Atharva Veda · Chapter 5

sūktam १
sūktam २
sūktam ३
sūktam ४
sūktam ५
sūktam ६
sūktam ७
sūktam ८
sūktam ९
sūktam १०
sūktam ११
sūktam १२
sūktam १३
sūktam १४
sūktam १५
sūktam १६
sūktam १७
sūktam १८
sūktam १९
sūktam २०
sūktam २१
sūktam २२
sūktam २३
sūktam २४
sūktam २५
sūktam २६
sūktam २७
sūktam २८
sūktam २९
sūktam ३०
sūktam ३१
5.1
ṛdhaṅmantro yoniṃ ya ābabhūvāmṛtāsurvardhamānaḥ sujanmā /
adabdhāsurbhrājamāno'heva trito dhartā dādhāra trīṇi

ā yo dharmāṇi prathamaḥ sasāda tato vapūṃṣi kṛṇuṣe purūṇi /
dhāsyuryoniṃ prathama ā viveśā yo vācamanuditāṃ ciketa

yaste śokāya tanvaṃ rireca kṣaraddhiraṇyaṃ śucayo'nu svāḥ /
atrā dadhete amṛtāni nāmāsme vastrāṇi viśa erayantām

pra yadete prataraṃ pūrvyaṃ guḥ sadaḥsada ātiṣṭhanto ajuryam /
kaviḥ śuṣasya mātarā rihāṇe jāmyai dhuryaṃ patimerayethām

tadū ṣu te mahatpṛthujman namaḥ kaviḥ kāvyenā kṛṇomi /
yatsamyañcāvabhiyantāvabhi kṣāmatrā mahī rodhacakre vāvṛdhete

sapta maryādāḥ kavayastatakṣustāsāmidekāmabhyaṃhuro gāt/
āyorha skambha upamasya nīḍe pathāṃ visarge dharuṇeṣu tasthau

utāmṛtāsurvrata emi kṛnvann asurātmā tanvastatsumadguḥ /
uta vā śakro ratnaṃ dadhātyūrjayā vā yatsacate havirdāḥ

uta putraḥ pitaraṃ kṣatramīḍe jyeṣṭhaṃ maryādamahvayantsvastaye /
darśan nu tā varuṇa yāste viṣṭhā āvarvratataḥ kṛṇavo vapūṃṣi

ardhamardhena payasā pṛṇakṣyardhena śuṣma vardhase amura /
aviṃ vṛdhāma śagmiyaṃ sakhāyaṃ varuṇaṃ putramadityā iṣiram /
kaviśastānyasmai vapūṃṣyavocāma rodasī satyavācā

5.2
tadidāsa bhuvaneṣu jyeṣṭhaṃ yato yajña ugrastveṣanṛmṇaḥ /
sadyo jajñāno ni riṇāti śatrūn anu yadenaṃ madanti viśva ūmāḥ

vavṛdhānaḥ śavasā bhūryojāḥ śatrurdāsāya bhiyasaṃ dadhāti /
avyanacca vyanacca sasni saṃ te navanta prabhṛtā madeṣu

tve kratumapi pṛñcanti bhūri dviryadete trirbhavantyūmāḥ /
svadoḥ svādīyaḥ svādunā sṛjā samadaḥ su madhu madhunābhi yodhīḥ

yadi cin nu tvā dhanā jayantaṃ raṇeraṇe anumadanti viprāḥ /
ojīyaḥ śuṣmintsthiramā tanuṣva mā tvā dabhan durevāsaḥ kaśokāḥ

tvayā vayaṃ śāśadmahe raṇeṣu prapaśyanto yudhenyāni bhūri /
codayāmi ta āyudhā vacobhiḥ saṃ te śiśāmi brahmaṇā vayāṃsi

ni taddadhiṣe'vare pare ca yasminn āvithāvasā duroṇe /
ā sthāpayata mātaraṃ jigatnumata invata karvarāṇi bhūri

stuṣva varṣman puruvartmānaṃ samṛbhvāṇaminatamamāptamāptyānām /
ā darśati śavasā bhūryojāḥ pra sakṣati pratimānaṃ pṛthivyāḥ

imā brahma bṛhaddivaḥ kṛṇavadindrāya śūṣamagriyaḥ svarṣāḥ /
maho gotrasya kṣayati svarājā turaścidviśvamarṇavattapasvān

evā mahān bṛhaddivo atharvāvocatsvāṃ tanvamindrameva /
svasārau mātaribhvarī aripre hinvanti caine śavasā vardhayanti ca

5.3
mamāgne varco vihaveṣvastu vayaṃ tvendhānāstanvaṃ puṣema /
mahyaṃ namantāṃ pradiśaścatasrastvayādhyakṣeṇa pṛtanā jayema

agne manyuṃ pratinudan pareṣāṃ tvaṃ no gopāḥ pari pāhi viśvataḥ /
apāñco yantu nivatā durasyavo'maiṣāṃ cittaṃ prabudhāṃ vi neśat

mama devā vihave santu sarva indravanto maruto viṣṇuragniḥ /
mamāntarikṣamurulokamastu mahyaṃ vātaḥ pavatāṃ kāmāyāsmai

mahyaṃ yajantāṃ mama yānīṣṭākūtiḥ satyā manaso me astu /
eno mā ni gāṃ katamaccanāhaṃ viśve devā abhi rakṣantu meha

mayi devā draviṇamā yajantāṃ mayi āśīrastu mayi devahūtiḥ /
daivāḥ hotāraḥ saniṣan na etadariṣṭāḥ syāma tanvā suvīrāḥ

daivīḥ ṣaḍurvīruru naḥ kṛṇota viśve devāsa iha mādayadhvam /
mā no vidadabhibhā mo aśastirmā no vidadvṛjinā dveṣyā yā

tisro devīrmahi naḥ śarma yacchata prajāyai nastanve yacca puṣṭam /
mā hāsmahi prajayā mā tanūbhirmā radhāma dviṣate soma rājan

uruvyacā no mahiṣaḥ śarma yacchatvasmin have puruhūtaḥ purukṣu /
sa naḥ prajāyai haryaśva mṛḍendra mā no rīriṣo mā parā dāḥ

dhātā vidhātā bhuvanasya yaspatirdevaḥ savitābhimātiṣāhaḥ /
ādityā rudrā aśvinobhā devāḥ pāntu yajamānaṃ nirṛthāt

ye naḥ sapatnā apa te bhavantvindrāgnibhyāmava bādhāmaha enān /
ādityā rudrā uparispṛśo no ugraṃ cettāramadhirājamakrata

arvāñcamindramamuto havāmahe yo gojiddhanajidaśvajidyaḥ /
imaṃ no yajñaṃ vihave śṛṇotvasmākamabhūrharyaśva medī

5.4
yo giriṣvajāyathā vīrudhāṃ balavattamaḥ /
kuṣṭhehi takmanāśana takmānaṃ nāśayann itaḥ

suparṇasuvane girau jātaṃ himavataspari /
dhanairabhi śrutvā yanti vidurhi takmanāśanam

aśvattho devasadanastṛtīyasyāmito divi /
tatrāmṛtasya cakṣaṇaṃ devāḥ kuṣṭhamavanvata

hiraṇyayī nauracaraddhiraṇyabandhanā divi /
tatrāmṛtasya puṣpaṃ devāḥ kuṣṭhamavanvata

hiraṇyayāḥ panthāna āsann aritrāṇi hiraṇyayā /
nāvo hiraṇyayīrāsan yābhiḥ kuṣṭhaṃ nirāvahan

imaṃ me kuṣṭha pūruṣaṃ tamā vaha taṃ niṣkuru /
tamu me agadaṃ kṛdhi

devebhyo adhi jāto'si somasyāsi sakhā hitaḥ /
sa prāṇāya vyānāya cakṣuṣe me asmai mṛḍa

udaṅjāto himavataḥ sa prācyāṃ nīyase janam /
tatra kuṣṭhasya nāmānyuttamāni vi bhejire

uttamo nāma kuṣṭhasyuttamo nāma te pitā /
yakṣmaṃ ca sarvaṃ nāśaya takmānaṃ cārasaṃ kṛdhi

śīrṣāmayamupahatyāmakṣyostanvo rapaḥ /
kuṣṭhastatsarvaṃ niṣkaraddaivaṃ samaha vṛṣṇyam

