Atharva Veda · Chapter 20

sūktam १
sūktam २
sūktam ३
sūktam ४
sūktam ५
sūktam ६
sūktam ७
sūktam ८
sūktam ९
sūktam १०
sūktam ११
sūktam १२
sūktam १३
sūktam १४
sūktam १५
sūktam १६
sūktam १७
sūktam १८
sūktam १९
sūktam २०
sūktam २१
sūktam २२
sūktam २३
sūktam २४
sūktam २५
sūktam २६
sūktam २७
sūktam २८
sūktam २९
sūktam ३०
sūktam ३१
sūktam ३२
sūktam ३३
sūktam ३४
sūktam ३५
sūktam ३६
sūktam ३७
sūktam ३८
sūktam ३९
sūktam ४०
sūktam ४१
sūktam ४२
sūktam ४३
sūktam ४४
sūktam ४५
sūktam ४६
sūktam ४७
sūktam ४८
sūktam ४९
sūktam ५०
sūktam ५१
sūktam ५२
sūktam ५३
sūktam ५४
sūktam ५५
sūktam ५६
sūktam ५७
sūktam ५८
sūktam ५९
sūktam ६०
sūktam ६१
sūktam ६२
sūktam ६३
sūktam ६४
sūktam ६५
sūktam ६६
sūktam ६७
sūktam ६८
sūktam ६९
sūktam ७०
sūktam ७१
sūktam ७२
sūktam ७३
sūktam ७४
sūktam ७५
sūktam ७६
sūktam ७७
sūktam ७८
sūktam ७९
sūktam ८०
sūktam ८१
sūktam ८२
sūktam ८३
sūktam ८४
sūktam ८५
sūktam ८६
sūktam ८७
sūktam ८८
sūktam ८९
sūktam ९०
sūktam ९१
sūktam ९२
sūktam ९३
sūktam ९४
sūktam ९५
sūktam ९६
sūktam ९७
sūktam ९८
sūktam ९९
sūktam १००
sūktam १०१
sūktam १०२
sūktam १०३
sūktam १०४
sūktam १०५
sūktam १०६
sūktam १०७
sūktam १०८
sūktam १०९
sūktam ११०
sūktam १११
sūktam ११२
sūktam ११३
sūktam ११४
sūktam ११५
sūktam ११६
sūktam ११७
sūktam ११८
sūktam ११९
sūktam १२०
sūktam १२१
sūktam १२२
sūktam १२३
sūktam १२४
sūktam १२५
sūktam १२६
sūktam १२७
sūktam १२८
sūktam १२९
sūktam १३०
sūktam १३१
sūktam १३२
sūktam १३३
sūktam १३४
sūktam १३५
sūktam १३६
sūktam १३७
sūktam १३८
sūktam १३९
sūktam १४०
sūktam १४१
sūktam १४२
sūktam १४३
20.1
indra tvā vṛṣabhaṃ vayaṃ sute some havāmahe /
sa pāhi madhvo andhasaḥ

maruto yasya hi kṣaye pāthā divo vimahasaḥ /
sa sugopātamo janaḥ

ukṣānnāya vaśānnāya somapṛṣṭhāya vedhase /
stomairvidhemāgnaye

20.2
marutaḥ potrātsuṣṭubhaḥ svarkādṛtunā somaṃ pibantu

agnirāgnīdhrātsuṣṭubhaḥ svarkādṛtunā somaṃ pibatu

indro brahmā brāhmaṇātsuṣṭubhaḥ svarkādṛtunā somaṃ pibatu

devo draviṇodāḥ potrātsuṣṭubhaḥ svarkādṛtunā somaṃ pibatu

20.3
ā yāhi suṣumā hi ta indra somaṃ pibā imam /
edaṃ barhiḥ sado mama

ā tvā brahmayujā harī vahatāmindra keśinā /
upa brahmāṇi naḥ śṛṇu

brahmāṇastvā vayaṃ yujā somapāmindra sominaḥ /
sutāvanto havāmahe

20.4
ā no yāhi sutāvato'smākaṃ suṣṭutīrupa /
pibā su śiprinn andhasaḥ

ā te siñcāmi kukṣyoranu gātrā vi dhāvatu /
gṛbhāya jihvayā madhu

svāduṣṭe astu saṃsude madhumān tanve tava /
somaḥ śamastu te hṛde

20.5
ayamu tvā vicarṣaṇe janīrivābhi saṃvṛtaḥ /
pra soma indra sarpatu

tuvigrīvo vapodaraḥ subāhurandhaso sade /
indro vṛtrāṇi jighnate

indra prehi purastvaṃ viśvasyeśāna ojasā /
vṛtrāṇi vṛtrahaṃ jahi

dīrghaste astvaṅkuśo yenā vasu prayacchasi /
yajamānāya sunvate

ayaṃ ta indra somo nipūto adhi barhiṣi /
ehīmasya dravā piba

śācigo śācipūjanāyaṃ raṇāya te sutaḥ /
ākhaṇḍala pra hūyase

yaste śṛṅgavṛṣo napātpraṇapātkuṇḍapāyyaḥ /
nyasmin dadhra ā manaḥ

20.6
indra tvā vṛṣabhaṃ vayaṃ sute some havāmahe /
sa pāhi madhvo andhasaḥ

indra kratuvidaṃ sutaṃ somaṃ harya puruṣṭuta /
pibā vṛṣasva tātṛpim

indra pra ṇo dhitāvānaṃ yajñaṃ viśvebhirdevebhir/
tira stavāna viśpate

indra somāḥ sutā ime tava pra yanti satpate /
kṣayaṃ candrāsa indavaḥ

dadhiṣvā jaṭhare sutaṃ somamindra vareṇyam /
tava dyukṣāsa indavaḥ

girvaṇaḥ pāhi naḥ sutaṃ madhordhārābhirajyase /
indra tvādātamidyaśaḥ

abhi dyumnāni vanina indraṃ sacante akṣitā /
pītvī somasya vāvṛdhe

arvāvato na ā gahi parāvataśca vṛtrahan /
imā juṣasva no giraḥ

yadantarā parāvatamarvāvataṃ ca hūyase /
indreha tata ā gahi

20.7
udghedabhi śrutāmaghaṃ vṛṣabhaṃ naryāpasam /
astārameṣi sūrya

nava yo navatiṃ puro bibheda bāhvojasā /
ahiṃ ca vṛtrahāvadhīt

sa na indraḥ śivaḥ sakhāśvāvadgomadyavamat/
urudhāreva dohate

indra kratuvidaṃ sutaṃ somaṃ harya puruṣṭuta /
pibā vṛṣasva tātṛpim

20.8
evā pāhi pratnathā mandatu tvā śrudhi brahma vāvṛdhasvota gīrbhiḥ /
āviḥ sūryaṃ kṛṇuhi pīpihīṣo jahi śatrūṃrabhi gā indra tṛndhi

arvāṅehi somakāmaṃ tvāhurayaṃ sutastasya pibā madāya /
uruvyacā jaṭhara ā vṛṣasva piteva naḥ śṛṇuhi hūyamānaḥ

āpūrṇo asya kalaśaḥ svāhā sekteva kośaṃ siṣice pibadhyai /
samu priyā āvavṛtran madāya pradakṣiṇidabhi somāsa indram

20.9
taṃ vo dasmamṛtīṣahaṃ vasormandānamandhasaḥ /
abhi vatsaṃ na svasareṣu dhenava indraṃ gīrbhirnavāmahe

dyukṣaṃ sudānuṃ taviṣībhirāvṛtaṃ giriṃ na purubhojasam /
kṣumantaṃ vājaṃ śatinaṃ sahasriṇaṃ makṣū gomantamīmahe

tattvā yāmi suvīryaṃ tadbrahma pūrvacittaye /
yenā yatibhyo bhṛgave dhane hite yena praskaṇvamāvitha

yenā samudramasṛjo mahīrapastadindra vṛṣṇi te śavaḥ /
sadyaḥ so asya mahimā na saṃnaśe yaṃ kṣoṇīranucakrade

20.10
udu te madhumattamā gira stomāsa īrate /
satrājito dhanasā akṣitotayo vājayanto rathā iva

kaṇvā iva bhṛgavaḥ sūryā iva viśvamiddhītamānaśuḥ /
indraṃ stomebhirmahayanta āyavaḥ priyamedhāso asvaran

20.11
indraḥ pūrbhidātiraddāsamarkairvidadvasurdayamāno vi śatrūn /
brahmajūtastanvā vāvṛdhāno bhūridātra āpṛṇadrodasī ubhe

makhasya te taviṣasya pra jūtimiyarmi vācamamṛtāya bhūṣan /
indra kṣitīnāmasi mānuṣīṇāṃ viśāṃ daivīnāmuta pūrvayāvā

indro vṛtramavṛṇocchardhanītiḥ pra māyināmaminādvarpaṇītiḥ /
ahan vyaṃsamuśadhagvaneṣvāvirdhenā akṛṇodrāmyāṇām

indraḥ svarṣā janayann ahāni jigāyośigbhiḥ pṛtanā abhiṣṭiḥ /
prārocayan manave ketumahnāmavindajjyotirbṛhate raṇāya

indrastujo barhaṇā ā viveśa nṛvaddadhāno naryā purūṇi /
acetayaddhiya imā jaritre premaṃ varṇamatiracchukramāsām

maho mahāni panayantyasyendrasya karma sukṛtā purūṇi /
vṛjanena vṛjināntsaṃ pipeṣa māyābhirdasyūṃrabhibhūtyojāḥ

yudhendro mahnā varivaścakāra devebhyaḥ satpatiścarṣaṇiprāḥ /
vivasvataḥ sadane asya tāni viprā ukthebhiḥ kavayo gṛṇanti

satrāsāhaṃ vareṇyaṃ sahodāṃ sasavāṃsaṃ svarapaśca devīḥ /
sasāna yaḥ pṛthivīṃ dyāmutemāmindraṃ madantyanu dhīraṇāsaḥ

sasānātyāmuta sūryaṃ sasānendraḥ sasāna purubhojasaṃ gām /
hiraṇyayamuta bhogaṃ sasāna hatvī dasyūn prāryaṃ varṇamāvat

indra oṣadhīrasanodahāni vanaspatīṃrasanodantarikṣam /
bibheda balaṃ nunude vivāco'thābhavaddamitābhikratūnām

śunaṃ huvema maghavānamindramasmin bhare nṛtamaṃ vājasātau /
śṛṇvantamugramūtaye samatsu ghnantaṃ vṛtrāṇi saṃjitaṃ dhanānām

20.12
udu brahmāṇyairata śravasyendraṃ samarye mahayā vasiṣṭha /
ā yo viśvāni śavasā tatānopaśrotā ma īvato vacāṃsi

ayāmi ghoṣa indra devajāmirirajyanta yacchurudho vivāci /
nahi svamāyuścikite janeṣu tānīdaṃhāṃsyati parṣyasmān

yuje rathaṃ gaveṣaṇaṃ haribhyāmupa brahmāṇi jujuṣāṇamasthuḥ /
vi bādhiṣṭa sya rodasī mahitvendro vṛtrāṇyapratī jaghanvān

āpaścitpipyu staryo na gāvo nakṣann ṛtaṃ jaritārasta indra /
yāhi vāyurna niyuto no achā tvaṃ hi dhībhirdayase vi vājān

te tvā madā indra mādayantu śuṣmiṇaṃ tuvirādhasaṃ jaritre /
eko devatrā dayase hi martān asmin chūra savane mādayasva

evedindraṃ vṛṣaṇaṃ vajrabāhuṃ vasiṣṭhāso abhyarcantyarkaiḥ /
sa na stuto vīravaddhātu gomadyūyaṃ pāta svastibhiḥ sadā naḥ

ṛjīṣī vajrī vṛṣabhasturāṣāṭchuṣmī rājā vṛtrahā somapāvā /
yuktvā haribhyāmupa yāsadarvāṅmādhyaṃdine savane matsadindraḥ

20.13
indraśca somaṃ pibataṃ bṛhaspate'smin yajñe mandasānā vṛṣaṇvasū /
ā vāṃ viśantvindavaḥ svābhuvo'sme rayiṃ sarvavīraṃ ni yacchatam

ā vo vahantu saptayo raghuṣyado raghupatvānaḥ pra jigāta bāhubhiḥ /
sīdatā barhiruru vaḥ sadaskṛtaṃ mādayadhvaṃ maruto madhvo andhasaḥ

imaṃ stomamarhate jātavedase rathamiva saṃ mahemā manīṣayā /
bhadrā hi naḥ pramatirasya saṃsadyagne sakhye mā riṣāmā vayaṃ tava

aibhiragne sarathaṃ yāhyarvāṅnānārathaṃ vā vibhavo hyaśvāḥ /
patnīvatastriṃśataṃ trīṃśca devān anuṣvadhamā vaha mādayasva

20.14
vayamu tvāmapūrvya sthūraṃ na kaccidbharanto'vasyavaḥ /
vāje citraṃ havāmahe

upa tvā karmann ūtaye sa no yuvograścakrāma yo dhṛṣat/
tvāmiddhyavitāraṃ vavṛmahe sakhāya indra sānasim

yo na idamidaṃ purā pra vasya ānināya tamu va stuṣe /
sakhāya indramūtaye

haryaśvaṃ satpatiṃ carṣaṇīsahaṃ sa hi ṣmā yo amandata /
ā tu naḥ sa vayati gavyamaśvyaṃ stotṛbhyo maghavā śatam

20.15
pra maṃhiṣṭhāya bṛhate bṛhadraye satyaśuṣmāya tavase matiṃ bhare /
apāmiva pravaṇe yasya durdharaṃ rādho viśvāyu śavase apāvṛtam

adha te viśvamanu hāsadiṣṭaya āpo nimneva savanā haviṣmataḥ /
yatparvate na samaśīta haryata indrasya vajraḥ śnathitā hiraṇyayaḥ

asmai bhīmāya namasā samadhvara uṣo na śubhra ā bharā panīyase /
yasya dhāma śravase nāmendriyaṃ jyotirakāri harito nāyase

ime ta indra te vayaṃ puruṣṭuta ye tvārabhya carāmasi prabhūvaso /
nahi tvadanyo girvaṇo giraḥ sadhatkṣoṇīriva prati no harya tadvacaḥ

bhūri ta indra vīryaṃ tava smasyasya stoturmaghavan kāmamā pṛṇa /
anu te dyaurbṛhatī vīryaṃ mama iyaṃ ca te pṛthivī nema ojase

tvaṃ tamindra parvataṃ mahāmuruṃ vajreṇa vajrin parvaśaścakartitha /
avāsṛjo nivṛtāḥ sartavā apaḥ satrā viśvaṃ dadhiṣe kevalaṃ sahaḥ

20.16
udapruto na vayo rakṣamāṇā vāvadato abhriyasyeva ghoṣāḥ /
giribhrajo normayo madanto bṛhaspatimabhyarkā anāvan

saṃ gobhiraṅgiraso nakṣamāṇo bhaga ivedaryamaṇaṃ nināya /
jane mitro na dampatī anakti bṛhaspate vājayāśūṃrivājau

sādhvaryā atithinīriṣirā spārhāḥ suvarṇā anavadyarūpāḥ /
bṛhaspatiḥ parvatebhyo vitūryā nirgā ūpe yavamiva sthivibhyaḥ

āpruṣāyan madhunā ṛtasya yonimavakṣipann arka ulkāmiva dyoḥ /
bṛhaspatiruddharann aśmano gā bhūmyā udneva vi tvacaṃ bibheda

apa jyotiṣā tamo antarikṣadudnaḥ śīpālamiva vāta ājat/
bṛhaspatiranumṛśyā valasyābhramiva vāta ā cakra ā gāḥ

yadā valasya pīyato jasuṃ bhedbṛhaspatiragnitapobhirarkaiḥ /
dadbhirna jihvā pariviṣṭamādadāvirnidhīṃrakṛṇodusriyāṇām

bṛhaspatiramata hi tyadāsāṃ nāma svarīṇāṃ sadane guhā yat/
āṇḍeva bhitvā śakunasya garbhamudusriyāḥ parvatasya tmanājat

aśnāpinaddhaṃ madhu paryapaśyan matsyaṃ na dīna udani kṣiyantam /
niṣṭajjabhāra camasaṃ na vṛkṣādbṛhaspatirviraveṇā vikṛtya

soṣāmavindatsa svaḥ so agniṃ so arkeṇa vi babādhe tamāṃsi /
bṛhaspatirgovapuṣo valasya nirmajjānaṃ na parvaṇo jabhāra

himeva parṇā muṣitā vanāni bṛhaspatinākṛpayadvalo gāḥ /
anānukṛtyamapunaścakāra yātsūryāmāsā mitha uccarātaḥ

abhi śyāvaṃ na kṛśanebhiraśvaṃ nakṣatrebhiḥ pitaro dyāmapiṃśan /
rātryāṃ tamo adadhurjyotirahan bṛhaspatirbhinadadriṃ vidadgāḥ

idamakarma namo abhriyāya yaḥ pūrvīranvānonavīti /
bṛhaspatiḥ sa hi gobhiḥ so aśvaiḥ sa vīrebhiḥ sa nṛbhirno vayo dhāt

20.17
acchā ma indraṃ matayaḥ svarvidaḥ sadhrīcīrviśvā uśatīranūṣata /
pari ṣvajante janayo yathā patiṃ maryaṃ na śundhyuṃ maghavānamūtaye

na ghā tvadrigapa veti me manastve itkāmaṃ puruhūta śiśraya /
rājeva dasma ni ṣado'dhi barhiṣyasmintsu some'vapānamastu te

viṣūvṛdindro amuteruta kṣudhaḥ sa idrāyo maghavā vasva īśate /
tasyedime pravaṇe sapta sindhavo vayo vardhanti vṛṣabhasya śuṣmiṇaḥ

vayo na vṛkṣaṃ supalāśamāsadantsomāsa indraṃ mandinaścamūṣadaḥ /
praiṣāmanīkaṃ śavasā davidyutadvidatsvarmanave jyotirāryam

kṛtaṃ na śvaghnī vi cinoti devane saṃvargaṃ yan maghavā sūryaṃ jayat/
na tatte anyo anu vīryaṃ śakan na purāṇo maghavan nota nūtanaḥ

viśaṃviśaṃ maghavā paryaśāyata janānāṃ dhenā avacākaśadvṛṣā /
yasyāha śakraḥ savaneṣu raṇyati sa tīvraiḥ somaiḥ sahate pṛtanyataḥ

