Atharva Veda · Chapter 7

sūktam १
sūktam २
sūktam ३
sūktam ४
sūktam ५
sūktam ६
sūktam ७
sūktam ८
sūktam ९
sūktam १०
sūktam ११
sūktam १२
sūktam १३
sūktam १४
sūktam १५
sūktam १६
sūktam १७
sūktam १८
sūktam १९
sūktam २०
sūktam २१
sūktam २२
sūktam २३
sūktam २४
sūktam २५
sūktam २६
sūktam २७
sūktam २८
sūktam २९
sūktam ३०
sūktam ३१
sūktam ३२
sūktam ३३
sūktam ३४
sūktam ३५
sūktam ३६
sūktam ३७
sūktam ३८
sūktam ३९
sūktam ४०
sūktam ४१
sūktam ४२
sūktam ४३
sūktam ४४
sūktam ४५
sūktam ४६
sūktam ४७
sūktam ४८
sūktam ४९
sūktam ५०
sūktam ५१
sūktam ५२
sūktam ५३
sūktam ५४
sūktam ५५
sūktam ५६
sūktam ५७
sūktam ५८
sūktam ५९
sūktam ६०
sūktam ६१
sūktam ६२
sūktam ६३
sūktam ६४
sūktam ६५
sūktam ६६
sūktam ६७
sūktam ६८
sūktam ६९
sūktam ७०
sūktam ७१
sūktam ७२
sūktam ७३
sūktam ७४
sūktam ७५
sūktam ७६
sūktam ७७
sūktam ७८
sūktam ७९
sūktam ८०
sūktam ८१
sūktam ८२
sūktam ८३
sūktam ८४
sūktam ८५
sūktam ८६
sūktam ८७
sūktam ८८
sūktam ८९
sūktam ९०
sūktam ९१
sūktam ९२
sūktam ९३
sūktam ९४
sūktam ९५
sūktam ९६
sūktam ९७
sūktam ९८
sūktam ९९
sūktam १००
sūktam १०१
sūktam १०२
sūktam १०३
sūktam १०४
sūktam १०५
sūktam १०६
sūktam १०७
sūktam १०८
sūktam १०९
sūktam ११०
sūktam १११
sūktam ११२
sūktam ११३
sūktam ११४
sūktam ११५
sūktam ११६
sūktam ११७
sūktam ११८
sūktam ११९
sūktam १२०
sūktam १२१
sūktam १२२
sūktam १२३
7.1
dhītī vā ye anayan vāco agraṃ manasā vā ye'vadann ṛtāni /
tṛtīyena brahmaṇā vāvṛdhānāsturīyeṇāmanvata nāma dhenoḥ

sa veda putraḥ pitaraṃ sa mātaraṃ sa sūnurbhuvatsa bhuvatpunarmaghaḥ /
sa dyāmaurṇodantarikṣaṃ svaḥ sa idaṃ viśvamabhavatsa ābharat

7.2
atharvāṇaṃ pitaraṃ devabandhuṃ māturgarbhaṃ piturasuṃ yuvānam /
ya imaṃ yajñaṃ manasā ciketa pra ṇo vocastamiheha bravaḥ

7.3
ayā viṣṭhā janayan karvarāṇi sa hi ghṛṇirururvarāya gātuḥ /
sa pratyudaiddharuṇaṃ madhvo agraṃ svayā tanvā tanvamairayata

7.4
ekayā ca daśabhiśca suhute dvābhyāmiṣṭaye viṃśatyā ca /
tisṛbhiśca vahase triṃśatā ca viyugbhirvāya iha tā vi muñca

7.5
yajñena yajñamayajanta devāstāni dharmāṇi prathamānyāsan /
te ha nākaṃ mahimānaḥ sacanta yatra pūrve sādhyāḥ santi devāḥ

yajño babhūva sa ā babhūva sa pra jajñe sa u vāvṛdhe punaḥ /
sa devānāmadhipatirbabhūva so asmāsu draviṇamā dadhātu

yaddevā devān haviṣā'yajantāmartyān manasā martyena /
madema tatra parame vyoman paśyema taduditau sūryasya

yatpuruṣeṇa haviṣā yajñaṃ devā atanvata /
asti nu tasmādojīyo yadvihavyenejire

mugdhā devā uta śunā'yajantota goraṅgaiḥ purudhā'yajanta /
ya imaṃ yajñaṃ manasā ciketa pra ṇo vocastamiheha bravaḥ

7.6
aditirdyauraditirantarikṣamaditirmātā sa pitā sa putraḥ /
viśve devā aditirpañca janā aditirjātamaditirjanitvam

mahīmū ṣu mātaraṃ suvratānāmṛtasya patnīmavase havāmahe /
tuvikṣatrāmajarantīmurūcīṃ suśarmāṇamaditiṃ supraṇītim

sutrāmāṇaṃ pṛthivīṃ dyāmanehasaṃ suśarmāṇamaditiṃ supraṇītim /
daivīṃ nāvaṃ svaritrāmanāgaso asravantīmā ruhemā svastaye

vājasya nu prasave mātaraṃ mahīmaditiṃ nāma vacasā karāmahe /
yasyā upastha urvantarikṣaṃ sā naḥ śarma trivarūthaṃ ni yachāt

7.7
diteḥ putrāṇāmaditerakāriṣamava devānāṃ bṛhatāmanarmaṇām /
teṣāṃ hi dhāma gabhiṣaksamudriyaṃ nainān namasā paro asti kaścana

7.8
bhadrādadhi śreyaḥ prehi bṛhaspatiḥ puraetā te astu /
athemamasyā vara ā pṛthivyā āreśatruṃ kṛṇuhi sarvavīram

7.9
prapathe pathāmajaniṣṭa pūṣā prapathe divaḥ prapathe pṛthivyāḥ /
ubhe abhi priyatame sadhasthe ā ca parā ca carati prajānan

pūṣemā āśā anu veda sarvāḥ so asmām̐ abhayatamena neṣat/
svastidā āghṛṇiḥ sarvavīro'prayucchan pura etu prajānan

pūṣan tava vrate vayaṃ na riṣyema kadā cana /
stotārasta iha smasi

pari pūṣā parastāddhastaṃ dadhātu dakṣiṇam /
punarno naṣṭamājatu saṃ naṣṭena gamemahi

7.10
yaste stanaḥ śaśayuryo mayobhūryaḥ sumnayuḥ suhavo yaḥ sudatraḥ /
yena viśvā puṣyasi vāryāṇi sarasvati tamiha dhātave kaḥ

7.11
yaste pṛthu stanayitnurya ṛṣvo daivaḥ keturviśvamābhūṣatīdam /
mā no vadhīrvidyutā deva sasyaṃ mota vadhī raśmibhiḥ sūryasya

