Atharva Veda · Chapter 20.47

tamindraṃ vājayāmasi mahe vṛtrāya hantave /
sa vṛṣā vṛṣabho bhuvat

indraḥ sa dāmane kṛta ojiṣṭhaḥ sa made hitaḥ /
dyumnī ślokī sa somyaḥ

girā vajro na saṃbhṛtaḥ sabalo anapacyutaḥ /
vavakṣa ṛṣvo astṛtaḥ

indramidgāthino bṛhadindramarkebhirarkiṇaḥ /
indraṃ vāṇīranūṣata

indra iddharyoḥ sacā saṃmiśla ā vacoyujā /
indro vajrī hiraṇyayaḥ

indro dīrghāya cakṣasa ā sūryaṃ rohayaddivi /
vi gobhiradrimairayat

ā yāhi suṣumā hi ta indra somaṃ pibā imam /
edaṃ barhiḥ sado mama

ā tvā brahmayujā harī vahatāmindra keśinā /
upa brahmāṇi naḥ śṛṇu

brahmāṇastvā vayaṃ yujā somapāmindra sominaḥ /
sutāvanto havāmahe

yuñjanti bradhnamaruṣaṃ carantaṃ pari tasthuṣaḥ /
rocante rocanā divi

yuñjantyasya kāmyā harī vipakṣasā rathe /
śoṇā dhṛṣṇū nṛvāhasā

ketuṃ kṛṇvann aketave peśo maryā apeśase /
samuṣadbhirajāyathāḥ

udu tyaṃ jātavedasaṃ devaṃ vahanti ketavaḥ /
dṛśe viśvāya sūryam

apa tye tāyavo yathā nakṣatrā yantyaktubhiḥ /
sūrāya viśvacakṣase

adṛśrann asya ketavo vi raśmayo janāmanu /
bhrājanto agnayo yathā

taraṇirviśvadarśato jyotiṣkṛdasi sūrya /
viśvamā bhāsi rocana

pratyaṅdevānāṃ viśaḥ pratyaṅṅudeṣi mānuṣīḥ /
pratyaṅviśvaṃ svardṛśe

yenā pāvaka cakṣasā bhuraṇyantaṃ janāmanu /
tvaṃ varuṇa paśyasi

vi dyāmeṣi rajaspṛthvaharmimāno aktubhiḥ /
paśyaṃ janmāni sūrya

sapta tvā harito rathe vahanti deva sūrya /
śociṣkeśaṃ vicakṣaṇam

ayukta sapta śundhyuvaḥ sūro rathasya naptyaḥ /
tābhiryāti svayuktibhiḥ