Scripture Library
Atharva Veda · Chapter 20.6
20.6.1
indra tvā vṛṣabhaṃ vayaṃ sute some havāmahe /
sa pāhi madhvo andhasaḥ
20.6.2
indra kratuvidaṃ sutaṃ somaṃ harya puruṣṭuta /
pibā vṛṣasva tātṛpim
20.6.3
indra pra ṇo dhitāvānaṃ yajñaṃ viśvebhirdevebhir/
tira stavāna viśpate
20.6.4
indra somāḥ sutā ime tava pra yanti satpate /
kṣayaṃ candrāsa indavaḥ
20.6.5
dadhiṣvā jaṭhare sutaṃ somamindra vareṇyam /
tava dyukṣāsa indavaḥ
20.6.6
girvaṇaḥ pāhi naḥ sutaṃ madhordhārābhirajyase /
indra tvādātamidyaśaḥ
20.6.7
abhi dyumnāni vanina indraṃ sacante akṣitā /
pītvī somasya vāvṛdhe
20.6.8
arvāvato na ā gahi parāvataśca vṛtrahan /
imā juṣasva no giraḥ
20.6.9
yadantarā parāvatamarvāvataṃ ca hūyase /
indreha tata ā gahi
Original text: atharvavedaḥ · Sanskrit Wikisource contributors · Sanskrit Wikisource · CC BY-SA 4.0