Atharva Veda · Chapter 8.3

8.3
rakṣohaṇaṃ vājinamā jigharmi mitraṃ prathiṣṭhamupa yāmi śarma /
śiśāno agniḥ kratubhiḥ samiddhaḥ sa no divā sa riṣaḥ pātu naktam

ayodaṃṣṭro arciṣā yātudhānān upa spṛśa jātavedaḥ samiddhaḥ /
ā jihvayā mūradevān rabhasva kravyādo vṛṣṭvāpi dhatsvāsan

ubhobhayāvinn upa dhehi daṃṣṭrau hiṃsraḥ śiśāno'varaṃ paraṃ ca /
utāntarikṣe pari yāhyagne jambhaiḥ saṃ dhehyabhi yātudhānān

agne tvacaṃ yātudhānasya bhindhi hiṃsrāśanirharasā hantvenam /
pra parvāṇi jātavedaḥ śṛṇīhi kravyātkraviṣṇurvi cinotvenam

yatredānīṃ paśyasi jātavedastiṣṭhantamagna uta vā carantam /
utāntarikṣe patantaṃ yātudhānaṃ tamastā vidhya śarvā śiśānaḥ

yajñairiṣūḥ saṃnamamāno agne vācā śalyām̐ aśanibhirdihānaḥ /
tābhirvidhya hṛdaye yātudhānān pratīco bāhūn prati bhaṅgdhyeṣām

utārabdhāntspṛnuhi jātaveda utārebhāṇāmṛṣṭibhiryātudhānān /
agne pūrvo ni jahi śośucāna āmādaḥ kṣviṅkāstamadantvenīḥ

iha pra brūhi yatamaḥ so agne yātudhāno ya idaṃ kṛṇoti /
tamā rabhasva samidhā yaviṣṭha nṛcakṣasaścakṣuṣe randhayainam

tīkṣṇenāgne cakṣuṣā rakṣa yajñaṃ prāñcaṃ vasubhyaḥ pra ṇaya pracetaḥ /
hiṃsraṃ rakṣāṃsyabhi śośucānaṃ mā tvā dabhan yātudhānā nṛcakṣaḥ

nṛcakṣā rakṣaḥ pari paśya vikṣu tasya trīṇi prati śṛṇīhyagrā /
tasyāgne pṛṣṭīrharasā śṛṇīhi tredhā mūlaṃ yātudhānasya vṛśca

triryātudhānaḥ prasitiṃ ta etvṛtaṃ yo agne anṛtena hanti /
tamarciṣā sphūrjayan jātavedaḥ samakṣamenaṃ gṛṇate ni yuṅgdhi

yadagne adya mithunā śapāto yadvācastṛṣṭaṃ janayanta rebhāḥ /
manyormanasaḥ śaravyā jāyate yā tayā vidhya hṛdaye yātudhānān

parā śṛṇīhi tapasā yātudhānān parāgne rakṣo harasā śṛṇīhi /
parārciṣā mūradevān chṛṇīhi parāsutṛpaḥ śośucataḥ śṛṇīhi

parādya devā vṛjinaṃ śṛṇantu pratyagenaṃ śapathā yantu sṛṣṭāḥ /
vācāstenaṃ śarava ṛcchantu marman viśvasyaitu prasitiṃ yātudhānaḥ

yaḥ pauruṣeyeṇa kraviṣā samaṅkte yo aśvyena paśunā yātudhānaḥ /
yo aghnyāyā bharati kṣīramagne teṣāṃ śīrṣāṇi harasāpi vṛśca

viṣaṃ gavāṃ yātudhānā bharantāmā vṛścantāmaditaye durevāḥ /
paraiṇān devaḥ savitā dadātu parā bhāgamoṣadhīnāṃ jayantām

saṃvatsarīṇaṃ paya usriyāyāstasya māśīdyātudhāno nṛcakṣaḥ /
pīyūṣamagne yatamastitṛpsāttaṃ pratyañcamarciṣā vidhya marmaṇi

sanādagne mṛṇasi yātudhānān na tvā rakṣāṃsi pṛtanāsu jigyuḥ /
sahamūrān anu daha kravyādo mā te hetyā mukṣata daivyāyāḥ

tvaṃ no agne adharādudaktastvaṃ paścāduta rakṣā purastāt/
prati tye te ajarāsastapiṣṭhā aghaśaṃsaṃ śośucato dahantu

paścātpurastādadharādutottarātkaviḥ kāvyena pari pāhyagne /
sakhā sakhāyamajaro jarimne agne martāmamartyastvaṃ naḥ

tadagne cakṣuḥ prati dhehi rebhe śaphārujo yena paśyasi yātudhānān /
atharvavajjyotiṣā daivyena satyaṃ dhūrvantamacitaṃ nyoṣa

pari tvāgne puraṃ vayaṃ vipraṃ sahasya dhīmahi /
dhṛṣadvarṇaṃ divedive hantāraṃ bhaṅgurāvataḥ

viṣeṇa bhaṅgurāvataḥ prati sma rakṣaso jahi /
agne tigmena śociṣā tapuragrābhirarcibhiḥ

vi jyotiṣā bṛhatā bhātyagnirāvirviśvāni kṛṇute mahitvā /
prādevīrmāyāḥ sahate durevāḥ śiśīte śṛṅge rakṣobhyo vinikṣe

ye te śṛṅge ajare jātavedastigmahetī brahmasaṃśite /
tābhyāṃ durhārdamabhidāsantaṃ kimīdinam /
pratyañcamarciṣā jātavedo vi nikṣva

agnī rakṣāṃsi sedhati śukraśociramartyaḥ /
śuciḥ pāvaka īḍyaḥ