7.12
sabhā ca mā samitiścāvatāṃ prajāpaterduhitarau saṃvidāne /
yenā saṃgachā upa mā sa śikṣāccāru vadāni pitaraḥ saṃgateṣu

vidma te sabhe nāma nariṣṭā nāma vā asi /
ye te ke ca sabhāsadaste me santu savācasaḥ

eṣāmahaṃ samāsīnānāṃ varco vijñānamā dade /
asyāḥ sarvasyāḥ saṃsado māmindra bhaginaṃ kṛṇu

yadvo manaḥ parāgataṃ yadbaddhamiha veha vā /
tadva ā vartayāmasi mayi vo ramatāṃ manaḥ

7.13
yathā sūryo nakṣatrāṇāmudyaṃstejāṃsyādade /
evā strīṇāṃ ca puṃsāṃ ca dviṣatāṃ varca ā dade

yāvanto mā sapatnānāmāyantaṃ pratipaśyatha /
udyantsūrya iva suptānāṃ dviṣatāṃ varca ā dade

7.14
abhi tyaṃ devaṃ savitāramoṇyoḥ kavikratum /
arcāmi satyasavaṃ ratnadhāmabhi priyaṃ matim

urdhvā yasyāmatirbhā adidyutatsavīmani /
hiraṇyapāṇiramimīta sukratuḥ kṛpātsvaḥ

sāvīrhi deva prathamāya pitre varṣmāṇamasmai varimāṇamasmai /
athāsmabhyaṃ savitarvāryāṇi divodiva ā suvā bhūri paśvaḥ

damūnā devaḥ savitā vareṇyo dadhadratnaṃ pitṛbhya āyūṃṣi /
pibātsomaṃ mamadadenamiṣṭe parijmā citkramate asya dharmaṇi

7.15
tāṃ savitaḥ satyasavāṃ sucitrāmāhaṃ vṛṇe sumatiṃ viśvavārām /
yāmasya kaṇvo aduhatprapīnāṃ sahasradhārāṃ mahiṣo bhagāya

7.16
bṛhaspate savitarvardhayainaṃ jyotayainaṃ mahate saubhagāya /
saṃśitaṃ citsaṃtaraṃ saṃ śiśādhi viśva enamanu madantu devāḥ

7.17
dhātā dadhātu no rayimīśāno jagataspatiḥ /
sa naḥ pūrṇena yacchatu

dhātā dadhātu dāśuṣe prācīṃ jīvātumakṣitām /
vayaṃ devasya dhīmahi sumatiṃ viśvarādhasaḥ

dhātā viśvā vāryā dadhātu prajākāmāya dāśuṣe duroṇe /
tasmai devā amṛtaṃ saṃ vyayantu viśve devā aditiḥ sajoṣāḥ

dhātā rātiḥ savitedaṃ juṣantāṃ prajāpatirnidhipatirno agniḥ /
tvaṣṭā viṣṇuḥ prajayā saṃrarāṇo yajamānāya draviṇaṃ dadhātu

7.18
pra nabhasva pṛthivi bhinddhīdaṃ divyaṃ nabhaḥ /
udno divyasya no dhātarīśāno vi ṣyā dṛtim

na ghraṃstatāpa na himo jaghāna pra nabhatāṃ pṛthivī jīradānuḥ /
āpaścidasmai ghṛtamitkṣaranti yatra somaḥ sadamittatra bhadram

7.19
prajāpatirjanayati prajā imā dhātā dadhātu sumanasyamānaḥ /
saṃjānānāḥ saṃmanasaḥ sayonayo mayi puṣṭaṃ puṣṭapatirdadhātu

7.20
anvadya no'numatiryajñaṃ deveṣu manyatām /
agniśca havyavāhano bhavatāṃ dāśuṣe mama

anvidanumate tvaṃ maṃsase śaṃ ca naskṛdhi /
juṣasva havyamāhutaṃ prajāṃ devi rarāsva naḥ

anu manyatāmanumanyamānaḥ prajāvantaṃ rayimakṣīyamāṇam /
tasya vayaṃ heḍasi māpi bhūma sumṛḍīke asya sumatau syāma

yatte nāma suhavaṃ supraṇīte'numate anumataṃ sudānu /
tenā no yajñaṃ pipṛhi viśvavāre rayiṃ no dhehi subhage suvīram

emaṃ yajñamanumatirjagāma sukṣetratāyai suvīratāyai sujātam /
bhadrā hyasyāḥ pramatirbabhūva semaṃ yajñamavatu devagopā

anumatiḥ sarvamidaṃ babhūva yattiṣṭhati carati yadu ca viśvamejati /
tasyāste devi sumatau syāmānumate anu hi maṃsase naḥ

7.21
sameta viśve vacasā patiṃ diva eko vibhūratithirjanānām /
sa pūrvyo nūtanamāvivāsattaṃ vartaniranu vāvṛta ekamitpuru

7.22
ayaṃ sahasramā no dṛśe kavīnāṃ matirjyotirvidharmaṇi

bradhnaḥ samīcīruṣasaḥ samairayan /
arepasaḥ sacetasaḥ svasare manyumattamāścite goḥ

7.23
dauṣvapnyaṃ daurjīvityaṃ rakṣo abhvamarāyyaḥ /
durṇāmnīḥ sarvā durvācastā asman nāśayāmasi

7.24
yan na indro akhanadyadagnirviśve devā maruto yatsvarkāḥ /
tadasmabhyaṃ savitā satyadharmā prajāpatiranumatirni yachāt

7.25
yayorojasā skabhitā rajāṃsi yau vīryairvīratamā śaviṣṭhā /
yau patyete apratītau sahobhirviṣṇumagan varuṇaṃ pūrvahūtiḥ

yasyedaṃ pradiśi yadvirocate pra cānati vi ca caṣṭe śacībhiḥ /
purā devasya dharmaṇā sahobhirviṣṇumagan varuṇaṃ pūrvahūtiḥ

7.26
viṣṇornu kaṃ prā vocaṃ vīryāṇi yaḥ pārthivāni vimame rajāṃsi /
yo askabhāyaduttaraṃ sadhasthaṃ vicakramāṇastredhorugāyaḥ

pra tadviṣṇu stavate vīryāṇi mṛgo na bhīmaḥ kucaro giriṣṭhāḥ /
parāvata ā jagamyātparasyāḥ

yasyoruṣu triṣu vikramaneṣvadhikṣiyanti bhuvanāni viśvā /
uru viṣṇo vi kramasvoru kṣayāya naskṛdhi /
ghṛtaṃ ghṛtayone piba prapra yajñapatiṃ tira

idaṃ viṣṇurvi cakrame tredhā ni dadhe padā /
samūḍhamasya paṃsure

trīṇi padā vi cakrame viṣṇurgopā adābhyaḥ /
ito dharmāṇi dhārayan

viṣṇoḥ karmāṇi paśyata yato vratāni paspaśe /
indrasya yujyaḥ sakhā

tadviṣṇoḥ paramaṃ padaṃ sadā paśyanti sūrayaḥ /
divīva cakṣurātatam

divo viṣṇa uta pṛthivyā maho viṣṇa urorantarikṣāt/
hastau pṛṇasva bahubhirvasavyairāprayaccha dakṣiṇādota savyāt

