Atharva Veda · Chapter 19

sūktam १
sūktam २
sūktam ३
sūktam ४
sūktam ५
sūktam ६
sūktam ७
sūktam ८
sūktam ९
sūktam १०
sūktam ११
sūktam १२
sūktam १३
sūktam १४
sūktam १५
sūktam १६
sūktam १७
sūktam १८
sūktam १९
sūktam २०
sūktam २१
sūktam २२
sūktam २३
sūktam २४
sūktam २५
sūktam २६
sūktam २७
sūktam २८
sūktam २९
sūktam ३०
sūktam ३१
sūktam ३२
sūktam ३३
sūktam ३४
sūktam ३५
sūktam ३६
sūktam ३७
sūktam ३८
sūktam ३९
sūktam ४०
sūktam ४१
sūktam ४२
sūktam ४३
sūktam ४४
sūktam ४५
sūktam ४६
sūktam ४७
sūktam ४८
sūktam ४९
sūktam ५०
sūktam ५१
sūktam ५२
sūktam ५३
sūktam ५४
sūktam ५५
sūktam ५६
sūktam ५७
sūktam ५८
sūktam ५९
sūktam ६०
sūktam ६१
sūktam ६२
sūktam ६३
sūktam ६४
sūktam ६५
sūktam ६६
sūktam ६७
sūktam ६८
sūktam ६९
sūktam ७०
sūktam ७१
sūktam ७२
19.1
saṃsaṃ sravantu nadyaḥ saṃ vātāḥ saṃ patatriṇaḥ /
yajñamimaṃ vardhayatā giraḥ saṃsrāvyeṇa haviṣā juhomi

imaṃ homā yajñamavatemaṃ saṃsrāvaṇā uta yajñamimaṃ vardhayatā giraḥ saṃsrāvyeṇa haviṣā juhomi

rūpaṃrūpaṃ vayovayaḥ saṃrabhyainaṃ pari ṣvaje /
yajñamimaṃ catasraḥ pradiśo vardhayantu saṃsrāvyeṇa haviṣā juhomi

19.2
śaṃ ta āpo haimavatīḥ śamu te santūtsyāḥ /
śaṃ te saniṣyadā āpaḥ śamu te santu varṣyāḥ

śaṃ ta āpo dhanvanyāḥ śaṃ te santvanūpyāḥ /
śaṃ te khanitrimā āpaḥ śaṃ yāḥ kumbhebhirābhṛtāḥ

anabhrayaḥ khanamānā viprā gambhīre apasaḥ /
bhiṣagbhyo bhiṣaktarā āpo achā vadāmasi

apāmaha divyānāmapāṃ srotasyānām /
apāmaha praṇejane'śvā bhavatha vājinaḥ

tā apaḥ śivā apo'yakṣmaṃkaraṇīrapaḥ /
yathaiva tṛpyate mayastāsta ā datta bhesajīḥ

19.3
divaspṛthivyāḥ paryantarikṣādvanaspatibhyo adhyoṣadhībhyaḥ /
yatrayatra vibhṛto jātavedāstata stuto juṣamāṇo na ehi

yaste apsu mahimā yo vaneṣu ya oṣadhīṣu paśuṣvapsvantaḥ /
agne sarvāstanvaḥ saṃ rabhasva tābhirna ehi draviṇodā ajasraḥ

yaste deveṣu mahimā svargo yā te tanuḥ pitṛṣvāviveśa /
puṣṭiryā te manuṣyeṣu paprathe'gne tayā rayimasmāsu dhehi

śrutkarṇāya kavaye vedyāya vacobhirvākairupa yāmi rātim /
yato bhayamabhayaṃ tan no astvava devānāṃ yaja heḍo agne

19.4
yāmāhutiṃ prathamāmatharvā yā jātā yā havyamakṛṇojjātavedāḥ /
tāṃ ta etāṃ prathamo johavīmi tābhiṣṭupto vahatu havyamagniragnaye svāha

