Brahmanda Purana · Chapter 3.38

iti śrībrahmāṇḍamahāpurāṇe uttarabhāge hayagrīvāgastyasaṃvāde lalitopākhyāne gṛharājāntarakathanaṃ nāma saptatriṃśo 'dhyāyaḥ
agastya uvāca
śrutametanmahāvṛttamāvirbhāvādikaṃ mahat /
bhaṇḍāsuravadhaścaiva devyāḥ śrīnagarasthitiḥ

idānīṃ śrotumicchāmi tasyā matrasya sādhanam /
tanmantrāṇāṃ lakṣaṇaṃ ca sarvametannivedaya

hayagrīva uvāca
sarvebhyo 'pi padārthebhyaḥ śābdaṃ vastu mahattaram /
sarvebhyo 'pi hi śabdebhyo vedarāśirmahānmune

sarvebhyo 'pi hi vedebhyo vedamantrā mahattarāḥ /
sarvebhyo vedamantrebhyo viṣṇumantrā mahattarāḥ

tebhyo 'pi daurgamantrāstu mahānto munipuṅgava /
tebhyo gāṇapatā mantrā mune vīrya mahattarāḥ

tebhyo 'pyarkasya mantrāstu tebhyaḥ śaivā mahattarāḥ /
tebhyo 'pi lakṣmīmantrāstu tebhyaḥ sārasvatā varāḥ

tebhyo 'pi girijāmantrāstebhyaścāmnāyabhedajāḥ /
sarvāmnāyamanubhyo 'pi vārāhā manavo varāḥ

tebhyaḥ śyāmāmanuvarā viśiṣṭā ilvalāntaka /
tebhyo 'pi lalitāmantrā daśabhedavibheditāḥ

teṣu dvau manurājau tu variṣṭhau vindhyamardana /
lopāmudrā kāmarāja iti khyātimupāgatau

hrādistu lopāmudrā syātkāmarājastu kādikāḥ /
haṃsādervācyatāṃ yātāḥ kāmarājo mahesvaraḥ

smarādervācyatāṃ yātā devī śrīlalitāṃbikā /
hādikādyormantrayostu bhedo varṇatrayodbhavaḥ

tyośca kāmarājo 'yaṃ siddhido bhaktiśālinām /
śivena śaktyā kāmena kṣityā caiva tu māyayā

haṃsena bhṛguṇā caiva kāmena śaśimaulinā /
śakreṇa bhuvaneśena candreṇa ca manobhuvā

kṣityā hṛllekhayā caiva prokto haṃsādimantrarāṭ /
kāmādimantrarājastu smarayoniḥ śriyo mukhe

pañcatrikamahāvidyā lalitāṃbā pravācikām /
ye yajanti mahābhāgāsteṣāṃ sarvatra siddhaye

sadgurostu manuṃ prāpya tripañcārṇapariṣkṛtam /
samyaksaṃsādhayedvidvānvakṣyamāṇaprakārataḥ

tatkrameṇa pravakṣyāmi sāvadhāno mune śṛṇu /
prātarutthāya śirasismṛtvā kamalamujjvalam

sahasrapatraśobhāḍhyaṃ sakeśarasukarṇikam /
tatra śrīmadguruṃ dhvātvā prasannaṃ karuṇāmayam

tatobahirvinirgatya kuryācchaucādikāḥ kriyāḥ /
athāgatya ca tailena sāmodena vilepitaḥ

udvartitaśca susnātaḥ śuddhenoṣṇena vāriṇā /
āpo nisargataḥ pūtāḥ kiṃ punarvahnisaṃyutāḥ /
tasmāduṣṇodake snāyāttadabhāve yathodakam

paridhāya paṭau śuddhe kausumbhau vātha vāruṇau /
ācamya prayato vidvānhṛdi dhyāyanparāṃbikām

ūrdhvapuṇḍraṃ tripuṇḍaṃ vā paṭṭavardhanameva vā /
agastyapatrākāraṃ vā dhṛtvā bhāle nijocitam /
antarhitaśca śuddhātmā sandhyāvandanamācaret

aśvatthapatrākāreṇa pātreṇa sakuśākṣatam /
sapuṣpacandanaṃ cārdhyaṃ mārtaṇḍāya samutkṣipet

tathārdhyabhāvadevatvāllalitāyai trirardhyakam /
tarppayitvā yathāśakti mūlena laliteśvarīm

devarṣipitṛvargāṃśca tarpayitvā vidhānataḥ /
divākaramupāsthāya devīṃ ca ravibimbagām

maunī viśuddhahṛdayaḥ praviśya makhamandiram /
cārukarpūrakastūrīcandanādivilepitaḥ

bhūṣaṇairbhūṣitāṅgaśca cāruśṛṅgāraveṣadhṛk /
āmodikusumasragbhiravataṃsitakuntalaḥ

