Atharva Veda · Chapter 3

sūktam १
sūktam २
sūktam ३
sūktam ४
sūktam ५
sūktam ६
sūktam ७
sūktam ८
sūktam ९
sūktam १०
sūktam ११
sūktam १२
sūktam १३
sūktam १४
sūktam १५
sūktam १६
sūktam १७
sūktam १८
sūktam १९
sūktam २०
sūktam २१
sūktam २२
sūktam २३
sūktam २४
sūktam २५
sūktam २६
sūktam २७
sūktam २८
sūktam २९
sūktam ३०
sūktam ३१
3.1
agnirnaḥ śatrūn pratyetu vidvān pratidahann abhiśastimarātim /
sa senāṃ mohayatu pareṣāṃ nirhastāṃśca kṛṇavajjātavedāḥ

yūyamugrā maruta īdṛśe sthābhi preta mṛṇata sahadhvam /
amīmṛṇan vasavo nāthitā ime agnirhyeṣāṃ dūtaḥ pratyetu vidvān

amitrasenāṃ maghavann asmān chatrūyatīmabhi /
yuvaṃ tāmindra vṛtrahann agniśca dahataṃ prati

prasūta indra pravatā haribhyāṃ pra te vajraḥ pramṛṇann etu śatrūn /
jahi pratīco anūcaḥ parāco viṣvaksatyaṃ kṛṇuhi cittameṣām

indra senāṃ mohayāmitrāṇām /
agnervātasya dhrājyā tān viṣūco vi nāśaya

indraḥ senāṃ mohayatu maruto ghnantvojasā /
cakṣūṃsyagnirā dattāṃ punaretu parājitā

3.2
agnirno dūtaḥ pratyetu vidvān pratidahann abhiśastimarātim /
sa cittāni mohayatu pareṣāṃ nirhastāṃśca kṛṇavajjātavedāḥ

ayamagniramūmuhadyāni cittāni vo hṛdi /
vi vo dhamatvokasaḥ pra vo dhamatu sarvataḥ

indra cittāni mohayann arvāṅākūtyā cara /
agnervātasya dhrājyā tān viṣūco vi nāśaya

vyākūtaya eṣāmitātho cittāni muhyata /
atho yadadyaiṣāṃ hṛdi tadeṣāṃ pari nirjahi

amīṣāṃ cittāni pratimohayantī gṛhāṇāṅgānyapve parehi /
abhi prehi nirdaha hṛtsu śokairgrāhyāmitrāṃstamasā vidhya śatrūn

asau yā senā marutaḥ pareṣāmasmān aityabhyojasā spardhamānā /
tāṃ vidhyata tamasāpavratena yathaiṣāmanyo anyaṃ na jānāt

3.3
acikradatsvapā iha bhuvadagne vyacasva rodasī urūcī /
yuñjantu tvā maruto viśvavedasa āmuṃ naya namasā rātahavyam

dūre citsantamaruṣāsa indramā cyāvayantu sakhyāya vipram /
yadgāyatrīṃ bṛhatīmarkamasmai sautrāmaṇyā dadhṛṣanta devāḥ

adbhyastvā rāja varuṇo hvayatu somastvā hvayatu parvatebhyaḥ /
indrastvā hvayatu viḍbhya ābhyaḥ śyeno bhūtvā viśa ā patemāḥ

śyeno havyaṃ nayatvā parasmādanyakṣetre aparuddhaṃ carantam /
aśvinā panthāṃ kṛṇutāṃ sugaṃ ta imaṃ sajātā abhisaṃviśadhvam

hvayantu tvā pratijanāḥ prati mitrā avṛṣata /
indrāgnī viśve devāste viśi kṣemamadīdharan

yaste havaṃ vivadatsajāto yaśca niṣṭyaḥ /
apāñcamindra taṃ kṛtvāthemamihāva gamaya

3.4
ā tvā gan rāṣṭraṃ saha varcasodihi prāṅviśāṃ patirekarāṭtvaṃ vi rāja /
sarvāstvā rājan pradiśo hvayantūpasadyo namasyo bhaveha

tvāṃ viśo vṛṇatāṃ rājyāya tvāmimāḥ pradiśaḥ pañca devīḥ /
varṣman rāṣṭrasya kakudi śrayasva tato na ugro vi bhajā vasūni

accha tvā yantu havinaḥ sajātā agnirdūto ajiraḥ saṃ carātai /
jāyāḥ putrāḥ sumanaso bhavantu bahuṃ baliṃ prati paśyāsā ugraḥ

aśvinā tvāgre mitrāvaruṇobhā viśve devā marutastvā hvayantu /
adhā mano vasudeyāya kṛṇuṣva tato na ugro vi bhajā vasūni

ā pra drava paramasyāḥ parāvataḥ śive te dyāvāpṛthivī ubhe stām /
tadayaṃ rājā varuṇastathāha sa tvāyamahvatsa upedamehi

indrendra manuṣyāḥ parehi saṃ hyajñāsthā varuṇaiḥ saṃvidānaḥ /
sa tvāyamahvatsve sadhasthe sa devān yakṣatsa u kalpayadviśaḥ

pathyā revatīrbahudhā virūpāḥ sarvāḥ saṃgatya varīyaste akran /
tāstvā sarvāḥ saṃvidānā hvayantu daśamīmugraḥ sumanā vaśeha