ākūtiṃ devīṃ subhagāṃ puro dadhe cittasya mātā suhavā no astu /
yāmāśāmemi kevalī sā me astu videyamenāṃ manasi praviṣṭām

ākūtyā no bṛhaspata ākūtyā na upā gahi /
atho bhagasya no dhehyatho naḥ suhavo bhava

bṛhaspatirma ākūtimāṅgirasaḥ prati jānātu vācametām /
yasya devā devatāḥ saṃbabhūvuḥ sa supraṇītāḥ kāmo anvetvasmān

19.5
indro rājā jagataścarṣaṇīnāmadhi kṣami viṣurūpaṃ yadasti /
tato dadāti dāśuṣe vasūni codadrādha upastutaścidarvāk

19.6
sahasrabāhuḥ puruṣaḥ sahasrākṣaḥ sahasrapāt/
sa bhūmiṃ viśvato vṛtvātyatiṣṭhaddaśāṅgulam

tribhiḥ padbhirdyāmarohatpādasyehābhavatpunaḥ /
tathā vyakrāmadviṣvaṅaśanānaśane anu

tāvanto asya mahimānastato jyāyāṃśca pūruṣaḥ /
pādo'sya viśvā bhūtāni tripādasyāmṛtaṃ divi

puruṣa evedaṃ sarvaṃ yadbhūtaṃ yacca bhāvyam /
utāmṛtatvasyeśvaro yadanyenābhavatsaha

yatpuruṣaṃ vyadadhuḥ katidhā vyakalpayan /
mukhaṃ kimasya kiṃ bāhū kimūrū pādā ucyate

brāhmaṇo'sya mukhamāsīdbāhū rājanyo'bhavat/
madhyaṃ tadasya yadvaiśyaḥ padbhyāṃ śūdro ajāyata

candramā manaso jātaścakṣoḥ sūryo ajāyata /
mukhādindraścāgniśca prāṇādvāyurajāyata

nābhyā āsīdantarikṣaṃ śīrṣṇo dyauḥ samavartata /
padbhyāṃ bhūmirdiśaḥ śrotrāttathā lokāmakalpayan

virāḍagre samabhavadvirājo adhi pūruṣaḥ /
sa jāto atyaricyata paścādbhūmimatho puraḥ

yatpuruṣeṇa haviṣā devā yajñamatanvata /
vasanto asyāsīdājyaṃ grīṣma idhmaḥ śaraddhaviḥ

taṃ yajñaṃ prāvṛṣā praukṣan puruṣaṃ jātamagraśaḥ /
tena devā ayajanta sādhyā vasavaśca ye

tasmādaśvā ajāyanta ye ca ke cobhayādataḥ /
gāvo ha jajñire tasmāttasmājjātā ajāvayaḥ

tasmādyajñātsarvahuta ṛcaḥ sāmāni jajñire /
chando ha jajñire tasmādyajustasmādajāyata

tasmādyajñātsarvahutaḥ saṃbhṛtaṃ pṛṣadājyam /
paśūṃstāṃścakre vāyavyān āraṇyā grāmyāśca ye

saptāsyāsan paridhayastriḥ sapta samidhaḥ kṛtāḥ /
devā yadyajñaṃ tanvānā abadhnan puruṣaṃ paśum

mūrdhno devasya bṛhato aṃśavaḥ sapta saptatīḥ /
rājñaḥ somasyājāyanta jātasya puruṣādadhi

19.7
citrāṇi sākaṃ divi rocanāni sarīsṛpāṇi bhuvane javāni /
turmiśaṃ sumatimicchamāno ahāni gīrbhiḥ saparyāmi nākam

suhavamagne kṛttikā rohiṇī cāstu bhadraṃ mṛgaśiraḥ śamārdrā /
punarvasū sūnṛtā cāru puṣyo bhānurāśleṣā ayanaṃ maghā me

puṇyaṃ pūrvā phalgunyau cātra hastaścitrā śivā svāti sukho me astu /
rādhe viśākhe suhavānurādhā jyeṣṭhā sunakṣatramariṣṭa mūlam

annaṃ pūrvā rāsatāṃ me aṣāḍhā ūrjaṃ devyuttarā ā vahantu /
abhijin me rāsatāṃ puṇyameva śravaṇaḥ śraviṣṭhāḥ kurvatāṃ supuṣṭim