saṃkalpabhūṣaṇo vātha yathāvibhavabhūṣaṇaḥ /
pūjākhaṇḍe vakṣyamāṇānkṛtvā nyāsānanukramāt

mṛdvāsane samāsīno dhyāyecchrīnagaraṃ mahat /
nānāvṛkṣamahodyānamārabhya lalitāvadhi

dhyāyecchrīnagaraṃ divyaṃ bahirantarataḥ śuciḥ /
pūjākhaṇḍoktamārgema pūjāṃ kṛtvā vilakṣaṇaḥ

akṣamālāṃ samādāya candrakastūrivāsitām /
udaṅmukhaḥ prāṅkho vā japetsiṃhāsaneśvarīm /
ṣaṭtriṃśallakṣasaṃkhyāṃ tu japedvidyā prasīdati

taddaśāṃśastu homaḥ syāttaddaśāṃśaṃ ca tarpaṇam /
taddaśāṃśaṃ brāhmaṇānāṃ bhojanaṃ samudīritam

evaṃ sa siddhamantrastu kuryātkāmyajapaṃ punaḥ /
lakṣamātraṃ japitvā tu manuṣyānvaśamānayet

lakṣadvitayajāpyena nārīḥ sarvā vaśaṃ nayet /
lakṣatritayajāpena sarvānvaśayate nṛpān

caturlakṣajape jāte kṣubhyanti phaṇikanyakāḥ /
pañcalakṣajape jāte sarvāḥ pātālayoṣitaḥ

bhūlokasundarīvargo vaśyaḥṣaḍlakṣajāpataḥ /
kṣubhyanti sapta lakṣeṇa svargalokamṛgīdṛśaḥ

devayonibhavāḥ sarve 'pyaṣṭalakṣajapādvaśāḥ /
navalakṣeṇa gīrvāṇā nakhilānvaśamānayet

lakṣaikādaśajāpyena brahmaviṣṇumaheśvarān /
lakṣadvādaśajāpena siddhīraṣṭau vaśaṃ nayet

indrasyendratvametena mantreṇa hyabhavatpurā /
viṣṇorviṣṇutvametena śivasya śivatāmunā

indoścandratvametena bhānorbhāskaratāmunā /
sarvāsāṃ devatānāṃ ca tāstāḥ siddhaya ujjvalāḥ /
anena mantrarājena jātā ityavadhāraya

etanmantrasya jāpī tu sarvapāpavivarjitaḥ /
trailokyasundarākāro manmathasyāpi mohakṛt

sarvābhiḥ siddhibhiryuktaḥ sarvajñaḥ sarvapūjitaḥ /
darśanādeva sarvaṣāmantarālasya pūrakaḥ

vācā vācaspatisamaḥ śriyā śrīpatisānabhaḥ /
bale marutsamānaḥ syātsthiratve himavāniva

aunnatye merutulyaḥ syādgāṃbhīryeṇa mahārṇavaḥ /
kṣaṇātkṣobhakaro mūrtyā grāmapallīpurādiṣu

īṣadbhūbhaṅgamātreṇa stambhako jṛṃbhakastathā /
uccāṭako mohakaśca mārako duṣṭacetasām

kruddhaḥ prasīdati haṭhāttasya darśanaharṣitaḥ /
aṣṭādaśasu vidyāsu nirūḍhimabhigacchati

mandākinīpūrasamā madhurā tasya bhāratī /
na tasyāviditaṃ kiñcitsarvaśāstreṣu kumbhaja

darśanāni ca sarvāṇi kartu khaṇḍayituṃ paṭuḥ /
tattvañjānāti nikhilaṃ sarvajñatvaṃ ca gacchati

sadā dayārdrahṛdayaṃ tasya sarveṣu jantuṣu /
tatkopāgnerviṣayatāṃ gantuṃ nālaṃ jagattrayī

tasya darśanavelāyāṃ ślathannīvīnibandhanāḥ /
viśrastaraśanābandhā galatkuṇḍalasañcayāḥ

gharmavārikaṇaśreṇīmuktābhūṣitamūrtayaḥ /
atyantarāgataralavyāpāranayanāñcalāḥ

sraṃsamānakarāṃbhojamaṇikaṅkaṇapaṅktayaḥ /
ūrustambhena niṣpandā namitāsyāśca lajjayā

dravatkandarpasadanāḥ pulakāṅkurabhūṣaṇāḥ /
anyamākāramiva ca prāptā mānasajanmanā

dīpyamānā ivoddāmarāgajvālākadaṃbakaiḥ /
vīkṣyamāṇā ivānaṅgaśarapāvakavṛṣṭibhiḥ

utkaṇṭhayā tudyamānāḥ khidyamānā tanūṣmaṇā /
sicyamānāḥ śramajalaiḥ śucyamānāśca lajjayā

kulaṃ jātiṃ ca śīlaṃ ca lajjāṃ ca parivārakam /
lokādbhayaṃ bandhubhayaṃ paralokabhaye tathā