āpo na sindhumabhi yatsamakṣarantsomāsa indraṃ kulyā iva hradam /
vardhanti viprā maho asya sādane yavaṃ na vṛṣṭirdivyena dānunā

vṛṣā na kruddhaḥ patayadrajaḥsvā yo aryapatnīrakṛṇodimā apaḥ /
sa sunvate maghavā jīradānave'vindajjyotirmanave haviṣmate

ujjāyatāṃ paraśu jyotiṣā saha bhūyā ṛtasya sudughā purāṇavat/
vi rocatāmaruṣo bhānunā śuciḥ svarna śukraṃ śuśucīta satpatiḥ

gobhiṣṭaremāmatiṃ durevāṃ yavena kṣudhaṃ puruhūta viśvām /
vayaṃ rājabhiḥ prathamā dhanānyasmākena vṛjanenā jayema

bṛhaspatirnaḥ pari pātu paścādutottarasmādadharādaghāyoḥ /
indraḥ purastāduta madhyato naḥ sakhā sakhibhyaḥ varivaḥ kṛṇotu

bṛhaspate yuvamindraśca vasvo divyasyeśāthe uta pārthivasya /
dhattaṃ rayiṃ stuvate kīraye cidyūyaṃ pāta svastibhiḥ sadā naḥ

20.18
vayamu tvā taditarthā indra tvāyantaḥ sakhāyaḥ /
kaṇvā ukthebhirjarante

na ghemanyadā papana vajrinn apaso naviṣṭau /
tavedu stomaṃ ciketa

icchanti devāḥ sunvantaṃ na svapnāya spṛhayanti /
yanti pramādamatandrāḥ

vayamindra tvāyavo'bhi pra ṇonumo vṛṣan /
viddhi tvasya no vaso

mā no nide ca vaktave'ryo randhīrarāvne /
tve api kraturmama

tvaṃ varmāsi saprathaḥ puroyodhaśca vṛtrahan /
tvayā prati bruve yujā

20.19
vārtrahatyāya śavase pṛtanāṣāhyāya ca /
indra tvā vartayāmasi

arvācīnaṃ su te mana uta cakṣuḥ śatakrato /
indra kṛṇvantu vāghataḥ

nāmāni te śatakrato viśvābhirgīrbhirīmahe /
indrābhimātiṣāhye

puruṣṭutasya dhāmabhiḥ śatena mahayāmasi /
indrasya carṣaṇīdhṛtaḥ

indraṃ vṛtrāya hantave puruhūtamupa bruve /
bhareṣu vājasātaye

vājeṣu sāsahirbhava tvāmīmahe śatakrato /
indra vṛtrāya hantave

dyumneṣu pṛtanājye pṛtsutūrṣu śravaḥsu ca /
indra sākṣvābhimātiṣu

20.20
śuṣmintamaṃ na ūtaye dyumninaṃ pāhi jāgṛvim /
indra somaṃ śatakrato

indriyāṇi śatakrato yā te janeṣu pañcasu /
indra tāni ta ā vṛṇe

agann indra śravo bṛhaddyumnaṃ dadhiṣva duṣṭaram /
utte śuṣmaṃ tirāmasi

arvāvato na ā gahyatho śakra parāvataḥ /
u loko yaste adriva indreha tata ā gahi

indro aṅgaṃ mahadbhayamabhi ṣadapa cucyavat/
sa hi sthiro vicarṣaṇiḥ

indraśca mṛlayāti no na naḥ paścādaghaṃ naśat/
bhadraṃ bhavāti naḥ puraḥ

indra āśābhyaspari sarvābhyo abhayaṃ karat/
jetā śatrūn vicarṣaṇiḥ

20.21
nyū ṣu vācaṃ pra mahe bharāmahe gira indrāya sadane vivasvataḥ /
nū ciddhi ratnaṃ sasatāmivāvidan na duṣṭutirdraviṇodeṣu śasyate

duro aśvasya dura indra gorasi duro yavasya vasuna inaspatiḥ /
śikṣānaraḥ pradivo akāmakarśanaḥ sakhā sakhibhyastamidaṃ gṛṇīmasi

śacīva indra purukṛddyumattama tavedidamabhitaścekite vasu /
ataḥ saṃgṛbhyābhibhūta ā bhara mā tvāyato jarituḥ kāmamūnayīḥ

ebhirdyubhirsumanā ebhirindubhirnirundhāno amatiṃ gobhiraśvinā /
indreṇa dasyuṃ darayanta indubhiryutadveṣasaḥ samiṣā rabhemahi

samindra rāyā samiṣā rabhemahi saṃ vājebhiḥ puruścandrairabhidyubhiḥ /
saṃ devyā pramatyā vīraśuṣmayā goagrayāśvāvatyā rabhemahi

te tvā madā amadan tāni vṛṣṇyā te somāso vṛtrahatyeṣu satpate /
yatkārave daśa vṛtrāṇyaprati barhiṣmate ni sahasrāṇi barhayaḥ

yudhā yudhamupa ghedeṣi dhṛṣṇuyā purā puraṃ samidaṃ haṃsyojasā /
namyā yadindra sakhyā parāvati nibarhayo namuciṃ nāma māyinam

tvaṃ karañjamuta parṇayaṃ vadhīstejiṣṭhayātithigvasya vartanī /
tvaṃ śatā vaṅgṛdasyābhinatpuro'nānudaḥ pariṣūtā ṛjiśvanā

tvametāṃ janarājño dvirdaśābandhunā suśravasopajagmuṣaḥ /
ṣaṣṭiṃ sahasrā navatiṃ nava śruto ni cakreṇa rathyā duṣpadāvṛṇak

tvamāvitha suśravasaṃ tavotibhistava trāmabhirindra tūrvayāṇam /
tvamasmai kutsamatithigvamāyuṃ mahe rājñe yūne arandhanāyaḥ

ya udṛcīndra devagopāḥ sakhāyaste śivatamā asāma /
tvāṃ stoṣāma tvayā suvīrā drāghīya āyuḥ prataraṃ dadhānāḥ

20.22
abhi tvā vṛṣabhā sute sutaṃ sṛjāmi pītaye /
tṛmpā vyaśnuhī madam

mā tvā mūrā aviṣyavo mopahasvāna ā dabhan /
mākīṃ brahmadviṣo vanaḥ

iha tvā goparīṇasā mahe mandantu rādhase /
saro gauro yathā piba

abhi pra gopatiṃ girendramarca yathā vide /
sūnuṃ satyasya satpatim

ā harayaḥ sasṛjrire'ruṣīradhi barhiṣi /
yatrābhi saṃnavāmahe

indrāya gāva āśiraṃ duduhre vajriṇe madhu /
yatsīmupahvare vidat

20.23
ā tū na indra madryagghuvānaḥ somapītaye /
haribhyāṃ yāhyadrivaḥ

satto hotā na ṛtviyastistire barhirānuṣak/
ayujran prātaradrayaḥ

imā brahma brahmavāhaḥ kriyanta ā barhiḥ sīda /
vīhi śūra purolāśam

rārandhi savaneṣu ṇa eṣu stomeṣu vṛtrahan /
uktheṣvindra girvaṇaḥ

matayaḥ somapāmuruṃ rihanti śavasaspatim /
indraṃ vatsaṃ na mātaraḥ

sa mandasvā hyandhaso rādhase tanvā mahe /
na stotāraṃ nide karaḥ

vayamindra tvāyavo haviṣmanto jarāmahe /
uta tvamasmayurvaso

māre asmadvi mumuco haripriyārvāṅyāhi /
indra svadhāvo matsveha

arvāñcaṃ tvā sukhe rathe vahatāmindra keśinā /
ghṛtasnū barhirāsade

20.24
upa naḥ sutamā gahi somamindra gavāśiram /
haribhyāṃ yaste asmayuḥ

tamindra madamā gahi barhiṣṭhāṃ grāvabhiḥ sutam /
kuvin nvasya tṛpṇavaḥ

indramitthā giro mamāchāguriṣitā itaḥ /
āvṛte somapītaye

indraṃ somasya pītaye stomairiha havāmahe /
ukthebhiḥ kuvidāgamat

indra somāḥ sutā ime tān dadhiṣva śatakrato /
jaṭhare vājinīvaso

vidmā hi tvā dhanaṃjayaṃ vājeṣu dadhṛṣaṃ kave /
adhā te sumnamīmahe

imamindra gavāśiraṃ yavāśiraṃ ca naḥ piba /
āgatyā vṛṣabhiḥ sutam

tubhyedindra sva okye somaṃ codāmi pītaye /
eṣa rārantu te hṛdi

tvāṃ sutasya pītaye pratnamindra havāmahe /
kuśikāso avasyavaḥ

20.25
aśvāvati prathamo goṣu gacchati suprāvīrindra martyastavotibhiḥ /
tamitpṛṇakṣi vasunā bhavīyasā sindhumāpo yathābhito vicetasaḥ

āpo na devīrupa yanti hotriyamavaḥ paśyanti vitataṃ yathā rajaḥ /
prācairdevāsaḥ pra ṇayanti devayuṃ brahmapriyaṃ joṣayante varā iva

adhi dvayoradadhā ukthyaṃ vaco yatasrucā mithunā yā saparyataḥ /
asaṃyatto vrate te kṣeti puṣyati bhadrā śaktiryajamānāya sunvate

ādaṅgirāḥ prathamaṃ dadhire vaya iddhāgnayaḥ śamyā ye sukṛtyayā /
sarvaṃ paṇeḥ samavindanta bhojanamaśvāvantaṃ gomantamā paśuṃ naraḥ

yajñairatharvā prathamaḥ pathastate tataḥ sūryo vratapā vena ājani /
ā gā ājaduśanā kāvyaḥ sacā yamasya jātamamṛtaṃ yajāmahe

barhirvā yatsvapatyāya vṛjyate'rko vā ślokamāghoṣate divi /
grāvā yatra vadati karurukthyastasyedindro abhipitveṣu raṇyati

progrāṃ pītiṃ vṛṣṇa iyarmi satyāṃ prayai sutasya haryaśva tubhyam /
indra dhenābhiriha mādayasva dhībhirviśvābhiḥ śacyā gṛṇānaḥ

20.26
yogeyoge tavastaraṃ vājevāje havāmahe /
sakhāya indramūtaye

ā ghā gamadyadi śravatsahasriṇībhirūtibhiḥ /
vājebhirupa no havam

anu pratnasyaukaso huve tuvipratiṃ naram /
yaṃ te pūrvaṃ pitā huve

yuñjanti bradhnamaruṣaṃ carantaṃ pari tasthuṣaḥ /
rocante rocanā divi

yuñjanti asya kāmyā harī vipakṣasā rathe /
śoṇā dhṛṣṇū nṛvāhasā

ketuṃ kṛṇvann aketave peśo maryā apeśase /
samuṣadbhirajāyathāḥ

20.27
yadindrāhaṃ yathā tvamīśīya vasva eka it/
stotā me goṣakhā syāt

śikṣeyamasmai ditseyaṃ śacīpate manīṣiṇe /
yadahaṃ gopatiḥ syām

dhenuṣṭa indra sūnṛtā yajamānāya sunvate /
gāmaśvaṃ pipyuṣī duhe

na te vartāsti rādhasa indra devo na martyaḥ /
yadditsasi stuto magham

yajña indramavardhayadyadbhūmiṃ vyavartayat/
cakrāṇa opaśaṃ divi

vāvṛdhānasya te vayaṃ viśvā dhanāni jigyuṣaḥ /
ūtimindrā vṛṇīmahe

20.28
vyantarikṣamatiran made somasya rocanā /
indro yadabhinadvalam

udgā ājadaṅgirobhya āviṣkrṇvan guhā satīḥ /
arvāñcaṃ nunude valam

indreṇa rocanā divo dṛlhāni dṛṃhitāni ca /
sthirāṇi na parāṇude

apāmūrmirmadann iva stoma indrājirāyate /
vi te madā arājiṣuḥ

20.29
tvaṃ hi stomavardhana indrāsyukthavardhanaḥ /
stotṝṇāmuta bhadrakṛt

indramitkeśinā harī somapeyāya vakṣataḥ /
upa yajñaṃ surādhasam

apāṃ phenena namuceḥ śira indrodavartayaḥ /
viśvā yadajaya spṛdhaḥ

māyābhirutsisṛpsata indra dyāmārurukṣataḥ /
ava dasyūṃradhūnuthāḥ

asunvāmindra saṃsadaṃ viṣūcīṃ vyanāśayaḥ /
somapā uttaro bhavan

20.30
pra te mahe vidathe śaṃsiṣaṃ harī pra te vanve vanuṣo haryataṃ madam /
ghṛtaṃ na yo haribhiścāru secata ā tvā viśantu harivarpasaṃ giraḥ

hariṃ hi yonimabhi ye samasvaran hinvanto harī divyaṃ yathā sadaḥ /
ā yaṃ pṛṇanti haribhirna dhenava indrāya śūśaṃ harivantamarcata

so asya vajro harito ya āyaso harirnikāmo harirā gabhastyoḥ /
dyumnī suśipro harimanyusāyaka indre ni rūpā haritā mimikṣire

divi na keturadhi dhāyi haryato vivyacadvajro harito na raṃhyā /
tudadahiṃ hariśipro ya āyasaḥ sahasraśokā abhavaddharimbharaḥ

tvaṃtvamaharyathā upastutaḥ pūrvebhirindra harikeśa yajvabhiḥ /
tvaṃ haryasi tava viśvamukthyamasāmi rādho harijāta haryatam

20.31
tā vajriṇaṃ mandinaṃ stomyaṃ mada indraṃ rathe vahato haryatā harī /
purūṇyasmai savanāni haryata indrāya somā harayo dadhanvire

araṃ kāmāya harayo dadhanvire sthirāya hinvan harayo harī turā /
arvadbhiryo haribhirjoṣamīyate so asya kāmaṃ harivantamānaśe

hariśmaśārurharikeśa āyasasturaspeye yo haripā avardhata /
arvadbhiryo haribhirvājinīvasurati viśvā duritā pāriṣaddharī

śruveva yasya hariṇī vipetatuḥ śipre vājāya hariṇī davidhvataḥ /
pra yatkṛte camase marmṛjaddharī pītvā madasya haryatasyāndhasaḥ

uta sma sadna haryatasya pastyoratyo na vājaṃ harivāmacikradat/
mahī ciddhi dhiṣaṇāharyadojasā bṛhadvayo dadhiṣe haryatascidā

20.32
ā rodasī haryamāṇo mahitvā navyaṃnavyaṃ haryasi manma nu priyam /
pra pastyamasura haryataṃ gorāviṣkṛdhi haraye sūryāya

ā tvā haryantaṃ prayujo janānāṃ rathe vahantu hariśipramindra /
pibā yathā pratibhṛtasya madhvo haryan yajñaṃ sadhamāde daśoṇim

apāḥ pūrveṣāṃ harivaḥ sutānāmatho idaṃ savanaṃ kevalaṃ te /
mamaddhi somaṃ madhumantamindra satrā vṛṣaṃ jathara ā vṛṣasva

20.33
apsu dhūtasya harivaḥ pibeha nṛbhiḥ sutasya jaṭharaṃ pṛṇasva /
mimikṣuryamadraya indra tubhyaṃ tebhirvardhasva madamukthavāhaḥ

progrāṃ pītiṃ vṛṣṇa iyarmi satyāṃ prayai sutasya haryaśva tubhyam /
indra dhenābhiriha mādayasva dhībhirviśvābhiḥ śacyā gṛṇānaḥ

ūtī śacīvastava vīryeṇa vayo dadhānā uśija ṛtajñāḥ /
prajāvadindra maṃso duroṇe tasthurgṛṇantaḥ sadhamādyāsaḥ

20.34
yo jāta eva prathamo manasvān devo devān kratunā paryamūṣat/
yasya śuṣmādrodasī abhyasetāṃ nṛmṇasya mahnā sa janāsa indraḥ

yaḥ pṛthivīṃ vyathamānāmadṛṃhadyaḥ parvatān prakupitāmaramṇāt/
yo antarikṣaṃ vimame varīyo yo dyāmastabhnātsa janāsa indraḥ

yo hatvāhimariṇātsapta sindhūn yo gā udājadapadhā valasya /
yo aśmanorantaragniṃ jajāna saṃvṛksamatsu sa janāsa indraḥ

yenemā viśvā cyavanā kṛtāni yo dāsaṃ varṇamadharaṃ guhākaḥ /
śvaghnīva yo jigīvāṃ lakṣamādadaryaḥ puṣṭāni sa janāsa indraḥ

yaṃ smā pṛcchanti kuha seti ghoramutemāhurnaiṣo astītyenam /
so aryaḥ puṣṭīrvija ivā mināti śradasmai dhatta sa janāsa indraḥ

yo radhrasya coditā yaḥ kṛśasya yo brahmaṇo nādhamānasya kīreḥ /
yuktagrāvṇo yo'vitā suśipraḥ sutasomasya sa janāsa indraḥ

yasyāśvāsaḥ pradiśi yasya gāvo yasya grāmā yasya viśve rathāsaḥ /
yaḥ sūryaṃ ya uṣasaṃ jajāna yo apāṃ netā sa janāsa indraḥ

yaṃ krandasī saṃyatī vihvayete pare'vare ubhayā amitrāḥ /
samānaṃ cidrathamātasthivāṃsā nānā havete sa janāsa indraḥ

yasmān na ṛte vijayante janāso yaṃ yudhyamānā avase havante /
yo viśvasya pratimānaṃ babhūva yo acyutacyutsa janāsa indraḥ

yaḥ śasvato mahyeno dadhānān amanyamānāṃ charvā jaghāna /
yaḥ śardhate nānudadāti śṛdhyāṃ yo dasyorhantā sa janāsa indraḥ

yaḥ śambharaṃ parvateṣu kṣiyantaṃ catvāriṃśyāṃ śaradyanvavindat/
ojāyamānaṃ yo ahiṃ jaghāna dānuṃ śayānaṃ sa janāsa indraḥ

yaḥ śambharaṃ paryataratkasībhiryo'cārukāsnāpibatsutasya /
antargirau yajamānaṃ bahuṃ janaṃ yasminn āmūrchatsa janāsa indraḥ

yaḥ saptaraśmirvṛṣabhastuviṣmān avāsṛjatsartave sapta sindhūn /
yo rauhiṇamasphuradvajrabāhurdyāmārohantaṃ sa janāsa indraḥ

dyāvā cidasmai pṛthivī mamete śuṣmāccidasya parvatā bhayante /
yaḥ somapā nicito vajrabāhuryo vajrahastaḥ sa janāsa indraḥ

yaḥ sunvantamavati yaḥ pacantaṃ yaḥ śaṃsantaṃ yaḥ śaśamānamūtī /
yasya brahma vardhanaṃ yasya somo yasyedaṃ rādhaḥ sa janāsa indraḥ

jāto vyakhyatpitrorupasthe bhuvo na veda janituḥ parasya /
staviṣyamāṇo no yo asmadvratā devānāṃ sa janāsa indraḥ

yaḥ somakāmo haryaśvaḥ sūriryasmādrejante bhuvanāni viśvā /
yo jaghāna śambaraṃ yaśca śuṣṇaṃ ya ekavīraḥ sa janāsa indraḥ

yaḥ sunvate pacate dudhra ā cidvājaṃ dardarṣi sa kilāsi satyaḥ /
vayaṃ ta indra viśvaha priyāsaḥ suvīrāso vidathamā vadema