3.5
āyamagan parṇamaṇirbalī balena pramṛṇantsapatnān /
ojo devānāṃ paya oṣadhīnāṃ varcasā mā jinvantvaprayāvan

mayi kṣatraṃ parṇamaṇe mayi dhārayatādrayim /
ahaṃ rāṣṭrasyābhīvarge nijo bhūyāsamuttamaḥ

yaṃ nidadhurvanaspatau guhyaṃ devāḥ priyaṃ maṇim /
tamasmabhyaṃ sahāyuṣā devā dadatu bhartave

somasya parṇaḥ saha ugramāgann indreṇa datto varuṇena śiṣṭaḥ /
taṃ priyāsaṃ bahu rocamāno dīrghāyutvāya śataśāradāya

ā mārukṣatparṇamaṇirmahyā ariṣṭatātaye /
yathāhamuttaro'sānyaryamṇa uta saṃvidaḥ

ye dhīvāno rathakārāḥ karmārā ye manīṣiṇaḥ /
upastīn parṇa mahyaṃ tvaṃ sarvān kṛṇvabhito janān

ye rājāno rājakṛtaḥ sūtā grāmaṇyaśca ye /
upastīn parṇa mahyaṃ tvaṃ sarvān kṛṇvabhito janān

parṇo'si tanūpānaḥ sayonirvīro vīreṇa mayā /
saṃvatsarasya tejasā tena badhnāmi tvā maṇe

3.6
pumān puṃsaḥ parijāto'śvatthaḥ khadirādadhi /
sa hantu śatrūn māmakān yān ahaṃ dveṣmi ye ca mām

tān aśvattha niḥ śṛṇīhi śatrūn vaibādhadodhataḥ /
indreṇa vṛtraghnā medī mitreṇa varuṇena ca

yathāśvattha nirabhano'ntarmahatyarṇave /
evā tāntsarvān nirbhaṅgdhi yān ahaṃ dveṣmi ye ca mām

yaḥ sahamānaścarasi sāsahāna iva ṛṣabhaḥ /
tenāśvattha tvayā vayaṃ sapatnāntsahiṣīmahi

sinātvenān nirṛtirmṛtyoḥ pāśairamokyaiḥ /
aśvattha śatrūn māmakān yān ahaṃ dveṣmi ye ca mām

yathāśvattha vānaspatyān ārohan kṛṇuṣe'dharān /
evā me śatrormūrdhānaṃ viṣvagbhinddhi sahasva ca

te'dharāñcaḥ pra plavantāṃ chinnā nauriva bandhanāt/
na vaibādhapraṇuttānāṃ punarasti nivartanam

praiṇān nude manasā pra cittenota brahmaṇā /
praiṇān vṛkṣasya śākhayāśvatthasya nudāmahe

3.7
hariṇasya raghuṣyado'dhi śīrṣaṇi bheṣajam /
sa kṣetriyaṃ viṣāṇayā viṣūcīnamanīnaśat

anu tvā hariṇo vṛṣā padbhiścaturbhirakramīt/
viṣāṇe vi ṣya guṣpitaṃ yadasya kṣetriyaṃ hṛdi

ado yadavarocate catuṣpakṣamiva chadiḥ /
tenā te sarvaṃ kṣetriyamaṅgebhyo nāśayāmasi

amū ye divi subhage vicṛtau nāma tārake /
vi kṣetriyasya muñcatāmadhamaṃ pāśamuttamam

āpa idvā u bheṣajīrāpo amīvacātanīḥ /
āpo viśvasya bheṣajīstāstvā muñcantu kṣetriyāt

yadāsuteḥ kriyamānāyāḥ kṣetriyaṃ tvā vyānaśe /
vedāhaṃ tasya bheṣajaṃ kṣetriyaṃ nāśayāmi tvat

apavāse nakṣatrāṇāmapavāsa uṣasāmuta /
apāsmatsarvaṃ durbhūtamapa kṣetriyamucchatu

3.8
ā yātu mitra ṛtubhiḥ kalpamānaḥ saṃveśayan pṛthivīmusriyābhiḥ /
athāsmabhyaṃ varuṇo vāyuragnirbṛhadrāṣṭraṃ saṃveśyaṃ dadhātu

dhātā rātiḥ savitedaṃ juśantāmindrastvaṣṭā prati haryantu me vacaḥ /
huve devīmaditiṃ śūraputrāṃ sajātānāṃ madhyameṣṭhā yathāsāni

huve somaṃ savitāraṃ namobhirviśvān ādityāmahamuttaratve /
ayamagnirdīdāyaddīrghameva sajātairiddho'pratibruvadbhiḥ

ihedasātha na paro gamātheryo gopāḥ puṣṭapatirva ājat/
asmai kāmāyopa kāminīrviśve vo devā upasaṃyantu

saṃ vo manāṃsi saṃ vratā samākūtīrnamāmasi /
amī ye vivratā sthana tān vaḥ saṃ namayāmasi

ahaṃ gṛbhṇāmi manasā manāṃsi mama cittamanu cittebhireta /
mama vaśeṣu hṛdayāni vaḥ kṛṇomi mama yātamanuvartmāna eta

3.9
karśaphasya viśaphasya dyauḥ pitā pṛthivī mātā /
yathābhicakra devāstathāpa kṛṇutā punaḥ

aśreṣmāṇo adhārayan tathā tan manunā kṛtam /
kṛṇomi vadhri viṣkandhaṃ muṣkābarho gavāmiva

piśaṅge sūtre khṛgalaṃ tadā badhnanti vedhasaḥ /
śravasyuṃ śuṣmaṃ kābavaṃ vadhriṃ kṛṇvantu bandhuraḥ

yenā śravasyavaścaratha devā ivāsuramāyayā /
śunāṃ kapiriva dūṣaṇo bandhurā kābavasya ca

duṣṭyai hi tvā bhatsyāmi dūṣayiṣyāmi kābavam /
udāśavo rathā iva śapathebhiḥ sariṣyatha

ekaśataṃ viṣkandhāni viṣṭhitā pṛthivīmanu /
teṣāṃ tvāmagre ujjaharurmaṇiṃ viṣkandhadūṣaṇam