7.27
iḍaivāsmāmanu vastāṃ vratena yasyāḥ pade punate devayantaḥ /
ghṛtapadī śakvarī somapṛṣṭhopa yajñamasthita vaiśvadevī

7.28
vedaḥ svastirdrughaṇaḥ svastiḥ paraśurvediḥ paraśurnaḥ svasti /
haviṣkṛto yajñiyā yajñakāmāste devāso yajñamimaṃ juṣantām

7.29
agnāviṣṇū mahi tadvāṃ mahitvaṃ pātho ghṛtasya guhyasya nāma /
damedame sapta ratnā dadhānau prati vāṃ jihvā ghṛtamā caraṇyāt

agnāviṣṇū mahi dhāma priyaṃ vāṃ vītho ghṛtasya guhyā juṣāṇau /
damedame suṣṭutyā vāvṛdhānau prati vāṃ jihvā ghṛtamuccaraṇyāt

7.30
svāktaṃ me dyāvāpṛthivī svāktaṃ mitro akarayam /
svāktaṃ me brahmaṇaspatiḥ svāktaṃ savitā karat

7.31
indrotibhirbahulābhirno adya yāvacchreṣṭhābhirmaghavan chūra jinva /
yo no dveṣṭyadhara saspadīṣṭa yamu dviṣmastamu prāṇo jahātu

7.32
upa priyaṃ panipnataṃ yuvānamāhutīvṛdham /
aganma bibhrato namo dīrghamāyuḥ kṛṇotu me

7.33
saṃ mā siñcantu marutaḥ saṃ pūṣā saṃ bṛhaspatiḥ /
saṃ māyamagniḥ siñcatu prajayā ca dhanena ca dīrghamāyuḥ kṛṇotu me

7.34
agne jātān pra ṇudā me sapatnān pratyajātān jātavedo nudasva /
adhaspadaṃ kṛṇuṣva ye pṛtanyavo'nāgasaste vayamaditaye syāma

7.35
prānyāntsapatnāntsahasā sahasva pratyajātān jātavedo nudasva /
idaṃ rāṣṭraṃ pipṛhi saubhagāya viśva enamanu madantu devāḥ

imā yāste śataṃ hirāḥ sahasraṃ dhamanīruta /
tāsāṃ te sarvāsāmahamaśmanā bilamapyadhām

paraṃ yoneravaraṃ te kṛṇomi mā tvā prajābhi bhūn mota sūtuḥ /
asvaṃ tvāprajasaṃ kṛṇomyaśmānaṃ te apidhānaṃ kṛṇomi

7.36
akṣyau nau madhusaṃkāśe anīkaṃ nau samañjanam /
antaḥ kṛṣṇuṣva māṃ hṛdi mana in nau sahāsati

7.37
abhi tvā manujātena dadhāmi mama vāsasā /
yāthā'so mama kevalo nānyāsāṃ kīrtayāścana

7.38
idaṃ khanāmi bheṣajaṃ māṃpaśyamabhirorudam /
parāyato nivartanamāyataḥ pratinandanam

yenā nicakra āsurīndraṃ devebhyaspari /
tenā ni kurve tvāmahaṃ yathā te'sāni supriyā

pratīcī somamasi pratīcī uta sūryam /
pratīcī viśvān devān tāṃ tvāchāvadāmasi

ahaṃ vadāmi nettvaṃ sabhāyāmaha tvaṃ vada /
mamedasastvaṃ kevalo nānyāsāṃ kīrtayāścana

yadi vāsi tirojanaṃ yadi vā nadyastiraḥi /
iyaṃ ha mahyaṃ tvāmoṣadhirbaddhveva nyānayat

7.39
divyaṃ suparṇaṃ payasaṃ bṛhantamapāṃ garbhaṃ vṛṣabhamoṣadhīnām /
abhīpato vṛṣṭyā tarpayantamā no goṣṭhe rayiṣṭhāṃ sthāpayāti

7.40
yasya vrataṃ paśavo yanti sarve yasya vrata upatiṣṭhanta āpaḥ /
yasya vrate puṣṭapatirniviṣṭastaṃ sarasvantamavase havāmahe

ā pratyañcaṃ dāśuṣe dāśvaṃsaṃ sarasvantaṃ puṣṭapatiṃ rayiṣṭhām /
rāyaspoṣaṃ śravasyuṃ vasānā iha sadanaṃ rayīṇām

7.41
ati dhanvānyatyapastatarda śyeno nṛcakṣā avasānadarśaḥ /
taran viśvānyavarā rajaṃsīndreṇa sakhyā śiva ā jagamyāt

śyeno nṛcakṣā divyaḥ suparṇaḥ sahasrapācchatayonirvayodhāḥ /
sa no ni yachādvasu yatparābhṛtamasmākamastu pitṛṣu svadhāvat

7.42
somārudrā vi vṛhataṃ viṣūcīmamīvā yā no gayamāviveśa /
bādhethāṃ dūraṃ nirṛtiṃ parācaiḥ kṛtaṃ cidenaḥ pra mumuktamasmat

somārudrā yuvametānyasmadviśvā tanūṣu bheṣajāni dhattam /
ava syataṃ muñcataṃ yan no asattanūṣu baddhaṃ kṛtameno asmat

7.43
śivāsta ekā aśivāsta ekāḥ sarvā bibharṣi sumanasyamānaḥ /
tisro vāco nihitā antarasmin tāsāmekā vi papātānu ghoṣam

7.44
ubhā jigyathurna parā jayethe na parā jigye kataraścanainayoḥ /
indraśca viṣṇo yadapaspṛdhethāṃ tredhā sahasraṃ vi tadairayethām

7.45
janādviśvajanīnātsindhutasparyābhṛtam /
dūrāttvā manya udbhṛtamīrṣyāyā nāma bheṣajam

agnerivāsya dahato dāvasya dahataḥ pṛthak/
etāmetasyerṣyāmudrāgnimiva śamaya

7.46
sinīvāli pṛthuṣṭuke yā devānāmasi svasā /
juṣasva havyamāhutaṃ prajāṃ devi didiḍḍhi naḥ

yā subāhuḥ svaṅguriḥ suṣūmā bahusūvarī /
tasyai viśpatnyai haviḥ sinīvālyai juhotana

yā viśpatnīndramasi pratīcī sahasrastukābhiyantī devī /
viṣṇoḥ patni tubhyaṃ rātā havīṃṣi patiṃ devi rādhase codayasva

7.47
kuhūṃ devīṃ sukṛtaṃ vidmanāpasamasmin yajñe suhavā johavīmi /
sā no rayiṃ viśvavāraṃ ni yachāddadātu vīraṃ śatadāyamukthyam

kuhūrdevānāmamṛtasya patnī havyā no asya haviṣo juṣeta /
śṛṇotu yajñamuśatī no adya rāyaspoṣaṃ cikituṣī dadhātu

