bāṣkalamantropaniṣat · Chapter 1

// atha bāṣkalamantropaniṣat //
medhātithiṃ kāṇvamindro jahāra dyā meṣabhūyopagato vidānaḥ /
tamanya ittamanaṃ pariprāṭ pada enaṃ niyuyuje parasmin

ko ha smaiṣa bhavasi vyavāyo nāvāyo ma iha śaśvadasti /
suśevamiccaṅkramasi prapaśyannitthā na kaścoraṇamācacakṣe

nemāmaspṛkṣadidudasyamānaḥ ko addhāmūmabhicaṅkramīti /
tadicchādhi yo asi sarvavittamo na tvāśnavadbrahma riṣā mayasvī

indro nṛcakṣā vṛṣabhasturāṣāṭ prasāsahistapasā mā vicakṣe /
sa iddevo ṛtamanvayantaṃ prabhīmakarmā tavaso'paviddhāt

kuheva māvaśamito nayātai kuheva te citratamapratiṣṭhā /
kuhācideṣa svapitā pitā no yo na veda na hṛtaṃ harantam

pratyaṅṅavāṅprāṅitarau ca neha nāhamenānanupatasthiraddhā /
na māmime nūnamitthā patho vidurye mā na yanti mithu cākaśānāḥ

paraḥ smiyāno avivarasya śūkaṃ kiṃ sīmiccharaṇaṃ manyamānaḥ /
na ha tvāhamapraṇīya svaviṣṭhāmitthā jahāmi śapamānaminnu

ahamasmi jaritṝṇāmu dāvā ahamāśiramahamidaṃ dadhagvān /
ahaṃ viśvā bhuvanā vicakṣannahaṃ devānāmāsannavo'daḥ

mama pratiṣṭhā bhuva āṇḍakośā vi caimi saṃ ca hi nu yo viraśpī /
ahaṃ nvahiṃ parvate śiśriyāṇamugro nvahaṃ tavasāvasyuraddhā

pravaṅkṣaṇā abhidaṃ parvatānāṃ yatsīmindrā akarodanīkaiḥ/
ko addhā veda ka iha pravocat ko aśnavadabhimātiṃ vijaghnuṣaḥ

ko me avo dāśuṣo viṣvagūtīritthā dadaśre bhuvanādhi viśvā /
rūpaṃ rūpaṃ januṣā bobhavīmi māyābhireko abhicākaśānaḥ

viśvaṃ vicakṣe yamayannabhīko neśe me kaśca mahimānamanyaḥ /
ahaṃ dyāvāpṛthivī ātatāno bibharmi dharmamavase janānām

ahamu ha pravatiṃ yajñiyāmiyāṃ
ahaṃ veda bhuvanasya nābhim /
āpiḥ pitā sūrahamasya viṣvaṅṅahaṃ divyā āntarikṣyāstukā vaham

ahaṃ vedānāmuta yajñānāmahaṃ chandasāmavidaṃ rayīṇām /
ahaṃ pacāmi sarasaḥ parasya yadidetīva sarirasya madhye

ahaminnu paramo jātavedā yamadhvaryurabhilokaṃ pṛṇaidhīt /
yamanvāha nabhaso na pakṣī kāṣṭhā bhindan gobhirito'mutaśca

ahamu yannapatatā rathena dviṣaḍāreṇa pradhinaikacakraḥ /
ahaminnu didyutāno dive dive tanvaṃ pupuṣyānamṛtaṃ vahāmi

ahaṃ diśaḥ pradiśa ādiśaśca viṣvak punānaḥ paryemi lokam /
ahaṃ viśvā oṣadhīrgarbha ādhāṃ yābhiridaṃ dhinuyurdāśuṣaḥ prajāḥ

aha carāmi bhuvanasya madhye punaruccāvacaṃ vyaśnuvānaḥ /
yo mā veda nihitaṃ guhā citsa iditthā bobhavīdāśayadhyai

ahaṃ pañcadhā daśadhā caikadhā ca sahasradhā naikadhā cāsamatra /
mayā tatamitīdamaśnute tadanyathāsadyadi me asadviduḥ

na māmaśnoti jaritā na kaścana na māmaśnoti pari gobhirābhiḥ /
na me'nāśvānuta dāśvānajagrabhītsarva inmāmupayanti viśvataḥ

kva śarāruḥ kva sṛmaraḥ kva nūraṇaḥ sarvamidaṃ tvattvadito vahāmi /
yanmadime bibhyati tanma ekaṃ te me akṣannahamu tānanukṣam

yattapyathā bahudhā me purā cittannu bhuve'hamuraṇo bobhuve /
ṛtasya panthāmasi hi prapanno'yase sa me satyamidekamehi

ahaṃ jyotirahamṛtaṃ vinaddhirahaṃ jātaṃ jani janiṣyamāṇam /
ahaṃ tvamahamahaṃ tvaminnu tvamahaṃ cakṣva vicikitsīrma ṛjvā

viśvaśāstā vidharaṇo viśvarūpo rudraḥ praṇītī tamanaḥ prajāpatiḥ /
haṃso viśoko ajaraḥ purāṇa ṛtīyamāno ahamasmi nāma

ahamasmi jaritā sarvatomukhaḥ paryāraṇaḥ parameṣṭhī nṛcakṣāḥ /
ahaṃ viṣvaṅṅahamasmi prasatvānahameko'smi yadidaṃ nu kiṃ ca