અથર્વવેદ · અધ્યાય 19.30

યત્તે દર્ભ જરામૃત્યુ શતં વર્મસુ વર્મ તે ।
તેનેમં વર્મિણં કૃત્વા સપત્નાં જહિ વીર્યૈઃ

શતં તે દર્ભ વર્માણિ સહસ્રં વીર્યાણિ તે ।
તમસ્મૈ વિશ્વે ત્વાં દેવા જરસે ભર્તવા અદુઃ

ત્વામાહુર્દેવવર્મ ત્વાં દર્ભ બ્રહ્મણસ્પતિમ્ ।
ત્વામિન્દ્રસ્યાહુર્વર્મ ત્વં રાષ્ટ્રાણિ રક્ષસિ

સપત્નક્ષયણં દર્ભ દ્વિષતસ્તપનં હૃદઃ ।
મણિં ક્ષત્રસ્ય વર્ધનં તનૂપાનં કૃણોમિ તે

યત્સમુદ્રો અભ્યક્રન્દત્પર્જન્યો વિદ્યુતા સહ ।
તતો હિરણ્યયો બિન્દુસ્તતો દર્ભો અજાયત