avadhūtāṣṭakam · Chapter 1

śrī paramātmane namaḥ //
atha paramahaṃsa śiromaṇi-avadhūta-śrīsvāmīśukadevastutiḥ
nirvāsanaṃ nirākāṅkṣaṃ sarvadoṣavivarjitam /
nirālambaṃ nirātaṅkaṃ hyavadhūtaṃ namāmyaham

nirmamaṃ nirahaṅkāraṃ samaloṣṭāśmakāñcanam /
samaduḥkhasukhaṃ dhīraṃ hyavadhūtaṃ namāmyaham

avināśinamātmānaṃ hyekaṃ vijñāya tatvataḥ /
vītarāgabhayakrodhaṃ hyavadhūtaṃ namāmyaham

nāhaṃ deho na me deho jīvo nāhamahaṃ hi cit /
evaṃ vijñāya santuṣṭam hyavadhūtaṃ namāmyaham

samastaṃ kalpanāmātraṃ hyātmā muktaḥ sanātanaḥ /
iti vijñāya santuṣṭaṃ hyavadhūtaṃ namāmyaham

jñānāgnidagdhakarmāṇaṃ kāmasaṅkalpavarjitam /
heyopādeyahīnaṃ taṃ hyavadhūtaṃ namāmyaham

vyāmohamātraviratau svarūpādānamātrataḥ /
vītaśokaṃ nirāyāsaṃ hyavadhūtaṃ namāmyaham

ātmā brahmeti niścitya bhāvābhāvau ca kalpitau /
udāsīnaṃ sukhāsīnaṃ hyavadhūtaṃ namāmyaham

svabhāvenaiva yo yogī sukhaṃ bhogaṃ na vāñchati /
yadṛcchālābhasantuṣṭaṃ hyavadhūtaṃ namāmyaham

naiva nindāpraśaṃsābhyāṃ yasya vikriyate manaḥ /
ātmakrīḍaṃ mahātmānaṃ hyavadhūtaṃ namāmyaham

nityaṃ jāgradavasthāyāṃ svapnavadyo'vatiṣṭhate /
niścintaṃ cinmayātmānaṃ hyavadhūtaṃ namāmyaham

dveṣyaṃ nāsti priyaṃ nāsti nāsti yasya śubhāśubham /
bhedajñānavihīnaṃ taṃ hyavadhūtaṃ namāmyaham

jaḍaṃ paśyati no yastu jagat paśyati cinmayam /
nityayuktaṃ guṇātītaṃ hyavadhūtaṃ namāmyaham

yo hi darśanamātreṇa pavate bhuvanatrayam /
pāvanaṃ jaṅgamaṃ tīrthaṃ hyavadhūtaṃ namāmyaham

niṣkalaṃ niṣkriyaṃ śāntaṃ nirmalaṃ paramāmṛtam /
anantaṃ jagadādhāraṃ hyavadhūtaṃ namāmyaham