20.35
asmā idu pra tavase turāya prayo na harmi stomaṃ māhināya /
ṛcīṣamāyādhrigava ohamindrāya brahmāṇi rātatamā

asmā idu praya iva pra yaṃsi bharāmyāngūṣaṃ bādhe suvṛkti /
indrāya hṛdā manasā manīṣā pratnāya patye dhiyo marjayanta

asmā idu tyamupamaṃ svarṣāṃ bharāmyāṅgūṣamāsyena /
maṃhiṣṭhamachoktibhirmatīnāṃ suvṛktibhiḥ sūriṃ vāvṛdhadhyai

asmā idu stomaṃ saṃ hinomi rathaṃ na taṣṭeva tatsināya /
giraśca girvāhase suvṛktīndrāya viśvaminvaṃ medhirāya

asmā idu saptimiva śravasyendrāyārkaṃ juhvā samañje /
vīraṃ dānaukasaṃ vandadhyai purāṃ gūrtaśravasaṃ darmāṇam

asmā idu tvaṣṭā takṣadvajraṃ svapastamaṃ svaryaṃ raṇāya /
vṛtrasya cidvidadyena marma tujann īśānastujatā kiyedhāḥ

asyedu mātuḥ savaneṣu sadyo mahaḥ pituṃ papivāṃ cārvannā /
muṣāyadviṣṇuḥ pacataṃ sahīyān vidhyadvarāhaṃ tiro adrimastā

asmā idu gnāściddevapatnīrindrāyārkamahihatya ūvuḥ /
pari dyāvāpṛthivī jabhra urvī nāsya te mahimānaṃ pari ṣṭaḥ

asyedeva pra ririce mahitvaṃ divaspṛthivyāḥ paryantarikṣāt/
svarālindro dama ā viśvagūrtaḥ svariramatro vavakṣe raṇāya

asyedeva śavasā śuśantaṃ vi vṛścadvajreṇa vṛtramindraḥ /
gā na vrāṇā avanīramuñcadabhi śravo dāvane sacetāḥ

asyedu tveṣasā ranta sindhavaḥ pari yadvajreṇa sīmayacchat/
īśānakṛddāśuṣe daśasyan turvītaye gādhaṃ turvaṇiḥ kaḥ

asmā idu pra bharā tūtujāno vṛtrāya vajramīśānaḥ kiyedhāḥ /
gorna parva vi radā tiraśceṣyann arṇāṃsyapāṃ caradhyai

asyedu pra brūhi pūrvyāṇi turasya karmāṇi navya ukthaiḥ /
yudhe yadiṣṇāna āyudhānyṛghāyamāṇo niriṇāti śatrūn

asyedu bhiyā girayaśca dṛlhā dyāvā ca bhūmā januṣastujete /
upo venasya joguvāna oṇiṃ sadyo bhuvadvīryāya nodhāḥ

asmā idu tyadanu dāyyeṣāmeko yadvavne bhūrerīśānaḥ /
praitaśaṃ sūrye paspṛdhānaṃ sauvaśvye suṣvimāvadindraḥ

evā te hāriyojanā suvṛktīndra brahmāṇi gotamāso akran /
aiṣu viśvapeśasaṃ dhiyaṃ dhāḥ prātarmakṣū dhiyāvasurjagamyāt

20.36
ya eka iddhavyaścarṣaṇīnāmindraṃ taṃ gīrbhirabhyarca ābhiḥ /
yaḥ patyate vṛṣabho vṛṣṇyāvāntsatyaḥ satvā purumāyaḥ sahasvān

tamu naḥ pūrve pitaro navagvāḥ sapta viprāso abhi vājayantaḥ /
nakṣaddābhaṃ taturiṃ parvateṣṭhāmadroghavācaṃ matibhiḥ śaviṣṭham

tamīmahe indramasya rāyaḥ puruvīrasya nṛvataḥ purukṣoḥ /
yo aṣkṛdhoyurajaraḥ svarvān tamā bhara harivo mādayadhyai

tan no vi voco yadi te purā cijjaritāra ānaśuḥ sumnamindra /
kaste bhāgaḥ kiṃ vayo dudhra khiduḥ puruhūta purūvaso'suraghnaḥ

taṃ pṛcchantī vajrahastaṃ ratheṣṭhāmindraṃ vepī vakvarī yasya nū gīḥ /
tuvigrābhaṃ tuvikūrmiṃ rabhodāṃ gātumiṣe nakṣate tumramaccha

ayā ha tyaṃ māyayā vāvṛdhānaṃ manojuvā svatavaḥ parvatena /
acyutā cidvīlitā svojo rujo vi dṛlhā dhṛṣatā virapśin

taṃ vo dhiyā navyasyā śaviṣṭhaṃ pratnaṃ pratnavatparitaṃsayadhyai /
sa no vakṣadanimānaḥ suvahnendro viśvānyati durgahāṇi

ā janāya druhvaṇe pārthivāni divyāni dīpayo'ntarikṣā /
tapā vṛṣan viśvataḥ śociṣā tān brahmadviṣe śocaya kṣāmapaśca

bhuvo janasya divyasya rājā pārthivasya jagatastveṣasaṃdṛk/
dhiṣva vajraṃ dakṣiṇa indra haste viśvā ajurya dayase vi māyāḥ

ā saṃyatamindra ṇaḥ svastiṃ śatrutūryāya bṛhatīmamṛdhrām /
yayā dāsānyāryāṇi vṛtrā karo vajrintsutukā nāhuṣāṇi

sa no niyudbhiḥ puruhūta vedho viśvavārābhirā gahi prayajyo /
na yā adevo varate na deva ābhiryāhi tūyamā madryadrik

20.37
yastigmaśṛṅgo vṛṣabho na bhīmaḥ ekaḥ kṛṣṭīścyavayati pra viśvāḥ /
yaḥ śaśvato adāśuṣo gayasya prayantāsi suṣvitarāya vedaḥ

tvaṃ ha tyadindra kutsamāvaḥ śuśrūṣamāṇastanvā samarye /
dāsaṃ yacśuṣṇaṃ kuyavaṃ nyasmā arandhaya ārjuneyāya śikṣan

tvaṃ dhṛṣṇo dhṛṣatā vītahavyaṃ prāvo viśvābhirūtibhiḥ sudāsam /
pra paurukutsiṃ trasadasyumāvaḥ kṣetrasātā vṛtrahatyeṣu pūrum

tvaṃ nṛbhirnṛmaṇo devavītau bhūrīṇi vṛtrā haryaśva haṃsi /
tvaṃ ni dasyuṃ cumuriṃ dhuniṃ cāsvāpayo dabhītaye suhantu

tava cyautnāni vajrahasta tāni nava yatpuro navatiṃ ca sadyaḥ /
niveśane śatatamāviveṣīrahaṃ ca vṛtraṃ namucimutāhan

sanā tā ta indra bhojanāni rātahavyāya dāśuṣe sudāse /
vṛṣṇe te harī vṛṣaṇā yunajmi vyantu brahmāṇi puruśāka vājam

mā te asyāṃ sahasāvan pariṣṭāvaghāya bhūma harivaḥ parādau /
trāyasva no'vṛkebhirvarūthaistava priyāsaḥ sūriṣu syāma

priyāsa itte maghavann abhiṣṭau naro madema śaraṇe sakhāyaḥ /
ni turvaśaṃ ni yādvaṃ śiśīhyatithigvāya śaṃsyaṃ kariṣyan

sadyaścin nu te maghavann abhiṣṭau naraḥ śaṃsantyukthaśāsa ukthā /
ye te havebhirvi paṇīṃradāśann asmān vṛṇīṣva yujyāya tasmai

ete stomā narāṃ nṛtama tubhyamasmadryañco dadato maghāni /
teṣāmindra vṛtrahatye śivo bhūḥ sakhā ca śūro'vitā ca nṛṇām

nū indra śūra stavamāna ūtī brahmajūtastanvā vāvṛdhasva /
upa no vājān mimīhyupa stīn yuyaṃ pāta svastibhiḥ sadā naḥ

20.38
ā yāhi suṣumā hi ta indra somaṃ pibā imam /
edaṃ barhiḥ sado mama

ā tvā brahmayujā harī vahatāmindra keśinā /
upa brahmāṇi naḥ śṛṇu

brahmāṇastvā vayaṃ yujā somapāmindra sominaḥ /
sutāvanto havāmahe

indramidgāthino bṛhadindramarkebhirarkiṇaḥ /
indraṃ vāṇīranūṣata

indra iddharyoḥ sacā saṃmiśla ā vacoyujā /
indro vajrī hiraṇyayaḥ

indro dīrghāya cakṣasa ā sūryaṃ rohayaddivi /
vi gobhiradrimairayat

20.39
indraṃ vo viśvataspari havāmahe janebhyaḥ /
asmākamastu kevalaḥ

vyantarikṣamatiran made somasya rocanā /
indro yadabhinadvalam

udgā ājadaṅgirobhya āviṣkṛṇvan guhā satīḥ /
arvāñcaṃ nunude valam

indreṇa rocanā divo dṛlhāni dṛṃhitāni ca /
sthirāṇi na parāṇude

apāmūrmirmadann iva stoma indrājirāyate /
vi te madā arājiṣuḥ

20.40
indreṇa saṃ hi dṛkṣase saṃjagmāno abibhyuṣā /
mandū samānavarcasā

anavadyairabhidyubhirmakhaḥ sahasvadarcati /
gaṇairindrasya kāmyaiḥ

ādaha svadhāmanu punargarbhatvamerire /
dadhānā nāma yajñiyam

20.41
indro dadhīco asthabhirvṛtrāṇyapratiṣkutaḥ /
jaghāna navatīrnava

icchan aśvasya yacchiraḥ parvateṣvapaśritam /
tadvidaccharyaṇāvati

atrāha goramanvata nāma tvaṣṭurapīcyam /
itthā candramaso gṛhe

20.42
vācamaṣṭāpadīmahaṃ navasraktimṛtaspṛśam /
indrātpari tanvaṃ mame

anu tvā rodasī ubhe krakṣamāṇamakṛpetām /
indra yaddasyuhābhavaḥ

uttiṣṭhann ojasā saha pītvī śipre avepayaḥ /
somamindra camū sutam

20.43
bhindhi viśvā apa dviṣaḥ bādho jahī mṛdhaḥ /
vasu spārhaṃ tadā bhara

yadvīlāvindra yatsthire yatparśāne parābhṛtam /
vasu spārhaṃ tadā bhara

yasya te viśvamānuṣo bhūrerdattasya vedati /
vasu spārhaṃ tadā bhara

20.44
pra samrājaṃ carṣaṇīnāmindraṃ stotā navyaṃ gīrbhiḥ /
naraṃ nṛṣāhaṃ maṃhiṣṭham

yasminn ukthāni raṇyanti viśvāni ca śravasya /
apāmavo na samudre

taṃ suṣṭutyā vivāse jyeṣṭharājaṃ bhare kṛtnum /
maho vājinaṃ sanibhyaḥ

20.45
ayamu te samatasi kapota iva garbhadhim /
vacastaccin na ohase

stotraṃ rādhānāṃ pate girvāho vīra yasya te /
vibhūtirastu sūnṛtā

ūrdhvastiṣṭhā na ūtaye'smin vāje śatakrato /
samanyeṣu bravāvahai

20.46
praṇetāraṃ vasyo achā kartāraṃ jyotiḥ samatsu /
sāsahvāṃsaṃ yudhāmitrān

sa naḥ papriḥ pārayāti svasti nāvā puruhūtaḥ /
indro viśvā ati dviṣaḥ

sa tvaṃ na indra vājobhirdaśasyā ca gātuyā ca /
achā ca naḥ sumnaṃ neṣi

20.47
tamindraṃ vājayāmasi mahe vṛtrāya hantave /
sa vṛṣā vṛṣabho bhuvat

indraḥ sa dāmane kṛta ojiṣṭhaḥ sa made hitaḥ /
dyumnī ślokī sa somyaḥ

girā vajro na saṃbhṛtaḥ sabalo anapacyutaḥ /
vavakṣa ṛṣvo astṛtaḥ

indramidgāthino bṛhadindramarkebhirarkiṇaḥ /
indraṃ vāṇīranūṣata

indra iddharyoḥ sacā saṃmiśla ā vacoyujā /
indro vajrī hiraṇyayaḥ

indro dīrghāya cakṣasa ā sūryaṃ rohayaddivi /
vi gobhiradrimairayat

ā yāhi suṣumā hi ta indra somaṃ pibā imam /
edaṃ barhiḥ sado mama

ā tvā brahmayujā harī vahatāmindra keśinā /
upa brahmāṇi naḥ śṛṇu

brahmāṇastvā vayaṃ yujā somapāmindra sominaḥ /
sutāvanto havāmahe

yuñjanti bradhnamaruṣaṃ carantaṃ pari tasthuṣaḥ /
rocante rocanā divi

yuñjantyasya kāmyā harī vipakṣasā rathe /
śoṇā dhṛṣṇū nṛvāhasā

ketuṃ kṛṇvann aketave peśo maryā apeśase /
samuṣadbhirajāyathāḥ

udu tyaṃ jātavedasaṃ devaṃ vahanti ketavaḥ /
dṛśe viśvāya sūryam

apa tye tāyavo yathā nakṣatrā yantyaktubhiḥ /
sūrāya viśvacakṣase

adṛśrann asya ketavo vi raśmayo janāmanu /
bhrājanto agnayo yathā

taraṇirviśvadarśato jyotiṣkṛdasi sūrya /
viśvamā bhāsi rocana

pratyaṅdevānāṃ viśaḥ pratyaṅṅudeṣi mānuṣīḥ /
pratyaṅviśvaṃ svardṛśe

yenā pāvaka cakṣasā bhuraṇyantaṃ janāmanu /
tvaṃ varuṇa paśyasi

vi dyāmeṣi rajaspṛthvaharmimāno aktubhiḥ /
paśyaṃ janmāni sūrya

sapta tvā harito rathe vahanti deva sūrya /
śociṣkeśaṃ vicakṣaṇam

ayukta sapta śundhyuvaḥ sūro rathasya naptyaḥ /
tābhiryāti svayuktibhiḥ

20.48
abhi tvā varcasā giraḥ siñcantyā caraṇyuvaḥ /
abhi vatsaṃ na dhenavaḥ

tā arṣanti śubhriyaḥ pṛñcatīrvarcasā payaḥ /
jātaṃ janiryathā hṛdā

vajrāpavasādhyaḥ kīrtirmriyamāṇamāvahan /
mahyamāyurghṛtaṃ payaḥ

āyaṃ gauḥ pṛśnirakramīdasadan mātaraṃ puraḥ /
pitaraṃ ca prayantsvaḥ

antaścarati rocanā asya prāṇādapānataḥ /
vyakhyan mahiṣaḥ svaḥ

triṃśaddhāmā vi rājati vākpataṅgo aśiśriyat/
prati vastorahardyubhiḥ

20.49
yacchakrā vācamāruhann antarikṣaṃ siṣāsathaḥ /
saṃ devā amadan vṛṣā

śakro vācamadhṛṣṭāyoruvāco adhṛṣṇuhi /
maṃhiṣṭha ā madardivi

śakro vācamadhṛṣṇuhi dhāmadharman vi rājati /
vimadan barhirāsaran

taṃ vo dasmamṛtīṣahaṃ vasormandānamandhasaḥ /
abhi vatsaṃ na svasareṣu dhenava indraṃ gīrbhirnavāmahe

dyukṣaṃ sudānuṃ taviṣībhirāvṛtaṃ giriṃ na purubhojasam /
kṣumantaṃ vājaṃ śatinaṃ sahasriṇaṃ makṣū gomantamīmahe

tattvā yāmi suvīryaṃ tadbrahma pūrvacittaye /
yenā yatibhyo bhṛgave dhane hite yena praskaṇvamāvitha

yenā samudramasṛjo mahīrapastadindra vṛṣṇi te śavaḥ /
sadyaḥ so asya mahimā na saṃnaśe yaṃ kṣoṇīranucakrade

20.50
kan navyo atasīnāṃ turo gṛṇīta martyaḥ /
nahī nvasya mahimānamindriyaṃ svargṛṇanta ānaśuḥ

kadu stuvanta ṛtayanta devata ṛṣiḥ ko vipra ohate /
kadā havaṃ maghavann indra sunvataḥ kadu stuvata ā gamaḥ

20.51
abhi pra vaḥ surādhasamindramarca yathā vide /
yo jaritṛbhyo maghavā purūvasuḥ sahasreṇeva śikṣati

śatānīkeva pra jigāti dhṛṣṇuyā hanti vṛtrāṇi dāśuṣe /
gireriva pra rasā asya pinvire datrāṇi purubhojasaḥ

pra su śrutaṃ surādhasamarcā śakramabhiṣṭaye /
yaḥ sunvate stuvate kāmyaṃ vasu sahasreṇeva maṃhate

śatānīkā hetayo asya duṣṭarā indrasya samiṣo mahīḥ /
girirna bhujmā maghatsu pinvate yadīṃ sutā amandiṣuḥ

20.52
vayaṃ gha tvā sutāvanta āpo na vṛktabarhiṣaḥ /
pavitrasya prasravaṇeṣu vṛtrahan pari stotāra āsate

svaranti tvā sute naro vaso nireka ukthinaḥ /
kadā sutaṃ tṛṣāṇa oka ā gama indra svabdīva vaṃsagaḥ

kaṇvebhirdhṛṣṇavā dhṛsadvājaṃ darṣi sahasriṇam /
piśaṅgarūpaṃ maghavan vicarṣaṇe makṣū gomantamīmahe

20.53
ka īṃ veda sute sacā pibantaṃ kadvayo dadhe /
ayaṃ yaḥ puro vibhinattyojasā mandānaḥ śipryandhasaḥ

dānā mṛgo na vāraṇaḥ purutrā carathaṃ dadhe /
nakiṣṭvā ni yamadā sute gamo mahāścarasyojasā

ya ugraḥ sann aniṣṭṛta sthiro raṇāya saṃskṛtaḥ /
yadi stoturmaghavā śṛṇavaddhavaṃ nendro yoṣatyā gamat