ā me mahacchatabhiṣagvarīya ā me dvayā proṣṭhapadā suśarma /
ā revatī cāśvayujau bhagaṃ ma ā me rayiṃ bharaṇya ā vahantu

19.8
yāni nakṣatrāṇi divyantarikṣe apsu bhūmau yāni nageṣu dikṣu /
prakalpayaṃścandramā yānyeti sarvāṇi mamaitāni śivāni santu

aṣṭāviṃśāni śivāni śagmāni saha yogaṃ bhajantu me /
yogaṃ pra padye kṣemaṃ ca kṣemaṃ pra padye yogaṃ ca namo'horātrābhyāmastu

svastitaṃ me suprātaḥ susāyaṃ sudivaṃ sumṛgaṃ suśakunaṃ me astu /
suhavamagne svastyamartyaṃ gatvā punarāyābhinandan

anuhavaṃ parihavaṃ parivādaṃ parikṣavam /
sarvairme riktakumbhān parā tāntsavitaḥ suva

apapāpaṃ parikṣavaṃ puṇyaṃ bhakṣīmahi kṣavam /
śivā te pāpa nāsikāṃ puṇyagaścābhi mehatām

imā yā brahmaṇaspate viṣucīrvāta īrate /
sadhrīcīrindra tāḥ kṛtvā mahyaṃ śivatamāskṛdhi

svasti no astvabhayaṃ no astu namo'horatrābhyāmastu

19.9
śāntā dyauḥ śāntā pṛthivī śāntamidamurvantarikṣam /
śāntā udanvatīrāpaḥ śāntā naḥ santvoṣadhīḥ

śāntāni pūrvarūpāṇi śāntaṃ no astu kṛtākṛtam /
śāntaṃ bhūtaṃ ca bhavyaṃ ca sarvameva śamastu naḥ

iyaṃ yā parameṣṭhinī vāgdevī brahmasaṃśitā /
yayaiva sasṛje ghoraṃ tayaiva śāntirastu naḥ

idaṃ yatparameṣṭhinaṃ mano vāṃ brahmasaṃśitam /
yenaiva sasṛje ghoraṃ tenaiva śāntirastu naḥ

imāni yāni pañcendriyāni manaḥṣaṣṭhāni me hṛdi brahmaṇā saṃśitāni /
yaireva sasṛje ghoraṃ taireva śāntirastu naḥ

śaṃ no mitraḥ śaṃ varuṇaḥ śaṃ viṣṇuḥ śaṃ prajāpatiḥ /
śaṃ na indro bṛhaspatiḥ śaṃ no bhavatvaryamā

śaṃ no mitraḥ śaṃ varuṇaḥ śaṃ vivasvāṃ chamantakaḥ /
utpātāḥ pārthivāntarikṣāḥ śaṃ no divicarā grahāḥ

śaṃ no bhūmirvepyamānā śamulkā nirhataṃ ca yat/
śaṃ gāvo lohitakṣīrāḥ śaṃ bhūmirava tīryatīḥ

nakṣatramulkābhihataṃ śamastu naḥ śaṃ no'bhicārāḥ śamu santu kṛtyāḥ /
śaṃ no nikhātā valgāḥ śamulkā deśopasargāḥ śamu no bhavantu

śaṃ no grahāścāndramasāḥ śamādityaśca rāhuṇā /
śaṃ no mṛtyurdhūmaketuḥ śaṃ rudrāstigmatejasaḥ