3.10
prathamā ha vyuvāsa sā dhenurabhavadyame /
sā naḥ payasvatī duhāmuttarāmuttarāṃ samām

yāṃ devāḥ pratinandanti rātriṃ dhenumupāyatīm /
saṃvatsarasya yā patnī sā no astu sumaṅgalī

saṃvatsarasya pratimāṃ yāṃ tvā rātryupāsmahe /
sā na āyuṣmatīṃ prajāṃ rāyaspoṣeṇa saṃ sṛja

iyameva sā yā prathamā vyaucchadāsvitarāsu carati praviṣṭā /
mahānto asyāṃ mahimāno antarvadhūrjigāya navagajjanitrī

vānaspatyā grāvāṇo ghoṣamakrata haviṣkṛṇvantaḥ parivatsarīṇam /
ekāṣṭake suprajasaḥ suvīrā vayaṃ syāma patayo rayīṇām

iḍāyāspadaṃ ghṛtavatsarīsṛpaṃ jātavedaḥ prati havyā gṛbhāya /
ye grāmyāḥ paśavo viśvarūpāsteṣāṃ saptānāṃ mayi rantirastu

ā mā puṣṭe ca poṣe ca rātri devānāṃ sumatau syāma /
pūrṇā darve parā pata supūrṇā punarā pata /
sarvān yajñāntsaṃbhuñjatīṣamūrjaṃ na ā bhara

āyamagantsaṃvatsaraḥ patirekāṣṭake tava /
sā na āyuṣmatīṃ prajāṃ rāyaspoṣeṇa saṃ sṛja

ṛtūn yaja ṛtupatīn ārtavān uta hāyanān /
samāḥ saṃvatsarān māsān bhūtasya pataye yaje

ṛtubhyaṣṭvārtavebhyo mādbhyaḥ saṃvatsarebhyaḥ /
dhātre vidhātre samṛdhe bhūtasya pataye yaje

iḍayā juhvato vayaṃ devān ghṛtavatā yaje /
gṛhān alubhyato vayaṃ saṃ viśemopa gomataḥ

ekāṣṭakā tapasā tapyamānā jajāna garbhaṃ mahimānamindram /
tena devā vyasahanta śatrūn hantā dasyūnāmabhavacchacīpatiḥ

indraputre somaputre duhitāsi prajāpateḥ /
kāmān asmākaṃ pūraya prati gṛhṇāhi no haviḥ

3.11
muñcāmi tvā haviṣā jīvanāya kamajñātayakṣmāduta rājayakṣmāt/
grāhirjagrāha yadyetadenaṃ tasyā indrāgnī pra mumuktamenam

yadi kṣitāyuryadi vā pareto yadi mṛtyorantikameva /
tamā harāmi nirṛterupasthādaspārśamenaṃ śataśāradāya

sahasrākṣeṇa śatavīryeṇa śatāyuṣā haviṣāhārṣamenam /
indro yathainaṃ śarado nayātyati viśvasya duritasya pāram

śataṃ jīva śarado vardhamānaḥ śataṃ hemantān chatamu vasantān /
śataṃ te indro agniḥ savitā bṛhaspatiḥ śatāyuṣā haviṣāhārṣamenam

pra viśataṃ prāṇāpānāvanaḍvāhāviva vrajam /
vyanye yantu mṛtyavo yān āhuritarān chatam

ihaiva staṃ prāṇāpānau māpa gātamito yuvam /
śarīramasyāṅgāni jarase vahataṃ punaḥ

jarāyai tvā pari dadāmi jarāyai ni dhuvāmi tvā /
jarā tvā bhadrā neṣṭa vyanye yantu mṛtyavo yān āhuritarān chatam

abhi tvā jarimāhita gāmukṣaṇamiva rajjvā /
yastvā mṛtyurabhyadhatta jāyamānaṃ supāśayā /
taṃ te satyasya hastābhyāmudamuñcadbṛhaspatiḥ

3.12
ihaiva dhruvāṃ ni minomi śālāṃ kṣeme tiṣṭhāti ghṛtamukṣamāṇā /
tāṃ tvā śāle sarvavīrāḥ suvīrā ariṣṭavīrā upa saṃ carema

ihaiva dhruvā prati tiṣṭha śāle'śvāvatī gomatī sūnṛtāvatī /
ūrjasvatī ghṛtavatī payasvatyucchrayasva mahate saubhagāya

dharuṇyasi śāle bṛhacchandāḥ pūtidhānyā /
ā tvā vatso gamedā kumāra ā dhenavaḥ sāyamāspandamānāḥ

imāṃ śālāṃ savitā vāyurindro bṛhaspatirni minotu prajānan /
ukṣantūdnā maruto ghṛtena bhago no rājā ni kṛṣiṃ tanotu

mānasya patni śaraṇā syonā devī devebhirnimitāsyagre /
tṛṇaṃ vasānā sumanā asastvamathāsmabhyaṃ sahavīraṃ rayiṃ dāḥ