7.48
rākāmahaṃ suhavā suṣṭutī huve śṛṇotu naḥ subhagā bodhatu tmanā /
sīvyatvapaḥ sūcyāchidyamānayā dadātu vīraṃ śatadāyamukthyam

yāste rāke sumatayaḥ supeśaso yābhirdadāsi dāśuṣe vasūni /
tābhirno adya sumanā upāgahi sahasrāpoṣaṃ subhage rarāṇā

7.49
devānāṃ patnīruśatīravantu naḥ prāvantu nastujaye vājasātaye /
yāḥ pārthivāso yā apāmapi vrate tā no devīḥ suhavāḥ śarma yacchantu

uta gnā vyantu devapatnīrindrāṇyagnāyyaśvinī rāṭ/
ā rodasī varunānī śṛṇotu vyantu devīrya ṛturjanīnām

7.50
yathā vṛkṣamaśanirviśvāhā hantyaprati /
evāhamadya kitavān akṣairbadhyāsamaprati

turāṇāmaturāṇāṃ viśāmavarjuṣīṇām /
samaitu viśvato bhago antarhastaṃ kṛtaṃ mama

īḍe agniṃ svāvasuṃ namobhiriha prasakto vi cayatkṛtaṃ naḥ /
rathairiva pra bhare vājayadbhiḥ pradakṣiṇaṃ marutāṃ stomamṛdhyām

vayaṃ jayema tvayā yujā vṛtamasmākamaṃśamudava bharebhare /
asmabhyamindra varīyaḥ sugaṃ kṛdhi pra śatrūṇāṃ maghavan vṛṣṇyā ruja

ajaiṣaṃ tvā saṃlikhitamajaiṣamuta saṃrudham /
aviṃ vṛko yathā mathadevā mathnāmi te kṛtam

uta prahāmatidīvā jayati kṛtamiva śvaghnī vi cinoti kāle /
yo devakāmo na dhanaṃ ruṇaddhi samittaṃ rāyaḥ sṛjati svadhābhiḥ

gobhiṣṭaremāmatiṃ durevāṃ yavena vā kṣudhaṃ puruhūta viśve /
vayaṃ rājasu prathamā dhanānyariṣṭāso vṛjanībhirjayema

kṛtaṃ me dakṣiṇe haste jayo me savya āhitaḥ /
gojidbhūyāsamaśvajiddhanaṃjayo hiraṇyajit

akṣāḥ phalavatīṃ dyuvaṃ datta gāṃ kṣīriṇīmiva /
saṃ mā kṛtasya dhārayā dhanuḥ snāvneva nahyata

7.51
bṛhaspatirnaḥ pari pātu paścādutottarasmādadharādaghayoḥ /
indraḥ purastāduta madhyato naḥ sakhā sakhibhyo varīyaḥ kṛṇotu

7.52
saṃjñānaṃ naḥ svebhiḥ saṃjñānamaraṇebhiḥ /
saṃjñānamaśvinā yuvamihāsmāsu ni yacchatam

saṃ jānāmahai manasā saṃ cikitvā mā yuṣmahi manasā daivyena /
mā ghoṣā utsthurbahule vinirhate meṣuḥ paptadindrasyāhanyāgate

7.53
amutrabhūyādadhi yadyamasya bṛhaspate abhiśasteramuñcaḥ /
pratyauhatāmaśvinā mṛtyumasmaddevānāmagne bhiṣajā śacībhiḥ

saṃ krāmataṃ mā jahītaṃ śarīraṃ prāṇāpānau te sayujāviha stām /
śataṃ jīva śarado vardhamāno'gniṣṭe gopā adhipā vasiṣṭhaḥ

āyuryatte atihitaṃ parācairapānaḥ prāṇaḥ punarā tāvitām /
agniṣṭadāhārnirṛterupasthāttadātmani punarā veśayāmi te

memaṃ prāṇo hāsīn mo apāno'vahāya parā gāt/
saptarṣibhya enaṃ pari dadāmi te enaṃ svasti jarase vahantu

pra viṣataṃ prāṇāpānāvanaḍvāhāviva vrajam /
ayaṃ jarimnaḥ śevadhirariṣṭa iha vardhatām

ā te prāṇaṃ suvāmasi parā yakṣmaṃ suvāmi te /
āyurno viśvato dadhadayamagnirvareṇyaḥ

udvayaṃ tamasaspari rohanto nākamuttamam /
devaṃ devatrā sūryamaganma jyotiruttamam

7.54
ṛcaṃ sāma yajāmahe yābhyāṃ karmāṇi kurvate /
ete sadasi rājato yajñaṃ deveṣu yacchataḥ

ṛcaṃ sāma yadaprākṣaṃ havirojo yajurbalam /
eṣa mā tasmān mā hiṃsīdvedaḥ pṛṣṭaḥ śacīpate

7.55
ye te panthāno'va divo yebhirviśvamairayaḥ /
tebhiḥ sumnayā dhehi no vaso

7.56
tiraścirājerasitātpṛdākoḥ pari saṃbhṛtam /
tatkaṅkaparvaṇo viṣamiyaṃ vīrudanīnaśat

iyaṃ vīrun madhujātā madhuścun madhulā madhūḥ /
sā vihrutasya bheṣajyatho maśakajambhanī

yato daṣṭaṃ yato dhītaṃ tataste nirhvayāmasi /
arbhasya tṛpradaṃśino maśakasyārasaṃ viṣam

ayaṃ yo vakro viparurvyaṅgo mukhāni vakrā vṛjinā kṛṇoṣi /
tāni tvaṃ brahmaṇaspate iṣīkāmiva saṃ namaḥ

arasasya śarkoṭasya nīcīnasyopasarpataḥ /
viṣaṃ hyasyādiṣyatho enamajījabham

na te bāhvorbalamasti na śīrṣe nota madhyataḥ /
atha kiṃ pāpayā'muyā puche bibharṣyarbhakam

adanti tvā pipīlikā vi vṛścanti mayūryaḥ /
sarve bhala bravātha śārkoṭamarasaṃ viṣam

ya ubhābhyāṃ praharasi puchena cāsyena ca /
āsye na te viṣaṃ kimu te pucchadhāvasat

7.57
yadāśasā vadato me vicukṣubhe yadyācamānasya carato janāmanu /
yadātmani tanvo me viriṣṭaṃ sarasvatī tadā pṛṇadghṛtena

sapta kṣaranti siśave marutvate pitre putrāso apyavīvṛtann ṛtāni /
ubhe idasyobhe asya rājata ubhe yatete ubhe asya puṣyataḥ

7.58
indrāvaruṇā sutapāvimaṃ sutaṃ somaṃ pibataṃ madyaṃ dhṛtavratau /
yuvo ratho adhvaro devavītaye prati svasaramupa yātu pītaye

indrāvaruṇā madhumattamasya vṛṣṇaḥ somasya vṛṣaṇā vṛṣethām /
idaṃ vāmandhaḥ pariṣiktamāsadyāsmin barhiṣi mādayethām