5.5
rātrī mātā nabhaḥ pitāryamā te pitāmahaḥ /
silācī nāma vā asi sā devānāmasi svasā

yastvā pibati jīvati trāyase puruṣaṃ tvam /
bhartrī hi śaśvatāmasi janānāṃ ca nyañcanī

vṛkṣaṃvṛkṣamā rohasi vṛṣaṇyantīva kanyalā /
jayantī pratyātiṣṭhantī sparaṇī nāma vā asi

yaddaṇḍena yadiṣvā yadvārurharasā kṛtam /
tasya tvamasi niṣkṛtiḥ semaṃ niṣkṛdhi pūruṣam

bhadrātplakṣān nistiṣṭhasyaśvatthātkhadirāddhavāt/
bhadrān nyagrodhātparṇātsā na ehyarundhati

hiraṇyavarṇe subhage sūryavarṇe vapuṣṭame /
rutaṃ gacchāsi niṣkṛte niṣkṛtirnāma vā asi

hiraṇyavarṇe subhage śuṣme lomaśavakṣaṇe /
apāmasi svasā lākṣe vāto hātmā babhūva te

silācī nāma kānīno'jababhru pitā tava /
aśvo yamasya yaḥ śyāvastasya hāsnāsyukṣitā

aśvasyāsnaḥ saṃpatitā sā vṛkṣāmabhi siṣyade /
sarā patatriṇī bhūtvā sā na ehyarundhati

5.6
brahma jajñānaṃ prathamaṃ purastādvi sīmataḥ suruco vena āvaḥ /
sa budhnyā upamā asya viṣṭhāḥ sataśca yonimasataśca vi vaḥ

anāptā ye vaḥ prathamā yāni karmāṇi cakrire /
vīrān no atra mā dabhan tadva etatpuro dadhe

sahasradhāra eva te samasvaran divo nāke madhujihvā asaścataḥ /
tasya spaśo na ni miṣanti bhūrṇayaḥ padepade pāśinaḥ santi setave

paryū ṣu pra dhanvā vājasātaye pari vṛtrāṇi sakṣaṇiḥ /
dviṣastadadhyarṇaveneyase sanisraso nāmāsi trayodaśo māsa indrasya gṛhaḥ

nvetenārātsīrasau svāhā /
tigmāyudhau tigmahetī suśevau somārudrāviha su mṛḍataṃ naḥ

avaitenārātsīrasau svāhā /
tigmāyudhau tigmahetī suśevau somārudrāviha su mṛḍataṃ naḥ

apaitenārātsīrasau svāhā /
tigmāyudhau tigmahetī suśevau somārudrāviha su mṛḍataṃ naḥ

mumuktamasmān duritādavadyājjuṣethāṃ yajñamamṛtamasmāsu dhattam

cakṣuṣo hete manaso hete brahmaṇo hete tapasaśca hete /
menyā menirasyamenayaste santu ye'smāmabhyaghāyanti

yo'smāṃścakṣuṣā manasā cittyākūtyā ca yo aghāyurabhidāsāt/
tvaṃ tān agne menyāmenīn kṛṇu svāhā

indrasya gṛho'si /
taṃ tvā pra padye taṃ tvā pra viśāmi sarvaguḥ sarvapūruṣaḥ sarvātmā sarvatanūḥ saha yan me'sti tena

indrasya śarmāsi /
taṃ tvā pra padye taṃ tvā pra viśāmi sarvaguḥ sarvapūruṣaḥ sarvātmā sarvatanūḥ saha yan me'sti tena

indrasya varmāsi /
taṃ tvā pra padye taṃ tvā pra viśāmi sarvaguḥ sarvapūruṣaḥ sarvātmā sarvatanūḥ saha yan me'sti tena

indrasya varūthamasi /
taṃ tvā pra padye taṃ tvā pra viśāmi sarvaguḥ sarvapūruṣaḥ sarvātmā sarvatanūḥ saha yan me'sti tena

5.7
ā no bhara mā pari ṣṭhā arāte mā no rakṣīrdakṣiṇāṃ nīyamānām /
namo vīrtsāyā asamṛddhaye namo astvarātaye

yamarāte purodhatse puruṣaṃ parirāpiṇam /
namaste tasmai kṛṇmo mā vaniṃ vyathayīrmama

pra ṇo vanirdevakṛtā divā naktaṃ ca kalpatām /
arātimanupremo vayaṃ namo astvarātaye

sarasvatīmanumatiṃ bhagaṃ yanto havāmahe /
vācaṃ juṣṭāṃ madhumatīmavādiṣaṃ devānāṃ devahūtiṣu

yaṃ yācāmyahaṃ vācā sarasvatyā manoyujā /
śraddhā tamadya vindatu dattā somena babhruṇā

mā vaniṃ mā vācaṃ no vīrtsīrubhāvindrāgnī ā bharatāṃ no vasūni /
sarve no adya ditsanto'rātiṃ prati haryata

paro'pehyasamṛddhe vi te hetiṃ nayāmasi /
veda tvāhaṃ nimīvantīṃ nitudantīmarāte

uta nagnā bobhuvatī svapnayā sacase janam /
arāte cittaṃ vīrtsantyākūtiṃ puruṣasya ca

yā mahatī mahonmānā viśvā āśā vyānaśe /
tasyai hiraṇyakeśyai nirṛtyā akaraṃ namaḥ

hiraṇyavarṇā subhagā hiraṇyakaśipurmahī /
tasyai hiraṇyadrāpaye'rātyā akaraṃ namaḥ

5.8
vaikaṅkatenedhmena devebhya ājyaṃ vaha /
agne tāmiha mādaya sarva ā yantu me havam

indrā yāhi me havamidaṃ kariṣyāmi tacchṛṇu /
ima aindrā atisarā ākūtiṃ saṃ namantu me /
tebhiḥ śakema vīryaṃ jātavedastanūvaśin

yadasāvamuto devā adevaḥ saṃścikīrṣati /
mā tasyāgnirhavyaṃ vākṣīddhavaṃ devā asya mopa gurmamaiva havametana

ati dhāvatātisarā indrasya vacasā hata /
aviṃ vṛka iva mathnīta sa vo jīvan mā moci prāṇamasyāpi nahyata

yamamī purodadhire brahmāṇamapabhūtaye /
indra sa te adhaspadaṃ taṃ pratyasyāmi mṛtyave

yadi preyurdevapurā brahma varmāṇi cakrire /
tanūpānaṃ paripāṇaṃ kṛṇvānā yadupocire sarvaṃ tadarasaṃ kṛdhi

yān asāvatisarāṃścakāra kṛṇavacca yān /
tvaṃ tān indra vṛtrahan pratīcaḥ punarā kṛdhi yathāmuṃ tṛṇahāṃ janam

yathendra udvācanaṃ labdhvā cakre adhaspadam /
kṛṇve'hamadharān tathā amūñchaśvatībhyaḥ samābhyaḥ

atrainān indra vṛtrahann ugro marmaṇi vidhya /
atraivainān abhi tiṣṭhendra medyahaṃ tava /
anu tvendrā rabhāmahe syāma sumatau tava

5.9
dive svāhā

pṛthivyai svāhā

antarikṣāya svāhā

antarikṣāya svāhā

dive svāhā

pṛthivyai svāhā

sūryo me cakṣurvātaḥ prāṇo'ntarikṣamātmā pṛthivī śarīram /
astṛto nāmāhamayamasmi sa ātmānaṃ ni dadhe dyāvāpṛthivībhyāṃ gopīthāya

udāyurudbalamutkṛtamutkṛtyāmun manīṣāmudindriyam /
āyuṣkṛdāyuṣpatnī svadhāvantau gopā me staṃ gopāyataṃ mā /
ātmasadau me staṃ mā mā hiṃsiṣṭam