20.54
viśvāḥ pṛtanā abhibhūtaraṃ naraṃ sajūstatakṣurindraṃ jajanuśca rājase /
kratvā variṣṭhaṃ vara āmurimutogramojiṣṭhaṃ tavasaṃ tarasvinam

samīṃ rebhāso asvarann indraṃ somasya pītaye /
svarpatiṃ yadīṃ vṛdhe dhṛtavrato hyojasā samūtibhiḥ

nemiṃ namanti cakṣasā meṣaṃ viprā abhisvarā /
sudītayo vo adruho'pi karṇe tarasvinaḥ samṛkvabhiḥ

20.55
tamindraṃ johavīmi maghavānamugraṃ satrā dadhānamapratiṣkutaṃ śavāṃsi /
maṃhiṣṭho gīrbhirā ca yajñiyo vavartadrāye no viśvā supathā kṛṇotu vajrī

yā indra bhuja ābharaḥ svarvāmasurebhyaḥ /
stotāramin maghavann asya vardhaya ye ca tve vṛktabarhiṣaḥ

yamindra dadhiṣe tvamaśvaṃ gāṃ bhāgamavyayam /
yajamāne sunvati dakṣiṇāvati tasmin taṃ dhehi mā paṇau

20.56
indro madāya vāvṛdhe śavase vṛtrahā nṛbhiḥ /
tamin mahatsvājiṣūtemarbhe havāmahe sa vājeṣu pra no'viṣat

asi hi vīra senyo'si bhūri parādadiḥ /
asi dabhrasya cidvṛdho yajamānāya śikṣasi sunvate bhūri te vasu

yadudīrata ājayo dhṛṣṇave dhīyate dhanā /
yukṣvā madacyutā harī kaṃ hanaḥ kaṃ vasau dadho'smāmindra vasau dadhaḥ

mademade hi no dadiryūthā gavāmṛjukratuḥ /
saṃ gṛbhāya puru śatobhayāhastyā vasu śiśīhi rāya ā bhara

mādayasva sute sacā śavase śūra rādhase /
vidmā hi tvā purūvasumupa kāmāntsasṛjmahe'thā no'vitā bhava

ete ta indra jantavo viśvaṃ puṣyanti vāryam /
antarhi khyo janānāmaryo vedo adāśuṣāṃ teṣāṃ no veda ā bhara

20.57
surūpakṛtnumūtaye sudughāmiva goduhe /
juhūmasi dyavidyavi

upa naḥ savanā gahi somasya somapāḥ piba /
godā idrevato madaḥ

athā te antamānāṃ vidyāma sumatīnām /
mā no ati khya ā gahi

śuṣmintamaṃ na ūtaye dyumninaṃ pāhi jāgṛvim /
indra somaṃ śatakrato

indriyāṇi śatakrato yā te janeṣu pañcasu /
indra tāni ta ā vṛṇe

agann indra śravo bṛhaddyumnaṃ dadhiṣva duṣṭaram /
utte śuṣmaṃ tirāmasi

arvāvato na ā gahyatho śakra parāvataḥ /
u loko yaste adriva indreha tata ā gahi

indro aṅga mahadbhayamabhī ṣadapa cucyavat/
sa hi sthiro vicarṣaniḥ

indraśca mṛlayāti no na naḥ paścādaghaṃ naśat/
bhadraṃ bhavāti naḥ puraḥ

indra āśābhyaspari sarvābhyo abhayaṃ karat/
jetā śatrūn vicarṣaṇiḥ

ka īṃ veda sute sacā pibantaṃ kadvayo dadhe /
ayaṃ yaḥ puro vibhinattyojasā mandānaḥ śipryandhasaḥ

dānā mṛgo na vāraṇaḥ purutrā carathaṃ dadhe /
nakiṣṭvā ni yamadā sute gamo mahāṃścarasyojasā

ya ugraḥ sann aniṣṭṛta sthiro raṇāya saṃskṛtaḥ /
yadi stoturmaghavā śṛṇavaddhavaṃ nendro yoṣatyā gamat

vayaṃ gha tvā sutāvanta āpo na vṛktabarhiṣaḥ /
pavitrasya prasravaṇeṣu vṛtrahan pari stotāra āsate

svaranti tvā sute naro vaso nireka ukthinaḥ /
kadā sutaṃ tṛṣāṇa oka ā gama indra svabdīva vaṃsagaḥ

kaṇvebhirdhṛṣṇavā dhṛṣadvājaṃ darṣi sahasriṇam /
piśaṅgarūpaṃ maghavan vicarṣaṇe makṣū gomantamīmahe

20.58
śrāyanta iva sūryaṃ viśvedindrasya bhakṣata /
vasūni jāte janamāna ojasā prati bhāgaṃ na dīdhima

anarśarātiṃ vasudāmupa stuhi bhadrā indrasya rātayaḥ /
so asya kāmaṃ vidhato na roṣati mano dānāya codayan

baṇmahāmasi sūrya baḍāditya mahāmasi /
mahaste sato mahimā panasyate'ddhā deva mahāmasi

baṭsūrya śravasā mahāmasi satrā deva mahāmasi /
mahnā devānāmasuryaḥ purohito vibhu jyotiradābhyam

20.59
udu tye madhu mattamā gira stomāsa īrate /
satrājito dhanasā akṣitotayo vājayanto rathā iva

kaṇvā iva bhṛgavaḥ sūrya iva viśvamiddhītamānaśuḥ /
indraṃ stomebhirmahayanta āyavaḥ priyamedhāso asvaran

udin nvasya ricyate'ṃśo dhanaṃ na jigyusaḥ /
ya indro harivān na dabhanti taṃ ripo dakṣaṃ dadhāti somini

mantramakharvaṃ sudhitaṃ supeśasaṃ dadhāta yajñiyeṣvā /
pūrvīścana prasitayastaranti taṃ ya indre karmaṇā bhuvat

20.60
evā hyasi vīrayurevā śūra uta sthiraḥ /
evā te rādhyaṃ manaḥ

evā rātistuvīmagha viśvebhirdhāyi dhātṛbhiḥ /
aghā cidindra me sacā

mo ṣu brahmeva tandrayurbhuvo vājānāṃ pate /
matsvā sutasya gomataḥ

evā hyasya sūnṛtā virapśī gomatī mahī /
pakvā śākhā na dāśuṣe

evā hi te vibhūtaya ūtaya indra māvate /
sadyaścitsanti dāśuṣe

evā hyasya kāmyā stoma ukthaṃ ca śaṃsyā /
indrāya somapītaye

20.61
taṃ te madaṃ gṛṇīmasi vṛṣaṇaṃ pṛtsu sāsahim /
u lokakṛtnumadrivo hariśriyam

yena jyotīmṣyāyave manave ca viveditha /
mandāno asya barhiṣo vi rājasi

tadadyā citta ukthino'nu ṣṭuvanti pūrvathā /
vṛṣapatnīrapo jayā divedive

taṃ vabhi pra gāyata puruhūtaṃ puruṣṭutam /
indraṃ gīrbhistaviṣamā vivāsata

yasya dvibarhaso bṛhatsaho dādhāra rodasī /
girīṃrajrāmapaḥ svarvṛṣatvanā

sa rājasi puruṣṭutameko vṛtrāṇi jighnase /
indra jaitrā śravasya ca yantave

20.62
vayamu tvāmapūrvya sthūraṃ na kaccidbharanto'vasyavaḥ /
vāje citraṃ havāmahe

upa tvā karmann ūtaye sa no yuvograścakrāma yo dhṛṣat/
tvāmiddhyavitāraṃ vavṛmahe sakhāya indra sānasim

yo na idamidaṃ purā pra vasya ānināya tamu va stuṣe /
sakhāya indramūtaye

haryaśvaṃ satpatiṃ carṣaṇīsahaṃ sa hi ṣmā yo amandata /
ā tu naḥ sa vayati gavyamaśvyaṃ stotṛbhyo maghavā śatam

indrāya sāma gāyata viprāya bṛhate bṛhat/
dharmakṛte vipaścite panasyave

tvamindrābhibhūrasi tvaṃ sūryamarocayaḥ /
viśvakarmā viśvadevo mahāmasi

vibhrājaṃ jyotiṣā svaragacho rocanaṃ divaḥ /
devāsta indra sakhyāya yemire

taṃ vabhi pra gāyata puruhūtaṃ puruṣṭutam /
indraṃ gīrbhistaviṣamā vivāsata

yasya dvibarhaso bṛhatsaho dādhāra rodasī /
girīṃrajrāmapaḥ svarvṛṣatvanā

sa rājasi puruṣṭutameko vṛtrāṇi jighnase /
indra jaitra śravasya ca yantave

20.63
imā nu kaṃ bhuvanā sīṣadhāmendraśca viśve ca devāḥ /
yajñaṃ ca nastanvaṃ ca prajāṃ cādityairindraḥ saha cīkḷpāti

ādityairindraḥ sagaṇo marudbhirasmākaṃ bhūtvavitā tanūnām /
hatvāya devā asurān yadāyan devā devatvamabhirakṣamāṇāḥ

pratyañcamarkamanayaṃ chacībhirāditsvadhāmiṣirāṃ paryapaśyan /
ayā vājaṃ devahitaṃ sanema madema śatahimāḥ suvīrāḥ

ya eka idvidayate vasu martāya dāśuṣe /
īśāno apratiṣkuta indro aṅga

kadā martamarādhasaṃ padā kṣumpamiva sphurat/
kadā naḥ śuśravadgira indro aṅga

yaściddhi tvā bahubhya ā sutāvāmāvivāsati /
ugraṃ tatpatyate śava indro aṅga

ya indra somapātamo madaḥ śaviṣṭha cetati /
yenā haṃsi nyattriṇaṃ tamīmahe

yenā daśagvamadhriguṃ vepayantaṃ svarṇaram /
yenā samudramāvithā tamīmahe

yena sindhuṃ mahīrapo rathāmiva pracodayaḥ /
panthāmṛtasya yātave tamīmahe

20.64
endra no gadhi priyaḥ satrājidagohyaḥ /
girirna viśvataspṛthuḥ patirdivaḥ

abhi hi satya somapā ubhe babhūtha rodasī /
indrāsi sunvato vṛdhaḥ patirdivaḥ

tvaṃ hi śaśvatīnāmindra dartā purāmasi /
hantā dasyormanorvṛdhaḥ patirdivaḥ

edu madhvo madintaraṃ siñca vādhvaryo andhasaḥ /
evā hi vīra stavate sadāvṛdhaḥ

indra sthātarharīṇāṃ nakiṣte pūrvyastutim /
udānaṃśa śavasā na bhandanā

taṃ vo vājānāṃ patimahūmahi śravasyavaḥ /
aprāyubhiryajñebhirvāvṛdhenyam

20.65
eto nvindraṃ stavāma sakhāya stomyaṃ naram /
kuṣṭīryo viśvā abhyastyeka it

agorudhāya gaviṣe dyukṣāya dasmyaṃ vacaḥ /
ghṛtātsvādīyo madhunaśca vocata

yasyāmitāni vīryā na rādhaḥ paryetave /
jyotirna viśvamabhyasti dakṣiṇā

20.66
stuhīndraṃ vyaśvavadanūrmiṃ vājinaṃ yamam /
aryo gayaṃ maṃhamānaṃ vi dāśuṣe

evā nūnamupa stuhi vaiyaśva daśamaṃ navam /
suvidvāṃsaṃ carkṛtyaṃ caraṇīnām

vetthā hi nirṛtīnāṃ vajrahasta parivṛjam /
aharahaḥ śundhyuḥ paripadāmiva

20.67
vanoti hi sunvan kṣayaṃ parīṇasaḥ sunvāno hi ṣmā yajatyava dviṣo devānāmava dviṣaḥ /
sunvāna itsiṣāsati sahasrā vājyavṛtaḥ /
sunvānāyendro dadātyābhuvaṃ rayiṃ dadātyābhuvam

mo ṣu vo asmadabhi tāni pauṃsyā sanā bhūvan dyumnāni mota jāriṣurasmatpurota jāriṣuḥ /
yadvaścitraṃ yugeyuge navyaṃ ghoṣādamartyam /
asmāsu tan maruto yacca duṣṭaraṃ didhṛtā yacca duṣṭaram

agniṃ hotāraṃ manye dāsvantaṃ vasuṃ sūnuṃ sahaso jātavedasaṃ vipraṃ na jātavedasam /
ya ūrdhvayā svadhvaro devo devācyā kṛpā /
ghṛtasya vibhrāṣṭimanu vaṣṭi śociṣājuhvānasya sarpiṣaḥ

yajñaiḥ saṃmiślāḥ pṛṣatībhirṛṣṭibhiryāmaṃ chubhrāso añjiṣu priyā uta /
āsadyā barhirbharatasya sūnavaḥ potrādā somaṃ pibatā divo naraḥ

ā vakṣi devāmiha vipra yakṣi cośan hotarni ṣadā yoniṣu triṣu /
prati vīhi prasthitaṃ somyaṃ madhu pibāgnīdhrāttava bhāgasya tṛsṇuhi

eṣa sya te tanvo nṛmṇavardhanaḥ saha ojaḥ pradivi bāhvorhitaḥ /
tubhyaṃ suto maghavan tubhyamābhṛtastvamasya brāhmaṇādā tṛpatpiba

yamu pūrvamahuve tamidaṃ huve sedu havyo dadiryo nāma patyate /
adhvaryubhiḥ prasthitaṃ somyaṃ madhu potrātsomaṃ draviṇodaḥ piba ṛtubhiḥ

20.68
surūpakṛtnumūtaye sudughāmiva goduhe /
juhūmasi dyavidyavi

upa naḥ savanā gahi somasya somapāḥ piba /
godā idrevato madaḥ

athā te antamānāṃ vidyāma sumatīnām /
mā no ati khya ā gahi

parehi vigramastṛtamindraṃ pṛchā vipaścitam /
yaste sakhibhya ā varam

uta bruvantu no nido niranyataścidārata /
dadhānā indra idduvaḥ

uta naḥ subhagāmarirvoceyurdasma kṛṣṭayaḥ /
syāmedindrasya śarmaṇi

emāśumāśave bhara yajñaśriyaṃ nṛmādanam /
patayan mandayatsakham

asya pītvā śatakrato ghano vṛtrāṇāmabhavaḥ /
prāvo vājeṣu vājinam

taṃ tvā vājeṣu vājinaṃ vājayāmaḥ śatakrato /
dhanānāmindra sātaye

yo rāyo'vanirmahāntsupāraḥ sunvataḥ sakhā /
tasmā indrāya gāyata

ā tvetā ni ṣīdatendramabhi pra gāyata /
sakhāya stomavāhasaḥ

purūtamaṃ purūṇāmīśānaṃ vāryāṇām /
indraṃ some sacā sute

20.69
sa ghā no yoga ā bhuvatsa rāye sa puraṃdhyām /
gamadvājebhirā sa naḥ

yasya saṃsthe na vṛṇvate harī samatsu śatravaḥ /
tasmā indrāya gāyata

sutapāvne sutā ime śucayo yanti vītaye /
somāso dadhyāśiraḥ

tvaṃ sutasya pītaye sadyo vṛddho ajāyathāḥ /
indra jyaiṣṭhyāya sukrato

ā tvā viśantvāśavaḥ somāsa indra girvaṇaḥ /
śaṃ te santu pracetase

tvāṃ stomā avīvṛdhan tvāmukthā śatakrato /
tvāṃ vardhantu no giraḥ

akṣitotiḥ sanedimaṃ vājamindraḥ sahasriṇam /
yasmin viśvāni pauṃsyā

mā no martā abhi druhan tanūnāmindra girvaṇaḥ /
īśāno yavayā vadham

yuñjanti bradhnamaruṣaṃ carantaṃ pari tasthuṣaḥ /
rocante rocanā divi

yuñjantyasya kāmyā harī vipakṣasā rathe /
śoṇā dhṛṣṇū nṛvāhasā

ketuṃ kṛṇvann aketave peśo maryā apeśase /
samuṣadbhirajāyathāḥ

ādaha svadhāmanu punargarbhatvamerire /
dadhānā nāma yajñiyam

20.70
vīlu cidārujatnubhirguhā cidindra vahnibhiḥ /
avinda usriyā anu

devayanto yathā matimachā vidadvasuṃ giraḥ /
mahāmanūṣata śrutam

indreṇa saṃ hi dṛkṣase saṃjagmāno abibhyuṣā /
mandū samānavarcasā

anavadyairabhidyubhirmakhaḥ sahasvadarcati /
gaṇairindrasya kāmyaiḥ

ataḥ parijmann ā gahi divo vā rocanādadhi /
samasminn ṛñjate giraḥ

ito vā sātimīmahe divo vā pārthivādadhi /
indraṃ maho vā rajasaḥ

indramidgathino bṛhadindramarkebhirarkiṇaḥ /
indraṃ vāṇīranūṣata

indra iddharyoḥ sacā saṃmiśla ā vacoyujā /
indro vajrī hiraṇyayaḥ

indro dīrghāya cakṣasa ā sūryaṃ rohayaddivi /
vi gobhirindramairayat

indra vājeṣu no'va sahasrapradhaneṣu ca /
ugra ugrābhirūtibhiḥ

indraṃ vayaṃ mahādhana indramarbhe havāmahe /
yujaṃ vṛtreṣu vajriṇam

sa no vṛṣann amuṃ caruṃ satrādāvann apā vṛdhi /
asmabhyamapratiṣkutaḥ

tuñjetuñje ya uttare stomā indrasya vajriṇaḥ /
na vindhe asya suṣṭutim

vṛṣā yūtheva vaṃsagaḥ kṛṣṭīriyartyojasā /
īśāno apratiṣkutaḥ

ya ekaścarṣaṇīnāṃ vasūnāmirajyati /
indraḥ pañca kṣitīnām

indraṃ vo viśvataspari havāmahe janebhyaḥ /
asmākamastu kevalaḥ

endra sānasiṃ rayiṃ sajitvānaṃ sadāsaham /
varṣiṣṭhamūtaye bhara

ni yena muṣṭihatyayā ni vṛtrā ruṇadhāmahai /
tvotāso nyarvatā

indra tvotāso ā vayaṃ vajraṃ ghanā dadīmahi /
jayema saṃ yudhi spṛdhaḥ

vayaṃ śūrebhirastṛbhirindra tvayā yujā vayam /
sāsahyāma pṛtanyataḥ

20.71
mahāmindraḥ paraśca nu mahitvamastu vajriṇe /
dyaurna prathinā śavaḥ

samohe vā ya āśata narastokasya sanitau /
viprāso vā dhiyāyavaḥ

yaḥ kukṣiḥ somapātamaḥ samudra iva pinvate /
urvīrāpo na kākudaḥ

evā hyasya sūnṛtā virapśī gomatī mahī /
pakvā śākhā na dāśuṣe

evā hi te vibhūtaya ūtaya indra māvate /
sadyaścitsanti dāśuṣe

evā hyasya kāmyā stoma ukthaṃ ca śaṃsyā /
indrāya somapītaye

indrehi matsyandhaso viśvebhiḥ somaparvabhiḥ /
mahāmabhiṣṭirojasā

emenaṃ sṛjatā sute mandimindrāya mandine /
cakriṃ viśvāni cakraye

matsvā suśipra mandibhi stomebhirviśvacarṣaṇe /
sacaiṣu savaneṣvā

asṛgramindra te giraḥ prati tvāmudahāsata /
ajoṣā vṛṣabhaṃ patim

saṃ codaya citramarvāgrādha indra vareṇyam /
asaditte vibhu prabhu

asmāntsu tatra codayendra rāye rabhasvataḥ /
tuvidyumna yaśasvataḥ

saṃ gomadindra vājavadasme pṛthu śravo bṛhat/
viśvāyurdhehyakṣitam

asme dhehi śravo bṛhaddyumnaṃ sahasrasātamam /
indra tā rathinīriṣaḥ

vasorindraṃ vasupatiṃ gīrbhirgṛṇanta ṛgmiyam /
homa gantāramūtaye

sutesute nyokase bṛhadbṛhata edariḥ /
indrāya śūṣamarcati

20.72
viśveṣu hi tvā savaneṣu tuñjate samānamekaṃ vṛṣamaṇyavaḥ pṛthaksvaḥ saniṣyavaḥ pṛthak/
taṃ tvā nāvaṃ na parṣaṇiṃ śūṣasya dhuri dhīmahi /
indraṃ na yajñaiścatayanta āyava stomebhirindramāyavaḥ

vi tvā tatasre mithunā avasyavo vrajasya sātā gavyasya niḥsṛjaḥ sakṣanta indra niḥsṛjaḥ /
yadgavyantā dvā janā svaryantā samūhasi /
āviṣkarikradvṛṣaṇaṃ sacābhuvaṃ vajramindra sacābhuvam

uto no asyā uṣaso juṣeta hyarkasya bodhi haviṣo havīmabhiḥ svarṣātā havīmabhiḥ /
yadindra hantave mṛgho vṛṣā vajriṃ ciketasi /
ā me asya vedhaso navīyaso manma śrudhi navīyasaḥ

