અથર્વવેદ · અધ્યાય 8.3

8.3
રક્ષોહણં વાજિનમા જિઘર્મિ મિત્રં પ્રથિષ્ઠમુપ યામિ શર્મ ।
શિશાનો અગ્નિઃ ક્રતુભિઃ સમિદ્ધઃ સ નો દિવા સ રિષઃ પાતુ નક્તમ્

અયોદંષ્ટ્રો અર્ચિષા યાતુધાનાન્ ઉપ સ્પૃશ જાતવેદઃ સમિદ્ધઃ ।
આ જિહ્વયા મૂરદેવાન્ રભસ્વ ક્રવ્યાદો વૃષ્ટ્વાપિ ધત્સ્વાસન્

ઉભોભયાવિન્ન્ ઉપ ધેહિ દંષ્ટ્રૌ હિંસ્રઃ શિશાનોઽવરં પરં ચ ।
ઉતાન્તરિક્ષે પરિ યાહ્યગ્ને જમ્ભૈઃ સં ધેહ્યભિ યાતુધાનાન્

અગ્ને ત્વચં યાતુધાનસ્ય ભિન્ધિ હિંસ્રાશનિર્હરસા હન્ત્વેનમ્ ।
પ્ર પર્વાણિ જાતવેદઃ શૃણીહિ ક્રવ્યાત્ક્રવિષ્ણુર્વિ ચિનોત્વેનમ્

યત્રેદાનીં પશ્યસિ જાતવેદસ્તિષ્ઠન્તમગ્ન ઉત વા ચરન્તમ્ ।
ઉતાન્તરિક્ષે પતન્તં યાતુધાનં તમસ્તા વિધ્ય શર્વા શિશાનઃ

યજ્ઞૈરિષૂઃ સંનમમાનો અગ્ને વાચા શલ્યાઁ અશનિભિર્દિહાનઃ ।
તાભિર્વિધ્ય હૃદયે યાતુધાનાન્ પ્રતીચો બાહૂન્ પ્રતિ ભઙ્ગ્ધ્યેષામ્

ઉતારબ્ધાન્ત્સ્પૃનુહિ જાતવેદ ઉતારેભાણામૃષ્ટિભિર્યાતુધાનાન્ ।
અગ્ને પૂર્વો નિ જહિ શોશુચાન આમાદઃ ક્ષ્વિઙ્કાસ્તમદન્ત્વેનીઃ

ઇહ પ્ર બ્રૂહિ યતમઃ સો અગ્ને યાતુધાનો ય ઇદં કૃણોતિ ।
તમા રભસ્વ સમિધા યવિષ્ઠ નૃચક્ષસશ્ચક્ષુષે રન્ધયૈનમ્

તીક્ષ્ણેનાગ્ને ચક્ષુષા રક્ષ યજ્ઞં પ્રાઞ્ચં વસુભ્યઃ પ્ર ણય પ્રચેતઃ ।
હિંસ્રં રક્ષાંસ્યભિ શોશુચાનં મા ત્વા દભન્ યાતુધાના નૃચક્ષઃ

નૃચક્ષા રક્ષઃ પરિ પશ્ય વિક્ષુ તસ્ય ત્રીણિ પ્રતિ શૃણીહ્યગ્રા ।
તસ્યાગ્ને પૃષ્ટીર્હરસા શૃણીહિ ત્રેધા મૂલં યાતુધાનસ્ય વૃશ્ચ

ત્રિર્યાતુધાનઃ પ્રસિતિં ત એત્વૃતં યો અગ્ને અનૃતેન હન્તિ ।
તમર્ચિષા સ્ફૂર્જયન્ જાતવેદઃ સમક્ષમેનં ગૃણતે નિ યુઙ્ગ્ધિ

યદગ્ને અદ્ય મિથુના શપાતો યદ્વાચસ્તૃષ્ટં જનયન્ત રેભાઃ ।
મન્યોર્મનસઃ શરવ્યા જાયતે યા તયા વિધ્ય હૃદયે યાતુધાનાન્

