baudhāyanaśulbasūtram · Chapter 1

baudhāyana śulba sūtram

atheme'gnicayāḥ

teṣāṃ bhūmeḥ parimāṇavihārānvyākhyāsyāmaḥ

athāṅgulapramāṇaṃ caturdaśāṇavaḥ catustriṃśattilāḥ pṛthusaṃśliṣṭā ityaparam / daśāṅgulaṃ kṣudrapadam / dvādaśa prādeśaḥ / pṛthottarayuge trayodaśike / padaṃ pañcadaśa / aṣṭāśītiśatamīṣā / catuḥśatamakṣaḥ / ṣaḍaśītiryugam / dvātriṃśajjānuḥ / ṣaṭtriṃśacchamyābāhū / dvipadaḥ prakramaḥ / dvau prādeśāvaratniḥ / athāpyudāharanti pade yuge prakrame'ratnāviyati śamyāyāṃ ca mānārtheṣu yāthākāmīti / pañcāratniḥ puruṣo vyāmaśca / caturaratnirvyāyāmaḥ

caturaśraṃ cikīrṣanyāvaccikīrṣettāvatīṃ rajjumubhayataḥ pāśāṃ kṛtvā madhye lakṣaṇaṃ karoti / lekhāmālikhya tasyā madhye śaṅkuṃ nihanyāt / tasminpāśau pratimucya lakṣaṇena maṇḍalaṃ parilikhet / viṣkambhāntayoḥ śaṅkū nihanyāt / pūrvasminpāśaṃ pratimucya pāśena maṇḍalaṃ parilikhet / evamaparasmiṃste yatra sameyātāṃ tena dvitīyaṃ viṣkambhamāyacchet / viṣkambhāntayoḥ śaṅkū nihanyāt / pūrvasminpāśau pratimucya lakṣaṇena maṇḍalaṃ parilikhet / evaṃ dakṣiṇata evaṃ paścādevamuttaratasteṣāṃ ye'ntyāḥ saṃsargāstaccaturaśraṃ saṃpadyate

athāparam / pramāṇāddviguṇāṃ rajjumubhayataḥ pāśāṃ kṛtvā madhye lakṣaṇaṃ karoti / sa prācyarthaḥ / aparasminnardhe caturbhāgone lakṣaṇaṃ karoti / tannyañcanam / ardheṃ'sārthaṃ / pṛṣṭhyāntayoḥ pāśau pratimucya nyañcanena dakṣiṇāpāyamyārdhena śroṇyaṃsānnirharet

dīrghacaturaśraṃ cikīrṣanyāvaccikīrṣe ttāvatyāṃ bhūmyāṃ dvau śaṅkū nihanyāt / dvau dvāvekaikamabhitaḥ samau / yāvatī tiryaṅmānī tāvatīṃ rajjumubhayataḥ pāśāṃ kṛtvā madhye lakṣaṇaṃ karoti / pūrveṣāmantyayoḥ pāśau pratimucya lakṣaṇena dakṣiṇāpāyamya lakṣaṇe lakṣaṇaṃ karoti / madhyame pāśau pratimucya lakṣaṇasyopariṣṭāddakṣiṇāpāyamya lakṣaṇe śaṅkuṃ nihanyāt / saॐ'sa etenottaraॐ'so vyākhyātastathā śroṇī

yatra purastādaṃhīyasīṃ minuyāttatra tadardhe lakṣaṇaṃ karoti

athāparam / pramāṇādadhyardhāṃ rajjumubhayataḥ pāśāṃ kṛtvāparasmiṃstṛtīye ṣaḍbhāgone lakṣaṇaṃ karoti / tannyañchanam / iṣṭeṃ'sārtham / pṛṣṭhyāntayoḥ pāśau pratimucya nyañchanena dakṣiṇāpāyamyeṣṭena śroṇyaṃsānnirharet

samacaturaśrasyākṣṇayārajjurdvistāvatīṃ bhūmiṃ karoti

pramāṇaṃ tiryagdvikaraṇyāyāmastasyākṣṇayārajjustrikaraṇī

tṛtīyakaraṇyetena vyākhyātā navamastu bhūmerbhāgo bhavatīti

dīrghacaturaśrasyākṣṇayārajjuḥ pārśvamānī tiryaṅmānī ca yatpṛthagbhūte kurutastadubhayaṃ karoti

tāsāṃ trikacatuskayordvādaśikapañcikayoḥ pañcadaśikāṣṭikayoḥ saptikacaturviṃśikayordvādaśikapañcatriṃśikayoḥ pañcadaśikaṣaṭtriṃśikayorityetāsūpalabdhiḥ

nānācaturaśre samasyankanīyasaḥ karaṇyā varṣīyaso vṛdhramullikhet / vṛdhrasyākṣṇayārajjuḥ samastayoḥ pārśvamānī bhavati

caturaśrāccaturaśraṃ nirjihīrṣanyāvannirjihīrṣettasya karaṇyā varṣīyaso vṛdhramullikhet / vṛdhrasya pārśvamānīmakṣṇayetaratpārśvamupasaṃharet / sā yatra nipatettadapacchindyāt / chinnayā nirastam

samacaturaśraṃ dīrghacaturaśraṃ cikīrṣaṃstadakṣṇayāpacchidya bhāgaṃ dvedhā vibhajya pārśvayorupadadhyādyathāyogam

api vai tasmiṃścaturaśraṃ samasya tasya karaṇyāpacchidya yadatiśiṣyate taditaratropadadhyāt

dīrghacaturaśraṃ samacaturaśraṃ cikīrṣaṃstiryaṅmānīṃ karaṇīṃ kṛtvā śeṣaṃ dvedhā vibhajya pārśvayorupadadhyāt / khaṇḍamāvāpena tatsaṃpūrayet / tasya nirhāra uktaḥ

caturaśramekato'ṇimaccikīrṣannaṇimataḥ karaṇīṃ tiryaṅmānīṃ kṛtvā śeṣamakṣṇayā vibhajya viparyasyetaratropadadhyāt

