Scripture Library
Atharva Veda · Chapter 2.25
2.25.1
śaṃ no devī pṛśniparṇyaśaṃ nirṛtyā akaḥ /
ugrā hi kaṇvajambhanī tāmabhakṣi sahasvatīm
2.25.2
sahamāneyaṃ prathamā pṛśniparṇyajāyata /
tayāhaṃ durṇāmnāṃ śiro vṛścāmi śakuneriva
2.25.3
arāyamasṛkpāvānaṃ yaśca sphātiṃ jihīrṣati /
garbhādaṃ kaṇvaṃ nāśaya pṛśniparṇi sahasva ca
2.25.4
girimenāmā veśaya kaṇvān jīvitayopanān /
tāṃstvaṃ devi pṛśniparṇyagnirivānudahann ihi
2.25.5
parāca enān pra ṇuda kaṇvān jīvitayopanān /
tamāṃsi yatra gacchanti tatkravyādo ajīgamam
Original text: atharvavedaḥ · Sanskrit Wikisource contributors · Sanskrit Wikisource · CC BY-SA 4.0