5.10
aśmavarma me'si yo mā prācyā diśo'ghāyurabhidāsāt/
etatsa ṛchāt

aśmavarma me'si yo mā dakṣiṇāyā diśo'ghāyurabhidāsāt/
etatsa ṛchāt

aśmavarma me'si yo mā pratīcyā diśo'ghāyurabhidāsāt/
etatsa ṛchāt

aśmavarma me'si yo modīcyā diśo'ghāyurabhidāsāt/
etatsa ṛchāt

aśmavarma me'si yo mā dhruvāyā diśo'ghāyurabhidāsāt/
etatsa ṛchāt

aśmavarma me'si yo mordhvāyā diśo'ghāyurabhidāsāt/
etatsa ṛchāt

aśmavarma me'si yo mā diśāmantardeśebhyo'ghāyurabhidāsāt/
etatsa ṛchāt

bṛhatā mana upa hvaye mātariśvanā prāṇāpānau /
sūryāccakṣurantarikṣācchrotraṃ pṛthivyāḥ śarīram /
sarasvatyā vācamupa hvayāmahe manoyujā

5.11
kathaṃ mahe asurāyābravīriha kathaṃ pitre haraye tveṣanṛmṇaḥ /
pṛśniṃ varuṇa dakṣiṇāṃ dadāvān punarmagha tvaṃ manasācikitsīḥ

na kāmena punarmagho bhavāmi saṃ cakṣe kaṃ pṛśnimetāmupāje /
kena nu tvamatharvan kāvyena kena jātenāsi jātavedāḥ

satyamahaṃ gabhīraḥ kāvyena satyaṃ jātenāsmi jātavedāḥ /
na me dāso nāryo mahitvā vrataṃ mīmāya yadahaṃ dhariṣye

na tvadanyaḥ kavitaro na medhayā dhīrataro varuṇa svadhāvan /
tvaṃ tā viśvā bhuvanāni vettha sa cin nu tvajjano māyī bibhāya

tvaṃ hyaṅga varuṇa svadhāvan viśvā vettha janima supraṇīte /
kiṃ rajasa enā paro anyadastyenā kiṃ pareṇāvaramamura

ekaṃ rajasa enā paro anyadastyenā para ekena durṇaśaṃ cidarvāk/
tatte vidvān varuṇa pra bravīmyadhovacasaḥ paṇayo bhavantu nīcairdāsā upa sarpantu bhūmim

tvaṃ hyaṅga varuṇa bravīṣi punarmagheṣvavadyāni bhūri /
mo ṣu paṇīṃrabhyetāvato bhūn mā tvā vocann arādhasaṃ janāsaḥ

mā mā vocann arādhasaṃ janāsaḥ punaste pṛśniṃ jaritardadāmi /
stotraṃ me viśvamā yāhi śacībhirantarviśvāsu mānuṣīṣu dikṣu

ā te stotrāṇyudyatāni yantvantarviśvāsu mānuṣīṣu dikṣu /
dehi nu me yan me adatto asi yujyo me saptapadaḥ sakhāsi

samā nau bandhurvaruṇa samā jā vedāhaṃ tadyan nāveṣā samā jā /
dadāmi tadyatte adatto asmi yujyaste saptapadaḥ sakhāsmi

devo devāya gṛṇate vayodhā vipro viprāya stuvate sumedhāḥ /
ajījano hi varuṇa svadhāvann atharvāṇaṃ pitaraṃ devabandhum /
tasmā u rādhaḥ kṛṇuhi supraśastaṃ sakhā no asi paramaṃ ca bandhuḥ

5.12
samiddho adya manuṣo duroṇe devo devān yajasi jātavedaḥ /
ā ca vaha mitramahaścikitvān tvaṃ dūtaḥ kavirasi pracetāḥ

tanūnapātpatha ṛtasya yānān madhvā samañjantsvadayā sujihva /
manmāni dhībhiruta yajñamṛndhan devatrā ca kṛṇuhyadhvaraṃ naḥ

ājuhvāna īḍyo bandyaścā yāhyagne vasubhiḥ sajoṣāḥ /
tvaṃ devānāmasi yahva hotā sa enān yakṣīṣito yajīyān

prācīnaṃ barhiḥ pradiśā pṛthivyā vastorasyā vṛjyate agre ahnām /
vyu prathate vitaraṃ varīyo devebhyo aditaye syonam

vyacasvatīrurviyā vi śrayantāṃ patibhyo na janayaḥ śumbhamānāḥ /
devīrdvāro bṛhatīrviśvaminvā devebhyo bhavata suprāyaṇāḥ

ā suṣvayantī yajate upāke uṣāsānaktā sadatāṃ ni yonau /
divye yoṣaṇe bṛhatī surukme adhi śriyaṃ śukrapiśaṃ dadhāne

daivyā hotārā prathamā suvācā mimānā yajñaṃ manuṣo yajadhyai /
pracodayantā vidatheṣu kārū prācīnaṃ jyotiḥ pradiśā diśantā

ā no yajñaṃ bhāratī tūyametviḍā manuṣvadiha cetayantī /
tisro devīrbarhiredaṃ syonaṃ sarasvatīḥ svapasaḥ sadantām

ya ime dyāvāpṛthivī janitrī rūpairapiṃśadbhuvanāni viśvā /
tamadya hotariṣito yajīyān devaṃ tvaṣṭāramiha yakṣi vidvān

upāvasṛja tmanyā samañjan devānāṃ pātha ṛtuthā havīṃṣi /
vanaspatiḥ śamitā devo agniḥ svadantu havyaṃ madhunā ghṛtena

sadyo jāto vyamimīta yajñamagnirdevānāmabhavatpurogāḥ /
asya hotuḥ praśiṣyṛtasya vāci svāhākṛtaṃ haviradantu devāḥ

5.13
dadirhi mahyaṃ varuṇo divaḥ kavirvacobhirugrairni riṇāmi te viṣam /
khātamakhātamuta saktamagrabhamireva dhanvan ni jajāsa te viṣam

yatte apodakaṃ viṣaṃ tatta etāsvagrabham /
gṛhṇāmi te madhyamamuttamaṃ rasamutāvamaṃ bhiyasā neśadādu te

vṛṣā me ravo nabhasā na tanyaturugreṇa te vacasā bādha ādu te /
ahaṃ tamasya nṛbhiragrabhaṃ rasaṃ tamasa iva jyotirudetu sūryaḥ

cakṣuṣā te cakṣurhanmi viṣeṇa hanmi te viṣam /
ahe mriyasva mā jīvīḥ pratyagabhyetu tvā viṣam

kairāta pṛśna upatṛṇya babhra ā me śṛṇutāsitā alīkāḥ /
mā me sakhyuḥ stāmānamapi ṣṭhātāśrāvayanto ni viṣe ramadhvam

asitasya taimātasya babhrorapodakasya ca /
sātrāsāhasyāhaṃ manyorava jyāmiva dhanvano vi muñcāmi rathāmiva

āligī ca viligī ca pitā ca matā ca /
vidma vaḥ sarvato bandhvarasāḥ kiṃ kariṣyatha

urugūlāyā duhitā jātā dāsyasiknyā /
prataṅkaṃ dadruṣīṇāṃ sarvāsāmarasaṃ viṣam

karṇā śvāvittadabravīdgireravacarantikā /
yāḥ kāścemāḥ khanitrimāstāsāmarasatamaṃ viṣam

tābuvaṃ na tābuvaṃ na ghettvamasi tābuvam /
tābuvenārasaṃ viṣam

tastuvaṃ na tastuvaṃ na ghettvamasi tastuvam /
tastuvenārasaṃ viṣam

5.14
suparṇastvānvavindatsūkarastvākhanan nasā /
dipsauṣadhe tvaṃ dipsantamava kṛtyākṛtaṃ jahi

ava jahi yātudhānān ava kṛtyākṛtaṃ jahi /
atho yo asmān dipsati tamu tvaṃ jahyoṣadhe

riśyasyeva parīśāsaṃ parikṛtya pari tvacaḥ /
kṛtyāṃ kṛtyākṛte devā niṣkamiva prati muñcata

punaḥ kṛtyāṃ kṛtyākṛte hastagṛhya parā ṇaya /
samakṣamasmā ā dhehi yathā kṛtyākṛtaṃ hanat

kṛtyāḥ santu kṛtyākṛte śapathaḥ śapathīyate /
sukho ratha iva vartatāṃ kṛtyā kṛtyākṛtaṃ punaḥ

yadi strī yadi vā pumān kṛtyāṃ cakāra pāpmane /
tāmu tasmai nayāmasyaśvamivāśvābhidhānyā

yadi vāsi devakṛtā yadi vā puruṣaiḥ kṛtā /
tāṃ tvā punarṇayāmasīndreṇa sayujā vayam

agne pṛtanāṣāṭpṛtanāḥ sahasva /
punaḥ kṛtyāṃ kṛtyākṛte pratiharaṇena harāmasi

kṛtavyadhani vidhya taṃ yaścakāra tamijjahi /
na tvāmacakruṣe vayaṃ vadhāya saṃ śiśīmahi

putra iva pitaraṃ gaccha svaja ivābhiṣṭhito daśa /
bandhamivāvakrāmī gaccha kṛtye kṛtyākṛtaṃ punaḥ

udeṇīva vāraṇyabhiskandaṃ mṛgīva /
kṛtyā kartāramṛcchatu

iṣvā ṛjīyaḥ patatu dyāvāpṛthivī taṃ prati /
sā taṃ mṛgamiva gṛhṇātu kṛtyā kṛtyākṛtaṃ punaḥ

agnirivaitu pratikūlamanukūlamivodakam /
sukho ratha iva vartatāṃ kṛtyā kṛtyākṛtaṃ punaḥ