caturaśraṃ praugaṃ cikīrṣanyāvaccikīrṣeddvistāvatīṃ bhūmiṃ samacaturaśrāṃ kṛtvā pūrvasyāḥ karaṇyāḥ madhye śaṅkuṃ nihanyāt / tasminpāśau pratimucya dakṣiṇottarayoḥ śroṇyornipātayet / bahispandyamapacchindyāt

caturaśramubhayataḥ praugaṃ cikīrṣanyāvaccikīrṣeddvistāvatīṃ bhūmiṃ dīrghacaturaśrāṃ kṛtvā pūrvasyāḥ karaṇyāḥ madhye śaṅkuṃ nihanyāt / tasminpāśau pratimucya dakṣiṇottarayormadhyadeśayornipātayet / bahiḥspandyamapacchindyāt / etenāparaṃ praugaṃ vyākhyātam

caturaśraṃ maṇḍalaṃ cikīrṣannakṣṇayārdhaṃ madhyātprācīmabhyāpātayet / yadatiśiṣyate tasya saha tṛtīyena maṇḍalaṃ parilikhet

maṇḍalaṃ caturaśraṃ cikīrṣanviṣkambhamaṣṭau bhāgānkṛtvā bhāgamekonatriṃśadhā vibhajyāṣṭāviṃśatibhāgānuddharet / bhāgasya ca ṣaṣṭhamaṣṭamabhāgonam

api vā pañcadaśabhāgānkṛtvā dvāvuddharet / saiṣānityā caturaśrakaraṇī

pramāṇaṃ tṛtīyena vardhayettacca caturthenātmacatustriṃśonena / saviśeṣaḥ

athāgnyādheyike vihāre gārhapatyādāhavanīyasyāyatanam / vijñāyate'ṣṭaṣu prakrameṣu brāhmaṇo'gnimādadhītaikādaśasu rājanyo dvādaśasu vaiśya iti

āyāmatṛtīyena trīṇi caturaśrāṇyanūcīnāni kārayet / aparasyottarasyāṃ śroṇyāṃ gārhapatyaḥ / tasyaiva dakṣiṇeṃ'se'nvāhāryapacanaḥ pūrvasyottareṃ'sa āhavanīyaḥ

api vā gārhapatyāhavanīyayorantarālaṃ pañcadhā ṣoḍhā vā saṃbhujya ṣaṣṭhaṃ saptamaṃ vā bhāgamāgantukamupasamasya samaṃ traidhaṃ vibhajya pūrvasmādantād dvayorbhāgayorlakṣaṇaṃ karoti / gārhapatyāhavanīyayorantau niyamya lakṣaṇena dakṣiṇāpāyamya lakṣaṇe śaṅkuṃ nihanti / taddakṣiṇāgnerāyatanaṃ bhavati

api vā pramāṇaṃ pañcamena vardhayet / tatsarvaṃ pañcadhā saṃbhujyāparasmādantāddvayorbhāgayorlakṣaṇaṃ karoti / pṛṣṭhyāntayoḥ pāśau pratimucya lakṣaṇena dakṣiṇāpāyamya lakṣaṇe śaṅkuṃ nihanti / taddakṣi ṇāgnerāyatanaṃ bhavati

viparyastaitenotkaro vyākhyātaḥ

aparenāhavanīyaṃ yajamānamātrī bhavatīti darśapaurṇamāsikāyā vedervijñāyate

tasyāstribhāgonaṃ paścāttiraścī / tasyā evārdhaṃ purastāttiraścī / evaṃ dīrghacaturaśramekato'ṇimadvihṛtya sraktiṣu śaṅkūnnihanyāt

yāvatī pārśvamānī dvirabhyastā tāvatīṃ rajjumubhayataḥ pāśāṃ kṛtvā madhye lakṣaṇaṃ karoti / dakṣiṇayoḥ pārśvayoḥ pāśau pratimucya lakṣaṇena dakṣiṇāpāyamya lakṣaṇe śaṅkuṃ nihanyāt / tasminpāśau pratimucya lakṣaṇena dakṣiṇaṃ pārśvaṃ parilikhet / etenottaraṃ pārśvaṃ vyākhyātam / pūvaṃ pārśvaṃ tayā dvirabhyastayā parilikhet / evamaparam

daśapadā paścāttiraścī dvādaśapadā prācyaṣṭāpadā purastāttiraścīti pāśubandhikāyā vedervijñāyate / mānayogastasyā vyākhyātaḥ / rathasaṃmitetyekeṣām / virāṭsaṃpannetyekeṣām

śamyāmātrī catuḥsraktirbhavatītyuttaravedervijñāyate / samacaturaśrāviśeṣāt

vitṛtīyā vedirbhavatīti paitṛkyā vedervijñāyate / mahāvedestṛtīyena samacaturaśrakṛtāyāstṛtīyakaraṇī bhavatīti / navamastu bhūmerbhāgo bhavati / yajamānamātrī catuḥsraktirbhavatītyekeṣām / dikṣu sraktayo bhavanti

veditṛtīye yajeteti sautrāmaṇikīṃ vedimabhyupadiśanti / mahāvedestṛtīyena samacaturaśrakṛtāyā aṣṭādaśapadā pārśvamānī bhavati / tasyai dīrghakaraṇyāmekato'ṇimatkaraṇyāṃ ca yathākāmīti

prāgvaṃśaḥ ṣoḍaśaprakramāyāmo dvādaśavyāso'pi vā dvādaśaprakramāyāmo daśavyāsaḥ

tasya madhye dvādaśiko vihāraḥ

triṃśatpadāni prakramā vā paścāttiraścī bhavati ṣaṭtriṃśatprācī caturviṃśatiḥ purastāttiraścīti mahāvedervijñāyate / mānayogastasyā vyākhyātaḥ / āhavanīyātṣaṭ prakramānmahāvediḥ

