Brahmavaivarta Purana · Chapter 3.37

// nārada uvāca//
kavacaṃ śrotumicchāmi tāṃ ca vidyāṃ daśākṣarīm //
nātha tvatto hi sarvajña bhadrakālyāśca sāmpratam

nārāyaṇa uvāca //
śṛṇu nārada vakṣyāmi mahāvidyāṃ daśākṣarīm //
gopanīyaṃ ca kavacaṃ triṣu lokeṣu durlabham

ॐ hrīṃ śrīṃ klīṃ kālikāyai svāheti ca daśākṣarīm //
durvāsā hi dadau rājñe puṣkare sūryyaparvaṇi

daśalakṣajapenaiva mantrasiddhiḥ kṛtā purā //
pañcalakṣajapenaiva paṭhankavacamuttamam

babhūva siddhakavaco'pyayodhyāmājagāma saḥ //
kṛtsnāṃ hi pṛthivīṃ jigye kavacasya prabhāvataḥ

nārada uvāca //
śrutā daśākṣarī vidyā triṣu lokeṣu durlabhā //
adhunā śrotumicchāmi kavacaṃ brūhi me prabho

nārāyaṇa uvāca //
śṛṇu vakṣyāmi viprendra kavacaṃ paramādbhutam //
nārāyaṇena yaddattaṃ kṛpayā śūline purā

tripurasya vadhe ghore śivasya vijayāya ca //
tadeva śūlinā dattaṃ purā durvāsase mune

durvāsasā ca yaddattaṃ sucandrāya mahātmane //
atiguhyataraṃ tattvaṃ sarvamantraughavigraham //

ॐ hrīṃ śrīṃ klīṃ kālikāyai svāhā me pātu mastakam //
klīṃ kapālaṃ sadā pātu hrīṃ hrīṃ hrīmiti locane

ॐ hrīṃ trilocane svāhā nāsikāṃ me sadā'vatu //
klīṃ kālike rakṣa rakṣa svāhā dantānsadā'vatu

klīṃ bhadrakālike svāhā pātu me'dharayugmakam //
ॐ hrīṃ hrīṃ klīṃ kālikāyai svāhā kaṇṭhaṃ sadā'vatu

ॐ hrīṃ kālikāyai svāhā karṇayugmaṃ sadā'vatu //
ॐ krīṃ krīṃ klīṃ kālyai svāhā skandhaṃ pātu sadā mama

ॐ krīṃ bhadrakālyai svāhā mama vakṣaḥ sadā'vatu //
ॐ klīṃ kālikāyai svāhā mama nābhiṃ sadā'vatu

ॐ hrīṃ kālikāyai svāhā mama pṛṣṭhaṃ sadā'vatu //
raktabījavināśinyai svāhā hasto sadā'vatu

ॐ hrīṃ klīṃ muṇḍamālinyai svāhā pādau sadāvatu//
ॐ hrīṃ cāmuṇḍāyai svāhā sarvāṅgaṃ me sadā'vatu

prācyāṃ pātu mahākālī cāgneyyāṃ raktadantikā //
dakṣiṇe pātu cāmuṇḍā nairṛtyāṃ pātu kālikā

śyāmā ca vāruṇe pātu vāyavyāṃ pātu caṇḍikā //
uttare vikaṭāsyā cāpyaiśānyāṃ sāṭṭahāsinī

pātūrdhvaṃ lolajihvā sā māyā''dyā pātvadhaḥ sadā //
jale sthale cāntarikṣe pātu viśvaprasūḥ sadā

iti te kathitaṃ vatsa sarvamantraughavigraham //
sarveṣāṃ kavacānāṃ ca sārabhūtaṃ parātparam

saptadvīpeśvaro rājā sucandro'sya prabhāvataḥ //
kavacasya prabhāvena māndhātā pṛthivīpatiḥ

pracetā lomaśaścaiva yataḥ siddho babhūva ha //
yato hi yogināṃ śreṣṭhaḥ saubhariḥ pippalāyanaḥ

yadi syātsiddhakavacaḥ sarvasiddhīśvaro bhavet //
mahādānāni sarvāṇi tapāṃsyevaṃ vratāni va //
niścitaṃ kavacasyāsya kalāṃ nārhanti ṣoḍaśīm

idaṃ kavacamajñātvā bhajetkālīṃ jagatprasūm //
śatalakṣaṃ prajapto'pi na mantraḥ siddhidāyakaḥ

iti śrībrahmavaivarte mahāpurāṇe tṛtīye gaṇapatikhaṇḍe nāradanārāyaṇasaṃvāde bhadrakālīkavacanirūpaṇaṃ nāma saptatriṃśattamo'dhyāyaḥ