Atharva Veda · Chapter 19.30

yatte darbha jarāmṛtyu śataṃ varmasu varma te /
tenemaṃ varmiṇaṃ kṛtvā sapatnāṃ jahi vīryaiḥ

śataṃ te darbha varmāṇi sahasraṃ vīryāṇi te /
tamasmai viśve tvāṃ devā jarase bhartavā aduḥ

tvāmāhurdevavarma tvāṃ darbha brahmaṇaspatim /
tvāmindrasyāhurvarma tvaṃ rāṣṭrāṇi rakṣasi

sapatnakṣayaṇaṃ darbha dviṣatastapanaṃ hṛdaḥ /
maṇiṃ kṣatrasya vardhanaṃ tanūpānaṃ kṛṇomi te

yatsamudro abhyakrandatparjanyo vidyutā saha /
tato hiraṇyayo bindustato darbho ajāyata