7.59
yo naḥ śapādaśapataḥ śapato yaśca naḥ śapāt/
vṛkṣa iva vidyutā hata ā mūlādanu śuṣyatu

7.60
ūrjaṃ bibhradvasuvaniḥ sumedhā aghoreṇa cakṣuṣā mitriyeṇa /
gṛhān aimi sumanā vandamāno ramadhvaṃ mā bibhīta mat

ime gṛhā mayobhuva ūrjasvantaḥ payasvantaḥ /
pūrṇā vāmena tiṣṭhantaste no jānantvāyataḥ

yeṣāmadhyeti pravasan yeṣu saumanaso bahuḥ /
gṛhān upa hvayāmahe te no jānantvāyataḥ

upahūtā bhūridhanāḥ sakhāyaḥ svādusaṃmudaḥ /
akṣudhyā atṛṣyā sta gṛhā māsmadbibhītana

upahūtā iha gāva upahūtā ajāvayaḥ /
atho annasya kīlāla upahūto gṛheṣu

sūnṛtāvantaḥ subhagā irāvanto hasāmudāḥ /
atṛṣyā akṣudhyā sta gṛhā māsmadbibhītana

ihaiva sta mānu gāta viśvā rūpāṇi puṣyata /
aiṣyāmi bhadreṇā saha bhūyāṃso bhavatā mayā

7.61
yadagne tapasā tapa upatapyāmahe tapaḥ /
priyāḥ śrutasya bhūyāsmāyuṣmantaḥ sumedhasaḥ

agne tapastapyāmaha upa tapyāmahe tapaḥ /
śrutāni śṛṇvantaḥ vayamāyuṣmantaḥ sumedhasaḥ

7.62
ayamagniḥ satpatirvṛddhavṛṣṇo rathīva pattīn ajayatpurohitaḥ /
nābhā pṛthivyāṃ nihito davidyutadadhaspadaṃ kṛṇutāṃ ye pṛtanyavaḥ

7.63
pṛtanājitaṃ sahamānamagnimukthyairhavāmahe paramātsadhasthāt/
sa naḥ parṣadati durgāṇi viśvā kṣāmaddevo'ti duritānyagniḥ

7.64
idaṃ yatkṛṣṇaḥ śakunirabhiniṣpatann apīpatat/
āpo mā tasmātsarvasmādduritātpāntvaṃhasaḥ

idaṃ yatkṛṣṇaḥ śakuniravāmṛkṣan nirṛte te mukhena /
agnirmā tasmādenaso gārhapatyaḥ pra muñcatu

7.65
pratīcīnaphalo hi tvamapāmārga rurohitha /
sarvān macchapathāmadhi varīyo yavayā itaḥ

yadduṣkṛtaṃ yacchamalaṃ yadvā cerima pāpayā /
tvayā tadviśvatomukhāpāmārgāpa mṛjmahe

śyāvadatā kunakhinā baṇḍena yatsahāsima /
apāmārga tvayā vayaṃ sarvaṃ tadapa mṛjmahe

7.66
yadyantarikṣe yadi vāta āsa yadi vṛkṣeṣu yadi volapeṣu /
yadaśravan paśava udyamānaṃ tadbrāhmaṇaṃ punarasmān upaitu

7.67
punarmaitvindriyaṃ punarātmā draviṇaṃ brāhmaṇaṃ ca /
punaragnayo dhiṣṇyā yathāsthāma kalpayantāmihaiva

7.68
sarasvati vrateṣu te divyeṣu devi dhāmasu /
juṣasva havyamāhutaṃ prajāṃ devi rarāsva naḥ

idaṃ te havyaṃ ghṛtavatsarasvatīdaṃ pitṝṇāṃ havirāsyaṃ yat/
imāni ta uditā śamtamāni tebhirvayaṃ madhumantaḥ syāma

śivā naḥ śaṃtamā bhava sumṛḍīkā sarasvati /
mā te yuyoma saṃdṛśaḥ

7.69
śaṃ no vāto vātu śaṃ nastapatu sūryaḥ /
ahāni śaṃ bhavantu naḥ śaṃ rātrī prati dhīyatām /
śamuṣā no vyucchatu

7.70
yatkiṃ cāsau manasā yacca vācā yajñairjuhoti haviṣā yajuṣā /
tan mṛtyunā nirṛtiḥ saṃvidānā purā satyādāhutiṃ hantvasya

yātudhānā nirṛtirādu rakṣaste asya ghnantvanṛtena satyam /
indreṣitā devā ājamasya mathnantu mā tatsaṃ pādi yadasau juhoti

ajirādhirājau śyenau saṃpātināviva /
ājyaṃ pṛtanyato hatāṃ yo naḥ kaścābhyaghāyati

apāñcau ta ubhau bāhū api nahyāmyāsyam /
agnerdevasya manyunā tena te'vadhiṣaṃ haviḥ

api nahyāmi te bāhū api nahyāmyāsyam /
agnerghorasya manyunā tena'vadhiṣaṃ haviḥ

7.71
pari tvāgne puraṃ vayaṃ vipraṃ sahasya dhīmahi /
dhṛṣadvarṇaṃ divedive hantāraṃ bhaṅgurāvataḥ

7.72
uttiṣṭhatāva paśyatendrasya bhāgamṛtviyam /
yadi śrātaṃ juhotana yadyaśrātaṃ mamattana

śrātaṃ haviro ṣvindra pra yāhi jagāma sūro adhvano vi madhyam /
pari tvāsate nidhibhiḥ sakhāyaḥ kulapā na vrājapatiṃ carantam

śrātaṃ manya ūdhani śrātamagnau suśṛtaṃ manye tadṛtaṃ navīyaḥ /
mādhyandinasya savanasya dadhnaḥ pibendra vajrin purukṛjjuṣāṇaḥ

7.73
samiddho agnirvṛṣaṇā rathī divastapto gharmo duhyate vāmiṣe madhu /
vayaṃ hi vāṃ purudamāso aśvinā havāmahe sadhamādeṣu kāravaḥ

samiddho agniraśvinā tapto vāṃ gharma ā gatam /
duhyante nūnaṃ vṛṣaṇeha dhenavo dasrā madanti vedhasaḥ

ivāhākṛtaḥ śucirdeveṣu yajño yo aśvinoścamaso devapānaḥ /
tamu viśve amṛtāso juṣāṇā gandharvasya pratyāsnā rihanti

yadusriyāsvāhutaṃ ghṛtaṃ payo'yaṃ sa vāmaśvinā bhāga ā gatam /
mādhvī dhartārā vidathasya satpatī taptaṃ gharmaṃ pibataṃ divaḥ

tapto vāṃ gharmo nakṣatu svahotā pra vāmadhvaryuścaratu payasvān /
madhordugdhasyāśvinā tanāyā vītaṃ pātaṃ payasa usriyāyāḥ

upa drava payasā godhugoṣamā gharme siñca paya usriyāyāḥ /
vi nākamakhyatsavitā vareṇyo'nuprayāṇamuṣaso vi rājati