śaṃ rudrāḥ śaṃ vasavaḥ śamādityāḥ śamagnayaḥ /
śaṃ no maharṣayo devāḥ śaṃ devāḥ śaṃ bṛhaspatiḥ

brahma prajāpatirdhātā lokā vedāḥ saptaṛṣayo'gnayaḥ /
tairme kṛtaṃ svastyayanamindro me śarma yacchatu brahmā me śarma yacchatu /
viśve me devāḥ śarma yacchantu sarve me devāḥ śarma yacchantu

yāni kāni cicchāntāni loke saptaṛṣayo viduḥ /
sarvāṇi śaṃ bhavantu me śaṃ me astvabhayaṃ me astu

pṛthivī śāntirantarikṣaṃ śāntirdyauḥ śāntirāpaḥ śāntiroṣadhayaḥ śāntirvanaspatayaḥ śāntirviśve me devāḥ śāntiḥ sarve me devāḥ śāntiḥ śāntiḥ śāntiḥ śāntibhiḥ /
yadiha ghoraṃ yadiha krūraṃ yadiha pāpaṃ tacchāntaṃ tacchivaṃ sarvameva śamastu naḥ

19.10
śaṃ na indrāgnī bhavatāmavobhiḥ śaṃ na indrāvaruṇā rātahavyā /
śamindrāsomā suvitāya śaṃ yoḥ śaṃ na indrāpūṣaṇā vājasātau

śaṃ no bhagaḥ śamu naḥ śaṃso astu śaṃ naḥ puraṃdhiḥ śamu santu rāyaḥ /
śaṃ naḥ satyasya suyamasya śaṃsaḥ śaṃ no aryamā purujāto astu

śaṃ no dhātā śamu dhartā no astu śaṃ na urūcī bhavatu svadhābhiḥ /
śaṃ rodasī bṛhatī śaṃ no adriḥ śaṃ no devānāṃ suhavāni santu

śaṃ no agnirjyotiranīko astu śaṃ no mitrāvaruṇāvaśvinā śam /
śaṃ naḥ sukṛtāṃ sukṛtāni santu śaṃ na iṣiro abhi vātu vātaḥ

śaṃ no dyāvāpṛthivī pūrvahūtau śamantarikṣaṃ dṛśaye no astu /
śaṃ na oṣadhīrvanino bhavantu śaṃ no rajasaspatirastu jiṣṇuḥ

śaṃ na indro vasubhirdevo astu śamādityebhirvaruṇaḥ suśaṃsaḥ /
śaṃ no rudro rudrebhirjalāṣaḥ śaṃ nastvaṣṭā gnābhiriha śṛṇotu

śaṃ naḥ somo bhavatu brahma śaṃ naḥ śaṃ no grāvāṇaḥ śamu santu yajñāḥ /
śaṃ naḥ svarūnāṃ mitayo bhavantu śaṃ naḥ prasvaḥ śaṃ vastu vediḥ

śaṃ naḥ sūrya urucakṣā udetu śaṃ no bhavantu pradiśaścatasraḥ /
śaṃ naḥ parvatā dhruvayo bhavantu śaṃ naḥ sindhavaḥ śamu santvāpaḥ

śaṃ no aditirbhavatu vratebhiḥ śaṃ no bhavantu marutaḥ svarkāḥ /
śaṃ no viṣṇuḥ śamu pūṣā no astu śaṃ no bhavitraṃ śaṃ vastu vāyuḥ

śaṃ no devaḥ savitā trāyamāṇaḥ śaṃ no bhavantūṣaso vibhātīḥ /
śaṃ naḥ parjanyo bhavatu prajābhyaḥ śaṃ naḥ kṣetrasya patirastu śaṃbhuḥ

19.11
śaṃ naḥ satyasya patayo bhavantu śaṃ no arvantaḥ śamu santu gāvaḥ /
śaṃ na ṛbhavaḥ sukṛtaḥ suhastāḥ śaṃ no bhavatu pitaro haveṣu