20.73
tubhyedimā savanā śūra viśvā tubhyaṃ brahmāṇi vardhanā kṛṇomi /
tvaṃ nṛbhirhavyo viśvadhāsi

nū cin nu te manyamānasya dasmodaśnuvanti mahimānamugra /
na vīryamindra te na rādhaḥ

pra vo mahe mahivṛdhe bharadhvaṃ pracetase pra sumatiṃ kṛṇudhvam /
viśaḥ pūrvīḥ pra carā carṣaṇiprāḥ

yadā vajraṃ hiraṇyamidathā rathaṃ harī yamasya vahato vi sūribhiḥ /
ā tiṣṭhati maghavā sanaśruta indro vājasya dīrghaśravasaspatiḥ

so cin nu vṛṣṭiryūthyā svā sacāmindraḥ śmaśrūṇi haritābhi pruṣṇute /
ava veti sukṣayaṃ sute madhūdiddhūṇoti vāto yathā vanam

yo vācā vivāco mṛdhravācaḥ purū sahasrāśivā jaghāna /
tattadidasya pauṃsyaṃ gṛṇīmasi piteva yastaviṣīṃ vāvṛdhe śavaḥ

20.74
yacciddhi satya somapā anāśastā iva smasi /
ā tū na indra śaṃsaya goṣvaśveṣu śubhriṣu sahasreṣu tuvīmagha

śiprin vājānāṃ pate śacīvastava daṃsanā /
ā tū na indra śaṃsaya goṣvaśveṣu śubhriṣu sahasreṣu tuvīmagha

ni ṣvāpayā mithūdṛśā sastāmabudhyamāne /
ā tū na indra śaṃsaya goṣvaśveṣu śubhriṣu sahasreṣu tuvīmagha

sasantu tyā arātayo bodhantu śūra rātayaḥ /
ā tū na indra śaṃsaya goṣvaśveṣu śubhriṣu sahasreṣu tuvīmagha

samindra gardabhaṃ mṛṇa nuvantaṃ papayāmuyā /
ā tū na indra śaṃsaya goṣvaśveṣu śubhriṣu sahasreṣu tuvīmagha

patāti kuṇḍṛṇācyā dūraṃ vāto vanādadhi /
ā tū na indra śaṃsaya goṣvaśveṣu śubhriṣu sahasreṣu tuvīmagha

sarvaṃ parikrośaṃ jahi jambhayā kṛkadāśvam /
ā tū na indra śaṃsaya goṣvaśveṣu śubhriṣu sahasreṣu tuvīmagha

20.75
vi tvā tatasre mithunā avasyavo vrajasya sātā gavyasya niḥsṛjaḥ sakṣanta indra niḥsṛjaḥ /
yadgavyanta dvā janā svaryantā samūhasi /
āviṣkarikradvṛṣaṇaṃ sacābhuvaṃ vajramindra sacābhuvam

viduṣṭe asya vīryasya pūravaḥ puro yadindra śāradīravātiraḥ sāsahāno avātiraḥ /
śāsastamindra martyamayajuṃ śavasaspate /
mahīmamuṣṇāḥ pṛthivīmimā apo mandasāna imā apaḥ

āditte asya vīryasya carkiran madeṣu vṛṣann uśijo yadāvitha sakhīyato yadāvitha /
cakartha kāramebhyaḥ pṛtanāsu pravantave /
te anyāmanyāṃ nadyaṃ saniṣṇata śravasyantaḥ saniṣṇata

20.76
vane na vā yo nyadhāyi cākraṃ chucirvāṃ stomo bhuraṇāvajīgaḥ /
yasyedindraḥ purudineṣu hotā nṛṇāṃ narvo nṛtamaḥ kṣapāvān

pra te asyā uṣasaḥ prāparasyā nṛtau syāma nṛtamasya nṛṇām /
anu triśokaḥ śatamāvahan nṝn kutsena ratho yo asatsasavān

kaste mada indra rantyo bhūdduro giro abhyugro vi dhāva /
kadvāho arvāgupa mā manīṣā ā tvā śakyāmupamaṃ rādho annaiḥ

kadu dyumnamindra tvāvato nṝn kayā dhiyā karase kan na āgan /
mitro na satya urugāya bhṛtyā anne samasya yadasan manīṣāḥ

preraya sūro arthaṃ na pāraṃ ye asya kāmaṃ janidhā iva gman /
giraśca ye te tuvijāta pūrvīrnara indra pratiśikṣantyannaiḥ

mātre nu te sumite indra pūrvī dyaurmajmanā pṛthivī kāvyena /
varāya te ghṛtavantaḥ sutāsaḥ svādnan bhavantu pītaye madhūni

ā madhvo asmā asicann amatramindrāya pūrṇaṃ sa hi satyarādhāḥ /
sa vāvṛdhe varimann ā pṛthivyā abhi kratvā naryaḥ pauṃsyaiśca

vyānaḻ indraḥ pṛtanāḥ svojā āsmai yatante sakhyāya pūrvīḥ /
ā smā rathaṃ na pṛtanāsu tiṣṭha yaṃ bhadrayā sumatyā codayāse

20.77
ā satyo yātu maghavāmṛjīṣī dravantvasya haraya upa naḥ /
tasmā idandhaḥ suṣumā sudakṣamihābhipitvaṃ karate gṛṇānaḥ

ava sya śūrādhvano nānte'smin no adya savane mandadhyai /
śaṃsātyukthamuśaneva vedhāścikituṣe asuryāya manma

kavirna niṇyaṃ vidathāni sādhan vṛṣā yatsekaṃ vipipāno arcāt/
diva itthā jījanatsapta kārūn ahnā ciccakrurvayunā gṛṇantaḥ

svaryadvedi sudṛśīkamarkairmahi jyotī rurucuryaddha vastoḥ /
andhā tamāṃsi dudhitā vicakṣe nṛbhyaścakāra nṛtamo abhiṣṭau

vavakṣa indro amitamṛjiṣyubhe ā paprau rodasī mahitvā /
ataścidasya mahimā vi recyabhi yo viśvā bhuvanā babhūva

viśvāni śakro naryāṇi vidvān apo rireca sakhibhirnikāmaiḥ /
aśmānaṃ cidye bibhidurvacobhirvrajaṃ gomantamuśijo vi vavruḥ

apo vṛtraṃ vavrivāṃsaṃ parāhan prāvatte vajraṃ pṛthivī sacetāḥ /
prārṇāṃsi samudriyāṇyainoḥ patirbhavaṃ chavasā śūra dhṛṣṇo

apo yadadriṃ puruhūta dardarāvirbhuvatsaramā pūrvyaṃ te /
sa no netā vājamā darṣi bhūriṃ gotrā rujann aṅgirobhirgṛṇānaḥ

20.78
tadvo gāya sute sacā puruhūtāya satvane /
śaṃ yadgave na śākine

na ghā vasurni yamate dānaṃ vājasya gomataḥ /
yatsīmupa śravadgiraḥ

kuvitsasya pra hi vrajaṃ gomantaṃ dasyuhā gamat/
śacībhirapa no varat

20.79
indra kratuṃ na ā bhara pitā putrebhyo yathā /
śikṣā ṇo asmin puruhūta yāmani jīvā jyotiraśīmahi

mā no ajñātā vṛjanā durādhyo māśivāso ava kramuḥ /
tvayā vayaṃ pravataḥ śaśvatīrapo'ti śūra tarāmasi

20.80
indra jyeṣṭhaṃ na ā bharamojiṣṭhaṃ papuri śravaḥ /
yeneme citra vajrahasta rodasī obhe suśipra prāḥ

tvāmugramavase carṣaṇīsahaṃ rājan deveṣu hūmahe /
viśvā su no vithurā pibdanā vaso'mitrān suṣahān kṛdhi

20.81
yaddyāva indra te śataṃ śataṃ bhūmiruta syuḥ /
na tvā vajrintsahasraṃ sūryā anu na jātamaṣṭa rodasī

ā paprātha mahinā kṛṣṇyā vṛṣan viśvā śaviṣṭha śavasā /
asmāmava maghavan gomati vraje vajriṃ citrābhirūtibhiḥ

20.82
yadindra yāvatastvametāvadahamīśīya /
stotāramiddidhiṣeya radāvaso na pāpatvāya rāsīya

śikṣeyamin mahayate divedive rāya ā kuhacidvide /
nahi tvadanyan maghavan na āpyaṃ vasyo asti pitā cana

20.83
indra tridhātu śaraṇaṃ trivarūthaṃ svastimat/
chardiryaccha maghavadbhyaśca mahyaṃ ca yāvayā didyumebhyaḥ

ye gavyatā manasā śatrumādabhurabhipraghnanti dhṛṣṇuyā /
agha smā no maghavann indra girvaṇastanūpā antamo bhava

20.84
indrā yāhi citrabhāno sutā ime tvāyavaḥ /
aṇvībhistanā pūtāsaḥ

indrā yāhi dhiyeṣito viprajutaḥ sutāvataḥ /
upa brahmāṇi vāghataḥ

indrā yāhi tūtujāna upa brahmāṇi harivaḥ /
sute dadhiṣva naścanaḥ

20.85
mā cidanyadvi śaṃsata sakhāyo mā riṣaṇyata /
indramitstotā vṛṣaṇaṃ sacā sute muhurukthā ca śaṃsata

avakrakṣiṇaṃ vṛṣabhaṃ yathājuraṃ gāṃ na carṣaṇīsaham /
vidveṣaṇaṃ saṃvananobhayaṃkaraṃ maṃhiṣṭhamubhayāvinam

yacciddhi tvā janā ime nānā havanta ūtaye /
asmākaṃ brahmedamindra bhūtu te'hā viśvā ca vardhanam

vi tartūryante maghavan vipaścito'ryo vipo janānām /
upa kramasva pururūpamā bhara vājaṃ nediṣṭhamūtaye

20.86
brahmaṇā te brahmayujā yunajmi harī sakhāyā sadhamāda āśū /
sthiraṃ rathaṃ sukhamindrādhitiṣṭhan prajānan vidvāmupa yāhi somam

20.87
adhvaryavo'ruṇaṃ dugdhamaṃśuṃ juhotana vṛṣabhāya kṣitīnām /
gaurādvedīyāmavapānamindro viśvāhedyāti sutasomamicchan

yaddadhiṣe pradivi cārvannaṃ divedive pītimidasya vakṣi /
uta hṛdota manasā juṣāṇa uśann indra prasthitān pāhi somān

jajñānaḥ somaṃ sahase papātha pra te mātā mahimānamuvāca /
endra paprāthorvantarikṣaṃ yudhā devebhyo varivaścakartha

yadyodhayā mahato manyamānān sākṣāma tān bāhubhiḥ śāśadānān /
yadvā nṛbhirvṛta indrābhiyudhyāstaṃ tvayājiṃ sauśravasaṃ jayema

prendrasya vocaṃ prathamā kṛtāni pra nūtanā maghavā yā cakāra /
yadedadevīrasahiṣṭa māyā athābhavatkevalaḥ somo asya

tavedaṃ viśvamabhitaḥ paśavyaṃ yatpaśyasi cakṣasā sūryasya /
gavāmasi gopatireka indra bhakṣīmahi te prayatasya vasvaḥ

bṛhaspate yuvamindraśca vasvo divyasyeśāthe uta pārthivasya /
dhattaṃ rayiṃ stuvate kīraye cidyūyaṃ pāta svastibhiḥ sadā naḥ

20.88
yastastambha sahasā vi jmo antān bṛhaspatistriṣadhastho raveṇa /
taṃ pratnāsa ṛṣayo dīdhyānāḥ puro viprā dadhire mandrajihvam

dhunetayaḥ supraketaṃ madanto bṛhaspate abhi ye nastatasre /
pṛṣantaṃ sṛpramadabdhamūrvaṃ bṛhaspate rakṣatādasya yonim

bṛhaspate yā paramā parāvadata ā te ṛtaspṛśo ni ṣeduḥ /
tubhyaṃ khātā avatā adridugdhā madhva ścotantyabhito virapśam

bṛhaspatiḥ prathamaṃ jāyamāno maho jyotiṣaḥ parame vyoman /
saptāsyastuvijāto raveṇa vi saptaraśmiradhamattamāṃsi

sa suṣṭubhā sa ṛkvatā gaṇena valaṃ ruroja phaligaṃ raveṇa /
bṛhaspatirusriyā havyasūdaḥ kanikradadvāvaśatīrudājat

evā pitre viśvadevāya vṛṣṇe yajñairvidhema namasā havirbhiḥ /
bṛhaspate suprajā vīravanto vayaṃ syāma patayo rayīṇām

20.89
asteva su prataraṃ lāyamasyan bhūṣann iva pra bharā stomamasmai /
vācā viprāstarata vācamaryo ni rāmaya jaritaḥ soma indram

dohena gāmupa śikṣā sakhāyaṃ pra bodhaya jaritarjāramindram /
kośaṃ na pūrṇaṃ vasunā nyṛṣṭamā cyāvaya maghadeyāya śūram

kimaṅga tvā maghavan bhojamāhuḥ śiśīhi mā śiśayaṃ tvā śṛṇomi /
apnasvatī mama dhīrastu śakra vasuvidaṃ bhagamindrā bharā naḥ

tvāṃ janā mamasatyeṣvindra saṃtasthānā vi hvayante samīke /
atrā yujaṃ kṛṇute yo haviṣmān nāsunvatā sakhyaṃ vaṣṭi śūraḥ

dhanaṃ na spandraṃ bahulaṃ yo asmai tīvrāntsomāmāsunoti prayasvān /
tasmai śatrūntsutukān prātarahno ni svaṣṭrān yuvati hanti vṛtram

yasmin vayaṃ dadhimā śaṃsamindre yaḥ śiśrāya maghavā kāmamasme /
ārāccitsan bhayatāmasya śatrurnyasmai dyumnā janyā namantām

ārācchatrumapa bādhasva dūramugro yaḥ śambaḥ puruhūta tena /
asme dhehi yavamadgomadindra kṛdhī dhiyaṃ jaritre vājaratnām

pra yamantarvṛṣasavāso ajman tīvrāḥ somā bahulāntāsa indram /
nāha dāmānaṃ maghavā ni yaṃsan ni sunvate vahati bhūri vāmam

uta prahāmatidīvā jayati kṛtamiva śvaghnī vi cinoti kāle /
yo devakāmo na dhanaṃ ruṇaddhi samittaṃ rāyaḥ sṛjati svadhābhiḥ

gobhiṣṭaremāmatiṃ durevāṃ yavena vā kṣudhaṃ puruhūta viśve /
vayaṃ rājasu prathamā dhanānyariṣṭāso vṛjanībhirjayema

bṛhaspatirnaḥ pari pātu paścādutottarasmādadharādaghayoḥ /
indraḥ purastāduta madhyato naḥ sakhā sakhibhyo varīyaḥ kṛṇotu

20.90
yo adribhitprathamajā ṛtāvā bṛhaspatirāṅgiraso haviṣmān /
dvibarhajmā prāgharmasatpitā na ā rodasī vṛṣabho roravīti

janāya cidya īvate u lokaṃ bṛhaspatirdevahūtau cakāra /
ghnan vṛtrāṇi vi puro dardarīti jayaṃ chatrūṃramitrān pṛtsu sāhan

bṛhaspatiḥ samajayadvasūni maho vrajān gomate deva eṣaḥ /
apaḥ siṣāsantsvarapratīto bṛhaspatirhantyamitramarkaiḥ

20.91
imāṃ dhiyaṃ saptaśīrṣṇīṃ pitā na ṛtaprajātāṃ bṛhatīmavindat/
turīyaṃ svijjanayadviśvajanyo'yāsya ukthamindrāya śaṃsan