5.15
ekā ca me daśa ca me'pavaktāra oṣadhe /
ṛtajāta ṛtāvari madhu me madhulā karaḥ

dve ca me viṃśatiśca me'pavaktāra oṣadhe /
ṛtajāta ṛtāvari madhu me madhulā karaḥ

tisraśca me triṃśacca me'pavaktāra oṣadhe /
ṛtajāta ṛtāvari madhu me madhulā karaḥ

catasraśca me catvāriṃśacca me'pavaktāra oṣadhe /
ṛtajāta ṛtāvari madhu me madhulā karaḥ

pañca ca me pañcāśacca me'pavaktāra oṣadhe /
ṛtajāta ṛtāvari madhu me madhulā karaḥ

ṣaṭca me ṣaṣṭiśca me'pavaktāra oṣadhe /
ṛtajāta ṛtāvari madhu me madhulā karaḥ

sapta ca me saptatiśca me'pavaktāra oṣadhe /
ṛtajāta ṛtāvari madhu me madhulā karaḥ

aṣṭa ca me'śītiśca me'pavaktāra oṣadhe /
ṛtajāta ṛtāvari madhu me madhulā karaḥ

nava ca me navatiśca me'pavaktāra oṣadhe /
ṛtajāta ṛtāvari madhu me madhulā karaḥ

daśa ca me śataṃ ca me'pavaktāra oṣadhe /
ṛtajāta ṛtāvari madhu me madhulā karaḥ

śataṃ ca me sahasraṃ cāpavaktāra oṣadhe /
ṛtajāta ṛtāvari madhu me madhulā karaḥ

5.16
yadyekavṛṣo'si sṛjāraso'si

yadi dvivṛṣo'si sṛjāraso'si

yadi trivṛso'si sṛjāraso'si

yadi caturvṛṣo'si sṛjāraso'si

yadi pañcavṛṣo'si sṛjāraso'si

yadi ṣaḍvṛṣo'si sṛjāraso'si

yadi saptavṛṣo'si sṛjāraso'si

yadyaṣṭavṛṣo'si sṛjāraso'si

yadi navavṛṣo'si sṛjāraso'si

yadi daśavṛṣo'si sṛjāraso'si

yadyekādaśo'si so'podako'si

5.17
te'vadan prathamā brahmakilbiṣe'kūpāraḥ salilo mātariśvā /
vīḍuharāstapa ugraṃ mayobhūrāpo devīḥ prathamajā ṛtasya

somo rājā prathamo brahmajāyāṃ punaḥ prāyacchadahṛṇīyamānaḥ /
anvartitā varuṇo mitra āsīdagnirhotā hastagṛhyā nināya

hastenaiva grāhya ādhirasyā brahmajāyeti cedavocat/
na dūtāya praheyā tastha eṣā tathā rāṣṭraṃ gupitaṃ kṣatriyasya

yāmāhustārakaiṣā vikeśīti ducchunāṃ grāmamavapadyamānām /
sā brahmajāyā vi dunoti rāṣṭraṃ yatra prāpādi śaśa ulkuṣīmān

brahmacārī carati veviṣadviṣaḥ sa devānāṃ bhavatyekamaṅgam /
tena jāyāmanvavindadbṛhaspatiḥ somena nītāṃ juhvaṃ na devāḥ

devā vā etasyāmavadanta pūrve saptaṛṣayastapasā ye niṣeduḥ /
bhīmā jāyā brāhmaṇasyāpanītā durdhāṃ dadhāti parame vyoman

ye garbhā avapadyante jagadyaccāpalupyate /
vīrā ye tṛhyante mitho brahmajāyā hinasti tān

uta yatpatayo daśa striyāḥ pūrve abrāhmaṇāḥ /
brahmā ceddhastamagrahītsa eva patirekadhā

brāhmaṇa eva patirna rājanyo na vaiśyaḥ /
tatsūryaḥ prabruvann eti pañcabhyo mānavebhyaḥ

punarvai devā adaduḥ punarmanuṣyā adaduḥ /
rājānaḥ satyaṃ gṛhṇānā brahmajāyāṃ punardaduḥ

punardāya brahmajāyāṃ kṛtvā devairnikilbiṣam /
ūrjaṃ pṛthivyā bhaktvorugāyamupāsate

nāsya jāyā śatavāhī kalyāṇī talpamā śaye /
yasmin rāṣṭre nirudhyate brahmajāyācittyā

na vikarṇaḥ pṛthuśirāstasmin veśmani jāyate /
yasmin rāṣṭre nirudhyate brahmajāyācittyā

nāsya kṣattā niṣkagrīvaḥ sūnānāmetyagrataḥ /
yasmin rāṣṭre nirudhyate brahmajāyācittyā

nāsya śvetaḥ kṛṣṇakarṇo dhuri yukto mahīyate /
yasmin rāṣṭre nirudhyate brahmajāyācittyā

nāsya kṣetre puṣkariṇī nāṇḍīkaṃ jāyate bisam /
yasmin rāṣṭre nirudhyate brahmajāyācittyā

nāsmai pṛśniṃ vi duhanti ye'syā dohamupāsate /
yasmin rāṣṭre nirudhyate brahmajāyācittyā

nāsya dhenuḥ kalyāṇī nānaḍvāntsahate dhuram /
vijāniryatra brahmaṇo rātriṃ vasati pāpayā

5.18
naitāṃ te devā adadustubhyaṃ nṛpate attave /
mā brāhmaṇasya rājanya gāṃ jighatso anādyām

akṣadrugdho rājanyaḥ pāpa ātmaparājitaḥ /
sa brāhmaṇasya gāmadyādadya jīvāni mā śvaḥ

āviṣṭitāghaviṣā pṛdākūriva carmaṇā /
sā brāhmaṇasya rājanya tṛṣṭaiṣā gauranādyā

nirvai kṣatraṃ nayati hanti varco'gnirivārabdho vi dunoti sarvam /
yo brāhmaṇaṃ manyate annameva sa viṣasya pibati taimātasya

ya enaṃ hanti mṛduṃ manyamāno devapīyurdhanakāmo na cittāt/
saṃ tasyendro hṛdaye'gnimindhe ubhe enaṃ dviṣṭo nabhasī carantam

na brāhmaṇo hiṃsitavyo'gniḥ priyatanoriva /
somo hyasya dāyāda indro asyābhiśastipāḥ

śatāpāṣṭhāṃ ni girati tāṃ na śaknoti niḥkhidam /
annaṃ yo brahmaṇāṃ malvaḥ svādvadmīti manyate

jihvā jyā bhavati kulmalaṃ vāṅnāḍīkā dantāstapasābhidigdhāḥ /
tebhirbrahmā vidhyati devapīyūn hṛdbalairdhanurbhirdevajūtaiḥ

tīkṣṇeṣavo brāhmaṇā hetimanto yāmasyanti śaravyāṃ na sā mṛṣā /
anuhāya tapasā manyunā cota durādava bhindantyenam

ye sahasramarājann āsan daśaśatā uta /
te brāhmaṇasya gāṃ jagdhvā vaitahavyāḥ parābhavan

gaureva tān hanyamānā vaitahavyāmavātirat/
ye kesaraprābandhāyāścaramājāmapeciran

ekaśataṃ tā janatā yā bhūmirvyadhūnuta /
prajāṃ hiṃsitvā brāhmaṇīmasaṃbhavyaṃ parābhavan

devapīyuścarati martyeṣu garagīrṇo bhavatyasthibhūyān /
yo brāhmaṇaṃ devabandhuṃ hinasti na sa pitṛyāṇamapyeti lokam

agnirvai naḥ padavāyaḥ somo dāyāda ucyate /
hantābhiśastendrastathā tadvedhaso viduḥ

iṣuriva digdhā nṛpate pṛdākūriva gopate /
sā brāhmaṇasyeṣurghorā tayā vidhyati pīyataḥ