ṛtena sthūṇāmadhi roha vaṃśogro virājann apa vṛṅkṣva śatrūn /
mā te riṣann upasattāro gṛhāṇāṃ śāle śataṃ jīvema śaradaḥ sarvavīrāḥ

emāṃ kumārastaruṇa ā vatso jagatā saha /
emāṃ parisrutaḥ kumbha ā dadhnaḥ kalaśairaguḥ

pūrṇaṃ nāri pra bhara kumbhametaṃ ghṛtasya dhārāmamṛtena saṃbhṛtām /
imāṃ pātṝn amṛtena samaṅgdhīṣṭāpūrtamabhi rakṣātyenām

imā āpaḥ pra bharāmyayakṣmā yakṣmanāśanīḥ /
gṛhān upa pra sīdāmyamṛtena sahāgninā

3.13
yadadaḥ saṃprayatīrahāvanadatā hate /
tasmādā nadyo nāma stha tā vo nāmāni sindhavaḥ

yatpreṣitā varuṇenācchībhaṃ samavalgata /
tadāpnodindro vo yatīstasmādāpo anu ṣṭhana

apakāmaṃ syandamānā avīvarata vo hi kam /
indro vaḥ śaktibhirdevīstasmādvārnāma vo hitam

ekaḥ vo devo'pyatiṣṭhatsyandamānā yathāvaśam /
udāniṣurmahīriti tasmādudakamucyate

āpo bhadrā ghṛtamidāpa āsann agnīṣomau bibhratyāpa ittāḥ /
tīvro raso madhupṛcāmaraṃgama ā mā prāṇena saha varcasā gamet

āditpaśyāmyuta vā śṛṇomyā mā ghoṣo gacchati vāṅmāsām /
manye bhejāno amṛtasya tarhi hiraṇyavarṇā atṛpaṃ yadā vaḥ

idaṃ va āpo hṛdayamayaṃ vatsa ṛtāvarīḥ /
ihetthameta śakvarīryatredaṃ veśayāmi vaḥ

3.14
saṃ vo goṣṭhena suṣadā saṃ rayyā saṃ subhūtyā /
aharjātasya yan nāma tenā vaḥ saṃ sṛjāmasi

saṃ vaḥ sṛjatvaryamā saṃ pūṣā saṃ bṛhaspatiḥ /
samindro yo dhanaṃjayo mayi puṣyata yadvasu

saṃjagmānā abibhyuṣīrasmin goṣṭhe karīṣiṇīḥ /
bibhratīḥ somyaṃ madhvanamīvā upetana

ihaiva gāva etaneho śakeva puṣyata /
ihaivota pra jāyadhvaṃ mayi saṃjñānamastu vaḥ

śivo vo goṣṭho bhavatu śāriśākeva puṣyata /
ihaivota pra jāyadhvaṃ mayā vaḥ saṃ sṛjāmasi

mayā gāvo gopatinā sacadhvamayaṃ vo goṣṭha iha poṣayiṣṇuḥ /
rāyaspoṣeṇa bahulā bhavantīrjīvā jīvantīrupa vaḥ sadema

3.15
indramahaṃ vaṇijaṃ codayāmi sa na aitu puraetā no astu /
nudann arātiṃ paripanthinaṃ mṛgaṃ sa īśāno dhanadā astu mahyam

ye panthāno bahavo devayānā antarā dyāvāpṛthivī saṃcaranti /
te mā juṣantāṃ payasā ghṛtena yathā krītvā dhanamāharāṇi

idhmenāgna icchamāno ghṛtena juhomi havyaṃ tarase balāya /
yāvadīśe brahmaṇā vandamāna imāṃ dhiyaṃ śataseyāya devīm

imāmagne śaraṇiṃ mīmṛṣo no yamadhvānamagāma dūram /
śunaṃ no astu prapaṇo vikrayaśca pratipaṇaḥ phalinaṃ mā kṛṇotu /
idaṃ havyaṃ saṃvidānau juṣethāṃ śunaṃ no astu caritamutthitaṃ ca

yena dhanena prapaṇaṃ carāmi dhanena devā dhanamicchamānaḥ /
tan me bhūyo bhavatu mā kanīyo'gne sātaghno devān haviṣā ni ṣedha

yena dhanena prapaṇaṃ carāmi dhanena devā dhanamicchamānaḥ /
tasmin ma indro rucimā dadhātu prajāpatiḥ savitā somo agniḥ

upa tvā namasā vayaṃ hotarvaiśvānara stumaḥ /
sa naḥ prajāsvātmasu goṣu prāṇeṣu jāgṛhi

viśvāhā te sadamidbharemāśvāyeva tiṣṭhate jātavedaḥ /
rāyaspoṣeṇa samiṣā madanto mā te agne prativeśā riṣāma

3.16
prātaragniṃ prātarindraṃ havāmahe prātarmitrāvaruṇā prātaraśvinā /
prātarbhagaṃ pūṣaṇaṃ brahmaṇaspatiṃ prātaḥ somamuta rudraṃ havāmahe

prātarjitaṃ bhagamugraṃ havāmahe vayaṃ putramaditeryo vidhartā /
ādhraścidyaṃ manyamānasturaścidrājā cidyaṃ bhagaṃ bhakṣītyāha

bhaga praṇetarbhaga satyarādho bhagemāṃ dhiyamudavā dadan naḥ /
bhaga pra ṇo janaya gobhiraśvairbhaga pra nṛbhirnṛvantaḥ syāma

utedānīṃ bhagavantaḥ syāmota prapitva uta madhye ahnām /
utoditau maghavantsūryasya vayaṃ devānāṃ sumatau syāma

bhaga eva bhagavāmastu devastenā vayaṃ bhagavantaḥ syāma /
taṃ tvā bhaga sarva ijjohavīmi sa no bhaga puraetā bhaveha

samadhvarāyoṣaso namanta dadhikrāveva śucaye padāya /
arvācīnaṃ vasuvidaṃ bhagaṃ me rathamivāśvā vājina ā vahantu

aśvāvatīrgomatīrna uṣāso vīravatīḥ sadamucchantu bhadrāḥ /
ghṛtaṃ duhānā viśvataḥ prapītā yūyaṃ pāta svastibhiḥ sadā naḥ