ṛtaṃ śaṃsanta ṛju dīdhyānā divasputrāso asurasya vīrāḥ /
vipraṃ padamaṅgiraso dadhānā yajñasya dhāma prathamaṃ mananta

haṃsairiva sakhibhirvāvadadbhiraśmanmayāni nahanā vyasyan /
bṛhaspatirabhikanikradadgā uta prāstauducca vidvāmagāyat

avo dvābhyāṃ para ekayā gā guhā tiṣṭhantīranṛtasya setau /
bṛhaspatistamasi jyotiricchan udusrā ākarvi hi tisra āvaḥ

vibhidyā puraṃ śayathemapācīṃ nistrīṇi sākamudadherakṛntat/
bṛhaspatiruṣasaṃ sūryaṃ gāmarkaṃ viveda stanayann iva dyauḥ

indro valaṃ rakṣitāraṃ dughānāṃ kareṇeva vi cakartā raveṇa /
svedāñjibhirāśiramicchamāno'rodayatpaṇimā gā amuṣṇāt

sa īṃ satyebhiḥ sakhibhiḥ śucadbhirgodhāyasaṃ vi dhanasairadardaḥ /
brahmaṇaspatirvṛṣabhirvarāhairgharmasvedebhirdraviṇaṃ vyānaṭ

te satyena manasā gopatiṃ gā iyānāsa iṣaṇayanta dhībhiḥ /
bṛhaspatirmithoavadyapebhirudusriyā asṛjata svayugbhiḥ

taṃ vardhayanto matibhiḥ śivābhiḥ siṃhamiva nānadataṃ sadhasthe /
bṛhaspatiṃ vṛṣaṇaṃ śūrasātau bharebhare anu madema jiṣṇum

yadā vājamasanadviśvarūpamā dyāmarukṣaduttarāṇi sadma /
bṛhaspatiṃ vṛṣaṇaṃ vardhayanto nānā santo bibhrato jyotirāsā

satyamāśiṣaṃ kṛṇutā vayodhai kīriṃ ciddhyavatha svebhirevaiḥ /
paścā mṛdho apa bhavantu viśvāstadrodasī śṛṇutaṃ viśvaminve

indro mahnā mahato arṇavasya vi mūrdhānamabhinadarbudasya /
ahann ahimariṇātsapta sindhūn devairdyāvāpṛthivī prāvataṃ naḥ

20.92
abhi pra gopatiṃ girendramarca yathā vide /
sūtuṃ satyasya satpatim

ā harayaḥ sasṛjrire'ruṣīradhi barhiṣi /
yatrābhi saṃnavāmahe

indrāya gāva āśiraṃ duduhre vajriṇe madhu /
yatsīmupahvare vidat

udyadbradhnasya viṣṭapaṃ gṛhamindraśca ganvahi /
madhvaḥ pītvā sacevahi triḥ sapta sakhyuḥ pade

arcata prārcata priyamedhāso arcata /
arcantu putrakā uta puraṃ na dhṛṣṇvarcata

ava svarāti gargaro godhā pari saniṣvaṇat/
piṅgā pari caniṣkadadindrāya brahmodyatam

ā yatpatantyenyaḥ sudughā anapasphuraḥ /
apasphuraṃ gṛbhāyata somamindrāya pātave

apādindro apādagnirviśve devā amatsata /
varuṇa idiha kṣayattamāpo abhyanūṣata vatsaṃ saṃśiśvarīriva

sudevo asi varuṇa yasya te sapta sindhavaḥ /
anukṣaranti kākudaṃ sūryaṃ suṣirāmiva

yo vyatīṃraphāṇayatsuyuktāmupa dāśuṣe /
takvo netā tadidvapurupamā yo amucyata

atīdu śakra ohata indro viśvā ati dviṣaḥ /
bhinatkanīna odanaṃ pacyamānaṃ paro girā

arbhako na kumārako'dhi tiṣṭhann avaṃ ratham /
sa pakṣan mahiṣaṃ mṛgaṃ pitre mātre vibhukratum

ā tū suśipra daṃpate rathaṃ tiṣṭhā hiraṇyayam /
adha dyukṣaṃ sacevahi sahasrapādamaruṣaṃ svastigāmanehasam

taṃ ghemitthā namasvina upa svarājamāsate /
arthaṃ cidasya sudhitaṃ yadetave āvartayanti dāvane

anu pratnasyaukasaḥ priyamedhāsa eṣām /
pūrvāmanu prayatiṃ vṛktabarhiṣo hitaprayasa āśata

yo rājā carṣaṇīnāṃ yātā rathebhiradhriguḥ /
viśvāsāṃ tarutā pṛtanānāṃ jyeṣṭho yo vṛtrahā gṛṇe

indraṃ taṃ śumbha puruhanmann avase yasya dvitā vidhartari /
hastāya vajraḥ prati dhāyi darśato maho dive na sūryaḥ

nakiṣṭaṃ karmaṇā naśadyaścakāra sadāvṛdham /
indraṃ na yajñairviśvagūrtamṛbhvasamadhṛṣṭaṃ dhṛṣṇvojasam

aṣālhamugraṃ pṛtanāsu sāsahiṃ yasmin mahīrurujrayaḥ /
saṃ dhenavo jāyamāne anonavurdyāvaḥ kṣāmo anonavuḥ

yaddyāva indra te śataṃ śataṃ bhūmīruta syuḥ /
na tvā vajrintsahasraṃ sūryā anu na jātamaṣṭa rodasī

ā paprātha mahinā vṛṣṇyā vṛṣan viśvā śaviṣṭha śavasā /
asmāmava maghavan gomati vraje vajriṃ citrābhirūtibhiḥ

20.93
uttvā mandantu stomāḥ kṛṇuṣva rādho adrivaḥ /
ava brahmadviṣo jahi

padā paṇīṃrarādhaso ni bādhasva mahāmasi /
nahi tvā kaścana prati

tvamīśiṣe sutānāmindra tvamasutānām /
tvaṃ rājā janānām

īṅkhayantīrapasyuva indraṃ jātamupāsate /
bhejānāsaḥ suvīryam

tvamindra balādadhi sahaso jāta ojasaḥ /
tvaṃ vṛṣan vṛṣedasi

tvamindrāsi vṛtrahā vyantarikṣamatiraḥ /
uddyāmastabhnā ojasā

tvamindra sajoṣasamarkaṃ bibharṣi bāhvoḥ /
vajraṃ śiśāna ojasā

tvamindrābhibhurasi viśvā jātānyojasā /
sa viśvā bhuva ābhavaḥ

20.94
ā yātvindraḥ svapatirmadāya yo dharmaṇā tūtujānastuviṣmān /
pratvakṣāṇo ati viśvā sahāṃsyapāreṇa mahatā vṛṣṇyena

suṣṭhāmā rathaḥ suyamā harī te mimyakṣa vajro nṛpate gabhastau /
śībhaṃ rājan supathā yāhyarvāṅvardhāma te papuso vṛṣṇyāni

endravāho nṛpatiṃ vajrabāhumugramugrāsastaviṣāsa enam /
pratvakṣasaṃ vṛṣabhaṃ satyaśuṣmamemasmatrā sadhamādo vahantu

evā patiṃ droṇasācaṃ sacetasamūrja skambhaṃ dharuṇa ā vṛṣāyase /
ojaḥ kṛṣva saṃ gṛbhāya tve apyaso yathā kenipānāmino vṛdhe

gamann asme vasūnyā hi śaṃsiṣaṃ svāśiṣaṃ bharamā yāhi sominaḥ /
tvamīśiṣe sāsminn ā satsi barhiṣyanādhṛṣyā tava pātrāṇi dharmaṇā

pṛthakprāyan prathamā devahūtayo'kṛṇvata śravasyāni duṣṭarā /
na ye śekuryajñiyāṃ nāvamāruhamirmaiva te nyaviśanta kepayaḥ

evaivāpāgapare santu dūdhyo'śvā yeṣāṃ duryuga āyuyujre /
itthā ye prāgupare santi dāvane purūṇi yatra vayunāni bhojanā

girīṃrajrān rejamānāmadhārayaddyauḥ krandadantarikṣāṇi kopayat/
samīcīne dhiṣaṇe vi ṣkabhāyati vṛṣṇaḥ pītvā mada ukthāni śaṃsati

imaṃ bibharmi sukṛtaṃ te aṅkuśaṃ yenārujāsi maghavaṃ chaphārujaḥ /
asmintsu te savane astvoktyaṃ suta iṣṭau maghavan bodhyābhagaḥ

gobhiṣṭaremāmatiṃ durevāṃ yavena kṣudhaṃ puruhūta viśvām /
vayaṃ rājabhiḥ prathamā dhanānyasmākena vṛjanenā jayema

bṛhaspatirnaḥ pari pātu paścādutottarasmādadharādaghayoḥ /
indraḥ purastāduta madhyato naḥ sakhā sakhibhyo varivaḥ kṛṇotu

20.95
trikadrukeṣu mahiṣo yavāśiraṃ tuviśuṣmastṛpatsomamapibadviṣṇunā sutaṃ yathāvaśat/
sa īṃ mamāda mahi karma kartave mahāmuruṃ sainaṃ saścaddevo devaṃ satyamindraṃ satya induḥ

pro ṣvasmai purorathamindrāya śūṣamarcata /
abhīke cidu lokakṛtsaṃge samatsu vṛtrahāsmākaṃ bodhi coditā nabhantāmanyakeṣāṃ jyākā adhi dhanvasu

tvaṃ sindhūṃravāsṛjo'dharāco ahann ahim /
aśatrurindra jajñiṣe viśvaṃ puṣyasi vāryaṃ taṃ tvā pari ṣvajāmahe nabhantāmanyakeṣāṃ jyākā adhi dhanvasu

vi ṣu viśvā arātayo'ryo naśanta no dhiyaḥ /
astāsi śatrave vadhaṃ yo na indra jighāṃsati yā te rātirdadirvasu /
nabhantāmanyakeṣāṃ jyakā adhi dhanvasu

20.96
tīvrasyābhivayaso asya pāhi sarvarathā vi harī iha muñca /
indra mā tvā yajamānāso anye ni rīraman tubhyamime sutāsaḥ

tubhyaṃ sutāstubhyamu sotvāsastvāṃ giraḥ śvātryā ā hvayanti /
indredamadya savanaṃ juṣāṇo viśvasya vidvāmiha pāhi somam

ya uśatā manasā somamasmai sarvahṛdā devakāmaḥ sunoti /
na gā indrastasya parā dadāti praśastamiccārumasmai kṛṇoti

anuspaṣṭo bhavatyeṣo asya yo asmai revān na sunoti somam /
niraratnau maghavā taṃ dadhāti brahmadviṣo hantyanānudiṣṭaḥ

aśvāyanto gavyanto vājayanto havāmahe tvopagantavā u /
ābhūṣantaste sumatau navāyāṃ vayamindra tvā śunaṃ huvema

muñcāmi tvā haviṣā jīvanāya kamajñātayakṣmāduta rājayakṣmāt/
grāhirjagrāha yadyetadtasyā indrāgnī pra mumuktamenam

yadi kṣitāyuryadi vā pareto yadi mṛtyorantikaṃ nīta eva /
tamā harāmi nirṛterupasthādaspārśamenaṃ śataśāradāya

sahasrākṣeṇa śatavīryeṇa śatāyuṣā haviṣāhārṣamenam /
indro yathainaṃ śarado nayātyati viśvasya duritasya pāram

śataṃ jīva śarado vardhamānaḥ śataṃ hemantān chatamu vasantān /
śataṃ ta indro agniḥ savitā bṛhaspatiḥ śatāyuṣā haviṣāhārṣamenam

āhārṣamavidaṃ tvā punarāgāḥ punarṇavaḥ /
sarvāṅga sarvaṃ te cakṣuḥ sarvamāyuśca te'vidam

brahmaṇāgniḥ samvidāno rakṣohā bādhatāmitaḥ /
amīvā yaste garbhaṃ durṇāmā yonimāśaye

yaste garbhamamīvā durṇāmā yonimāśaye /
agniṣṭaṃ brahmaṇā saha niṣkravyādamanīnaśat

yaste hanti patayantaṃ niṣatsnuṃ yaḥ sarīsṛpam /
jātaṃ yaste jighāṃsati tamito nāśayāmasi

yasta ūrū viharatyantarā dampatī śaye /
yoniṃ yo antarārelhi tamito nāśayāmasi

yastvā bhrātā patirbhūtvā jāro bhūtvā nipadyate /
prajāṃ yaste jighāṃsati tamito nāśayāmasi

yastvā svapnena tamasā mohayitvā nipadyate /
prajāṃ yaste jighāṃsati tamito nāśayāmasi

akṣībhyāṃ te nāsikābhyāṃ karṇābhyāṃ chubukādadhi /
yakṣmaṃ śīrṣaṇyaṃ mastiṣkājjihvāyā vi vṛhāmi te

grīvābhyasta uṣṇihābhyaḥ kīkasābhyo anūkyāt/
yakṣmaṃ doṣaṇyamaṃsābhyāṃ bāhubhyāṃ vi vṛhāmi te

hṛdayātte pari klomno halīkṣṇātpārśvābhyām /
yakṣmaṃ matasnābhyāṃ plīhno yaknaste vi vṛhāmasi

āntrebhyaste gudābhyo vaniṣṭhorudarādadhi /
yakṣmaṃ kukṣibhyāṃ plāśernābhyā vi vṛhāmi te

ūrubhyāṃ te aṣṭhīvadbhyāṃ pārṣṇibhyāṃ prapadābhyām /
yakṣmaṃ bhasadyaṃ śroṇibhyāṃ bhāsadaṃ bhāṃsaso vi vṛhāmi te

amehanādvanaṃkaraṇāllomabhyaste nakhebhyaḥ /
yakṣmaṃ sarvasmādātmanastamidaṃ vi vṛhāmi te

asthibhyaste majjabhyaḥ snāvabhyo dhamanibhyaḥ /
yakṣmaṃ pāṇibhyāmaṅgulibhyo nakhebhyo vi vṛhāmi te

aṅgeaṅge lomnilomni yaste parvaṇiparvaṇi /
yakṣmaṃ tvacasyaṃ te vayaṃ kaśyapasya vībarheṇa viṣvañcaṃ vi vṛhāmasi

apehi manasaspate'pa kāma paraścara /
paro nirṛtyā ā cakṣva bahudhā jīvato manaḥ

20.97
vayamenamidā hyopīpemeha vajriṇam /
tasmā u adya samanā sutaṃ bharā nūnaṃ bhūṣata śrute

vṛkaścidasya vāraṇa urāmathirā vayuneṣu bhūṣati /
semaṃ naḥ stomaṃ jujuṣāṇa ā gahīndra pra citrayā dhiyā

kadu nvasyākṛtamindrasyāsti pauṃsyam /
keno nu kaṃ śromatena na śuśruve januṣaḥ pari vṛtrahā

20.98
tvāmiddhi havāmahe sātā vājasya kāravaḥ /
tvāṃ vṛtreṣvindra satpatiṃ narastvāṃ kāṣṭhāsvarvataḥ

sa tvaṃ naścitra vajrahasta dhṛṣṇuyā maha stavāno adrivaḥ /
gāmaśvaṃ rathyamindra saṃ kira satrā vājaṃ na jigyuṣe

20.99
abhi tvā pūrvapītaya indra stomebhirāyavaḥ /
samīcīnāsa ṛbhavaḥ samasvaran rudrā gṛṇanta pūrvyam

asyedindro vāvṛdhe vṛṣṇyaṃ śavo made sutasya viṣṇavi /
adyā tamasya mahimānamāyavo'nu ṣṭuvanti pūrvathā

20.100
adhā hīndra girvaṇa upa tvā kāmān mahaḥ sasṛjmahe /
udeva yanta udabhiḥ

vārṇa tvā yavyābhirvardhanti śūra brahmāṇi /
vāvṛdhvāṃsaṃ cidadrivo divedive

yuñjanti harī iṣirasya gāthayorau ratha uruyuge /
indravāhā vacoyujā

20.101
agniṃ dūtaṃ vṛṇīmahe hotāraṃ viśvavedasam /
asya yajñasya sukratum

agnimagniṃ havīmabhiḥ sadā havanta viśpatim /
havyavāhaṃ purupriyam

agne devāmihā vaha jajñāno vṛktabarhiṣe /
asi hotā na īḍyaḥ

20.102
īlenyo namasyastirastamāṃsi darśataḥ /
samagniridhyate vṛṣā

vṛṣo agniḥ samidhyate'śvo na devavāhanaḥ /
taṃ haviṣmantaḥ īlate

vṛṣaṇaṃ tvā vayaṃ vṛṣan vṛṣaṇaḥ samidhīmahi /
agne dīdyataṃ bṛhat

20.103
agnimīliṣvāvase gāthābhiḥ śīraśociṣam /
agniṃ rāye purumīlha śrutaṃ naro'gniṃ sudītaye chardiḥ

agna ā yāhyagnibhirhotāraṃ tvā vṛṇīmahe /
ā tvāmanaktu prayatā haviṣmatī yajiṣṭhaṃ barhirāsade

accha hi tvā sahasaḥ sūno aṅgiraḥ srucaścarantyadhvare /
ūrjo napātaṃ ghṛtakeśamīmahe'gniṃ yajñeṣu pūrvyam

20.104
imā u tvā purūvaso giro vardhantu yā mama /
pāvakavarṇāḥ śucayo vipaścito'bhi stomairanūṣata

ayaṃ sahasramṛṣibhiḥ sahaskṛtaḥ samudra iva paprathe /
satyaḥ so asya mahimā gṛne śavo yajñeṣu viprarājye

ā no viśvāsu havya indraḥ samatsu bhūṣatu /
upa brahmāṇi savanāni vṛtrahā paramajyā ṛcīṣamaḥ

tvaṃ dātā prathamo rāghasāmasyasi satya īśānakṛt/
tuvidyumnasya yujyā vṛṇīmahe putrasya śavaso mahaḥ

20.105
tvamindra pratūrtiṣvabhi viśvā asi spṛdhaḥ /
aśastihā janitā viśvatūrasi tvaṃ tūrya taruṣyataḥ

anu te śuṣmaṃ turayantamīyatuḥ kṣoṇī śiśuṃ na mātarā /
viśvāste spṛdhaḥ śnathayanta manyave vṛtraṃ yadindra tūrvasi

ita ūtī vo ajaraṃ prahetāramaprahitam /
āśuṃ jetāraṃ hetāraṃ rathītamamatūrtaṃ tugryāvṛdham

yo rājā carṣaṇīnāṃ yātā rathebhiradhriguḥ /
viśvāsāṃ tarutā pṛtanānāṃ jyeṣṭho yo vṛtrahā gṛṇe

indraṃ taṃ śumbha puruhanmann avase yasya dvitā vidhartari /
hastāya vajraḥ prati dhāyi darśato maho dive na sūryaḥ