tata ekasminsadaḥ / taddaśakam / udak saptaviṃśatyaratnayaḥ / aṣṭādaśetyekeṣām

tataścaturṣu havirdhānam / taddaśakaṃ dvādaśakaṃ vā mānayogastayorvyākhyātaḥ

yūpāvaṭīyācchaṅkorardhaprakramamavaśiṣyottaravediṃ vimimīte / daśapadottaravedirbhavatīti some vijñāyate / mānayogastasyā vyākhyātaḥ

cātvālaḥ śamyāmātro'parimito vā

athoparavāḥ prādeśamukhāḥ prādeśāntarālāḥ / aratnimātraṃ samacaturaśraṃ vihṛtya sraktiṣu śaṅkūnnihanyāt / ardhaprādeśenārdhaprādeśenaikaikaṃ maṇḍalaṃ parilikhet

sadasaḥ pūrvārdhāddviprakramamavaśiṣya dhiṣṇyānāṃ dviprādeśo viṣkambhastathāntarālāḥ

āgnīdhrāgārasya pārśvamānī pañcāratniḥ

etena mārjālīyo vyākhyātaḥ / tasyodīcīṃ dvāraṃ kurvanti

rathākṣāntarālā yūpāvaṭā bhavantītyekādaśinyāṃ vijñāyate / tasyā daśānāṃ ca rathākṣāṇāmekādaśānāṃ ca padānāmaṣṭāṅgulasya ca caturviṃśaṃ bhāgamādadīta / sa prakramaḥ syāt / tena vediṃ vimimīte

athāśvamedhe viṃśatyāśca rathākṣāṇāmekaviṃśatyāśca padānāmaṣṭāṅgulasya ca caturviṃśaṃ bhāgamādadīta / sa prakramaḥ syāt / tena vediṃ vimimīte

atha prācyekādaśinyāṃ yūpārthaṃ vedeḥ pūrvārdhātpadārdhavyāsamapacchidya tatpurastātprāñcaṃ dadhyāt / nātrāṣṭāṅgulaṃ vidyate / na vyatiṣaṅgaḥ

yūpāvaṭāḥ padaviṣkambhāstripadapariṇāhāni yūpoparāṇīti

ardhāṣṭamāḥ puruṣāḥ prathamo'gniḥ / ardhanavamā dvitīyaḥ / ardhadaśamāstṛtīyaḥ / evamuttarottaro vidhābhyāsa ekaśatavidhāt / tadetatsaptavidhaprabhṛtyekaśatavidhāntam

ata ūrdhvamekaśatavidhāneva pratyādadīta / anagnikānvā yajñakratūnāharet / anyatrāśvamedhāt

aśvamedhamaprāptaṃ cedāharedata ūrdhvaṃ vidhāmabhyasyennetaradādriyeta

atītaṃ cedāharedāhṛtya kṛtāntādeva pratyādadīta

kathamu khalu vidhāmabhyasyet

yadanyatprakṛtestatpañcadaśa bhāgānkṛtvā vidhāyāṃ vidhāyāṃ dvau dvau bhāgau samasyet / tābhirardhāṣṭamābhiragniṃ cinuyāt

ūrdhvapramāṇābhyāsaṃ jānoḥ pañcamasya caturviṃśenaike samāmananti

atha haika ekavidhaprabhṛtīnapakṣapucchāṃścinvate

tannopapadyate pūrvottaravirodhāt

atha haikeṣāṃ brāhmaṇaṃ bhavati śyenacidagnīnāṃ pūrvā tatiriti

athāpareṣāṃ na jyāyāṃsaṃ citvā kanīyāṃsaṃ cinvīteti

athāsmākaṃ / pakṣī bhavati / na hyapakṣaḥ patitumarhati / aratninā pakṣau drāghīyāṃsau bhavataḥ / tasmātpakṣapravayāṃsi vayāṃsi / vyāmamātrau pakṣau ca pucchaṃ ca bhavatīti

nāpakṣapucchaḥ śyeno vidyate / na cāsaptavidhasya pakṣapucchāni vidyante / na ca saptavidhaṃ citvaikavidhaprasaṅgaḥ / tasmātsaptavidha eva prathamo'gniḥ

bhedānvarjayet / adharottarayoḥ pārśvasaṃdhānaṃ bhedā ityupadiśanti / tadagnyanteṣu na vidyate na sraktipārśvayoḥ

sāhasraṃ cinvīta prathamaṃ cinvāna iti

pañcamāyāṃ vā citau saṃkhyāṃ pūrayet

dviśatāśceccikīrṣetpañcacoḍābhirnākasadaḥ samānasaṃkhyaṃ pratīyāt

paśudharmo ha vā agniḥ / yathā ha vai paśordakṣiṇeṣāmasthnāṃ yaddakṣiṇaṃ pārśvaṃ taduttareṣāmuttaraṃ yaduttareṣāṃ dakṣiṇaṃ taddakṣiṇeṣāmuttaraṃ yadavāk cordhvaṃ ca tatsamānamevamiṣṭakānāṃ rūpāṇyupadadhyāt

yā dakṣiṇāvṛto lekhāstā dakṣiṇata upadadhyāt savyāvṛta uttarataḥ / ṛjulekhāḥ paścācca purastācca bhavanti / tryālikhitā madhye / atha yā viśayasthā yathā ha vai paśoḥ pṛṣṭhavaṃśo naivaikasminpārśve vyatirekeṇa vartate naivāparasminnevaṃ tāsāmupadhānaṃ pratīyāt

athāpi brāhmaṇaṃ bhavati / prajāpatirvā atharvāgnireva dadhyaṅṅātharvaṇastasyeṣṭakā asthānīti

tasmād bahistanvaṃ ceccinuyāttanvopaplavamadhyairātmopaplavamadhyāt saṃdadhyāt

prāñcamenaṃ cinuta iti vijñāyate

amṛnmayībhiraniṣṭakābhirna saṃkhyāṃ pūrayet

iṣṭakacidvā anyo'gniḥ paśucidanya ityetasmādbrāhmaṇāt

paśurvā eṣa yadagniryoniḥ khalu vā eṣā paśorvikriyate yatprācīnamaiṣṭākādyajuḥ kriyata iti ca