3.17
sīrā yuñjanti kavayo yugā vi tanvate pṛthak/
dhīrā deveṣu sumnayau

yunakta sīrā vi yugā tanota kṛte yonau vapateha bījam /
virājaḥ śnuṣṭiḥ sabharā asan no nedīya itsṛṇyaḥ pakvamā yavan

lāṅgalaṃ pavīravatsuśīmaṃ somasatsaru /
udidvapatu gāmaviṃ prasthāvadrathavāhanaṃ pībarīṃ ca prapharvyam

indraḥ sītāṃ ni gṛhṇātu tāṃ pūṣābhi rakṣatu /
sā naḥ payasvatī duhāmuttarāmuttarāṃ samām

śunaṃ suphālā vi tudantu bhūmiṃ śunaṃ kīnāśā anu yantu vāhān /
śunāsīrā haviṣā tośamānā supippalā oṣadhīḥ kartamasmai

śunaṃ vāhāḥ śunaṃ naraḥ śunaṃ kṛṣatu lāṅgalam /
śunaṃ varatrā badhyantāṃ śunamaṣṭrāmudiṅgaya

śunāsīreha sma me juṣethām /
yaddivi cakrathuḥ payastenemāmupa siñcatam

sīte vandāmahe tvārvācī subhage bhava /
yathā naḥ sumanā aso yathā naḥ suphalā bhuvaḥ

ghṛtena sītā madhunā samaktā viśvairdevairanumatā marudbhiḥ /
sā naḥ sīte payasābhyāvavṛtsvorjasvatī ghṛtavatpinvamānā

3.18
imāṃ khanāmyoṣadhiṃ vīrudhāṃ balavattamām /
yayā sapatnīṃ bādhate yayā saṃvindate patim

uttānaparṇe subhage devajūte sahasvati /
sapatnīṃ me parā ṇuda patiṃ me kevalaṃ kṛdhi

nahi te nāma jagrāha no asmin ramase patau /
parāmeva parāvataṃ sapatnīṃ gamayāmasi

uttarāhamuttara uttareduttarābhyaḥ /
adhaḥ sapatnī yā mamādharā sādharābhyaḥ

ahamasmi sahamānātho tvamasi sāsahiḥ /
ubhe sahasvatī bhūtvā sapatnīṃ me sahāvahai

abhi te'dhāṃ sahamānāmupa te'dhāṃ sahīyasīm /
māmanu pra te mano vatsaṃ gauriva dhāvatu pathā vāriva dhāvatu

3.19
saṃśitaṃ ma idaṃ brahma saṃśitaṃ vīryaṃ balam /
saṃśitaṃ kṣatramajaramastu jiṣṇuryeṣāmasmi purohitaḥ

samahameṣāṃ rāṣṭraṃ syāmi samojo vīryaṃ balam /
vṛścāmi śatrūṇāṃ bāhūn anena haviṣā aham

nīcaiḥ padyantāmadhare bhavantu ye naḥ sūriṃ maghavānaṃ pṛtanyān /
kṣiṇāmi brahmaṇāmitrān un nayāmi svān aham

tīkṣṇīyāṃsaḥ paraśoragnestīkṣṇatarā uta /
indrasya vajrāttīkṣṇīyāṃso yeṣāmasmi purohitaḥ

eṣāmahamāyudhā saṃ syāmyeṣāṃ rāṣṭraṃ suvīraṃ vardhayāmi /
eṣāṃ kṣatramajaramastu jiṣṇveṣāṃ cittaṃ viśve'vantu devāḥ

uddharṣantāṃ maghavan vājinānyudvīrāṇāṃ jayatāmetu ghoṣaḥ /
pṛthagghoṣā ululayaḥ ketumanta udīratām /
devā indrajyeṣṭhā maruto yantu senayā

pretā jayatā nara ugrā vaḥ santu bāhavaḥ /
tīkṣṇeṣavo'baladhanvano hatogrāyudhā abalān ugrabāhavaḥ

avasṛṣṭā parā pata śaravye brahmasaṃśite /
jaya amitrān pra padyasva jahyeṣāṃ varaṃvaraṃ māmīṣāṃ moci kaścana