5.19
atimātramavardhanta nodiva divamaspṛśan /
bhṛguṃ hiṃsitvā sṛñjayā vaitahavyāḥ parābhavan

ye bṛhatsāmānamāṅgirasamārpayan brāhmaṇaṃ janāḥ /
petvasteṣāmubhayādamavistokānyāvayat

ye brāhmaṇaṃ pratyaṣṭhīvan ye vāsmiñchulkamīṣire /
asnaste madhye kulyāyāḥ keśān khādanta āsate

brahmagavī pacyamānā yāvatsābhi vijaṅgahe /
tejo rāṣṭrasya nirhanti na vīro jāyate vṛṣā

krūramasyā āśasanaṃ tṛṣṭaṃ piśitamasyate /
kṣīraṃ yadasyāḥ pīyate tadvai pitṛṣu kilbiṣam

ugro rājā manyamāno brāhmaṇaṃ yo jighatsati /
parā tatsicyate rāṣṭraṃ brāhmaṇo yatra jīyate

aṣṭāpadī caturakṣī catuḥśrotrā caturhanuḥ /
dvyāsyā dvijihvā bhūtvā sā rāṣṭramava dhūnute brahmajyasya

tadvai rāṣṭramā sravati nāvaṃ bhinnāmivodakam /
brahmāṇaṃ yatra hiṃsanti tadrāṣṭraṃ hanti duchunā

taṃ vṛkṣā apa sedhanti chāyāṃ no mopa gā iti /
yo brāhmaṇasya saddhanamabhi nārada manyate

viṣametaddevakṛtaṃ rājā varuṇo'bravīt/
na brāhmaṇasya gāṃ jagdhvā rāstre jāgāra kaścana

navaiva tā navatayo yā bhūmirvyadhūnuta /
prajāṃ hiṃsitvā brāhmaṇīmasaṃbhavyaṃ parābhavan

yāṃ mṛtāyānubadhnanti kūdyaṃ padayopanīm /
tadvai brahmajya te devā upastaraṇamabruvan

aśrūṇi kṛpamānasya yāni jītasya vāvṛtuḥ /
taṃ vai brahmajya te devā apāṃ bhāgamadhārayan

yena mṛtaṃ snapayanti śmaśrūṇi yenondate /
taṃ vai brahmajya te devā apāṃ bhāgamadhārayan

na varṣaṃ maitrāvaruṇaṃ brahmajyamabhi varṣati /
nāsmai samitiḥ kalpate na mitraṃ nayate vaśam

5.20
uccairghoṣo dundubhiḥ satvanāyan vānaspatyaḥ saṃbhṛta usṛiyābhiḥ /
vācaṃ kṣuṇuvāno damayantsapatnāntsiṃha iva jeṣyann abhi taṃstanīhi

siṃha ivāstānīddruvayo vibaddho'bhikrandann ṛṣabho vāsitāmiva /
vṛṣā tvaṃ vadhrayaste sapatnā aindraste śuṣmo abhimātiṣāhaḥ

vṛṣeva yūthe sahasā vidāno gavyann abhi ruva saṃdhanājit/
śucā vidhya hṛdayaṃ pareṣāṃ hitvā grāmān pracyutā yantu śatravaḥ

saṃjayan pṛtanā ūrdhvamāyurgṛhyā gṛhṇāno bahudhā vi cakṣva /
daivīṃ vācaṃ dundubha ā gurasva vedhāḥ śatrūṇāmupa bharasva vedaḥ

dundubhervācaṃ prayatāṃ vadantīmāśṛṇvatī nāthitā ghoṣabuddhā /
nārī putraṃ dhāvatu hastagṛhyāmitrī bhītā samare vadhānām

pūrvo dundubhe pra vadāsi vācaṃ bhūmyāḥ pṛṣṭhe vada rocamānaḥ /
amitrasenāmabhijañjabhāno dyumadvada dundubhe sūnṛtāvat

antareme nabhasī ghoṣo astu pṛthakte dhvanayo yantu śībham /
abhi kranda stanayotpipānaḥ ślokakṛn mitratūryāya svardhī

dhībhiḥ kṛtaḥ pra vadāti vācamuddharṣaya satvanāmāyudhāni /
indramedī satvano ni hvayasva mitrairamitrāmava jaṅghanīhi

saṃkrandanaḥ pravado dhṛṣṇuṣeṇaḥ pravedakṛdbahudhā grāmaghoṣī /
śriyo vanvano vayunāni vidvān kīrtiṃ bahubhyo vi hara dvirāje

śreyaḥketo vasujitsahīyāntsaṃgrāmajitsaṃśito brahmaṇāsi /
aṃśūn iva grāvādhiṣavaṇe adrirgavyan dundubhe'dhi nṛtya vedaḥ

śatrūṣāṇnīṣādabhimātiṣāho gaveṣaṇaḥ sahamāna udbhit/
vāgvīva mantraṃ pra bharasva vācaṃ sāṃgrāmajityāyeṣamudvadeha

acyutacyutsamado gamiṣṭho mṛdho jetā puraetāyodhyaḥ /
indreṇa gupto vidathā nicikyaddhṛddyotano dviṣatāṃ yāhi śībham

5.21
vihṛdayaṃ vaimanasyaṃ vadāmitreṣu dundubhe /
vidveṣaṃ kaśmaśaṃ bhayamamitreṣu ni dadhmasyava enān dundubhe jahi

udvepamānā manasā cakṣuṣā hṛdayena ca /
dhāvantu bibhyato'mitrāḥ pratrāsenājye hute

vānaspatyaḥ saṃbhṛta usriyābhirviśvagotryaḥ /
pratrāsamamitrebhyo vadājyenābhighāritaḥ

yathā mṛgāḥ saṃvijanta āraṇyāḥ puruṣādadhi /
eva tvaṃ dundubhe'mitrān abhi kranda pra trāsayātho cittāni mohaya

yathā vṛkādajāvayo dhāvanti bahu bibhyatīḥ /
eva tvaṃ dundubhe'mitrān abhi kranda pra trāsayātho cittāni mohaya

yathā śyenātpatatriṇaḥ saṃvijante ahardivi siṃhasya stanathoryathā /
eva tvaṃ dundubhe'mitrān abhi kranda pra trāsayātho cittāni mohaya

parāmitrān dundubhinā hariṇasyājinena ca /
sarve devā atitrasan ye saṃgrāmasyeṣate

yairindraḥ prakrīḍate padghoṣaiśchāyayā saha /
tairamitrāstrasantu no'mī ye yantyanīkaśaḥ

jyāghoṣā dundubhayo'bhi krośantu yā diśaḥ /
senāḥ parājitā yatīramitrāṇāmanīkaśaḥ

