Atharva Veda · Chapter 20.107

20.107
samasya manyave viśo viśvā namanta kṛṣṭayaḥ /
samudrāyeva sindhavaḥ

ojastadasya titviṣa ubhe yatsamavartayat/
indraścarmeva rodasī

vi cidvṛtrasya dodhato vajreṇa śataparvaṇā /
śiro bibhedvṛṣṇinā

tadidāsa bhuvaneṣu jyeṣṭhaṃ yato jajña ugrastveṣanṛmṇaḥ /
sadyo jajñāno ni riṇāti śatrūn anu yadenaṃ madanti viśva ūmāḥ

vāvṛdhānaḥ śavasā bhūryojāḥ śatrurdāsāya bhiyasaṃ dadhāti /
avyanacca vyanacca sasni saṃ te navanta prabhṛtā madeṣu

tve kratumapi pṛñcanti bhūri dviryadete trirbhavantyūmāḥ /
svādoḥ svādīyaḥ svādunā sṛjā samadaḥ su madhu madhunābhi yodhīḥ

yadi cin nu tvā dhanā jayantaṃ raṇeraṇe anumadanti viprāḥ /
ojīyaḥ śuṣmintsthiramā tanuṣva mā tvā dabhan durevāsaḥ kaśokāḥ

tvayā vayaṃ śāśadmahe raṇeṣu prapaśyanto yudhenyāni bhūri /
codayāmi ta āyudhā vacobhiḥ saṃ te śiśāmi brahmaṇā vayāṃsi

ni taddadhiṣe'vare pare ca yasminn āvithāvasā duroṇe /
ā sthāpayata mātaraṃ jigatnumata invata karvarāṇi bhūri

stuṣva varṣman puruvartmānaṃ samṛbhvāṇaminatamamāptamāptyānām /
ā darśati śavasā bhūryojāḥ pra sakṣati pratimānaṃ pṛthivyāḥ

imā brahma bṛhaddivaḥ kṛṇavadindrāya śūṣamagniyaḥ svarṣāḥ /
maho gotrasya kṣayati svarājā turaścidviśvamarṇavattapasvān

evā mahān bṛhaddivo atharvāvocatsvāṃ tanvamindrameva /
svasārau mātaribhvarī aripre hinvanti caine śavasā vardhayanti ca

citraṃ devānāṃ keturanīkaṃ jyotiṣmān pradiśaḥ sūrya udyan /
divākaro'ti dyumnaistamāṃsi viśvātārīdduritāni śukraḥ

citraṃ devānāmudagādanīkaṃ cakṣurmitrasya varuṇasyāgneḥ /
āprāddyāvāpṛthivī antarikṣaṃ sūrya ātmā jagatastasthuṣaśca

sūryo devīmuṣasaṃ rocamānāṃ maryo na yoṣāmabhyeti paścāt/
yatrā naro devayanto yugāni vitanvate prati bhadrāya bhadram