3.20
ayaṃ te yonirṛtviyo yato jāto arocathāḥ /
taṃ jānann agna ā rohādhā no vardhaya rayim

agne achā vadeha naḥ pratyaṅnaḥ sumanā bhava /
pra ṇo yaccha viśāṃ pate dhanadā asi nastvam

pra ṇo yacchatvaryamā pra bhagaḥ pra bṛhaspatiḥ /
pra devīḥ prota sūnṛtā rayiṃ devī dadhātu me

somaṃ rājānamavase'gniṃ gīrbhirhavāmahe /
ādityaṃ viṣṇuṃ sūryaṃ brahmāṇaṃ ca bṛhaspatim

tvaṃ no agne agnibhirbrahma yajñaṃ vardhaya /
tvaṃ no deva dātave rayiṃ dānāya codaya

indravāyū ubhāviha suhaveha havāmahe /
yathā naḥ sarva ijjanaḥ saṃgatyāṃ sumanā asaddānakāmaśca no bhuvat

aryamaṇaṃ bṛhaspatimindraṃ dānāya codaya /
vātaṃ viṣṇuṃ sarasvatīṃ savitāraṃ ca vājinam

vājasya nu prasave saṃ babhūvimemā ca viśvā bhuvanāni antaḥ /
utāditsantaṃ dāpayatu prajānan rayiṃ ca naḥ sarvavīraṃ ni yaccha

duhrāṃ me pañca pradiṣo duhrāmurvīryathābalam /
prāpeyaṃ sarvā ākūtīrmanasā hṛdayena ca

gosaniṃ vācamudeyaṃ varcasā mābhyudihi /
ā rundhāṃ sarvato vāyustvaṣṭā poṣaṃ dadhātu me

3.21
ye agnayo apsvantarye vṛtre ye puruṣe ye aśmasu /
ya āviveśoṣadhīryo vanaspatīṃstebhyo agnibhyo hutamastvetat

yaḥ some antaryo goṣvantarya āviṣṭo vayaḥsu yo mṛgeṣu /
ya āviveśa dvipado yascatuṣpadastebhyo agnibhyo hutamastvetat

ya indreṇa sarathaṃ yāti devo vaiśvānara uta viśvadāvyaḥ /
yaṃ johavīmi pṛtanāsu sāsahiṃ tebhyo agnibhyo hutamastvetat

yo devo viśvādyamu kāmamāhuryaṃ dātāraṃ pratigṛhṇantamāhuḥ /
yo dhīraḥ śakraḥ paribhūradābhyastebhyo agnibhyo hutamastvetat

yaṃ tvā hotāraṃ manasābhi saṃvidustrayodaśa bhauvanāḥ pañca mānavāḥ /
varcodhase yaśase sūnṛtāvate tebhyo agnibhyo hutamastvetat

ukṣānnāya vaśānnāya somapṛṣṭhāya vedhase /
vaiśvānarajyeṣṭhebhyastebhyo agnibhyo hutamastvetat

divaṃ pṛthivīmanvantarikṣaṃ ye vidyutamanusaṃcaranti /
ye dikṣvantarye vāte antastebhyo agnibhyo hutamastvetat

hiraṇyapāṇiṃ savitāramindraṃ bṛhaspatiṃ varuṇaṃ mitramagnim /
viśvān devān aṅgiraso havāmahe imaṃ kravyādaṃ śamayantvagnim

śānto agniḥ kravyācchāntaḥ puruṣareṣaṇaḥ /
atho yo viśvadāvyastaṃ kravyādamaśīśamam

ye parvatāḥ somapṛṣṭhā āpa uttānaśīvarīḥ /
vātaḥ parjanya ādagniste kravyādamaśīśaman

3.22
hastivarcasaṃ prathatāṃ bṛhadyaśo adityā yattanvaḥ saṃbabhūva /
tatsarve samadurmahyametadviśve devā aditiḥ sajoṣāḥ

mitraśca varuṇaścendro rudraśca cetatu /
devāso viśvadhāyasaste māñjantu varcasā

yena hastī varcasā saṃbabhūva yena rājā manuṣyesvapsvantaḥ /
yena devā devatāmagra āyan tena māmadya varcasāgne varcasvinaṃ kṛṇu

yatte varco jātavedo bṛhadbhavatyāhuteḥ /
yāvatsūryasya varca āsurasya ca hastinaḥ /
tāvan me aśvinā varca ā dhattāṃ puṣkarasrajā

yāvaccatasraḥ pradiśaścakṣuryāvatsamaśnute /
tāvatsamaitvindriyaṃ mayi taddhastivarcasam

hastī mṛgāṇāṃ suṣadāmatiṣṭhāvān babhūva hi /
tasya bhagena varcasābhi ṣiñcāmi māmaham

3.23
yena vehadbabhūvitha nāśayāmasi tattvat/
idaṃ tadanyatra tvadapa dūre ni dadhmasi

ā te yoniṃ garbha etu pumān bāṇa iveṣudhim /
ā vīro'tra jāyatāṃ putraste daśamāsyaḥ

pumāṃsaṃ putraṃ janaya taṃ pumān anu jāyatām /
bhavāsi putrāṇāṃ mātā jātānāṃ janayāśca yān

yāni badrāṇi bījānyṛṣabhā janayanti ca /
taistvaṃ putraṃ vindasva sā prasūrdhenukā bhava

kṛṇomi te prājāpatyamā yoniṃ garbha etu te /
vindasva tvaṃ putraṃ nāri yastubhyaṃ śamasacchamu tasmai tvaṃ bhava

yāsāṃ dyauḥ pitā pṛthivī mātā samudro mūlaṃ vīrudhāṃ babhūva /
tāstvā putravidyāya daivīḥ prāvantvoṣadhayaḥ

3.24
payasvatīroṣadhayaḥ payasvan māmakaṃ vacaḥ /
atho payasvatīnāmā bhare'haṃ sahasraśaḥ

vedāhaṃ payasvantaṃ cakāra dhānyaṃ bahu /
saṃbhṛtvā nāma yo devastaṃ vayaṃ havāmahe yoyo ayajvano gṛhe

imā yāḥ pañca pradiśo mānavīḥ pañca kṛṣṭayaḥ /
vṛṣṭe śāpaṃ nadīriveha sphātiṃ samāvahān

udutsaṃ śatadhāraṃ sahasradhāramakṣitam /
evāsmākedaṃ dhānyaṃ sahasradhāramakṣitam