lokabādhīni dravyāṇyavaṭeṣūpadadhyāt

maṇḍalamṛṣabhaṃ vikarṇīmitīṣṭakāsu lakṣmāṇi pratīyāt

iṣṭakāmantrayoriṣṭakāvyatireke lokaṃpṛṇāḥ saṃpradyante parimāṇābhāvāt

atītāneva veṣṭakāgaṇānatropadadhyāt

pañca lokaṃpṛṇāḥ

mantravyatireke'ktāḥ śarkarāḥ saṃdhiṣūpadadhyāt

prācīrupadadhāti pratīcīrupadadhātīti gaṇeṣu rītivādaḥ

prācīmupadadhāti pratīcīmupadadhātīti karturmukhavādaḥ

purastādanyāḥ pratīcīrupadadhāti paścādanyāḥ prācīrityapavargaḥ

caturaśrāsvevaitadupapadyate

na khaṇḍāmupadadhyāt / na bhinnāmupadadhyāt / na kṛṣṇāmupadadhyāt / na jīrṇāmupadadhyāt / na lakṣmaṇāmupadadhyāt / na svayamātṛṇṇāṃ svayaṃcitāvupadadhyāt

ūrdhvapramāṇamiṣṭakānāṃ jānoḥ pañcamena kārayet / ardhena nākasadāṃ pañcacoḍānāṃ ca

yacchoṣapākābhyāṃ pratihraseta purīṣeṇa tatsaṃpūrayet purīṣasyāniyataparimāṇatvāt

vyāyāmamātrī bhavatīti gārhapatyacitervijñāyate

caturaśretyekeṣāṃ / parimaṇḍaletyekeṣām

caturaśraṃ saptadhā vibhajya tiraścīṃ tredhā vibhajet / aparasminprastāra udīcīrupadadhāti

samacaturaśrāścedupadadhyādvyāyāmaṣaṣṭheneṣṭakāḥ kārayeccaturthena tṛtīyeneti / tāsāṃ nava prathamā dvādaśa dvitīyā iti pūrvasminprastāra upadadhāti / pañca tṛtīyāḥ ṣoḍaśa prathamā ityaparasmin

parimaṇḍalāyāṃ yāvatsaṃbhavettāvatsamacaturaśraṃ kṛtvā tannavadhā vibhajet pradhīṃstridhā tridheti / aparaṃ prastāraṃ tathopadadhyādyathā pradhyanīkeṣu sraktayo bhavanti

dhiṣṇyā ekacitīkāścaturaśrāḥ parimaṇḍalā vā

teṣāmāgnīdhrīyaṃ navadhā vibhajyaikasyāḥ sthāne'śmānamupadadhyāt

atha hoturdhiṣṇyaṃ navadhā vibhajya pūrvāṃstribhāgānekaikaṃ dvedhā vibhajet

athetarānnavadhā navadhā vibhajya madhyamapūrvau dvau bhāgau samasyet

atha mārjālīyaṃ tredhā vibhajya pūrvāparau bhāgau pañcadhā vibhajet

ukhyabhasmanā saṃsṛjyeṣṭakāḥ kārayediti

saṃvatsarabhṛta evaitadupapadyate na rātribhṛtaḥ

evamasya mantravatī citikḷptiḥ

chandaścitaṃ triṣāhasrasya parastāccinvīta kāmavivekāt tasya rūpaṃśyenākṛtirbhavatīti

atha vai bhavati śyenacitaṃ cinvīta suvargakāma iti

ākṛtidvaividhyam / caturāśrātmā śyenākṛtiśca

vijñāyate ubhayaṃ brāhmaṇam

pañca dakṣiṇāyāṃ śroṇyāmupadadhāti pañcottarasyām / basto vaya iti dakṣiṇeṃ'sa upadadhāti / vṛṣṇirvaya ityuttare / vyāghro vaya iti dakṣiṇe pakṣa upadadhāti / siṃho vaya ityuttare puruṣo vaya iti madhya iti ca

athāparaṃ vayasāṃ vā eṣa pratimayā cīyate yadagniriti / utpatatāṃ chāyayetyarthaḥ

samacaturaśrābhiragniṃ cinute daivyasya ca mānuṣasya ca vyāvṛttyā iti maitrāyaṇīyabrāhmaṇaṃ bhavati

tasyeṣṭakāḥ kārayet puruṣasya caturthena pañcamena ṣaṣṭhena daśameneti

athāgniṃ vimimīte

yāvānpuruṣa ūrdhvabāhustāvadantarāle veṇośchidre karoti / madhye tṛtīyaṃ / yadamutra spandyayā karoti tadiha veṇunā karoti

tasyātmā samacaturaśraścatvāraḥ puruṣāḥ / pakṣaḥ samacaturaśraḥ puruṣaḥ / sa tu dakṣiṇato'ratninā drāghīyān / etenottaraḥ pakṣo vyākhyātaḥ / pucchaḥ samacaturaśraḥ puruṣaḥ / tamavastātprādeśena vardhayet / evaṃ sāratni prādeśā saptavidhaḥ saṃpradyataḥ

upadhāne pakṣāgrāduttarataḥ puruṣatṛtīyavelāyāṃ catasraḥ pañcamyastāsāmabhito dve dve pādeṣṭake tato'ṣṭau caturthyaḥ / pakṣaśeṣaṃ ṣaḍbhāgīyābhiḥ pracchādayet / etenottaraḥ pakṣo vyākhyātaḥ

pūrvāparayoḥ pucchapārśvayoścaturbhāgīyā upadadhyāt / dakṣiṇottarayoḥ pādeṣṭakāḥ / śeṣamagniṃ pañcamabhāgīyābhiḥ pracchādayet

eṣa dviśataḥ prastāraḥ

aparasminprastāre pakṣāgrāduttarato'rdhavyāyāmavelāyāṃ tisrastisraḥ ṣaṣṭhyo dve dve dvipade iti viparyāsamupadadhyāt / tathottare

dakṣiṇasyāṃ śroṇyāṃ nava ṣaṣṭhyaścaturaśrakṛtāḥ / tathottarasyām

nava nava ṣaṣṭhyo dve dve dipade iti dakṣiṇādaṃsāduttarādaṃsādviparyāsamupadadhyāt