20.106
tava tyadindriyaṃ bṛhattava śuṣmamuta kratum /
vajraṃ śiśāti dhiṣaṇā vareṇyam

tava dyaurindra pauṃsyaṃ pṛthivī vardhati śravaḥ /
tvāmāpaḥ parvatāsaśca hinvire

tvāṃ viṣṇurbṛhan kṣayo mitro gṛṇāti varuṇaḥ /
tvāṃ śardho madatyanu mārutam

20.107
samasya manyave viśo viśvā namanta kuṣṭayaḥ /
samudrāyeva sindhavaḥ

ojastadasya titviṣa ubhe yatsamavartayat/
indraścarmeva rodasī

vi cidvṛtrasya dodhato vajreṇa śataparvaṇā /
śiro bibhedvṛṣṇinā

tadidāsa bhuvaneṣu jyeṣṭhaṃ yato jajña ugrastveṣanṛmṇaḥ /
sadyo jajñāno ni riṇāti śatrūn anu yadenaṃ madanti viśva ūmāḥ

vāvṛdhānaḥ śavasā bhūryojāḥ śatrurdāsāya bhiyasaṃ dadhāti /
avyanacca vyanacca sasni saṃ te navanta prabhṛtā madeṣu

tve kratumapi pṛñcanti bhūri dviryadete trirbhavantyūmāḥ /
svādoḥ svādīyaḥ svādunā sṛjā samadaḥ su madhu madhunābhi yodhīḥ

yadi cin nu tvā dhanā jayantaṃ raṇeraṇe anumadanti viprāḥ /
ojīyaḥ śuṣmintsthiramā tanuṣva mā tvā dabhan durevāsaḥ kaśokāḥ

tvayā vayaṃ śāśadmahe raṇeṣu prapaśyanto yudhenyāni bhūri /
codayāmi ta āyudhā vacobhiḥ saṃ te śiśāmi brahmaṇā vayāṃsi

ni taddadhiṣe'vare pare ca yasminn āvithāvasā duroṇe /
ā sthāpayata mātaraṃ jigatnumata invata karvarāṇi bhūri

stuṣva varṣman puruvartmānaṃ samṛbhvāṇaminatamamāptamāptyānām /
ā darśati śavasā bhūryojāḥ pra sakṣati pratimānaṃ pṛthivyāḥ

imā brahma bṛhaddivaḥ kṛṇavadindrāya śūṣamagniyaḥ svarṣāḥ /
maho gotrasya kṣayati svarājā turaścidviśvamarṇavattapasvān

evā mahān bṛhaddivo atharvāvocatsvāṃ tanvamindrameva /
svasārau mātaribhvarī aripre hinvanti caine śavasā vardhayanti ca

citraṃ devānāṃ keturanīkaṃ jyotiṣmān pradiśaḥ sūrya udyan /
divākaro'ti dyumnaistamāṃsi viśvātārīdduritāni śukraḥ

citraṃ devānāmudagādanīkaṃ cakṣurmitrasya varuṇasyāgneḥ /
āprāddyāvāpṛthivī antarikṣaṃ sūrya ātmā jagatastasthuṣaśca

sūryo devīmuṣasaṃ rocamānāṃ maryo na yoṣāmabhyeti paścāt/
yatrā naro devayanto yugāni vitanvate prati bhadrāya bhadram

20.108
tvaṃ na indrā bharamojo nṛmṇaṃ śatakrato vicarṣaṇe /
ā vīraṃ pṛtanāṣaham

tvaṃ hi naḥ pitā vaso tvaṃ mātā śatakrato babhūvitha /
adhā te sumnamīmahe

tvāṃ śuṣmin puruhūta vājayantamupa bruve śatakrato /
sa no rāsva suvīryam

20.109
svādoritthā viṣuvato madhvaḥ pibanti gauryaḥ /
yā indreṇa sayāvarīrvṛṣṇā madanti śobhase vasvīranu svarājyam

tā asya pṛśanāyuvaḥ somaṃ śrīṇanti pṛśnayaḥ /
priyā indrasya dhenavo vajraṃ hinvanti sāyakaṃ vasvīranu svarājyam

tā asya namasā sahaḥ saparyanti pracetasaḥ /
vratānyasya saścire purūṇi pūrvacittaye vasvīranu svarājyam

20.110
indrāya madūne sutaṃ pari ṣṭobhantu no giraḥ /
arkamarcantu kāravaḥ

yasmin viśvā adhi śriyo raṇanti sapta saṃsadaḥ /
indraṃ sute havāmahe

trikadrukeṣu cetanaṃ devāso yajñamatnata /
tamidvardhantu no giraḥ

20.111
yatsomamindra viṣṇavi yadvā gha trita āptye /
yadvā marutsu mandase samindubhiḥ

yadvā śakra parāvati samudre adhi mandase /
asmākamitsute raṇā samindubhiḥ

yadvāsi sunvato vṛdho yajamānasya satpate /
ukthe vā yasya raṇyasi samindubhiḥ

20.112
yadadya kacca vṛtrahann udagā abhi sūrya /
sarvaṃ tadindra te vaśe

yadvā pravṛddha satpate na marā iti manyase /
uto tatsatyamittava

ye somāsaḥ parāvati ye arvāvati sunvire /
sarvāṃstāmindra gacchasi

20.113
ubhayaṃ śṛṇavacca na indro arvāgidaṃ vacaḥ /
satrācyā maghavā somapītaye dhiyā śaviṣṭha ā gamat

taṃ hi svarājaṃ vṛṣabhaṃ tamojase dhiṣaṇe niṣṭatakṣatuḥ /
utopamānāṃ prathamo ni ṣīdasi somakāmaṃ hi te manaḥ

20.114
abhrātṛvyo'nā tvamanāpirindra januṣā sanādasi /
yudhedāpitvamicchase

nakī revantaṃ sakhyāya vindase pīyanti te surāśvaḥ /
yadā kṛṇoṣi nadanuṃ samūhasyāditpiteva hūyase

20.115
ahamiddhi pituṣpari medhāmṛtasya jagrabha /
ahaṃ sūrya ivājani

ahaṃ pratnena manmanā giraḥ śumbhāmi kaṇvavat/
yenendraḥ śuṣmamiddadhe

ye tvāmindra na tuṣṭuvurṛṣayo ye ca tuṣṭuvuḥ /
mamedvardhasva suṣṭutaḥ

20.116
mā bhūma niṣṭyā ivendra tvadaraṇā iva /
vanāni ni prajahitānyadrivo duroṣāso amanmahi

amanmahīdanāśavo'nugrāsaśca vṛtrahan /
sukṛtsu te mahatā śūra rādhasānu stomaṃ mudīmahi

20.117
pibā somamindra mandatu tvā yaṃ te suṣāva haryaśvādriḥ /
soturbāhubhyāṃ suyato nārvā

yaste mado yujascārurasti yena vṛtrāṇi haryaśva haṃsi /
sa tvāmindra prabhūvaso mamattu

bodhā su me maghavan vācamemāṃ yāṃ te vasiṣṭho arcati praśastim /
imā brahma sadhamāde juṣasva

20.118
śagdhyū ṣu śacīpata indra viśvābhirūtibhiḥ /
bhagaṃ na hi tvā yaśasaṃ vasuvidamanu śūra carāmasi

pauro aśvasya purukṛdgavāmasyutso deva hiraṇyayaḥ /
nakirhi dānaṃ parimardhiṣattve yadyadyāmi tadā bhara

indramiddevatātaye indraṃ prayatyadhvare /
indraṃ samīke vanino havāmaha indraṃ dhanasya sātaye

indro mahnā rodasī paprathacchava indraḥ sūryamarocayat/
indre ha viśvā bhuvanāni yemira indre suvānāsa indavaḥ

20.119
astāvi manma pūrvyaṃ brahmendrāya vocata /
pūrvīrṛtasya bṛhatīranūṣata stoturmeghā asṛkṣata

turaṇyavo madhumantaṃ ghṛtaścutaṃ viprāso arkamānṛcuḥ /
asme rayiḥ paprathe vṛṣṇyaṃ śavo'sme suvānāsa indavaḥ

20.120
yadindra prāgapāgudaṅnyagvā hūyase nṛbhiḥ /
simā purū nṛṣūto asyānave'si praśardha turvaśe

yadvā rume ruśame śyāvake kṛpa indra mādayase sacā /
kaṇvāsastvā brahmabhi stomavāhasa indrā yacchantyā gahi

20.121
abhi tvā śūra nonumo'dugdhā iva dhenavaḥ /
īśānamasya jagataḥ svardṛśamīśānamindra tasthuṣaḥ

na tvāvāmanyo divyo na pārthivo na jāto na janiṣyate /
aśvāyanto maghavann indra vājino gavyantastvā havāmahe

20.122
revatīrnaḥ sadhamāda indre santu tuvivājāḥ /
kṣumanto yābhirmadema

ā gha tvāvān tmanāpta stotṛbhyo dhṛṣṇaviyānaḥ /
ṛṇorakṣaṃ na cakrayoḥ

ā yadduvaḥ śatakratavā kāmaṃ jaritṝṇām /
ṛṇorakṣaṃ na śacībhiḥ

20.123
tatsūryasya devatvaṃ tan mahitvaṃ madhyā kartorvitataṃ saṃ jabhāra /
yadedayukta haritaḥ sadhasthādādrātrī vāsastanute simasmai

tan mitrasya varuṇasyābhicakṣe sūryo rūpaṃ kṛṇute dyorupasthe /
anantamanyadruśadasya prājaḥ kṛṣṇamanyaddharitaḥ saṃ bharanti

20.124
kayā naścitra ā bhuvadūtī sadāvṛdhaḥ sakhā /
kayā śaciṣṭhayā vṛtā

kastvā satyo madānāṃ maṃhiṣṭho matsadandhasaḥ /
dṛlhā cidāruje vasu

abhī ṣu naḥ sakhīnāmavitā jaritṝṇām /
śataṃ bhavāsyūtibhiḥ

imā nu kaṃ bhuvanā sīṣadhāmendraśca viśve ca devāḥ /
yajñaṃ ca nastanvaṃ ca prajāṃ cādityairindraḥ saha cīkḷpāti

ādityairindraḥ sagaṇo marudbhirasmākaṃ bhūtvavitā tanūnām /
hatvāya devā asurān yadāyan devā devatvamabhirakṣamāṇāḥ

pratyañcamarkamanayaṃ chacībhirāditsvadhāmiṣirāṃ paryapaśyan /
ayā vājaṃ devahitaṃ sanema madema śatahimāḥ suvīrāḥ

20.125
apendra prāco maghavann amitrān apāpāco abhibhūte nudasva /
apodīco apa śūrādharāca urau yathā tava śarman madema

kuvidaṅga yavamanto yavaṃ cidyathā dāntyanupūrvaṃ viyūya /
ihehaiṣāṃ kṛṇuhi bhojanāni ye barhiṣo namovṛktiṃ na jagmuḥ

nahi sthūryṛtuthā yātamasti nota śravo vivide saṃgameṣu /
gavyanta indraṃ sakhyāya viprā aśvāyanto vṛṣaṇaṃ vājayantaḥ

yuvaṃ surāmamaśvinā namucāvāsure sacā /
vipipānā śubhaspatī indraṃ karmasvāvatam

putramiva pitarāvaśvinobhendrāvathuḥ kāvyairdaṃsanābhiḥ /
yatsurāmaṃ vyapibaḥ śacībhiḥ sarasvatī tvā maghavann abhiṣṇak

indraḥ sutrāmā svavāmavobhiḥ sumṛḍīko bhavatu viśvavedāḥ /
bādhatāṃ dveṣo abhayaṃ naḥ kṛṇotu suvīryasya patayaḥ syāma

sa sutrāmā svavāmindro asmadārācciddveṣaḥ sanutaryuyotu /
tasya vayaṃ sumatau yajñiyasyāpi bhadre saumanase syāma

20.126
vi hi sotorasṛkṣata nendraṃ devamamaṃsata /
yatrāmadadvṛṣākapiraryaḥ puṣṭeṣu matsakhā viśvasmādindra uttaraḥ

parā hīndra dhāvasi vṛṣākaperati vyathiḥ /
no aha pra vindasyanyatra somapītaye viśvasmādindra uttaraḥ

kimayaṃ tvāṃ vṛṣākapiścakāra harito mṛgaḥ /
yasmā irasyasīdu nvaryo vā puṣṭimadvasu viśvasmādindra uttaraḥ

yamimaṃ tvaṃ vṛṣākapiṃ priyamindrābhirakṣasi /
śvā nvasya jambhiṣadapi karṇe varāhayurviśvasmādindra uttaraḥ

priyā taṣṭāni me kapirvyaktā vyadūduṣat/
śiro nvasya rāviṣaṃ na sugaṃ duṣkṛte bhuvaṃ viśvasmādindra uttaraḥ

na matstrī subhasattarā na suyāśutarā bhuvat/
na matpraticyavīyasī na sakthyudyamīyasī viśvasmādindra uttaraḥ

uve amba sulābhike yathevāṅgaṃ bhaviṣyati /
bhasan me amba sakthi me śiro me vīva hṛṣyati viśvasmādindra uttaraḥ

kiṃ subāho svaṅgure pṛthuṣṭo pṛthujāghane /
kiṃ śūrapatni nastvamabhyamīṣi vṛṣākapiṃ viśvasmādindra uttaraḥ

avīrāmiva māmayaṃ śarārurabhi manyate /
utāhamasmi vīriṇīndrapatnī marutsakhā viśvasmādindra uttaraḥ

saṃhotraṃ sma purā nārī samanaṃ vāva gacchati /
vedhā ṛtasya vīriṇīndrapatnī mahīyate viśvasmādindra uttaraḥ

indrāṇīmāsu nāriṣu subhagāmahamaśravam /
nahyasyā aparaṃ cana jarasā marate patirviśvasmādindra uttaraḥ

nāhamindrāṇi rāraṇa sakhyurvṛṣākaperṛte /
yasyedamapyaṃ haviḥ priyaṃ deveṣu gacchati viśvasmādindra uttaraḥ

vṛṣākapāyi revati suputra ādu susnuṣe /
ghasatta indra ukṣaṇaḥ priyaṃ kācitkaraṃ havirviśvasmādindra uttaraḥ

ukṣṇo hi me pañcadaśa sākaṃ pacanti viṃsatim /
utāhamadmi pīva idubhā kukṣī pṛṇanti me viśvasmādindra uttaraḥ

vṛṣabho na tigmaśṛṅgo'ntaryūtheṣu roruvat/
manthasta indra śaṃ hṛde yaṃ te sunoti bhāvayurviśvasmādindra uttaraḥ

na seśe yasya rambate'ntarā sakthyā kapṛt/
sedīśe yasya romaśaṃ niṣeduṣo vijṛmbhate viśvasmādindra uttaraḥ

na seśe yasya romaśaṃ niṣeduṣo vijṛmbhate /
sedīśe yasya rambate'ntarā sakthyā kapṛtviśvasmādindra uttaraḥ

ayamindra vṛṣākapiḥ parasvantaṃ hataṃ vidat/
asiṃ sūnāṃ navaṃ carumādedhasyāna ācitaṃ viśvasmādindra uttaraḥ

ayamemi vicākaśadvicinvan dāsamāryam /
pibāmi pākasutvano'bhi dhīramacākaśaṃ viśvasmādindra uttaraḥ

dhanva ca yatkṛntatraṃ ca kati svittā vi yojanā /
nedīyaso vṛṣākape'stamehi gṛhāmupa viśvasmādindra uttaraḥ

punarehi vṛṣākape suvitā kalpayāvahai /
ya eṣa svapnanaṃśano'stameṣi pathā punarviśvasmādindra uttaraḥ

yadudañco vṛṣākape gṛhamindrājagantana /
kva sya pulvagho mṛgaḥ kamagaṃ janayopano viśvasmādindra uttaraḥ

parśurha nāma mānavī sākaṃ sasūva viṃśatim /
bhadraṃ bhala tyasyā abhūdyasyā udaramāmayadviśvasmādindra uttaraḥ

20.127
idaṃ janā upa śruta narāśaṃsa staviṣyate /
ṣaṣṭiṃ sahasrā navatiṃ ca kaurama ā ruśameṣu dadmahe

uṣṭrā yasya pravāhaṇo vadhūmanto dvirdaśa /
varṣmā rathasya ni jihīḍate diva īṣamāṇā upaspṛśaḥ

eṣa iṣāya māmahe śataṃ niṣkān daśa srajaḥ /
trīṇi śatānyarvatāṃ sahasrā daśa gonām

vacyasva rebha vacyasva vṛkṣe na pakve śakunaḥ /
naṣṭe jihvā carcarīti kṣuro na bhurijoriva

pra rebhāso manīṣā vṛṣā gāva iverate /
amotaputrakā eṣāmamota gā ivāsate

pra rebha dhīṃ bharasva govidaṃ vasuvidam /
devatremāṃ vācaṃ srīṇīhīṣurnāvīrastāram

rājño viśvajanīnasya yo devomartyāmati /
vaiśvānarasya suṣṭutimā sunotā parikṣitaḥ

parichinnaḥ kṣemamakarottama āsanamācaran /
kulāyan kṛṇvan kauravyaḥ patirvadati jāyayā

kataratta ā harāṇi dadhi manthāṃ pari śrutam /
jāyāḥ patiṃ vi pṛcchati rāṣṭre rājñaḥ parikṣitaḥ

abhīvasvaḥ pra jihīte yavaḥ pakvaḥ patho bilam /
janaḥ sa bhadramedhati rāṣṭre rājñaḥ parikṣitaḥ

indraḥ kārumabūbudhaduttiṣṭha vi carā janam /
mamedugrasya carkṛdhi sarva itte pṛṇādariḥ

iha gāvaḥ pra jāyadhvamihāśvā iha pūruṣāḥ /
iho sahasradakṣiṇopi pūṣā ni ṣīdati

nemā indra gāvo riṣan mo āsāṃ gopa rīriṣat/
māsāmamitrayurjana indra mā stena īśata

upa no na ramasi sūktena vacasā vayaṃ bhadreṇa vacasā vayam /
vanādadhidhvano giro na riṣyema kadā cana