upa hvaye sudughāṃ dhenumetāṃ suhasto godhuguta dohadenām /
śreṣṭhaṃ savaṃ savitā sāviṣan no'bhīddho gharmastadu ṣu pra vocat

hiṅkṛṇvatī vasupatnī vasūnāṃ vatsamicchantī manasā nyāgan /
duhāmaśvibhyāṃ payo aghnyeyaṃ sā vardhatāṃ mahate saubhagāya

juṣṭo damūnā atithirduroṇa imaṃ no yajñamupa yāhi vidvān /
viśvā agne abhiyujo vihatya śatrūyatāmā bharā bhojanāni

agne śardha mahate saubhagāya tava dyumnānyuttamāni santu /
saṃ jāspatyaṃ suyamamā kṛṇuṣva śatrūyatāmabhi tiṣṭhā mahāṃsi

sūyavasādbhagavatī hi bhūyā adhā vayaṃ bhagavantaḥ syāma /
addhi tṛṇamaghnye viśvadānīṃ piba śuddhamudakamācarantī

7.74
apacitāṃ lohinīnāṃ kṛṣṇā māteti śuśruma /
munerdevasya mūlena sarvā vidhyāmi tā aham

vidhyāmyāsāṃ prathamāṃ vidhyāmi uta madhyamām /
idaṃ jaghanyāmāsāmā chinadmi stukāmiva

tvāṣṭreṇāhaṃ vacasā vi ta īrṣyāmamīmadam /
atho yo manyuṣṭe pate tamu te śamayāmasi

vratena tvaṃ vratapate samakto viśvāhā sumanā dīdihīha /
taṃ tvā vayaṃ jātavedaḥ samiddhaṃ prajāvanta upa sadema sarve

7.75
prajāvatīḥ sūyavase ruśantīḥ śuddhā apaḥ suprapāṇe pibantīḥ /
mā va stena īśata māghaśaṃsaḥ pari vo rudrasya hetirvṛṇaktu

padajñā stha ramatayaḥ saṃhitā viśvanāmnīḥ /
upa mā devīrdevebhireta /
imaṃ goṣṭhamidaṃ sado ghṛtenāsmāntsamukṣata

7.76
ā susrasaḥ susraso asatībhyo asattarāḥ /
sehorarasatarā havaṇādvikledīyasīḥ

yā graivyā apacito'tho yā upapakṣyāḥ /
vijāmni yā apacitaḥ svayaṃsrasaḥ

yaḥ kīkasāḥ praśṛṇāti talīdyamavatiṣṭhati /
nirhāstaṃ sarvaṃ jāyānyaṃ yaḥ kaśca kakudi śritaḥ

pakṣī jāyānyaḥ patati sa ā viśati pūruṣam /
tadakṣitasya bheṣajamubhayoḥ sukṣatasya ca

vidma vai te jāyānya jānaṃ yato jāyānya jāyase /
kathaṃ ha tatra tvaṃ hano yasya kṛṇmo havirgṛhe

dhṛṣatpiba kalaśe somamindra vṛtrahā śūra samare vasūnām /
mādhyandine savana ā vṛṣasva rayiṣṭhāno rayimasmāsu dhehi

7.77
sāṃtapanā idaṃ havirmarutastajjujuṣṭana /
asmākotī riśādasaḥ

yo no marto maruto durhṛṇāyustiraścittāni vasavo jighāṃsati /
druhaḥ pāśān prati muñcatāṃ sastapiṣṭhena tapasā hantanā tam

samvatsarīṇā marutaḥ svarkā urukṣayāḥ sagaṇā mānuṣāsaḥ /
te asmatpāśān pra muñcantvenasassāṃtapanā matsarā mādayiṣṇavaḥ

7.78
vi te muñcāmi raśanāṃ vi yoktraṃ vi niyojanam /
ihaiva tvamajasra edhyagne

asmai kṣatrāṇi dhārayantamagne yunajmi tvā brahmaṇā daivyena /
dīdihyasmabhyaṃ draviṇeha bhadraṃ premaṃ voco havirdāṃ devatāsu

7.79
yatte devā akṛṇvan bhāgadheyamamāvāsye saṃvasanto mahitvā /
tenā no yajñaṃ pipṛhi viśvavāre rayiṃ no dhehi subhage suvīram

ahamevāsmyamāvāsyā māmā vasanti sukṛto mayīme /
mayi devā ubhaye sādyāścendrajyeṣṭhāḥ samagacchanta sarve

āgan rātrī saṅgamanī vasūnāmūrjaṃ puṣṭaṃ vasvāveśayantī /
amāvāsyāyai haviṣa vidhemorjaṃ duhānā payasā na āgan

amāvāsye na tvadetānyanyo viśvā rūpāṇi paribhūrjajāna /
yatkāmāste juhumastan no astu vayaṃ syāma patayo rayiṇām

7.80
pūrṇā paścāduta pūrṇā purastādunmadhyataḥ paurṇamāsī jigāya /
tasyāṃ devaiḥ saṃvasanto mahitvā nākasya pṛṣṭhe samiṣā madema

vṛṣabhaṃ vājinaṃ vayaṃ paurṇamāsaṃ yajāmahe /
sa no dadātvakṣitāṃ rayimanupadasvatīm

prajāpate na tvadetānyanyo viśvā rūpāṇi paribhūrjajāna /
yatkāmāste juhumastan no astu vayaṃ syāma patayo rayīṇām

paurṇamāsī prathamā yajñiyāsīdahnāṃ rātrīṇāmatiśarvareṣu /
ye tvāṃ yajñairyajñiye ardhayantyamī te nāke sukṛtaḥ praviṣṭāḥ

7.81
pūrvāparaṃ carato mayayaitau śiśū krīḍantau pari yāto'rṇavam /
viśvānyo bhuvanā vicaṣṭa ṛtūṃranyo vidadhajjāyase navaḥ

navonavo bhavasi jāyamāno'hnāṃ keturuṣasāmeṣyagram /
bhāgaṃ devebhyo vi dadhāsyāyan pra candramastirase dhīrghamāyuḥ

somasyāmśo yudhāṃ pate'nūno nāma vā asi /
anūnaṃ darśa mā kṛdhi prajayā ca dhanena ca

darśo'si darśato'si samagro'si samantaḥ /
samagraḥ samanto bhūyāsaṃ gobhiraśvaiḥ prajayā paśubhirgṛhairdhanena

yo'smān dveṣṭi yaṃ vayaṃ dviṣmastasya tvaṃ prāṇenā pyāyasva /
ā vayaṃ pyāsiṣīmahi gobhiraśvaiḥ prajayā paśubhirgṛhairdhanena

yaṃ devā aṃśumāpyāyayanti yamakṣitamakṣitā bhakṣayanti /
tenāsmān indro varuṇo bṛhaspatirā pyāyayantu bhuvanasya gopāḥ