śeṣamagniṃ pañcamabhāgīyābhiḥ pracchādayet

eṣa dviśataḥ prastāro vyatyāsaṃ cinuyādyāvataḥ prastārāṃścikīrṣet

athāparaḥ

puruṣasya pañcamyaḥ / tā evaikato'dhyardhāḥ / tāsāmardhyāḥ pādyāśca

upadhāne / pūrvāparayoḥ pakṣapārśvayorardheṣṭakā udīcīrupadadhyāt / tathottare

dakṣiṇottarayoḥ pucchapārśvayoścatasraścatasro'dhyardhā udīcīḥ / pucchasyāvastāccatasro'rdheṣṭakā udīcīḥ / tāsāmabhito dve pādeṣṭake / jaghanena pucchāpyayorekaikāmardheṣṭakāṃ prācīm

śeṣamagniṃ pañcamabhāgīyābhiḥ pracchādayet

eṣa dviśataḥ prastāraḥ

aparasmin prastāra ātmasraktiṣu catasraḥ pādeṣṭakā upadadhyāt / tāsāmabhito dve dve ardheṣṭake / pūrvasminnanike pañca

pakṣāgrayostisrastisro'dhyardhā udīcīḥ / tāsāmantaraleṣvekaikāmardheṣṭakāṃ prācīm

śeṣamagniṃ pañcamabhāgīyābhiḥ pracchādayet

eṣa dviśataḥ prastāro vyatyāsaṃ cinuyādyāvataḥ prastārāṃścikīrṣet

atha vakrapakṣo vyastapucchaḥ

tasyeṣṭakāḥ kārayetpuruṣasya caturthyaḥ / tāsāmardhyāḥ pādyāśca / nityamakṣṇyāpacchedanamanādeśe

pādeṣṭakāścaturbhiḥ parigṛhṇīyādardhapadena padenādhyardhapadena padasaviśeṣeṇeti / te dve yathā dīrghasaṃśliṣṭe syātāṃ tathārdheṣṭakāṃ kārayet

athāgniṃ vimimīta / ātmā dvipuruṣāyāmo daśapadavyāsaḥ / tasya dakṣiṇādaṃsāduttarato'dhyardhaprakrame lakṣaṇaṃ karoti / evamaparataḥ / tayorupariṣṭātspandyāṃ niyamyāṃsamapacchindyāt / etenetarāsāṃ sraktīnāmapacchedā vyākhyātāḥ / sa ātmā

śiro'rdhaṣaṣṭhapadāyāmamardhapuruṣavyāsaṃ / tasyāṃsau prakrameṇa prakrameṇāpacchindyāt

pucchasya ṣaṭpadā prācī dvipuruṣodīcī / tasya pūrve srakti tribhistribhiḥ prakramairapacchindyāt

pakṣo dvādaśapadāyāmo daśapadavyāsaḥ / tasya madhyātprāñci ṣaṭpadāni prakramya śaṅkuṃ nihanyāt / śroṇyorekaikam / athainaṃ spandyayā paricinuyāt / antaspandyamapacchidya tatpurastāt prāñcaṃ dadhyāt / sa nirṇāmaḥ / etenottarasya pakṣasya nirṇāmo vyākhyātaḥ

pakṣāgrayoḥ prakramapramāṇāni pañca pañca caturaśrāṇyanūcīnāni kṛtvā sarvāṇyavāñcamakṣṇayāpacchindyādardhānyuddharet

evaṃ sāratniprādeśaḥ saptavidhaḥ saṃpadyataḥ

upadhāne śiraso'pyaye caturthīmupadadhyāt / haṃsamukhī purastāt / pādeṣṭake abhitaḥ / tayoravastādabhitastisrastisraścaturaśrapādyāḥ / śeṣe pādeṣṭakāḥ

api vā śiraso'gre haṃsamukhīmupadadhyāttasya avastāccaturthīmupadadhyātpādeṣṭake abhitaḥ / tayoravastādabhitastisrastisraścaturaśrapādyāḥ / śeṣe pādeṣṭakāḥ

śiraso'vastātpañcapādeṣṭakā vyatiṣaktā upadadhyāt / tathā pucchasya purastāt yadyadapacchinnaṃ tasminnardheṣṭakāḥ pādeṣṭakāścopadadhyāt

śeṣamagniṃ caturbhāgīyābhiḥ pracchādayet / pādyābhiḥ sārdhyābhiḥ saṃkhyāṃ pūrayet

eṣa dviśataḥ prastāraḥ

aparasminprastāre haṃsamukhīścatasraścatasṛbhiḥ pādeṣṭakābhiḥ saṃyojayedyathā dīrghacaturaśraṃ saṃpadyate / tattiryak svayamātṛṇṇāvakāśa upadadhyāt

haṃsamukhyau pratīcyau pucchāpyaye'rdhapadenātmani viśaye / tayoravastādabhitastisraḥ pādeṣṭakāḥ prāṅmukhīrupadadhyāt

pucchasyāvastātpañcadaśa pādeṣṭakā vyatiṣaktā upadadhyāt

pādeṣṭake ardheṣṭaketi pakṣapatrāṇāṃ prācīrvyatyāsaṃ cinuyāt

viśaye yadapacchinnaṃ tasminnardheṣṭakāḥ pādeṣṭakāścopadadhyāt

śeṣamagniṃ caturbhāgīyābhiḥ pracchādayet / pādyābhiḥ sārdhyābhiḥ saṃkhyāṃ pūrayet