muñcantyo hṛdi yācantyo bhavanti hariṇīdṛśaḥ /
araṇye pattane vāpi devālayamaṭheṣu vā /
yatra kutrāpi tiṣṭhantaṃ taṃ dhāvanti mṛgīdṛśaḥ

atyāhato yathaivāṃbhobindurbhramati puṣkare /
tadvadbhramanti cittāni darśane tasya subhruvām

vinītānavanītānāṃ vidrāvaṇamahāphalam /
taṃ sevante samastānāṃ vidyānāmapi paṅktayaḥ

candrārkamaṇḍaladvandvakucamaṇḍalaśobhinī /
triloke lalanā tasya darśanādanurajyati /
anyāsāṃ tu varākīṇāṃ vaktavyaṃ kiṃ tapodhana

pattaneṣu ca vīthīṣu catvareṣu vaneṣu ca /
tatkīrtighoṣaṇā puṇyā sadā dyusaddrumāyate

tasya darśanataḥ pāpa jālaṃ naśyati pāpinām /
tadguṇā eva ghokṣyante sarvatra kavipuṅgavaiḥ

bhinnairvarṇairāyudhaiśca bhinnairvāhanabhūṣaṇaiḥ /
ye dhyāyanti mahādevīṃ tāstāḥ siddhīrbhañjati te

manorādimakhaṇḍastu kundendudhavaladyutiḥ /
ahaścakre jvalajjvālaścintanīyastu mūlake

indragopaka saṃkāśo dvitīyo manukhaṇḍakaḥ /
nībhālanīye 'haścakre ābālāntajvalacchikhaḥ

atha bālādipadmasthadvidalāṃbujakoṭare /
nībhālanīyastārtīyakhaṇḍo duritakhaṇḍakaḥ

muktā dhyeyā śaśijotsnā dhavalākṛtiraṃbikā /
raktasaṃdhyakarociḥ syādvaśīkaraṇakarmaṇi

sarvasaṃpattilābhe tu śyāmalāṅgī vicintyate /
nīlā ca mūkīkaraṇe pītā staṃbhanakarmaṇi

kavitve viśadākārā sphaṭikopalanirmalā /
dhanalābhe suvarṇābhā cintyate lalitāṃbikā

āmūlamābrahmabilaṃ jvalanmāṇikyadīpavat /
ye dhyāyanti mahāpuñjaṃ te syuḥ saṃsiddhasiddhayaḥ

evaṃ bahuprakāreṇa dhyānabhedena kumbhaja /
nibhālayantaḥ śrīdevīṃ bhajanti mahatīṃ śriyam /
prāpyate sadbhirevaiṣā nāsadbhistu kadācana

yaistu taptaṃ tapastīvraṃ tairevātmani dhyāyate /
tasya no paścimaṃ janma svayaṃ yo vā na śaṅkaraḥ /
na tena labhyate vidyā lalitā parameśvarī

vaṃśe tu yasya kasyāpi bhavedeṣa manuryadi /
tadvaṃśyāḥ sarva eva syurmuktāstṛptā na saṃśayaḥ

guptādguptataraivaiṣā sarvaśāstreṣu niścitā /
vedāḥ samastaśāstrāṇi stuvanti laliteśvarīm

paramātmeyameva syādiyameva parā gatiḥ /
iyameva mahattīrthamiyameva mahatphalam

imāṃ gāyanti munayo dhyāyanti sanakādayaḥ /
arcantīmāṃ suraśreṣṭhā brahmādyāḥ pañcasiddhidām

na prāpyate kucāritraiḥ kutsitaiḥ kuṭilāśayaiḥ /
daivabāhyairvṛthātarkairvṛthā vibhrānta buddhibhiḥ

naṣṭairaśīlairucchiṣṭaiḥ kulabhraṣṭaiśca niṣṭhuraiḥ /
darśanadveṣibhiḥ pāpaśīlairācāranindakaiḥ

uddhatairuddhatālāpairdāṃbhikairatimānibhiḥ /
etādṛśānāṃ martyānāṃ devānāṃ cātidurlabhā

devatānāṃ ca pūjyatvamasyāḥ proktaṃ ghaṭodbhava /
bhaṇḍāsura vadhāyaiṣā prādurbhūtā cidagnitaḥ

mahātripurasundaryā sūrtistejovijṛṃbhitā /
kāmākṣīti vidhātrā tu prastutā laliteśvarī

dhyāyataḥ parayā bhaktyā tāṃ parāṃ lalitāṃbikām /
sadāśivasya manaso lālanāllalitābhidhā

yadyatkṛtavatī kṛtyaṃ tatsarvaṃ viniveditam /
pūjāvidhānamakhilaṃ śāstroktenaiva vartmanā /
khaṇḍāntare vadiṣyāmi tadvilāsaṃ mahādbhutam