śaṃ no devā viśvadevā bhavantu śaṃ sarasvatī saha dhībhirastu /
śamabhiṣācaḥ śamu rātiṣācaḥ śaṃ no divyāḥ pārthivāḥ śaṃ no apyāḥ

śaṃ no aja ekapāddevo astu śamahirbudhnyaḥ śaṃ samudraḥ /
śaṃ no apāṃ napātperurastu śaṃ naḥ pṛṣṇirbhavatu devagopā

ādityā rudrā vasavo juṣantāmidaṃ brahma kriyamāṇaṃ navīyaḥ /
sṛṇvantu no divyāḥ pārthivāso gojātā uta ye yajñiyāsaḥ

ye devānāmṛtvijo yajñiyāso manoryajatrā amṛtā ṛtajñāḥ /
te no rāsantāmurugāyamadya yūyaṃ pāta svastibhiḥ sadā naḥ

tadastu mitrāvaruṇā tadagne śaṃ yorasmabhyamidamastu śastam /
aśīmahi gādhamuta pratiṣṭhāṃ namo dive bṛhate sādanāya

19.12
uṣā apa svasustamaḥ saṃ vartayati vartaniṃ sujātatā /
ayā vājaṃ devahitaṃ sanema madema śatahimāḥ suvīrāḥ

19.13
indrasya bāhū sthavirau vṛṣāṇau citrā imā vṛṣabhau pārayiṣṇū /
tau yokṣe prathamo yoga āgate yābhyāṃ jitamasurāṇāṃ svaryat

āśuḥ śiśāno vṛṣabho na bhīmo ghanāghanaḥ kṣobhaṇaścarṣaṇīnām /
saṃkrandano'nimiṣa ekavīraḥ śataṃ senā ajayatsākamindraḥ

saṃkrandanenānimiṣeṇa jiṣṇunāyodhyena duścyavanena dhṛṣṇunā /
tadindreṇa jayata tatsahadhvaṃ yudho nara iṣuhastena vṛṣṇā

sa iṣuhastaiḥ sa niṣaṅgibhirvaśī saṃsraṣṭā sa yudha indro gaṇena /
saṃsṛṣṭajitsomapā bāhuśardhyugradhanvā pratihitābhirastā

balavijñāyaḥ sthaviraḥ pravīraḥ sahasvān vājī sahamāna ugraḥ /
abhivīro abhiṣatvā sahojijjaitramindra rathamā tiṣṭha govidam

imaṃ vīramanu harṣadhvamugramindraṃ sakhāyo anu saṃ rabhadhvam /
grāmajitaṃ gojitaṃ vajrabāhuṃ jayantamajma pramṛṇantamojasā

abhi gotrāṇi sahasā gāhamāno'dāya ugraḥ śatamanyurindraḥ /
duścyavanaḥ pṛtanāṣāḍayodhyo'smākaṃ senā avatu pra yutsu

bṛhaspate pari dīyā rathena rakṣohāmitrāmapabādhamānaḥ /
prabhañjaṃchatrūn pramṛṇann amitrān asmākamedhyavitā tanūnām

indra eṣāṃ netā bṛhaspatirdakṣiṇā yajñaḥ pura etu somaḥ /
devasenānāmabhibhañjatīnāṃ jayantīnāṃ maruto yantu madhye

indrasya vṛṣṇo varuṇasya rājña ādityānāṃ marutāṃ śardha ugram /
mahāmanasāṃ bhuvanacyavānāṃ ghoṣo devānāṃ jayatāmudasthāt

asmākamindraḥ samṛteṣu dhvajeṣvasmākaṃ yā iṣavastā jayantu /
asmākaṃ vīrā uttare bhavantvasmān devāso'vatā haveṣu

19.14
idamucchreyo'vasānamāgāṃ śive me dyāvāpṛthivī abhūtām /
asapatnāḥ pradiśo me bhavantu na vai tvā dviṣmo abhayaṃ no astu