athāparaḥ

puruṣasya pañcamībhiḥ śatamaśītiḥ saptārdhaṃ ca sāratniprādeśaḥ saptavidhaḥ saṃpadyate

tāsāṃ pañcāśaddve cātmanyardhacaturthyaḥ śirasi / pañcadaśa pucche / aṣṭapañcāśatsārdhyā dakṣiṇe pakṣa upadadhyāt / tathottare

ardhavyāyāmena sraktīnāmapacchedaḥ / saṃnataṃ pucchaṃ / pakṣayostribhistribhiraratnibhirapanāmaḥ / adhyardhyābhiḥ ṣaṭ ṣaṭ patrāṇi kuryāt / ākṛtiḥ śiraso nityā

atheṣṭakānāṃ vikārāḥ

puruṣasya pañcamyastā evaikato'dhyardhāḥ / tā evaikataḥ sapādāḥ / pañcamabhāgīyāyāḥ pādyāḥ sārdhyāḥ / tathādhyardhāyāḥ / tayoścāṣṭamabhāgau tathā śleṣayedyathā tisraḥ sraktayo bhavanti / pañcamabhāgīyāyāścāṣṭamyaḥ / tāni daśa

ātmani pañcamabhāgīyāḥ sārdhyā upadadhyāt / tathā pucche

pakṣayoścādhyardhāḥ sārdhyāḥ

śirasi yāḥ saṃbhavanti

aparasminprastāre pūrvayoḥ pakṣāpyayayorekaikāmubhayīmupadadhyāt / ekaikāmaparayoḥ / dve dve śirasaḥ pārśvayoḥ

pucchasyāvastādadhyardhāḥ prācīryathāvakāśam / pārśvayoḥ pādyāḥ sāṣṭamabhāgāḥ

pakṣayoścādhyardhāḥ sāvayavāḥ

śeṣaṃ yathāyogaṃ yathāsaṃkhyaṃ yathādharmaṃ copadadhyāt

kaṅkacita etenātmā pucchaṃ ca vyākhyātam

śirasi pañcopadadhyāt / tasyākṛtirvyākhyāta

saptapañcāśaddakṣiṇe pakṣa upadadhyāt / tathottare

vyāyāmena saprādeśena pakṣayorapanāmaḥ / pañcamabhāgīyārdhyābhiḥ ṣaṭ ṣaṭ patrāṇi kuryāt / adhyardhāvaśiṣyate

tayā pucchasyāvastāt pādāvaratnimātrāvaratnyantarālau prādeśavyāsau bhavataḥ / tayoravastādabhito dvaudvāvaṣṭamabhāgau prāgbhedāvupadadhyāt

evaṃ sāratniprādeśaḥ saptavidhaḥ saṃpadyate

atheṣṭakānāṃ vikārāḥ / pañcamabhāgīyāḥ sāvayavāḥ / pādeṣṭakāṃ caturbhiḥ parigṛhṇīyādardhaprādeśenādhyardhaprādeśena prādeśena prādeśasaviśeṣeneti / adhyardheṣṭakāṃ caturbhiḥ parigṛhṇīyādardhavyāyāmena dvābhyāmaratnibhyāmaratnisaviśeṣeneti / tāḥ ṣaṭ

tāsāṃ caturaśrapādyāḥ sāṣṭamabhāgāḥ pādayorupadhāya śeṣaṃ yathāyogaṃ yathāsaṃkhyaṃ yathādharmaṃ
copadadhyāt

alajacita etenātmā śiraḥ pucchaṃ ca vyākhyātaṃ pādāvapoddhṛtya

triṣaṣṭirdakṣiṇe pakṣa upadadhyāt / tathottare

puruṣeṇa pakṣayorapanāmaḥ

aparasmādapanāmātprāñcamaratniṃ mitvā tasminspandyāṃ niyamyāparaṃ pakṣapatrāpacchedamanvāyacchet

evaṃ pañca pañcamyaḥ sārdhyā uddhṛtā bhavanti

pādeṣṭakāmapanāma upadhyāya tāsāṃ caturaśra pādyāḥ sāṣṭamabhāgā apoddhṛtya
śeṣaṃ yathāyogaṃ yathāsaṃkhyaṃ yathādharmaṃ copadadhyāt

praugacitaṃ cinvīteti

yāvānagniḥ sāratniprādeśastāvatpraugaṃ kṛtvā tasyāparasyāḥ karaṇyā dvādaśeneṣṭakāstadardhavyāsāḥ kārayet / tāsāmardhyāḥ pādyāśca

tāsāṃ dve ardheṣṭake bāhyasaviśeṣe cubuka upadadhyādardhyāścāntayoḥ

śeṣamagniṃ bṛhatībhiḥ pracchādayedardheṣṭakābhiḥ saṃkhyāṃ pūrayet

aparasminprastāre'parasminnanīke saptacatvāriṃśatpādeṣṭakā vyatiṣaktā upadadhyāt

cubuka ekāṃ śūlapādyām

dīrghe cetare catasraḥ svayamātṛṇṇāvakāśa upadadhyādardhyāścāntayoḥ

śeṣamagniṃ bṛhatībhiḥ
prācībhiḥ pracchādayedardheṣṭakābhiḥ saṃkhyāṃ pūrayet

ubhayataḥ praugaṃ cinvīteti

yāvānagniḥ sāratniprādeśastāvadubhayataḥ praugaṃ kṛtvā navamena tiryaṅmānyāḥ praugacitoktā vikārāḥ

tathopadhānam

aparasminprastāre cubukayorddhve pādeṣṭake upadadhyāt / saṃdhyantayośca dīrghapādye

dīrghe cetare ca catasraḥ svayamātṛṇṇāvakāśa upadadhyādardhyāścāntayoḥ

śeṣamagniṃ bṛhatībhiḥ prācībhiḥ pracchādayedardheṣṭakābhiḥ
saṃkhyāṃ pūrayet

rathacakracitaṃ cinvīteti vijñāyate

dvayāni tu khalu rathacakrāṇi bhavanti sārāṇi ca pradhiyuktāni ca / aviśeṣātte manyāmahe'nyatarasyākṛtiriti

