Atharva Veda · Chapter 19.58

ghṛtasya jūtiḥ samanā sadevā saṃvatsaraṃ haviṣā vardhayantī /
śrotraṃ cakṣuḥ prāṇo'chinno no astvachinnā vayamāyuṣo varcasaḥ

upāsmān prāṇo hvayatāmupa prāṇaṃ havāmahe /
varco jagrāha pṛthivyantarikṣaṃ varcaḥ somo bṛhaspatirvidhattā

varcaso dyāvāpṛthivī saṃgrahaṇī babhūvathurvarco gṛhītvā pṛthivīmanu saṃ carema /
yaśasaṃ gāvo gopatimupa tiṣṭhantyāyatīryaśo gṛhītvā pṛthivīmanu saṃ carema

vrajaṃ kṛṇudhvaṃ sa hi vo nṛpāṇo varmā sīvyadhvaṃ bahulā pṛthūni /
puraḥ kṛṇudhvamāyasīradhṛṣṭā mā vaḥ susroccamaso dṛṃhata tam

yajñasya cakṣuḥ prabhṛtirmukhaṃ ca vācā śrotreṇa manasā juhomi /
imaṃ yajñaṃ vitataṃ viśvakarmaṇā devā yantu sumanasyamānāḥ

ye devānāmṛtvijo ye ca yajñiyā yebhyo havyaṃ kriyate bhāgadheyam /
imaṃ yajñaṃ saha patnībhiretya yāvanto devāstaviṣā mādayantām