Scripture Library
Atharva Veda · Chapter 2.13
2.13.1
āyurdā agne jarasaṃ vṛṇāno ghṛtapratīko ghṛtapṛṣṭho agne /
ghṛtaṃ pītvā madhu cāru gavyaṃ piteva putrān abhi rakṣatādimam
2.13.2
pari dhatta dhatta no varcasemaṃ jarāmṛtyuṃ kṛṇuta dīrghamāyuḥ /
bṛhaspatiḥ prāyacchadvāsa etatsomāya rājñe paridhātavā u
2.13.3
parīdaṃ vāso adhithāḥ svastaye'bhūrgṛṣṭīnāmabhiśastipā u /
śataṃ ca jīva śaradaḥ purūcī rāyaśca poṣamupasaṃvyayasva
2.13.4
ehyaśmānamā tiṣṭhāśmā bhavatu te tanūḥ /
kṛṇvantu viśve devā āyuṣṭe śaradaḥ śatam
2.13.5
yasya te vāsaḥ prathamavāsyaṃ harāmastaṃ tvā viśve'vantu devāḥ /
taṃ tvā bhrātaraḥ suvṛdhā vardhamānamanu jāyantāṃ bahavaḥ sujātam
Original text: atharvavedaḥ · Sanskrit Wikisource contributors · Sanskrit Wikisource · CC BY-SA 4.0