āditya cakṣurā datsva marīcayo'nu dhāvata /
patsaṅginīrā sajantu vigate bāhuvīrye

yūyamugrā marutaḥ pṛśnimātara indreṇa yujā pra mṛnīta śatrūn /
somo rājā varuṇo rājā mahādeva uta mṛtyurindraḥ

etā devasenāḥ sūryaketavaḥ sacetasaḥ /
amitrān no jayantu svāhā

5.22
agnistakmānamapa bādhatāmitaḥ somo grāvā varuṇaḥ pūtadakṣāḥ /
vedirbarhiḥ samidhaḥ śośucānā apa dveṣāṃsyamuyā bhavantu

ayaṃ yo viśvān haritān kṛṇoṣyucchocayann agnirivābhidunvan /
adhā hi takmann araso hi bhūyā adhā nyaṅṅadharān vā parehi

yaḥ paruṣaḥ pāruṣeyo'vadhvaṃsa ivāruṇaḥ /
takmānaṃ viśvadhāvīryādharāñcaṃ parā suvā

adharāñcaṃ pra hiṇomi namaḥ kṛtvā takmane /
śakambharasya muṣṭihā punaretu mahāvṛṣān

oko asya mūjavanta oko asya mahāvṛṣāḥ /
yāvajjātastakmaṃstāvān asi balhikeṣu nyocaraḥ

takman vyāla vi gada vyaṅga bhūri yāvaya /
dāsīṃ niṣṭakvarīmiccha tāṃ vajreṇa samarpaya

takman mūjavato gaccha balhikān vā parastarām /
śūdrāmiccha prapharvyaṃ tāṃ takman vīva dhūnuhi

mahāvṛṣān mūjavato bandhvaddhi paretya /
praitāni takmane brūmo anyakṣetrāṇi vā imā

anyakṣetre na ramase vaśī san mṛḍayāsi naḥ /
abhūdu prārthastakmā sa gamiṣyati balhikān

yattvaṃ śīto'tho rūraḥ saha kāsāvepayaḥ /
bhīmāste takman hetayastābhiḥ sma pari vṛṅgdhi naḥ

mā smaitāntsakhīn kuruthā balāsaṃ kāsamudyugam /
mā smāto'rvāṅaiḥ punastattvā takmann upa bruve

takman bhrātrā balāsena svasrā kāsikayā saha /
pāpmā bhrātṛvyeṇa saha gachāmumaraṇaṃ janam

tṛtīyakaṃ vitṛtīyaṃ sadandimuta śāradam /
takmānaṃ śītaṃ rūraṃ graiṣmaṃ nāśaya vārṣikam

gandhāribhyo mūjavadbhyo'ṅgebhyo magadhebhyaḥ /
praiṣyan janamiva śevadhiṃ takmānaṃ pari dadmasi

5.23
ote me dyāvāpṛthivī otā devī sarasvatī /
otau ma indraścāgniśca krimiṃ jambhayatāmiti

asyendra kumārasya krimīn dhanapate jahi /
hatā viśvā arātaya ugreṇa vacasā mama

yo akṣyau parisarpati yo nāse parisarpati /
datāṃ yo madhyaṃ gacchati taṃ krimiṃ jambhayāmasi

sarūpau dvau virūpau dvau kṛṣṇau dvau rohitau dvau /
babhruśca babhrukarṇaśca gṛdhraḥ kokaśca te hatāḥ

ye krimayaḥ śitikakṣā ye kṛṣṇāḥ śitibāhavaḥ /
ye ke ca viśvarūpāstān krimīn jambhayāmasi

utpurastātsūrya eti viśvadṛṣṭo adṛṣṭahā /
dṛṣṭāṃśca ghnann adṛṣṭāṃśca sarvāṃśca pramṛṇan krimīn

yevāṣāsaḥ kaṣkaṣāsa ejatkāḥ śipavitnukāḥ /
dṛṣṭaśca hanyatāṃ krimirutādṛṣṭaśca hanyatām

hato yevāṣaḥ krimīṇāṃ hato nadanimota /
sarvān ni maṣmaṣākaraṃ dṛṣadā khalvāmiva

triśīrṣāṇaṃ trikakudaṃ krimiṃ sāraṅgamarjunam /
śṛṇāmyasya pṛṣṭīrapi vṛścāmi yacchiraḥ

atrivadvaḥ krimayo hanmi kaṇvavajjamadagnivat/
agastyasya brahmaṇā saṃ pinaṣmyahaṃ krimīn

hato rājā krimīṇāmutaiṣāṃ sthapatirhataḥ /
hato hatamātā krimirhatabhrātā hatasvasā

hatāso asya veśaso hatāsaḥ pariveśasaḥ /
atho ye kṣullakā iva sarve te krimayo hatāḥ

sarveṣāṃ ca krimīṇāṃ sarvāsāṃ ca krimīnām /
bhinadmyaśmanā śiro dahāmyagninā mukham

5.24
savitā prasavānāmadhipatiḥ sa māvatu /
asmin brahmaṇyasmin karmaṇyasyāṃ purodhāyāmasyāṃ pratiṣṭhāyāmasyām /
cittyāmasyāmākūtyāmasyāmāśiṣyasyāṃ devahūtyāṃ svāhā

agnirvanaspatīnāmadhipatiḥ sa māvatu /
asmin brahmaṇyasmin karmaṇyasyāṃ purodhāyāmasyāṃ pratiṣṭhāyāmasyām /
cittyāmasyāmākūtyāmasyāmāśiṣyasyāṃ devahūtyāṃ svāhā

dyāvāpṛthivī dātṝṇāmadhipatiḥ sa māvatu /
asmin brahmaṇyasmin karmaṇyasyāṃ purodhāyāmasyāṃ pratiṣṭhāyāmasyām /
cittyāmasyāmākūtyāmasyāmāśiṣyasyāṃ devahūtyāṃ svāhā

varuṇo'pāmadhipatiḥ sa māvatu /
asmin brahmaṇyasmin karmaṇyasyāṃ purodhāyāmasyāṃ pratiṣṭhāyāmasyām /
cittyāmasyāmākūtyāmasyāmāśiṣyasyāṃ devahūtyāṃ svāhā

mitrāvaruṇau vṛṣṭyādhipatī tau māvatām /
asmin brahmaṇyasmin karmaṇyasyāṃ purodhāyāmasyāṃ pratiṣṭhāyāmasyām /
cittyāmasyāmākūtyāmasyāmāśiṣyasyāṃ devahūtyāṃ svāhā

marutaḥ parvatānāmadhipatayaste māvantu /
asmin brahmaṇyasmin karmaṇyasyāṃ purodhāyāmasyāṃ pratiṣṭhāyāmasyām /
cittyāmasyāmākūtyāmasyāmāśiṣyasyāṃ devahūtyāṃ svāhā

somo vīrudhāmadhipatiḥ sa māvatu /
asmin brahmaṇyasmin karmaṇyasyāṃ purodhāyāmasyāṃ pratiṣṭhāyāmasyām /
cittyāmasyāmākūtyāmasyāmāśiṣyasyāṃ devahūtyāṃ svāhā

vāyurantarikṣasyādhipatiḥ sa māvatu /
asmin brahmaṇyasmin karmaṇyasyāṃ purodhāyāmasyāṃ pratiṣṭhāyāmasyām /
cittyāmasyāmākūtyāmasyāmāśiṣyasyāṃ devahūtyāṃ svāhā

sūryaścakṣuṣāmadhipatiḥ sa māvatu /
asmin brahmaṇyasmin karmaṇyasyāṃ purodhāyāmasyāṃ pratiṣṭhāyāmasyām /
cittyāmasyāmākūtyāmasyāmāśiṣyasyāṃ devahūtyāṃ svāhā

candramā nakṣatrāṇāmadhipatiḥ sa māvatu /
asmin brahmaṇyasmin karmaṇyasyāṃ purodhāyāmasyāṃ pratiṣṭhāyāmasyām /
cittyāmasyāmākūtyāmasyāmāśiṣyasyāṃ devahūtyāṃ svāhā

indro divo'dhipatiḥ sa māvatu /
asmin brahmaṇyasmin karmaṇyasyāṃ purodhāyāmasyāṃ pratiṣṭhāyāmasyām /
cittyāmasyāmākūtyāmasyāmāśiṣyasyāṃ devahūtyāṃ svāhā

marutāṃ pitā paśūnāmadhipatiḥ sa māvatu /
asmin brahmaṇyasmin karmaṇyasyāṃ purodhāyāmasyāṃ pratiṣṭhāyāmasyām /
cittyāmasyāmākūtyāmasyāmāśiṣyasyāṃ devahūtyāṃ svāhā

mṛtyuḥ prajānāmadhipatiḥ sa māvatu /
asmin brahmaṇyasmin karmaṇyasyāṃ purodhāyāmasyāṃ pratiṣṭhāyāmasyām /
cittyāmasyāmākūtyāmasyāmāśiṣyasyāṃ devahūtyāṃ svāhā

yamaḥ pitṝṇāmadhipatiḥ sa māvatu /
asmin brahmaṇyasmin karmaṇyasyāṃ purodhāyāmasyāṃ pratiṣṭhāyāmasyām /
cittyāmasyāmākūtyāmasyāmāśiṣyasyāṃ devahūtyāṃ svāhā

pitaraḥ pare te māvantu /
asmin brahmaṇyasmin karmaṇyasyāṃ purodhāyāmasyāṃ pratiṣṭhāyāmasyām /
cittyāmasyāmākūtyāmasyāmāśiṣyasyāṃ devahūtyāṃ svāhā

tatā avare te māvantu /
asmin brahmaṇyasmin karmaṇyasyāṃ purodhāyāmasyāṃ pratisṭhāyāmasyām /
cittyāmasyāmākūtyāmasyāmāśiṣyasyāṃ devahūtyāṃ svāhā

tatastatāmahāste māvantu /
asmin brahmaṇyasmin karmaṇyasyāṃ purodhāyāmasyāṃ pratiṣṭhāyāmasyām /
cittyāmasyāmākūtyāmasyāmāśiṣyasyāṃ devahūtyāṃ svāhā

