brahmakṛto rāmastavaḥ · Chapter 1

r
ātmānaṃ mānuṣaṃ manye rāmaṃ daśarathātmajam /
yo'haṃ yaśca yataścāhaṃ bhagavāṃstadbravītu me //६/१२०

iti bruvāṇaṃ kākutsthaṃ brahmā brahmavidāṃ varaḥ /
abravīcchṛṇu me vākyaṃ satyaṃ satyaparākrama //६/१२०

bhavānnārāyaṇo devaḥ śrīmāṃścakrāyudhaḥ prabhuḥ /
ekaśṛṅgo varāhastvaṃ bhūtabhavyasapatnajit //६/१२०

akṣaraṃ brahma satyaṃ ca madhye cānte ca rāghava /
lokānāṃ tvaṃ paro dharmo viṣvaksenaścaturbhujaḥ //६/१२०

śārṅgadhanvā hṛṣīkeśaḥ puruṣaḥ puruṣottamaḥ /
ajitaḥ khaḍgadhṛgviṣṇuḥ kṛṣṇaścaiva bṛhadbalaḥ //६/१२०

senānīrgrāmaṇīśca tvaṃ buddhiḥ sattvaṃ kṣamā damaḥ /
prabhavaścāpyayaśca tvamupendro madhusūdanaḥ //६/१२०

indrakarmā mahendrastvaṃ padmanābho raṇāntakṛt /
śaraṇyaṃ śaraṇaṃ ca tvāmāhurdivyā maharṣayaḥ //६/१२०

sahasraśṛṅgo vedātmā śataśīrṣo maharṣabhaḥ /
tvaṃ trayāṇāṃ hi lokānāmādikartā svayaṃprabhuḥ //६/१२०

siddhānāmapi sādhyānāmāśrayaścāsi pūrvajaḥ /
tvaṃ yajñastvaṃ vaṣaṭkārastvamoṃkāraḥ parātparaḥ //६/१२०

prabhavaṃ nidhanaṃ cāpi no viduḥ ko bhavāniti /
dṛśyase sarvabhūteṣu goṣu ca brāhmaṇeṣu ca //६/१२०

dikṣu sarvāsu gagane parvateṣu nadīṣu ca /
sahasracaraṇaḥ śrīmān śataśīrṣaḥ sahasradṛk //६/१२०

tvaṃ dhārayasi bhūtāni pṛthivīṃ sarvaparvatān /
ante pṛthivyāḥ salile dṛśyase tvaṃ mahoragaḥ //६/१२०

trīm̐llokān dhārayan rāma devagandharvadānavān /
ahaṃ te hṛdayaṃ rāma jihvā devī sarasvatī //६/१२०

devā romāṇi gātreṣu brahmaṇā nirmitāḥ prabho /
nimeṣaste smṛtā rātrirunmeṣo divasastathā //६/१२०

saṃskārāstvabhavan vedā naitadasti tvayā vinā /
jagat sarvaṃ śarīraṃ te sthairyaṃ te vasudhātalam //६/१२०

agniḥ kopaḥ prasādaste somaḥ śrīvatsalakṣaṇaḥ /
tvayā lokāstrayaḥ krāntāḥ purā svairvikramaistribhiḥ //६/१२०

mahendraśca kṛto rājā baliṃ baddhvā sudāruṇam /
sītā lakṣmīrbhavān viṣṇurdevaḥ kṛṣṇaḥ prajāpatiḥ //६/१२०

vadhārthaṃ rāvaṇasyeha praviṣṭo mānuṣīṃ tanum /
tadidaṃ nastvayā kāryaṃ kṛtaṃ dharmabhṛtāṃ vara //६/१२०

nihato rāvaṇo rāma prahṛṣṭo divamākrama /
amoghaṃ deva vīryaṃ te na te moghāḥ parākramāḥ //६/१२०

amoghaṃ darśanaṃ rāma amoghastava saṃstavaḥ /
amoghāste bhaviṣyanti bhaktimanto narā bhuvi //६/१२०

ye tvāṃ devaṃ dhruvaṃ bhaktāḥ purāṇaṃ puruṣottamam /
prāpnuvanti tathā kāmāniha loke paratra ca //६/१२०

imamārṣaṃ stavaṃ divyamitihāsaṃ purātanam /
ye narāḥ kīrtayiṣyanti nāsti teṣāṃ parābhavaḥ //६/१२०