athāgniṃ vimimīte / yāvānagniḥ sāratniprādeśastāvatīṃ bhūmiṃ parimaṇḍalāṃ kṛtvā tasminyāvatsaṃbhavettāvatsamacaturaśraṃ kṛtvā tasya karaṇyā dvādaśeneṣṭakāḥ kārayet

tāsāṃ ṣaṭ pradhāvupadhāya śeṣamaṣṭadhā vibhajet

aparaṃ prastāraṃ tathopadadhyādyathā pradhyanīkeṣu sraktayo bhavanti

athāparaḥ

puruṣārdhātpañcadaśeneṣṭakāḥ samacaturaśrāḥ kārayenmānārthāḥ

tāsāṃ dve śate pañcaviṃśatiśca sāratniprādeśaḥ saptavidhaḥ saṃpadyate

tāsvanyāścatuḥṣaṣṭimāvapet / tābhiḥ samacaturaśraṃ karoti / tasya ṣoḍaśeṣṭakā pārśvamānī bhavati / trayastriṃśadatiśiṣyante / tābhirantānsarvaśaḥ paricinuyāt

nābhiḥ ṣoḍaśa madhyamāḥ / catuḥṣaṣṭirarāścatuḥṣaṣṭirvediḥ / nemiḥ śeṣāḥ

nābhimantataḥ parilikhet / nemimantataścāntarataśca parilikhya / neminābhyorantarālaṃ dvātriṃśaddhā vibhajya viparyāsaṃ bhāgānuddharet / evamāvāpa uddhṛto bhavati

nemiṃ catuḥṣaṣṭiṃ kṛtvā vyavalikhya madhye parikṛṣet / tā aṣṭāviṃśatiśataṃ bhavanti

arāṃścaturdhā caturdhā nābhimaṣṭadhā vibhajet

eṣa prathamaḥ prastāraḥ

aparasminprastāre nābhimantataścaturthavelāyāṃ parikṛṣet / nemimantarataḥ

nemimantarataścatuḥṣaṣṭiṃ kṛtvā vyavalikhet

arāṇāṃ pañcadhā vibhāga āparikarṣaṇayoḥ

nemyāmantarāleṣu dve dve nābhyāmantarāleṣvekaikāṃ

yaccheṣaṃ nābhestadaṣṭadhā vibhajet

sa eṣa ṣoḍaśakaraṇaḥ sāro rathacakracit

droṇacitaṃ cinvīteti vijñāyate

dvayāni tu khalu droṇāni bhavanti caturaśrāṇi ca parimaṇḍalāni ca / aviśeṣātte manyāmahe'nyatarasyākṛtiriti

athāgniṃ vimimīte / caturaśra ātmā bhavati / tasya trayaḥ puruṣāstribhāgonāḥ parśvamānī

paścāttsarurbhavati / tasyārdhapuruṣo daśāṅgulāni ca prācī / tribhāgonaḥ puruṣa udīcīti

evaṃ sāratniprādeśaḥ saptavidhaḥ saṃpadyate

atheṣṭakānāṃ vikārāḥ / puruṣasya ṣaṣṭhyastā evaikato'dhyardhāḥ / tāsāmardhyāstiryagbhedāḥ puruṣasya caturthya iti

tāsāṃ tsaruśroṇyantarālayoḥ ṣaṭ ṣaṣṭīrupadhāya śeṣamagniṃ bṛhatībhiḥ pracchādayet / ardheṣṭakābhiḥ saṃkhyāṃ pūrayet

aparasminprastāre dakṣiṇeṃ'se'dhyardhāmudīcīmupadadhyāt / tathottare

pūrvasminnanīke ṣaḍbhāgīyā upadadhyāt

dakṣiṇottarayoścaturbhāgīyāḥ

tsaroḥ purastātpārśvayorddhve caturbhāgīye upadadhyāt / tayoravastādabhito dve dve adhyardhe viṣūcī / tayoravastānmadhyadeśe dve ṣaṣṭhyau prācyau

śeṣamagniṃ bṛhatībhiḥ prācībhiḥ pracchādayet / ardheṣṭakābhiḥ saṃkhyāṃ pūrayet

athāparaḥ

puruṣasya ṣoḍaśībhirviṃśaśataṃ sāratniprādeśaḥ saptavidhaḥ saṃpadyate

tāsāmekāmapoddhṛtya śeṣāḥ parimaṇḍalaṃ karoti

tatpūrveṇa rathacakracitā vyākhyātam

ṣoḍaśīṃ purastādviśaya upadhāya tayā saha maṇḍalaṃ parilikhet

yadavastādapacchinnaṃ tatpurastādupadadhyāt

pradhīnāṃ saptadhā vibhāgaḥ

pradhimadhyamāḥ prakramavyāsā bhavanti

caturaśrāṇāmardhyābhiḥ saṃkhyāṃ pūrayet

aparasminprastāre pradhimadhyamāmoṣṭha upadhāya yadavastāttaddvedhā vibhajet

sa eṣa navakaraṇo droṇacitparimaṇḍalaḥ

samūhya paricāyyau pūrveṇa rathacakracitā vyākhyātau

samūhyasya dikṣu cātvālān khānayitvā tebhyaḥ purīṣaṃ samūhyopadadhyāt

paricāyya iṣṭakānāṃ deśabhedaḥ

taṃ sarvābhiḥ pradakṣiṇaṃ paricinuyāt

śmaśānacitaṃ cinvīteti vijñāyate

sarvamagniṃ caturaśrānpañcadaśa bhāgānkṛtvā teṣāmākhyātamupadhānam

tribhirbhāgairbhāgārdhavyāsaṃ dīrghacaturaśraṃ vihṛtya pūrvasyāḥ karaṇyā madhyācchroṇī pratyālikhyāntāvuddharet / tasya daśadhā vibhāgaḥ

tāni viṃśatiḥ sarvo'gniḥ saṃpadyate

aparasminprastāre praugamadhye'nūcīnaṃ vibhajet / tasya ṣaḍdhā vibhāgaḥ / te dve parśvayorupadadhyāt

bhāgatṛtīyāyāmaścaturthavyāsāḥ kārayet / tāsāmardhyāstiryagbhedāḥ

tā antayorupadhāya śeṣamagniṃ bṛhatībhiḥ prācībhiḥ pracchādayet / ardheṣṭakābhiḥ saṃkhyāṃ pūrayet

