Atharva Veda · Chapter 20.70

vīlu cidārujatnubhirguhā cidindra vahnibhiḥ /
avinda usriyā anu

devayanto yathā matimachā vidadvasuṃ giraḥ /
mahāmanūṣata śrutam

indreṇa saṃ hi dṛkṣase saṃjagmāno abibhyuṣā /
mandū samānavarcasā

anavadyairabhidyubhirmakhaḥ sahasvadarcati /
gaṇairindrasya kāmyaiḥ

ataḥ parijmann ā gahi divo vā rocanādadhi /
samasminn ṛñjate giraḥ

ito vā sātimīmahe divo vā pārthivādadhi /
indraṃ maho vā rajasaḥ

indramidgathino bṛhadindramarkebhirarkiṇaḥ /
indraṃ vāṇīranūṣata

indra iddharyoḥ sacā saṃmiśla ā vacoyujā /
indro vajrī hiraṇyayaḥ

indro dīrghāya cakṣasa ā sūryaṃ rohayaddivi /
vi gobhirindramairayat

indra vājeṣu no'va sahasrapradhaneṣu ca /
ugra ugrābhirūtibhiḥ

indraṃ vayaṃ mahādhana indramarbhe havāmahe /
yujaṃ vṛtreṣu vajriṇam

sa no vṛṣann amuṃ caruṃ satrādāvann apā vṛdhi /
asmabhyamapratiṣkutaḥ

tuñjetuñje ya uttare stomā indrasya vajriṇaḥ /
na vindhe asya suṣṭutim

vṛṣā yūtheva vaṃsagaḥ kṛṣṭīriyartyojasā /
īśāno apratiṣkutaḥ

ya ekaścarṣaṇīnāṃ vasūnāmirajyati /
indraḥ pañca kṣitīnām

indraṃ vo viśvataspari havāmahe janebhyaḥ /
asmākamastu kevalaḥ

endra sānasiṃ rayiṃ sajitvānaṃ sadāsaham /
varṣiṣṭhamūtaye bhara

ni yena muṣṭihatyayā ni vṛtrā ruṇadhāmahai /
tvotāso nyarvatā

indra tvotāso ā vayaṃ vajraṃ ghanā dadīmahi /
jayema saṃ yudhi spṛdhaḥ

vayaṃ śūrebhirastṛbhirindra tvayā yujā vayam /
sāsahyāma pṛtanyataḥ