5.25
parvatāddivo yoneraṅgādaṅgātsamābhṛtam /
śepo garbhasya retodhāḥ sarau parṇamivā dadhat

yatheyaṃ pṛthivī mahī bhūtānāṃ garbhamādadhe /
evā dadhāmi te garbhaṃ tasmai tvāmavase huve

garbhaṃ dhehi sinīvāli garbhaṃ dhehi sarasvati /
garbhaṃ te aśvinobhā dhattāṃ puṣkarasrajā

garbhaṃ te mitrāvaruṇau garbhaṃ devo bṛhaspatiḥ /
garbhaṃ ta indraścāgniśca garbhaṃ dhātā dadhātu te

viṣṇuryoniṃ kalpayatu tvaṣṭā rūpāṇi piṃśatu /
ā siñcatu prajāpatirdhātā garbhaṃ dadhātu te

yadveda rājā varuṇo yadvā devī sarasvatī /
yadindro vṛtrahā veda tadgarbhakaraṇaṃ piba

garbho asyoṣadhīnāṃ garbho vanaspatīnām /
garbho viśvasya bhūtasya so agne garbhameha dhāḥ

adhi skanda vīrayasva garbhamā dhehi yonyām /
vṛṣāsi vṛṣṇyāvan prajāyai tvā nayāmasi

vi jihīṣva bārhatsāme garbhaste yonimā śayām /
aduṣṭe devāḥ putraṃ somapā ubhayāvinam

dhātaḥ śreṣṭhena rūpeṇāsyā nāryā gavīnyoḥ /
pumāṃsaṃ putramā dhehi daśame māsi sūtave

tvaṣṭaḥ śreṣṭhena rūpeṇāsyā nāryā gavīnyoḥ /
pumāṃsaṃ putramā dhehi daśame māsi sūtave

savitaḥ śreṣṭhena rūpeṇāsyā nāryā gavīnyoḥ /
pumāṃsaṃ putramā dhehi daśame māsi sūtave

prajāpate śreṣṭhena rūpeṇāsyā nāryā gavīnyoḥ /
pumāṃsaṃ putramā dhehi daśame māsi sūtave

5.26
yajūṃṣi yajñe samidhaḥ svāhāgniḥ pravidvān iha vo yunaktu

yunaktu devaḥ savitā prajānann asmin yajñe mahiṣaḥ svāhā

indra ukthāmadānyasmin yajñe pravidvān yunaktu suyujaḥ svāhā

praiṣā yajñe nividaḥ svāhā śiṣṭāḥ patnībhirvahateha yuktāḥ

chandāṃsi yajñe marutaḥ svāhā māteva putraṃ pipṛteha yuktāḥ

eyamagan barhiṣā prokṣaṇībhiryajñaṃ tanvānāditiḥ svāhā

viṣṇuryunaktu bahudhā tapāṃsyasmin yajñe suyujaḥ svāhā

tvaṣṭā yunaktu bahudhā nu rūpā asmin yajñe yunaktu suyujaḥ svāhā

bhago yunaktvāśiṣo nvasmā asmin yajñe pravidvān yunaktu suyujaḥ svāhā

somo yunaktu bahudhā payāṃsyasmin yajñe suyujaḥ svāhā

indro yunaktu bahudhā payāṃsyasmin yajñe suyujaḥ svāhā

aśvinā brahmaṇā yātamarvāñcau vaṣaṭkāreṇa yajñaṃ vardhayantau /
bṛhaspate brahmaṇā yāhyarvāṅyajño ayaṃ svaridaṃ yajamānāya svāhā

5.27
ūrdhvā asya samidho bhavantyūrdhvā śukrā śocīṣyagneḥ /
dyumattamā supratīkaḥ sasūnustanūnapādasuro bhūripāṇiḥ

devo deveṣu devaḥ patho anakti madhvā ghṛtena

madhvā yajñaṃ nakṣati praiṇāno narāśaṃso agniḥ sukṛddevaḥ savitā viśvavāraḥ

achāyameti śavasā ghṛtā cidīdāno vahnirnamasā

agniḥ sruco adhvareṣu prayakṣu sa yakṣadasya mahimānamagneḥ

tarī mandrāsu prayakṣu vasavaścātiṣṭhan vasudhātaraśca

dvāro devīranvasya viśve vrataṃ rakṣanti viśvahā

uruvyacasāgnerdhāmnā patyamāne /
ā suṣvayantī yajate upāke uṣāsānaktemaṃ yajñamavatāmadhvaraṃ naḥ

daivā hotāra ūrdhvamadhvaraṃ no'gnerjihvayābhi gṛnata gṛnatā naḥ sviṣṭaye /
tisro devīrbarhiredaṃ sadantāmiḍā sarasvatī mahī bhāratī gṛṇānā

tan nasturīpamadbhutaṃ purukṣu /
deva tvaṣṭā rāyaspoṣaṃ vi ṣya nābhimasya

vanaspate'va sṛjā rarāṇaḥ /
tmanā devebhyo agnirhavyaṃ śamitā svadayatu

agne svāhā kṛṇuhi jātavedaḥ /
indrāya yajñaṃ viśve devā haviridaṃ juṣantām

5.28
nava prāṇān navabhiḥ saṃ mimīte dīrghāyutvāya śataśāradāya /
harite trīṇi rajate trīṇyayasi trīṇi tapasāviṣṭitāni

agniḥ sūryaścandramā bhūmirāpo dyaurantarikṣaṃ pradiśo diśaśca /
ārtavā ṛtubhiḥ saṃvidānā anena mā trivṛtā pārayantu

trayaḥ poṣāstrivṛti śrayantāmanaktu pūṣā payasā ghṛtena /
annasya bhūmā puruṣasya bhūmā bhūmā paśūnāṃ ta iha śrayantām

imamādityā vasunā samukṣatemamagne vardhaya vavṛdhānaḥ /
imamindra saṃ sṛja vīryeṇāsmin trivṛcchrayatāṃ poṣayiṣṇu

bhūmiṣṭvā pātu haritena viśvabhṛdagniḥ pipartvayasā sajoṣāḥ /
vīrudbhiṣṭe arjunaṃ saṃvidānaṃ dakṣaṃ dadhātu sumanasyamānam

tredhā jātaṃ janmanedaṃ hiraṇyamagnerekaṃ priyatamaṃ babhūva somasyaikaṃ hiṃsitasya parāpatat/
apāmekaṃ vedhasāṃ reta āhustatte hiraṇyaṃ trivṛdastvāyuṣe

tryāyuṣaṃ jamadagneḥ kaśyapasya tryāyuṣam /
tredhāmṛtasya cakṣaṇaṃ trīṇyāyūṃṣi te'karam

trayaḥ suparṇāstrivṛtā yadāyann ekākṣaramabhisaṃbhūya śakrāḥ /
pratyauhan mṛtyumamṛtena sākamantardadhānā duritāni viśvā

divastvā pātu haritaṃ madhyāttvā pātvarjunam /
bhūmyā ayasmayaṃ pātu prāgāddevapurā ayam

imāstisro devapurāstāstvā rakṣantu sarvataḥ /
tāstvaṃ bibhradvarcasvyuttaro dviṣatāṃ bhava

puraṃ devānāmamṛtaṃ hiraṇyaṃ ya ābedhe prathamo devo agre /
tasmai namo daśa prācīḥ kṛṇomyanu manyatāṃ trivṛdābadhe me

