Atharva Veda · Chapter 3.20

ayaṃ te yonirṛtviyo yato jāto arocathāḥ /
taṃ jānann agna ā rohādhā no vardhaya rayim

agne acchā vadeha naḥ pratyaṅnaḥ sumanā bhava /
pra ṇo yaccha viśāṃ pate dhanadā asi nastvam

pra ṇo yacchatvaryamā pra bhagaḥ pra bṛhaspatiḥ /
pra devīḥ prota sūnṛtā rayiṃ devī dadhātu me

somaṃ rājānamavase'gniṃ gīrbhirhavāmahe /
ādityaṃ viṣṇuṃ sūryaṃ brahmāṇaṃ ca bṛhaspatim

tvaṃ no agne agnibhirbrahma yajñaṃ vardhaya /
tvaṃ no deva dātave rayiṃ dānāya codaya

indravāyū ubhāviha suhaveha havāmahe /
yathā naḥ sarva ijjanaḥ saṃgatyāṃ sumanā asaddānakāmaśca no bhuvat

aryamaṇaṃ bṛhaspatimindraṃ dānāya codaya /
vātaṃ viṣṇuṃ sarasvatīṃ savitāraṃ ca vājinam

vājasya nu prasave saṃ babhūvimemā ca viśvā bhuvanāni antaḥ /
utāditsantaṃ dāpayatu prajānan rayiṃ ca naḥ sarvavīraṃ ni yaccha

duhrāṃ me pañca pradiśo duhrāmurvīryathābalam /
prāpeyaṃ sarvā ākūtīrmanasā hṛdayena ca

gosaniṃ vācamudeyaṃ varcasā mābhyudihi /
ā rundhāṃ sarvato vāyustvaṣṭā poṣaṃ dadhātu me