śatahasta samāhara sahasrahasta saṃ kira /
kṛtasya kāryasya ceha sphātiṃ samāvaha

tisro mātrā gandharvāṇāṃ catasro gṛhapatnyāḥ /
tāsāṃ yā sphātimattamā tayā tvābhi mṛśāmasi

upohaśca samūhaśca kṣattārau te prajāpate /
tāvihā vahatāṃ sphātiṃ bahuṃ bhūmānamakṣitam

3.25
uttudastvottudatu mā dhṛthāḥ śayane sve /
iṣuḥ kāmasya yā bhīmā tayā vidhyāmi tvā hṛdi

ādhīparṇāṃ kāmaśalyāmiṣuṃ saṃkalpakulmalām /
tāṃ susaṃnatāṃ kṛtvā kāmo vidhyatu tvā hṛdi

yā plīhānaṃ śoṣayati kāmasyeṣuḥ susaṃnatā /
prācīnapakṣā vyoṣā tayā vidhyāmi tvā hṛdi

śucā viddhā vyoṣayā śuṣkāsyābhi sarpa mā /
mṛdurnimanyuḥ kevalī priyavādinyanuvratā

ājāmi tvājanyā pari māturatho pituḥ /
yathā mama kratāvaso mama cittamupāyasi

vyasyai mitrāvaruṇau hṛdaścittānyasyatam /
athaināmakratuṃ kṛtvā mamaiva kṛṇutaṃ vaśe

3.26
ye'syāṃ stha prācyāṃ diśi hetayo nāma devāsteṣāṃ vo agniriṣavaḥ /
te no mṛḍata te no'dhi brūta tebhyo vo namastebhyo vaḥ svāhā

ye'syāṃ stha dakṣiṇāyāṃ diśyaviṣyavo nāma devāsteṣāṃ vaḥ kāma iṣavaḥ /
te no mṛḍata te no'dhi brūta tebhyo vo namastebhyo vaḥ svāhā

ye'syāṃ stha pratīcyāṃ diśi vairājā nāma devāsteṣāṃ va āpa iṣavaḥ /
te no mṛḍata te no'dhi brūta tebhyo vo namastebhyo vaḥ svāhā

ye'syāṃ sthodīcyāṃ diśi pravidhyanto nāma devāsteṣāṃ vo vāta iṣavaḥ /
te no mṛḍata te no'dhi brūta tebhyo vo namastebhyo vaḥ svāhā

ye'syāṃ stha dhruvāyāṃ diśi nilimpā nāma devāsteṣāṃ va oṣadhīriṣavaḥ /
te no mṛḍata te no'dhi brūta tebhyo vo namastebhyo vaḥ svāhā

ye'syāṃ sthordhvāyāṃ diśyavasvanto nāma devāsteṣāṃ vo bṛhaspatiriṣavaḥ /
te no mṛḍata te no'dhi brūta tebhyo vo namastebhyo vaḥ svāhā

3.27
prācī digagniradhipatirasito rakṣitādityā iṣavaḥ /
tebhyo namo'dhipatibhyo namo rakṣitṛbhyo nama iṣubhyo nama ebhyo astu /
yo'smān dveṣṭi yaṃ vayaṃ dviṣmastaṃ vo jambhe dadhmaḥ

dakṣiṇā digindro'dhipatistiraścirājī rakṣitā pitara iṣavaḥ /
tebhyo namo'dhipatibhyo namo rakṣitṛbhyo nama iṣubhyo nama ebhyo astu /
yo'smān dveṣṭi yaṃ vayaṃ dviṣmastaṃ vo jambhe dadhmaḥ

pratīcī digvaruṇo'dhipatiḥ pṛdākū rakṣitānnamiṣavaḥ /
tebhyo namo'dhipatibhyo namo rakṣitṛbhyo nama iṣubhyo nama ebhyo astu /
yo'smān dveṣṭi yaṃ vayaṃ dviṣmastaṃ vo jambhe dadhmaḥ

udīcī diksomo'dhipatiḥ svajo rakṣitāśaniriṣavaḥ /
tebhyo namo'dhipatibhyo namo rakṣitṛbhyo nama iṣubhyo nama ebhyo astu /
yo'smān dveṣṭi yaṃ vayaṃ dviṣmastaṃ vo jambhe dadhmaḥ

dhruvā digviṣṇuradhipatiḥ kalmāṣagrīvo rakṣitā vīrudha iṣavaḥ /
tebhyo namo'dhipatibhyo namo rakṣitṛbhyo nama iṣubhyo nama ebhyo astu /
yo'smān dveṣṭi yaṃ vayaṃ dviṣmastaṃ vo jambhe dadhmaḥ

ūrdhvā digbṛhaspatiradhipatiḥ śvitro rakṣitā varṣamiṣavaḥ /
tebhyo namo'dhipatibhyo namo rakṣitṛbhyo nama iṣubhyo nama ebhyo astu /
yo'smān dveṣṭi yaṃ vayaṃ dviṣmastaṃ vo jambhe dadhmaḥ

3.28
ekaikayaiṣā sṛṣṭyā saṃ babhūva yatra gā asṛjanta bhūtakṛto viśvarūpāḥ /
yatra vijāyate yaminyapartuḥ sā paśūn kṣiṇāti riphatī ruśatī

eṣā paśūntsaṃ kṣiṇāti kravyādbhūtvā vyadvarī /
utaināṃ brahmaṇe dadyāttathā syonā śivā syāt