7.82
abhyarcata suṣṭutiṃ gavyamājimasmāsu bhadrā draviṇāni dhatta /
imaṃ yajñaṃ nayata devatā no ghṛtasya dhārā madhumatpavantām

mayyagre agniṃ gṛhṇāmi saha kṣatreṇa varcasā balena /
mayi prajāṃ mayyāyurdadhāmi svāhā mayyagnim

ihaivāgne adhydhārayā rayiṃ mā tvā ni kran pūrvacittā nikāriṇaḥ /
kṣatreṇāgne suyamamastu tubhyamupasattā vardhatāṃ te aniṣṭṛtaḥ

anvagniruṣasāmagramakhyadanvahāni prathamo jātavedāḥ /
anu sūrya uṣaso anu raśmīn anu dyāvāpṛthivī ā viveśa

pratyagniruṣasāmagramakhyatprati ahāni prathamo jātavedāḥ /
prati sūryasya purudhā ca raśmīn prati dyāvāpṛthivī ā tatāna

ghṛtaṃ te agne divye sadhasthe ghṛtena tvāṃ manuradyā samindhe /
ghṛtaṃ te devīrnaptya ā vahantu ghṛtaṃ tubhyaṃ duhratāṃ gāvo agne

7.83
apsu te rājan varuṇa gṛho hiraṇyayo mitaḥ /
tato dhṛtavrato rājā sarvā dhāmāni muñcatu

dāmnodāmno rājann ito varuṇa muñca naḥ /
yadāpo aghnyā iti varuṇeti yadūcima tato varuṇa muñca naḥ

uduttamaṃ varuṇa pāśamasmadavādhamaṃ vi madhyamaṃ śrathāya /
adhā vayamāditya vrate tavānāgaso aditaye syāma

prāsmatpāśān varuṇa muñca sarvān ya uttamā adhamā vāruṇā ye /
duṣvapnyaṃ duritaṃ ni ṣvāsmadatha gachema sukṛtasya lokam

7.84
anādhṛṣyo jātavedā amartyo virāḍagne kṣatrabhṛddīdihīha /
viśvā amīvāḥ pramuñcan mānuṣībhiḥ śivābhiradya pari pāhi no gayam

indra kṣatramabhi vāmamojo'jāyathā vṛṣabha carṣaṇīnām /
apānudo janamamitrayantamuruṃ devebhyo akṛṇoru lokam

mṛgo na bhīmaḥ kucaro giriṣṭhāḥ parāvata ā jagamyātparasyāḥ /
sṛkaṃ saṃśāya pavimindra tigmaṃ vi śatrūn tāḍhi vi mṛdho nudasva

7.85
tyamū ṣu vājinaṃ devajūtaṃ sahovānaṃ tarutāraṃ rathānām /
ariṣṭanemiṃ pṛtanājimāśuṃ svastaye tārkṣyamihā huvema

7.86
trātāramindramavitāramindraṃ havehave suhavaṃ śūramindram /
huve nu śakraṃ puruhūtamindraṃ svasti na indro maghavān kṛṇotu

7.87
yo agnau rudro yo apsvantarya oṣadhīrvīrudha āviveśa /
ya imāviśvā bhuvanāni cākḷpe tasmai rudrāya namo astvagnaye

7.88
apehyarirasyarirvā asi viṣe viṣamapṛkthā viṣamidvā apṛkthāḥ /
ahimevābhyapehi taṃ jahi

7.89
apo divyā acāyiṣaṃ rasena samapṛkṣmahi /
payasvān agna āgamaṃ taṃ mā saṃ sṛja varcasā

saṃ māgne varcasā sṛja saṃ prajayā samāyuṣā /
vidyurme asya devā indro vidyātsaha ṛṣibhiḥ

idamāpaḥ pra vahatāvadyaṃ ca malaṃ ca yat/
yaccābhidudrohānṛtaṃ yacca śepe abhīruṇam

edho'syedhiṣīya samidasi samedhiṣīya /
tejo'si tejo mayi dhehi

7.90
api vṛśca purāṇavadvratateriva guṣpitam /
ojo dāsasya dambhaya

vayaṃ tadasya sambhṛtaṃ vasvindrena vi bhajāmahai /
mlāpayāmi bhrajaḥ śibhraṃ varuṇasya vratena te

yathā śepo apāyātai strīṣu cāsadanāvayāḥ /
avasthasya knadīvataḥ śāṅkurasya nitodinaḥ /
yadātatamava tattanu yaduttataṃ ni tattanu

7.91
indraḥ sutrāmā svavāmavobhiḥ sumṛḍīko bhavatu viśvavedāḥ /
bādhatāṃ dveṣo abhayaṃ naḥ kṛṇotu suvīryasya patayaḥ syāma

7.92
sa sutrāmā svavāmindro asmadārācciddveṣaḥ sanutaryuyotu /
tasya vayaṃ sumatau yajñiyasyāpi bhadre saumanase syāma

7.93
indreṇa manyunā vayamabhi ṣyāma pṛtanyataḥ /
ghnanto vṛtrāṇyaprati

7.94
dhruvaṃ dhruveṇa haviṣāva somaṃ nayāmasi /
yathā na indraḥ kevalīrviśaḥ saṃmanasaskarat

7.95
udasya śyāvau vithurau gṛdhrau dyāmiva petatuḥ /
ucchocanapraśocanavasyocchocanau hṛdaḥ

ahamenāvudatiṣṭhipaṃ gāvau śrāntasadāviva /
kurkurāviva kūjantāvudavantau vṛkāviva

ātodinau nitodināvatho saṃtodināvuta /
api nahyāmyasya meḍhraṃ ya itaḥ strī pumān jabhāra

7.96
asadan gāvaḥ sadane'paptadvasatiṃ vayaḥ /
āsthāne parvatā asthuḥ sthāmni vṛkkāvatiṣṭhipam

7.97
yadadya tvā prayati yajñe asmin hotaścikitvann avṛṇīmahīha /
dhruvamayo dhruvamutā śaviṣṭhaipravidvān yajñamupa yāhi somam

samindra no manasā neṣa gobhiḥ saṃ sūribhirharivantsaṃ svastyā /
saṃ brahmaṇā devahitaṃ yadasti saṃ devānāṃ sumatau yajñiyānām

yān āvaha uśato deva devāṃstān preraya sve agne sadhasthe /
jakṣivāṃsaḥ papivāṃso madhūnyasmai dhatta vasavo vasūni

sugā vo devāḥ sadanā akarma ya ājagma savane mā juṣāṇāḥ /
vahamānā bharamāṇāḥ svā vasūni vasuṃ gharmaṃ divamā rohatānu

yajña yajñaṃ gaccha yajñapatiṃ gaccha /
svāṃ yoniṃ gaccha svāhā

eṣa te yajño yajñapate sahasūktavākaḥ /
suvīryaḥ svāhā

vaṣaḍdhutebhyo vaṣaḍahutebhyaḥ /
devā gātuvido gātuṃ vittvā gātumita

manasaspata imaṃ no divi deveṣu yajñam /
svāhā divi svāhā pṛthivyāṃ svāhāntarikṣe svāhā vāte dhāṃ svāhā