ūrdhvapramāṇamagneḥ pañcamena vardhayet

tatsarvaṃ tredhā vibhajya dvayorbhāgayoścaturthena vā navamena vā caturdaśena veṣṭakāḥ kārayet

tābhiścatasro vā nava vā caturdaśa vā citirupadhāya śeṣamavāñcamakṣṇayāpacchindyāt / ardhamuddharet

tasya nityo vibhāgo yathāyogamiṣṭakānāṃ hrāsavṛddhi

kūrmacitaṃ cinvīta yaḥ kāmayeta brahmalokamabhijayeyamiti / vijñāyate

dvayāḥ khalu kūrmā bhavanti vakrāṅgāśca parimaṇḍalāśca / aviśeṣātte manyāmahe'nyatarasyākṛtiriti

athāgniṃ vimimīte / caturaśra ātmā bhavati / tasya daśa prakramāḥ pārśvamānī bhavati / tasya dvābhyāṃ dvābhyāṃ prakramābhyāṃ sraktīnāmapacchedaḥ

pūrvasminnanīke prakramapramāṇāni catvāri caturaśrāṇi kṛtvā teṣāṃ ye antye te akṣṇayāpacchindyāt / evaṃ dakṣiṇata evaṃ paścādevamuttarataḥ / sa ātmā

śiraḥ pañcapadāyāmamardhapuruṣavyāsam / tasyāṃsau prakrameṇa prakrameṇāpacchindyāt

sraktyapacchede pādānunnayet / tasya dvipadākṣṇayā tiraścī taddviguṇāyāmamanūcī / tasya dvipadākṣṇayā pūrvamaṃsamapacchindyāt / etenetareṣāṃ pādānāmapacchedā vyākhyātāḥ / aparayoḥ pādayoraparāvaṃsāvapacchindyāt

evaṃ sāratniprādeśaḥ saptavidhaḥ saṃpadyate

tasyeṣṭakāḥ kārayetpuruṣasya caturthyastāsāmardhyāḥ pādyāśca

adhyardhapādyāścaturbhiḥ parigṛhṇīyātprakrameṇa dvābhyāṃ padābhyāṃ padasaviśeṣeṇeti

te dve yathā dīrghasaṃśliṣṭe syātāṃ tathaikāṃ kārayet

dvipadākṣṇayārdhena samacaturaśrāmekāṃ

upadhāne śiraso'gre caturaśrāmupadadhyāt / haṃsamukhyāvavastāt

pañca pañca caturaśrā dve dve pādeṣṭake iti pādeṣūpadadhyāt

yadyadapacchinnaṃ tasminnardheṣṭakā upadadhyāt

śeṣamagniṃ caturbhāgīyābhiḥ pracchādayet / ardheṣṭakābhiḥ saṃkhyāṃ pūrayet

aparasminprastāre śiraso'gre haṃsamukhīmupadadhyātpādeṣṭake abhitaḥ

tayoravastādabhito dve dve adhyardha pādye viṣūcī

tayoravastādabhitaśchedasaṃhite dve pādeṣṭake

dve dve dvipade tisrastisro'rdheṣṭakā iti pādeṣūpadadhyāt

yadyadapacchinnaṃ tasminnardheṣṭakāḥ pādeṣṭakaścopadadhyāt

śeṣamagniṃ caturbhāgīyābhiḥ pracchādayet/
ardheṣṭakābhiḥ saṃkhyāṃ pūrayet

athāparaḥ

puruṣasya ṣoḍaśībhirviṃśaśataṃ sāratniprādeśaḥ saptavidhaḥ saṃpadyate

tāsāṃ pañca ṣoḍaśīrapoddhṛtya śeṣāḥ parimaṇḍalaṃ karoti / taduttareṇa droṇacitā vyākhyātam

atha tāḥ pañca ṣoḍaśyastābhiravāntaradikṣu pādānunnayecchiraḥ purastāt / tāsāṃ parikarṣaṇaṃ vyākhyātam

pradhīnāṃ saptadhā vibhāgaḥ pradhimadhyamāḥ prakramavyāsā bhavanti

yadatiriktaṃ saṃpadyate taccaturaśrāṇāmadhyardhābhiryoyujyeta

aparasminprastāre pādānāṃ śirovadvibhāgaḥ śirasaḥ pādavat

vyatyāsaṃ cinuyādyāvataḥ prastārāṃścikīrṣet

kūrmasyānte tanu purīṣamupadadhyānmadhye bahulam / etadeva droṇe viparītam

atha haika ekavidhaprabhṛtīnpraugādīn bruvate

samacaturaśrāneka ācāryāḥ / tasya karaṇyā dvādaśeneṣṭakāḥ kārāyettāsāmardhyāḥ pādyāśca

athāśvamedhikasyāgneḥ puruṣābhyāso nāratniprādeśānāṃ

prākṛto vā triguṇaḥ / tristāvo'gnirbhavatītyekaviṃśo'gnirbhavatītyubhayaṃ brāhmaṇamubhayaṃ brāhmaṇam

iti baudhāyanaśulbasūtram
srotam
sambhavataḥ [http://titus.uni-frankfurt.de/texte/etcs/ind/aind/ved/yvs/baudhsbs/baudh.htm Baudhāyana-Śulba-Sūtra] (TITUS) se lekara devanāgarī meṃ parivartita karake yahām̐ rakhā gayā/