20.128
yaḥ sabheyo vidathyaḥ sutvā yajvātha pūruṣaḥ /
sūryaṃ cāmū riśādasastaddevāḥ prāgakalpayan

yo jāmyā aprathayastadyatsakhāyaṃ dudhūrṣati /
jyeṣṭho yadapracetāstadāhuradharāgiti

yadbhadrasya puruṣasya putro bhavati dādhṛṣiḥ /
tadvipro abravīdu tadgandharvaḥ kāmyaṃ vacaḥ

yaśca paṇi raghujiṣṭhyo yaśca devāmadāśuriḥ /
dhīrāṇāṃ śaśvatāmahaṃ tadapāgiti śuśruma

ye ca devā ayajantātho ye ca parādadiḥ /
sūryo divamiva gatvāya maghavā no vi rapśate

yo'nāktākṣo anabhyakto amaṇivo ahiraṇyavaḥ /
abrahmā brahmaṇaḥ putrastotā kalpeṣu saṃmitā

ya āktākṣaḥ subhyaktaḥ sumaṇiḥ suhiraṇyavaḥ /
subrahmā brahmaṇaḥ putrastotā kalpeṣu saṃmitā

prapāṇā ca veśantā revāmapratidiśyayaḥ /
ayabhyā kanyā kalyāṇī totā kalpeṣu saṃmitā

suprapāṇā ca veśantā revāntsupratidiśyayaḥ /
suyabhyā kanyā kalyāṇī totā kalpeṣu saṃmitā

parivṛktā ca mahiṣī svastyā ca yudhiṃ gamaḥ /
anāśuraścāyāmī totā kalpeṣu saṃmitā

vāvātā ca mahiṣī svastyā ca yudhiṃ gamaḥ /
śvāśuraścāyāmī totā kalpeṣu saṃmitā

yadindrādo dāśarājñe mānuṣaṃ vi gāhathāḥ /
virūpaḥ sarvasmā āsītsaha yakṣāya kalpate

tvaṃ vṛṣākṣuṃ maghavann amraṃ maryākaro raviḥ /
tvaṃ rauhiṇaṃ vyāsyo vi vṛtrasyābhinacchiraḥ

yaḥ parvatān vyadadhādyo apo vyagāhathāḥ /
indro yo vṛtrahānmahaṃ tasmādindra namo'stu te

pṛṣṭhaṃ dhāvantaṃ haryorauccaiḥ śravasamabruvan /
svastyaśva jaitrāyendramā vaha susrajam

ye tvā śvetā ajaiśravaso hāryo yuñjanti dakṣiṇam /
pūrvā namasya devānāṃ bibhradindra mahīyate

20.129
etā aśvā ā plavante

pratīpaṃ prāti sutvanam

tāsāmekā hariknikā

hariknike kimichāsi

sādhuṃ putraṃ hiraṇyayam

kvāhataṃ parāsyaḥ

yatrāmūstisraḥ śiṃśapāḥ

pari trayaḥ

pṛdākavaḥ

śṛṅgaṃ dhamanta āsate

ayanmahā te arvāhaḥ

sa icchakaṃ saghāghate

saghāghate gomīdyā gogatīriti

pumāṃ kuste nimicchasi

palpa baddha vayo iti

baddha vo aghā iti

ajāgāra kevikā

aśvasya vāro gośapadyake

śyenīpatī sā

anāmayopajihvikā

20.130
ko arya bahulimā iṣūni

ko asidyāḥ payaḥ

ko arjunyāḥ payaḥ

kaḥ kārṣṇyāḥ payaḥ

etaṃ pṛccha kuhaṃ pṛccha

kuhākaṃ pakvakaṃ pṛccha

yavāno yatiṣvabhiḥ kubhiḥ

akupyantaḥ kupāyakuḥ

āmaṇako maṇatsakaḥ

deva tvapratisūrya

enaścipaṅktikā haviḥ

pradudrudo maghāprati

śṛṅga utpanna

mā tvābhi sakhā no vidan

vaśāyāḥ putramā yanti

irāvedumayaṃ data

atho iyanniyann iti

atho iyanniti

atho śvā asthiro bhavan

uyaṃ yakāṃśalokakā

20.131
āminoniti bhadyate

tasya anu nibhañjanam

varuṇo yāti vasvabhiḥ

śataṃ vā bhāratī śavaḥ

śatamāśvā hiraṇyayāḥ /
śataṃ rathyā hiraṇyayāḥ /
śataṃ kuthā hiraṇyayāḥ /
ahula kuśa varttaka

śaphena iva ohate

āya vanenatī janī

vaniṣṭhā nāva gṛhyanti

idaṃ mahyaṃ madūriti

te vṛkṣāḥ saha tiṣṭhati

pāka baliḥ

śaka baliḥ

aśvattha khadiro dhavaḥ

araduparama

śayo hata iva

vyāpa pūruṣaḥ

adūhamityāṃ pūṣakam

atyardharca parasvataḥ

dauva hastino dṛtī

20.132
ādalābukamekakam

alābukaṃ nikhātakam

karkariko nikhātakaḥ

tadvāta unmathāyati

kulāyaṃ kṛṇavāditi

ugraṃ vaniṣadātatam

na vaniṣadanātatam

ka eṣāṃ karkarī likhat

ka eṣāṃ dundubhiṃ hanat

yadīyaṃ hanatkathaṃ hanat

devī hanatkuhanat

paryāgāraṃ punaḥpunaḥ

trīṇyuṣṭrasya nāmāni

hiraṇya ityeke abravīt

dvau vā ye śiśavaḥ

nīlaśikhaṇḍavāhanaḥ

20.133
vitatau kiraṇau dvau tāvā pinaṣṭi pūruṣaḥ /
na vai kumāri tattathā yathā kumāri manyase

mātuṣṭe kiraṇau dvau nivṛttaḥ puruṣānṛte /
na vai kumāri tattathā yathā kumāri manyase

nigṛhya karṇakau dvau nirāyacchasi madhyame /
na vai kumāri tattathā yathā kumāri manyase

uttānāyai śayānāyai tiṣṭhantī vāva gūhasi /
na vai kumāri tattathā yathā kumāri manyase

ślakṣṇāyāṃ ślakṣṇikāyāṃ ślakṣṇamevāva gūhasi /
na vai kumāri tattathā yathā kumāri manyase

avaślakṣṇamiva bhraṃśadantarlomamati hrade /
na vai kumāri tattathā yathā kumāri manyase

20.134
ihettha prāgapāgudagadharāgarālāgudabhartsatha

ihettha prāgapāgudagadharāgvatsāḥ puruṣanta āsate

ihettha prāgapāgudagadharāksthālīpāko vi līyate

ihettha prāgapāgudagadharāksa vai pṛthu līyate

ihettha prāgapāgudagadharāgāste lāhaṇi līśāthī

ihettha prāgapāgudagadharāgakṣlilī puchilīyate

20.135
bhugityabhigataḥ śalityapakrāntaḥ phalityabhiṣṭhitaḥ /
dundubhimāhananābhyāṃ jaritarothāmo daiva

kośabile rajani grantherdhānamupānahi pādam /
uttamāṃ janimāṃ janyānuttamāṃ janīn vartmanyāt

alābūni pṛṣātakānyaśvatthapalāśam /
pipīlikāvataśvaso vidyutsvāparṇaśapho gośapho jaritarothāmo daiva

vīme devā akraṃsatādhvaryo kṣipraṃ pracara /
susatyamidgavāmasyasi prakhudasi

patnī yadṛśyate patnī yakṣyamāṇā jaritarothāmo daiva /
hotā viṣṭīmena jaritarothāmo daiva

ādityā ha jaritaraṅgirobhyo dakṣiṇāmanayan /
tāṃ ha jaritaḥ pratyāyaṃstāmu ha jaritaḥ pratyāyan

tāṃ ha jaritarnaḥ pratyagṛbhṇaṃstāmu ha jaritarnaḥ pratyagṛbhṇaḥ /
ahānetarasaṃ na vi cetanāni yajñān etarasaṃ na purogavāmaḥ

uta śveta āśupatvā uto padyābhiryaviṣṭhaḥ /
utemāśu mānaṃ piparti

ādityā rudrā vasavastvenu ta idaṃ rādhaḥ prati gṛbhṇīhyaṅgiraḥ /
idaṃ rādho vibhu prabhu idaṃ rādho bṛhatpṛthu

० devā dadatvāsuraṃ tadvo astu sucetanam /
yuṣmāmastu divedive pratyeva gṛbhāyat

tvamindra śarmariṇā havyaṃ pārāvatebhyaḥ /
viprāya stuvate vasuvaniṃ duraśravase vaha

tvamindra kapotāya chinnapakṣāya vañcate /
śyāmākaṃ pakvaṃ pīlu ca vārasmā akṛṇorbahuḥ

araṃgaro vāvadīti tredhā baddho varatrayā /
irāmaha praśaṃsatyanirāmapa sedhati

20.136
yadasyā aṃhubhedyāḥ kṛdhu sthūlamupātasat/
muṣkāvidasyā ejato gośaphe śakulāviva

yadā sthūlena pasasāṇau muṣkā upāvadhīt/
viṣvañcā vasyā vardhataḥ sikatāsveva gardabhau

yadalpikāsvalpikā karkadhūkevaṣadyate /
vāsantikamiva tejanaṃ yantyavātāya vitpati

yaddevāso lalāmaguṃ praviṣṭīminamāviṣuḥ /
sakulā dediśyate nārī satyasyākṣibhuvo yathā

mahānagnyatṛpnadvi mokradadasthānāsaran /
śaktikānanā svacamaśakaṃ saktu padyama

mahānagnyulūkhalamatikrāmantyabravīt/
yathā tava vanaspate niraghnanti tathaiveti

mahānagnyupa brūte bhraṣṭothāpyabhūbhuvaḥ /
yathaiva te vanaspate pippati tathaiveti

mahānagnyupa brūte bhraṣṭothāpyabhūbhuvaḥ /
yathā vayo vidāhya svarge namavadahyate

mahānagnyupa brūte svasāveśitaṃ pasaḥ /
itthaṃ phalasya vṛkṣasya śūrpe śūrpaṃ bhajemahi

mahānagnī kṛkavākaṃ śamyayā pari dhāvati /
ayaṃ na vidma yo mṛgaḥ śīrṣṇā harati dhāṇikām

mahānagnī mahānagnaṃ dhāvantamanu dhāvati /
imāstadasya gā rakṣa yabha māmaddhyaudanam

sudevastvā mahānagnīrbabādhate mahataḥ sādhu khodanam /
kusaṃ pīvaro navat

vaśā dagdhāmimāṅguriṃ prasṛjatogrataṃ pare /
mahān vai bhadro yabha māmaddhyaudanam

videvastvā mahānagnīrvibādhate mahataḥ sādhu khodanam /
kumārikā piṅgalikā kārda bhasmā ku dhāvati

mahān vai bhadro bilvo mahān bhadra udumbaraḥ /
mahāmabhikta bādhate mahataḥ sādhu khodanam

yaḥ kumārī piṅgalikā vasantaṃ pīvarī labhet/
tailakuṇḍamimāṅguṣṭhaṃ rodantaṃ śudamuddharet

20.137
yaddha prācīrajagantoro maṇḍūradhāṇikīḥ /
hatā indrasya śatravaḥ sarve budbudayāśavaḥ

kapṛn naraḥ kapṛthamuddadhātana codayata khudata vājasātaye /
niṣṭigryaḥ putramā cyāvayotaya indraṃ sabādha iha somapītaye

dadhikrāvṇo akāriṣaṃ jiṣṇoraśvasya vājinaḥ /
surabhi no mukhā karatpra ṇa āyūṃṣi tāriṣat

sutāso madhumattamāḥ somā indrāya mandinaḥ /
pavitravanto akṣaran devān gacchantu vo madāḥ

indurindrāya pavata iti devāso abruvan /
vācaspatirmakhasyate viśvasyeśāna ojasā

sahasradhāraḥ pavate samudro vācamīṅkhayaḥ /
somaḥ patī rayīṇāṃ sakhendrasya divedive

ava drapso aṃśumatīmatiṣṭhadiyānaḥ kṛṣṇo daśabhiḥ sahasraiḥ /
āvattamindraḥ śacyā dhamantamapa snehitīrnṛmaṇā adhatta

drapsamapaśyaṃ viṣuṇe carantamupahvare nadyo aṃśumatyāḥ /
nabho na kṛṣṇamavatasthivāṃsamiṣyāmi vo vṛṣaṇo yudhyatājau

adha drapso aṃśumatyā upasthe'dhārayattanvaṃ titviṣāṇaḥ /
viśo adevīrabhyācarantīrbṛhaspatinā yujendraḥ sasāhe

tvaṃ ha tyatsaptabhyo jāyamāno'śatrubhyo abhavaḥ śatrurindra /
gūlhe dyāvāpṛthivī anvavindo vibhumadbhyo bhuvanebhyo raṇaṃ dhāḥ

tvaṃ ha tyadapratimānamojo vajreṇa vajrin dhṛṣito jaghantha /
tvaṃ śuṣṇasyāvātiro vadhatraistvaṃ gā indra śacyedavindaḥ

tamindraṃ vājayāmasi mahe vṛtrāya hantave /
sa vṛṣā vṛṣabho bhuvat

३ indraḥ sa dāmane kṛta ojiṣṭhaḥ sa made hitaḥ /
dyumnī ślokī sa somyaḥ

girā vajro na saṃbhṛtaḥ sabalo anapacyutaḥ /
vavakṣa ṛṣvo astṛtaḥ

20.138
mahāmindro ya ojasā parjanyo vṛṣṭimāmiva /
stomairvatsasya vāvṛdhe

prajāmṛtasya piprataḥ pra yadbharanta vahnayaḥ /
viprā ṛtasya vāhasā

kaṇvāḥ indraṃ yadakrata stomairyajñasya sādhanam /
jāmi bruvata āyudham

20.139
ā nūnamaśvinā yuvaṃ vatsasya gantamavase /
prāsmai yacchatamavṛkaṃ pṛthu chardiryuyutaṃ yā arātayaḥ

yadantarikṣe yaddivi yatpañca mānuṣāmanu /
nṛmnaṃ taddhattamaśvinā

ye vāṃ daṃsāṃsyaśvinā viprāsaḥ parimāmṛśuḥ /
evetkāṇvasya bodhatam

ayaṃ vāṃ gharmo aśvinā stomena pari ṣicyate /
ayaṃ somo madhumān vājinīvasū yena vṛtraṃ ciketathaḥ

yadapsu yadvanaspatau yadoṣadhīṣu purudaṃsasā kṛtam /
tena māviṣṭamaśvinā

20.140
yan nāsatyā bhuraṇyatho yadvā deva bhiṣajyathaḥ /
ayaṃ vāṃ vatso matibhirna vindhate haviṣmantaṃ hi gacchathaḥ

ā nūnamaśvinorṛṣi stomaṃ ciketa vāmayā /
ā somaṃ madhumattamaṃ gharmaṃ siñcādatharvaṇi

ā nūnaṃ raghuvartaniṃ rathaṃ tiṣṭhātho aśvinā /
ā vāṃ stomā ime mama nabho na cucyavīrata

yadadya vāṃ nāsatyokthairācucyuvīmahi /
yadvā vāṇībhiraśvinevetkaṇvasya bodhatam

yadvāṃ kakṣīvāmuta yadvyaśva ṛṣiryadvāṃ dīrghatamā juhāva /
pṛthī yadvāṃ vainyaḥ sādaneṣvevedato aśvinā cetayethām

20.141
yātaṃ chardiṣpā uta paraspā bhūtaṃ jagatpā uta nastanūpā /
vartistokāya tanayāya yātam

yadindreṇa sarathaṃ yātho aśvinā yadvā vāyunā bhavathaḥ samokasā /
yadādityebhirṛbhubhiḥ sajoṣasā yadvā viṣṇorvikramaṇeṣu tiṣṭhathaḥ

yadadyāśvināvahaṃ huveya vājasātaye /
yatpṛtsu turvaṇe sanastacchreṣṭhamaśvinoravaḥ

ā nūnaṃ yātamaśvinemā havyāni vāṃ hitā /
ime somāso adhi turvaśe yadāvime kaṇveṣu vāmatha

yan nāsatyā parāke arvāke asti bheṣajam /
tena nūnaṃ vimadāya pracetasā chardirvatsāya yacchatam

20.142
abhutsyu pra devyā sākaṃ vācāhamaśvinoḥ /
vyāvardevyā matiṃ vi rātiṃ martyebhyaḥ

pra bodhayoṣo aśvinā pra devi sūnṛte mahi /
pra yajñahotarānuṣakpra madāya śravo bṛhat

yaduṣo yāsi bhānunā saṃ sūryeṇa rocase /
ā hāyamaśvino ratho vartiryāti nṛpāyyam

yadāpītāso aṃśavo gāvo na duhra ūdhabhiḥ /
yadvā vāṇīranuṣata pra devayanto aśvinā

pra dyumnāya pra śavase pra nṛṣāhyāya śarmaṇe /
pra dakṣāya pracetasā

yan nūnaṃ dhībhiraśvinā pituryonā niṣīdathaḥ /
yadvā sumnebhirukthyā

20.143
taṃ vāṃ rathaṃ vayamadyā huvema pṛthujrayamaśvinā saṃgatiṃ goḥ /
yaḥ sūryāṃ vahati vandhurāyurgirvāhasaṃ purutamaṃ vasūyum

yuvaṃ śriyamaśvinā devatā tāṃ divo napātā vanathaḥ śacībhiḥ /
yuvorvapurabhi pṛkṣaḥ sacante vahanti yatkakuhāso rathe vām

ko vāmadyā karate rātahavya ūtaye vā sutapeyāya vārkaiḥ /
ṛtasya vā vanuṣe pūrvyāya namo yemāno aśvinā vavartat

hiraṇyayena purubhū rathenemaṃ yajñaṃ nāsatyopa yātam /
pibātha in madhunaḥ somyasya dadhatho ratnaṃ vidhate janāya

ā no yātaṃ divo accha pṛthivyā hiraṇyayena suvṛtā rathena /
mā vāmanye ni yaman devayantaḥ saṃ yaddade nābhiḥ pūrvyā vām

nū no rayiṃ puruvīraṃ bṛhantaṃ dasrā mimāthāmubhayeṣvasme /
naro yadvāmaśvinā stomamāvantsadhastutimājamīlhāso agman

iheha yadvāṃ samanā papṛkṣe seyamasme sumatirvājaratnā /
uruṣyataṃ jaritāraṃ yuvaṃ ha śritaḥ kāmo nāsatyā yuvadrik

madhumatīroṣadhīrdyāva āpo madhuman no bhavatvantarikṣam /
kṣetrasya patirmadhumān no astvariṣyanto anvenaṃ carema

panāyyaṃ tadaśvinā kṛtaṃ vāṃ vṛṣabho divo rajasaḥ pṛthivyāḥ /
sahasraṃ śaṃsā uta ye gaviṣṭau sarvāmittāmupa yātā pibadhyai