પરા શૃણીહિ તપસા યાતુધાનાન્ પરાગ્ને રક્ષો હરસા શૃણીહિ ।
પરાર્ચિષા મૂરદેવાન્ છૃણીહિ પરાસુતૃપઃ શોશુચતઃ શૃણીહિ

પરાદ્ય દેવા વૃજિનં શૃણન્તુ પ્રત્યગેનં શપથા યન્તુ સૃષ્ટાઃ ।
વાચાસ્તેનં શરવ ઋચ્છન્તુ મર્મન્ વિશ્વસ્યૈતુ પ્રસિતિં યાતુધાનઃ

યઃ પૌરુષેયેણ ક્રવિષા સમઙ્ક્તે યો અશ્વ્યેન પશુના યાતુધાનઃ ।
યો અઘ્ન્યાયા ભરતિ ક્ષીરમગ્ને તેષાં શીર્ષાણિ હરસાપિ વૃશ્ચ

વિષં ગવાં યાતુધાના ભરન્તામા વૃશ્ચન્તામદિતયે દુરેવાઃ ।
પરૈણાન્ દેવઃ સવિતા દદાતુ પરા ભાગમોષધીનાં જયન્તામ્

સંવત્સરીણં પય ઉસ્રિયાયાસ્તસ્ય માશીદ્યાતુધાનો નૃચક્ષઃ ।
પીયૂષમગ્ને યતમસ્તિતૃપ્સાત્તં પ્રત્યઞ્ચમર્ચિષા વિધ્ય મર્મણિ

સનાદગ્ને મૃણસિ યાતુધાનાન્ ન ત્વા રક્ષાંસિ પૃતનાસુ જિગ્યુઃ ।
સહમૂરાન્ અનુ દહ ક્રવ્યાદો મા તે હેત્યા મુક્ષત દૈવ્યાયાઃ

ત્વં નો અગ્ને અધરાદુદક્તસ્ત્વં પશ્ચાદુત રક્ષા પુરસ્તાત્।
પ્રતિ ત્યે તે અજરાસસ્તપિષ્ઠા અઘશંસં શોશુચતો દહન્તુ

પશ્ચાત્પુરસ્તાદધરાદુતોત્તરાત્કવિઃ કાવ્યેન પરિ પાહ્યગ્ને ।
સખા સખાયમજરો જરિમ્ને અગ્ને મર્તામમર્ત્યસ્ત્વં નઃ

તદગ્ને ચક્ષુઃ પ્રતિ ધેહિ રેભે શફારુજો યેન પશ્યસિ યાતુધાનાન્ ।
અથર્વવજ્જ્યોતિષા દૈવ્યેન સત્યં ધૂર્વન્તમચિતં ન્યોષ

પરિ ત્વાગ્ને પુરં વયં વિપ્રં સહસ્ય ધીમહિ ।
ધૃષદ્વર્ણં દિવેદિવે હન્તારં ભઙ્ગુરાવતઃ

વિષેણ ભઙ્ગુરાવતઃ પ્રતિ સ્મ રક્ષસો જહિ ।
અગ્ને તિગ્મેન શોચિષા તપુરગ્રાભિરર્ચિભિઃ

વિ જ્યોતિષા બૃહતા ભાત્યગ્નિરાવિર્વિશ્વાનિ કૃણુતે મહિત્વા ।
પ્રાદેવીર્માયાઃ સહતે દુરેવાઃ શિશીતે શૃઙ્ગે રક્ષોભ્યો વિનિક્ષે

યે તે શૃઙ્ગે અજરે જાતવેદસ્તિગ્મહેતી બ્રહ્મસંશિતે ।
તાભ્યાં દુર્હાર્દમભિદાસન્તં કિમીદિનમ્ ।
પ્રત્યઞ્ચમર્ચિષા જાતવેદો વિ નિક્ષ્વ

અગ્ની રક્ષાંસિ સેધતિ શુક્રશોચિરમર્ત્યઃ ।
શુચિઃ પાવક ઈડ્યઃ