસે પુનઃ ॥
હરેરારાધનવ્યગ્રો બદરીસન્નિધિં યયૌ

જગામ તુલસી દેવી હૃદયેન વિદૂયતા ॥
નિરાહારા તપશ્ચક્રે પુષ્કરે લક્ષવર્ષકમ્

પશ્ચાન્મુનીન્દ્રશાપેન ગણેશસ્ય ચ નારદ ॥
સા પ્રિયા શંખચૂડસ્ય બભૂવ સુચિરં મુને

તતઃ શઙ્કરશૂલેન સ મમારાસુરેશ્વરઃ ॥
સા કલાંશેન વૃક્ષત્વં યયૌ નારાયણપ્રિયા

કથિતશ્ચેતિહાસસ્તે શ્રુતો ધર્મમુખાત્પુરા ॥
મોક્ષપ્રદશ્ચ સારશ્ચ પુરાણેન પ્રકીર્તિતઃ

તતઃ પરશુરામોઽસૌ જગામ તપસે વનમ્ ॥
પ્રણમ્ય શઙ્કરં દુર્ગાં સંપૂજ્ય ચ ગણેશ્વરમ્

પૂજિતો વન્દિતઃ સર્વૈઃ સુરેન્દ્રમુનિપુઙ્ગવૈઃ ॥
પાર્વતીશિવસાન્નિધ્યે સુખં તસ્થૌ ગણેશ્વરઃ

ઇદં ગણપતેઃ ખણ્ડં યઃ શૃણોતિ સમાહિતઃ ॥
સ રાજસૂયયજ્ઞસ્ય ફલમાપ્નોતિ નિશ્ચિતમ્

અપુત્રો લભતે પુત્રં શ્રીગણેશપ્રસાદતઃ ॥
ધીરં વીરં ચ ધનિનં ગુણિનં ચિરજીવિનમ્

યશસ્વિનં પુત્રિણં ચ વિદ્વાંસં સુકવીશ્વરમ્ ॥
જિતેન્દ્રિયાણાં પ્રવરં દાતારં સર્વસમ્પદામ્

સુશીલં ચ સદાચારં પ્રશંસ્યં વૈષ્ણવં લભેત્ ॥
અહિંસકં દયાલું ચ તત્ત્વજ્ઞાનવિશારદમ્

ભક્ત્યા ગણેશં સંપૂજ્ય વસ્ત્રાલઙ્કારચન્દનૈઃ ॥
શ્રુત્વા ગણપતેઃ ખણ્ડં મહાવન્ધ્યા પ્રસૂયતે

મૃતવત્સા કાકવન્ધ્યા બ્રહ્મન્પુત્રં લભેદ્ધ્રુવમ્ ॥
અદૂષ્યદૂષણપરા શુદ્ધા ચૈવ લભેત્સુતમ્

સંપૂર્ણં બ્રહ્મવૈવર્તં શ્રુત્વા યલ્લભતે ફલમ્ ॥
તત્ફલં લભતે મર્ત્યઃ શ્રુત્વેદં ખણ્ડમુત્તમમ્

વાઞ્છાં કૃત્વા તુ મનસિ શૃણોતિ પરમાસ્થિતઃ॥
તસ્મૈ દદાતિ સર્વેષ્ટં સુરશ્રેષ્ઠો ગણેશ્વરઃ

શ્રુત્વા ગણપતેઃ ખણ્ડં વિઘ્નનાશાય યત્નતઃ ॥
સ્વર્ણયજ્ઞોપવીતં ચ શ્વેતચ્છત્રં ચ માલ્યકમ્

પ્રદીયતે વાચકાય સ્વસ્તિકં તિલલડ્ડુકાન્ ॥
પરિપક્વફલાન્યેવ દેશકાલોદ્ભવાનિ ચ

ઇતિ શ્રીબ્રહ્મવૈવર્ત્તે મહાપુરાણે તૃતીયે ગણપતિખણ્ડે નારદનારાયણસંવાદે પરશુરામાગમનૈતત્ખણ્ડશ્રવણફલવર્ણનં નામ ષટ્ચત્વારિંશત્તમોઽધ્યાયઃ

ઇતિ શ્રીબ્રહ્મવૈવર્ત્તે મહાપુરાણે તૃતીયં ગણપતિખણ્ડં સમાપ્તમ્ ॥