Atharva Veda · Chapter 19.15

yata indra bhayāmahe tato no abhayaṃ kṛdhi /
maghavaṃchagdhi tava tvaṃ na ūtibhirvi dviṣo vi mṛdho jahi

indraṃ vayamanūrādhaṃ havāmahe'nu rādhyāsma dvipadā catuṣpadā /
mā naḥ senā araruṣīrupa gurviṣūcirindra druho vi nāśaya

indrastrātota vṛtrahā parasphāno vareṇyaḥ /
sa rakṣitā caramataḥ sa madhyataḥ sa paścātsa purastān no astu

uruṃ no lokamanu neṣi vidvāntsvaryajjyotirabhayaṃ svasti /
ugrā ta indra sthavirasya bāhū upa kṣayema śaraṇā bṛhantā

abhayaṃ naḥ karatyantarikṣamabhayaṃ dyāvāpṛthivī ubhe ime /
abhayaṃ paścādabhayaṃ purastāduttarādadharādabhayaṃ no astu

abhayaṃ mitrādabhayamamitrādabhayaṃ jñātādabhayaṃ puro yaḥ /
abhayaṃ naktamabhayaṃ divā naḥ sarvā āśā mama mitraṃ bhavantu