Atharva Veda · Chapter 7.62

ūrjaṃ bibhradvasuvaniḥ sumedhā aghoreṇa cakṣuṣā mitriyeṇa /
gṛhān aimi sumanā vandamāno ramadhvaṃ mā bibhīta mat

ime gṛhā mayobhuva ūrjasvantaḥ payasvantaḥ /
pūrṇā vāmena tiṣṭhantaste no jānantvāyataḥ

yeṣāmadhyeti pravasan yeṣu saumanaso bahuḥ /
gṛhān upa hvayāmahe te no jānantvāyataḥ

upahūtā bhūridhanāḥ sakhāyaḥ svādusaṃmudaḥ /
akṣudhyā atṛṣyā sta gṛhā māsmadbibhītana

upahūtā iha gāva upahūtā ajāvayaḥ /
atho annasya kīlāla upahūto gṛheṣu

sūnṛtāvantaḥ subhagā irāvanto hasāmudāḥ /
atṛṣyā akṣudhyā sta gṛhā māsmadbibhītana

ihaiva sta mānu gāta viśvā rūpāṇi puṣyata /
aiṣyāmi bhadreṇā saha bhūyāṃso bhavatā mayā