śivā bhava puruṣebhyo gobhyo aśvebhyaḥ śivā /
śivāsmai sarvasmai kṣetrāya śivā na ihaidhi

iha puṣṭiriha rasa iha sahasrasātamā bhava /
paśūn yamini poṣaya

yatrā suhārdaḥ sukṛto madanti vihāya rogaṃ tanvaḥ svāyāḥ /
taṃ lokaṃ yaminyabhisaṃbabhūva sā no mā hiṃsītpuruṣān paśūṃśca

yatrā suhārdāṃ sukṛtāmagnihotrahutāṃ yatra lokaḥ /
taṃ lokaṃ yaminyabhisaṃbabhūva sā no mā hiṃsītpuruṣān paśūṃśca

3.29
yadrājāno vibhajanta iṣṭāpūrtasya ṣoḍaśaṃ yamasyāmī sabhāsadaḥ /
avistasmātpra muñcati dattaḥ śitipātsvadhā

sarvān kāmān pūrayatyābhavan prabhavan bhavan /
ākūtipro'virdattaḥ śitipānn nopa dasyati

yo dadāti śitipādamaviṃ lokena saṃmitam /
sa nākamabhyārohati yatra śulko na kriyate abalena balīyase

pañcāpūpaṃ śitipādamaviṃ lokena saṃmitam /
pradātopa jīvati pitṝṇāṃ loke'kṣitam

pañcāpūpaṃ śitipādamaviṃ lokena saṃmitam /
pradātopa jīvati sūryāmāsayorakṣitam

ireva nopa dasyati samudra iva payo mahat/
devau savāsināviva śitipān nopa dasyati

ka idaṃ kasmā adātkāmaḥ kāmāyādāt/
kāmo dātā kāmaḥ pratigrahītā kāmaḥ samudramā viveśa /
kāmena tvā prati gṛhnāmi kāmaitatte

bhūmiṣṭvā prati gṛhṇātvantarikṣamidaṃ mahat/
māhaṃ prāṇena mātmanā mā prajayā pratigṛhya vi rādhiṣi

3.30
sahṛdayaṃ sāṃmanasyamavidveṣaṃ kṛṇomi vaḥ /
anyo anyamabhi haryata vatsaṃ jātamivāghnyā

anuvrataḥ pituḥ putro mātrā bhavatu saṃmanāḥ /
jāyā patye madhumatīṃ vācaṃ vadatu śantivām

mā bhrātā bhrātaraṃ dvikṣan mā svasāramuta svasā /
samyañcaḥ savratā bhūtvā vācaṃ vadata bhadrayā

yena devā na viyanti no ca vidviṣate mithaḥ /
tatkṛṇmo brahma vo gṛhe saṃjñānaṃ puruṣebhyaḥ

jyāyasvantaścittino mā vi yauṣṭa saṃrādhayantaḥ sadhurāścarantaḥ /
anyo anyasmai valgu vadanta eta sadhrīcīnān vaḥ saṃmanasaskrṇomi

samānī prapā saha vo'nnabhāgaḥ samāne yoktre saha vo yunajmi /
samyañco'gniṃ saparyatārā nābhimivābhitaḥ

sadhrīcīnān vaḥ saṃmanasaskṛṇomyekaśnuṣṭīntsaṃvananena sarvān /
devā ivāmṛtaṃ rakṣamāṇāḥ sāyaṃprātaḥ saumanaso vo astu

3.31
vi devā jarasāvṛtan vi tvamagne arātyā /
vyahaṃ sarveṇa pāpmanā vi yakṣmeṇa samāyuṣā

vyārtyā pavamāno vi śakraḥ pāpakṛtyayā /
vyahaṃ sarveṇa pāpmanā vi yakṣmeṇa samāyuṣā

vi grāmyāḥ paśava āraṇyairvyāpastṛṣṇayāsaran /
vyahaṃ sarveṇa pāpmanā vi yakṣmeṇa samāyuṣā

vī me dyāvāpṛthivī ito vi panthāno diśaṃdiśam /
vyahaṃ sarveṇa pāpmanā vi yakṣmeṇa samāyuṣā

tvaṣṭā duhitre vahatuṃ yunaktītīdaṃ viśvaṃ bhuvanaṃ vi yāti /
vyahaṃ sarveṇa pāpmanā vi yakṣmeṇa samāyuṣā

agniḥ prāṇāntsaṃ dadhāti candraḥ prāṇena saṃhitaḥ /
vyahaṃ sarveṇa pāpmanā vi yakṣmeṇa samāyuṣā

prāṇena viśvatovīryaṃ devāḥ sūryaṃ samairayan /
vyahaṃ sarveṇa pāpmanā vi yakṣmeṇa samāyuṣā

āyuṣmatāmāyuṣkṛtāṃ prāṇena jīva mā mṛthāḥ /
vyahaṃ sarveṇa pāpmanā vi yakṣmeṇa samāyuṣā

prāṇena prāṇatāṃ prāṇehaiva bhava mā mṛthāḥ /
vyahaṃ sarveṇa pāpmanā vi yakṣmeṇa samāyuṣā

udāyuṣā samāyuṣodoṣadhīnāṃ rasena /
vyahaṃ sarveṇa pāpmanā vi yakṣmeṇa samāyuṣā

ā parjanyasya vṛṣṭyodasthāmāmṛtā vayam /
vyahaṃ sarveṇa pāpmanā vi yakṣmeṇa samāyuṣā