ā tvā cṛtatvaryamā pūṣā bṛhaspatiḥ /
aharjātasya yan nāma tena tvāti cṛtāmasi

ṛtubhiṣṭvārtavairāyuṣe varcase tvā /
saṃvatsarasya tejasā tena saṃhanu kṛṇmasi

ghṛtādulluptaṃ madhunā samaktaṃ bhūmidṛṃhamacyutaṃ pārayiṣṇu /
bhindatsapatnān adharāṃśca kṛṇvadā mā roha mahate saubhagāya

5.29
purastādyukto vaha jātavedo'gne viddhi kriyamāṇaṃ yathedam /
tvaṃ bhiṣagbheṣajasyāsi kartā tvayā gāmaśvaṃ puruṣaṃ sanema

tathā tadagne kṛṇu jātavedo viśvebhirdevaiḥ saha saṃvidānaḥ /
yo no dideva yatamo jaghāsa yathā so asya paridhiṣpatāti

yathā so asya paridhiṣpatāti tathā tadagne kṛṇu jātavedaḥ /
viśvebhirdevairsaha saṃvidānaḥ

akṣyau ni vidhya hṛdayaṃ ni vidhya jihvāṃ ni tṛnddhi pra dato mṛṇīhi /
piśāco asya yatamo jaghāsāgne yaviṣṭha prati śṛṇīhi

yadasya hṛtaṃ vihṛtaṃ yatparābhṛtamātmano jagdhaṃ yatamatpiśācaiḥ /
tadagne vidvān punarā bhara tvaṃ śarīre māṃsamasumerayāmaḥ

āme supakve śabale vipakve yo mā piśāco aśane dadambha /
tadātmanā prajayā piśācā vi yātayantāmagado'yamastu

kṣīre mā manthe yatamo dadambhākṛṣṭapacye aśane dhānye yaḥ /
tadātmanā prajayā piśācā vi yātayantāmagado'yamastu

apāṃ mā pāne yatamo dadambha kravyādyātūnāṃ śayane śayānam /
tadātmanā prajayā piśācā vi yātayantāmagado'yamastu

divā mā naktaṃ yatamo dadambha kravyādyātūnāṃ śayane śayānam /
tadātmanā prajayā piśācā vi yātayantāmagado'yamastu

kravyādamagne rudhiraṃ piśācaṃ manohanaṃ jahi jātavedaḥ /
tamindro vājī vajreṇa hantu chinattu somaḥ śiro asya dhṛṣṇuḥ

sanādagne mṛṇasi yātudhānān na tvā rakṣāṃsi pṛtanāsu jigyuḥ /
sahamūrān anu daha kravyādo mā te hetyā mukṣata daivyāyāḥ

samāhara jātavedo yaddhṛtaṃ yatparābhṛtam /
gātrāṇyasya vardhantāmaṃśurivā pyāyatāmayam

somasyeva jātavedo aṃśurā pyāyatāmayam /
agne virapśinaṃ medhyamayakṣmaṃ kṛṇu jīvatu

etāste agne samidhaḥ piśācajambhanīḥ /
tāstvaṃ juṣasva prati cainā gṛhāṇa jātavedaḥ

tārṣṭāghīragne samidhaḥ prati gṛhṇāhyarciṣā /
jahātu kravyādrūpaṃ yo asya māṃsaṃ jihīrṣati

5.30
āvatasta āvataḥ parāvatasta āvataḥ /
ihaiva bhava mā nu gā mā pūrvān anu gāḥ pitṝn asuṃ badhnāmi te dṛḍham

yattvābhiceruḥ puruṣaḥ svo yadaraṇo janaḥ /
unmocanapramocane ubhe vācā vadāmi te

yaddudrohitha śepiṣe striyai puṃse acittyā /
unmocanapramocane ubhe vācā vadāmi te

yatenaso mātṛkṛtāccheṣe pitṛkṛtācca yat/
unmocanapramocane ubhe vācā vadāmi te

yatte mātā yatte pitā jamirbhrātā ca sarjataḥ /
pratyaksevasva bheṣajaṃ jaradaṣṭiṃ kṛṇomi tvā

ihaidhi puruṣa sarveṇa manasā saha /
dūtau yamasya mānu gā adhi jīvapurā ihi

anuhūtaḥ punarehi vidvān udayanaṃ pathaḥ /
ārohaṇamākramaṇaṃ jīvatojīvato'yanam

mā bibherna mariṣyasi jaradaṣṭiṃ kṛṇomi tvā /
niravocamahaṃ yakṣmamaṅgebhyo aṅgajvaraṃ tava

aṅgabhedo aṅgajvaro yaśca te hṛdayāmayaḥ /
yakṣmaḥ śyena iva prāpaptadvacā sāḍhaḥ parastarām

ṛṣī bodhapratībodhāvasvapno yaśca jāgṛviḥ /
tau te prāṇasya goptārau divā naktaṃ ca jāgṛtām

ayamagnirupasadya iha sūrya udetu te /
udehi mṛtyorgambhīrātkṛṣṇāccittamasaspari

namo yamāya namo astu mṛtyave namaḥ pitṛbhya uta ye nayanti /
utpāraṇasya yo veda tamagniṃ puro dadhe'smā ariṣṭatātaye

aitu prāṇa aitu mana aitu cakṣuratho balam /
śarīramasya saṃ vidāṃ tatpadbhyāṃ prati tiṣṭhatu

prāṇenāgne cakṣuṣā saṃ sṛjemaṃ samīraya tanvā saṃ balena /
vetthāmṛtasya mā nu gān mā nu bhūmigṛho bhuvat

mā te prāṇa upa dasan mo apāno'pi dhāyi te /
sūryastvādhipatirmṛtyorudāyacchatu raśmibhiḥ

iyamantarvadati jihvā baddhā paniṣpadā /
tvayā yakṣmaṃ niravocaṃ śataṃ ropīśca takmanaḥ

ayaṃ lokaḥ priyatamo devānāmaparājitaḥ /
yasmai tvamiha mṛtyave diṣṭaḥ puruṣa jajñiṣe /
sa ca tvānu hvayāmasi mā purā jaraso mṛthāḥ

5.31
yāṃ te cakrurāme pātre yāṃ cakrurmiśradhānye /
āme māṃse kṛtyāṃ yāṃ cakruḥ punaḥ prati harāmi tām

yāṃ te cakruḥ kṛkavākāvaje vā yāṃ kurīriṇi /
avyāṃ te kṛtyāṃ yāṃ cakruḥ punaḥ prati harāmi tām

yāṃ te cakrurekaśaphe paśūnāmubhayādati /
gardabhe kṛtyāṃ yāṃ cakruḥ punaḥ prati harāmi tām

yāṃ te cakruramūlāyāṃ valagaṃ vā narācyām /
kṣetre te kṛtyāṃ yāṃ cakruḥ punaḥ prati harāmi tām

yāṃ te cakrurgārhapatye pūrvāgnāvuta duścitaḥ /
śālāyāṃ kṛtyāṃ yāṃ cakruḥ punaḥ prati harāmi tām

yāṃ te cakruḥ sabhāyāṃ yāṃ cakruradhidevane /
akṣeṣu kṛtyāṃ yāṃ cakruḥ punaḥ prati harāmi tām

yāṃ te cakruḥ senāyāṃ yāṃ cakruriṣvāyudhe /
dundubhau kṛtyāṃ yāṃ cakruḥ punaḥ prati harāmi tām

yāṃ te kṛtyāṃ kūpe'vadadhuḥ śmaśāne vā nicakhnuḥ /
sadmani kṛtyāṃ yāṃ cakruḥ punaḥ prati harāmi tām

yāṃ te cakruḥ puruṣāsthe agnau saṃkasuke ca yām /
mrokaṃ nirdāhaṃ kravyādaṃ punaḥ prati harāmi tām

apathenā jabhāraināṃ tāṃ pathetaḥ pra hiṇmasi /
adhīro maryādhīrebhyaḥ saṃ jabhārācittyā

yaścakāra na śaśāka kartuṃ śaśre pādamaṅgurim /
cakāra bhadramasmabhyamabhago bhagavadbhyaḥ

kṛtyākṛtaṃ valaginaṃ mūlinaṃ śapatheyyam /
indrastaṃ hantu mahatā vadhenāgnirvidhyatvastayā