Scripture Library
Atharva Veda · Chapter 19.3
19.3.1
divaspṛthivyāḥ paryantarikṣādvanaspatibhyo adhyoṣadhībhyaḥ /
yatrayatra vibhṛto jātavedāstata stuto juṣamāṇo na ehi
19.3.2
yaste apsu mahimā yo vaneṣu ya oṣadhīṣu paśuṣvapsvantaḥ /
agne sarvāstanvaḥ saṃ rabhasva tābhirna ehi draviṇodā ajasraḥ
19.3.3
yaste deveṣu mahimā svargo yā te tanuḥ pitṛṣvāviveśa /
puṣṭiryā te manuṣyeṣu paprathe'gne tayā rayimasmāsu dhehi
19.3.4
śrutkarṇāya kavaye vedyāya vacobhirvākairupa yāmi rātim /
yato bhayamabhayaṃ tan no astvava devānāṃ yaja heḍo agne
Original text: atharvavedaḥ · Sanskrit Wikisource contributors · Sanskrit Wikisource · CC BY-SA 4.0