7.98
saṃ barhiraktaṃ haviṣā ghṛtena samindreṇa vasunā saṃ marudbhiḥ /
saṃ devairviśvadevebhiraktamindraṃ gacchatu haviḥ svāhā

7.99
pari stṛṇīhi pari dhehi vediṃ mā jāmiṃ moṣīramuyā śayānām /
hotṛṣadanaṃ haritaṃ hiraṇyayaṃ niṣkā ete yajamānasya loke

7.100
paryāvarte duṣvapnyātpāpātsvapnyādabhūtyāḥ /
brahmāhamantaraṃ kṛṇve parā svapnamukhāḥ śucaḥ

7.101
yatsvapne annamaśnāmi na prātaradhigamyate /
sarvaṃ tadastu me śivaṃ nahi taddṛṣyate divā

7.102
namaskṛtya dyāvāpṛthivībhyāmantarikṣāya mṛtyave /
mekṣāmyūrdhvastiṣṭhan mā mā hiṃsiṣurīśvarāḥ

7.103
ko asyā no druho'vadyavatyā un neṣyati kṣatriyo vasya icchan /
ko yajñakāmaḥ ka u pūrtikāmaḥ ko deveṣu vanute dīrghamāyuḥ

7.104
kaḥ pṛśniṃ dhenuṃ varuṇena dattāmatharvane sudughāṃ nityavatsām /
bṛhaspatinā sakhyaṃ juṣaṇo yathāvaśaṃ tanvaḥ kalpayāti

7.105
apakrāman pauruṣeyādvṛṇāno daivyaṃ vacaḥ /
praṇītīrabhyāvartasva viśvebhiḥ sakhibhiḥ saha

7.106
yadasmṛti cakṛma kiṃ cidagna upārima caraṇe jātavedaḥ /
tataḥ pāhi tvaṃ naḥ pracetaḥ śubhe sakhibhyo amṛtatvamastu naḥ

7.107
ava divastārayanti sapta sūryasya raśmayaḥ /
āpaḥ samudriyā dhārāstāsśalyamasisrasan

7.108
yo na stāyaddipsati yo na āviḥ svo vidvān araṇo vā no agne /
pratīcyetvaraṇī datvatī tān maiṣāmagne vāstu bhūn mo apatyam

yo naḥ suptān jāgrato vābhidāsāttiṣṭhato vā carato jātavedaḥ /
vainareṇa sayujā sajoṣāstān pratīco nirdaha jātavedaḥ

7.109
idamugrāya babhrave namo yo akṣeṣu tanūvaśī /
ghṛtena kaliṃ śikṣāmi sa no mṛḍātīdṛśe

ghṛtamapsarābhyo vaha tvamagne pāṃsūn akṣebhyaḥ sikatā apaśca /
yathābhāgaṃ havyadātiṃ juṣāṇā madanti devā ubhayāni havyā

apsarasaḥ sadhamādaṃ madanti havirdhānamantarā sūryaṃ ca /
tā me hastau saṃ sṛjantu ghṛtena sapatnaṃ me kitavaṃ randhayantu

ādinavaṃ pratidīvne ghṛtenāsmāmabhi kṣara /
vṛkṣamivāśanyā jahi yo asmān pratidīvyati

yo no dyuve dhanamidaṃ cakāra yo akṣāṇāṃ glahanaṃ śeṣaṇaṃ ca /
sa no devo haviridaṃ juṣāṇo gandharvebhiḥ sadhamādaṃ madema

saṃvasava iti vo nāmadheyamugraṃpaśyā rāṣṭrabhṛto hyakṣāḥ /
tebhyo va indavo haviṣā vidhema vayaṃ syāma patayo rayīṇām

devān yan nāthito huve brahmacaryaṃ yadūṣima /
akṣān yadbabhrūn ālabhe te no mṛḍantvīdṛśe

7.110
agna indraśca dāśuṣe hato vṛtrāṇyaprati /
ubhā hi vṛtrahantamā

yābhyāmajayantsvaragra eva yāvātasthaturbhuvanāni viśvā /
pra carṣaṇīvṛṣaṇā vajrabāhū agnimindraṃ vṛtrahaṇā huve'ham

upa tvā devo agramīccamasena bṛhaspatiḥ /
indra gīrbhirna ā viśa yajamānāya sunvate

7.111
indrasya kukṣirasi somadhāna ātmā devānāmuta mānuṣāṇām /
iha prajā janaya yāsta āsu yā anyatreha tāste ramantām

7.112
śumbhanī dyāvāpṛthivī antisumne mahivrate /
āpaḥ sapta susruvurdevīstā no muñcantvaṃhasaḥ

muñcantu mā śapathyādatho varuṇyāduta /
atho yamasya paḍvīśādviśvasmāddevakilbiṣāt

7.113
tṛṣṭike tṛṣṭavandana udamūṃ chindhi tṛṣṭike /
yathā kṛtadviṣṭāso'muṣmai śepyāvate

tṛṣṭāsi tṛṣṭikā viṣā viṣātakyasi /
parivṛktā yathāsasyṛṣabhasya vaśeva

7.114
ā te dade vakṣaṇābhya ā te'haṃ hṛdayāddade /
ā te mukhasya saṅkāśātsarvaṃ te varca ā dade

preto yantu vyādhyaḥ prānudhyāḥ pro aśastayaḥ /
agnī rakṣasvinīrhantu somo hantu durasyatīḥ

7.115
pra patetaḥ pāpi lakṣmi naśyetaḥ prāmutaḥ pata /
ayasmayenāṅkena dviṣate tvā sajāmasi

yā mā lakṣmīḥ patayālūrajuṣṭābhicaskanda vandaneva vṛkṣam /
anyatrāsmatsavitastāmito dhā hiraṇyahasto vasu no rarāṇaḥ

ekaśataṃ lakṣmyo martyasya sākaṃ tanvā januṣo'dhi jātāḥ /
tāsāṃ pāpiṣṭhā niritaḥ pra hiṇmaḥ śivā asmabhyaṃ jātavedo niyaccha

etā enā vyākaraṃ khile gā viṣṭhitā iva /
ramantāṃ puṇyā lakṣmīryāḥ pāpīstā anīnaśam

7.116
namo rūrāya cyavanāya nodanāya dhṛṣṇave /
namaḥ śītāya pūrvakāmakṛtvane

yo anyedyurubhayadyurabhyetīmaṃ maṇḍūkam /
abhyetvavrataḥ

7.117
ā mandrairindra haribhiryāhi mayūraromabhiḥ /
mā tvā ke cidvi yaman viṃ na pāśino'ti dhanveva tāmihi

7.118
marmāṇi te varmaṇā chādayāmi somastvā rājāmṛtenānu vastām /
urorvarīyo varuṇaste kṛṇotu jayantaṃ tvānu devā madantu