19.15
yata indra bhayāmahe tato no abhayaṃ kṛdhi /
maghavaṃchagdhi tava tvaṃ na ūtibhirvi dviṣo vi mṛdho jahi

indraṃ vayamanūrādhaṃ havāmahe'nu rādhyāsma dvipadā catuṣpadā /
mā naḥ senā araruṣīrupa gurviṣūcirindra druho vi nāśaya

indrastrātota vṛtrahā parasphāno vareṇyaḥ /
sa rakṣitā caramataḥ sa madhyataḥ sa paścātsa purastān no astu

uruṃ no lokamanu neṣi vidvāntsvaryajjyotirabhayaṃ svasti /
ugrā ta indra sthavirasya bāhū upa kṣayema śaraṇā bṛhantā

abhayaṃ naḥ karatyantarikṣamabhayaṃ dyāvāpṛthivī ubhe ime /
abhayaṃ paścādabhayaṃ purastāduttarādadharādabhayaṃ no astu

abhayaṃ mitrādabhayamamitrādabhayaṃ jñātādabhayaṃ puro yaḥ /
abhayaṃ naktamabhayaṃ divā naḥ sarvā āśā mama mitraṃ bhavantu

19.16
asapatnaṃ purastātpaścān no abhayaṃ kṛtam /
savitā mā dakṣiṇata uttarān mā śacīpatiḥ

divo mādityā rakṣatu bhūmyā rakṣantvagnayaḥ /
indrāgnī rakṣatāṃ mā purastādaśvināvabhitaḥ śarma yacchatām /
tiraścīn aghnyā rakṣatu jātavedā bhūtakṛto me sarvataḥ santu varma

19.17
agnirmā pātu vasubhiḥ purastāttasmin krame tasmiṃ chraye tāṃ puraṃ praimi /
sa mā rakṣatu sa mā gopāyatu tasmā ātmānaṃ pari dade svāhā

vāyurmāntarikṣeṇaitasyā diśaḥ pātu tasmin krame tasmiṃ chraye tāṃ puraṃ praimi /
sa mā rakṣatu sa mā gopāyatu tasmā ātmānaṃ pari dade svāhā

somo mā rudrairdakṣiṇāyā diśaḥ pātu tasmin krame tasmiṃ chraye tāṃ puraṃ praimi /
sa mā rakṣatu sa mā gopāyatu tasmā ātmānaṃ pari dade svāhā

varuṇo mādityairetasyā diśaḥ pātu tasmin krame tasmiṃ chraye tāṃ puraṃ praimi /
sa mā rakṣatu sa mā gopāyatu tasmā ātmānaṃ pari dade svāhā

sūryo mā dyāvāpṛthivībhyāṃ pratīcyā diśaḥ pātu tasmin krame tasmiṃ chraye tāṃ puraṃ praimi /
sa mā rakṣatu sa mā gopāyatu tasmā ātmānaṃ pari dade svāhā

āpo mauṣadhīmatīretasyā diśaḥ pāntu tāsu krame tāsu śraye tāṃ puraṃ praimi /
tā mā rakṣantu tā mā gopāyantu tābhya ātmānaṃ pari dade svāhā

viśvakarmā mā saptaṛṣibhirudīcyā diśaḥ pātu tasmin krame tasmiṃ chraye tāṃ puraṃ praimi /
sa mā rakṣatu sa mā gopāyatu tasmā ātmānaṃ pari dade svāhā

indro mā marutvān etasyā diśaḥ pātu tasmin krame tasmiṃ chraye tāṃ puraṃ praimi /
sa mā rakṣatu sa mā gopāyatu tasmā ātmānaṃ pari dade svāhā

prajāpatirmā prajananavāntsaha pratiṣṭhayā dhruvāyā diśaḥ pātu tasmin krame tasmiṃ chraye tāṃ puraṃ praimi /
sa mā rakṣatu sa mā gopāyatu tasmā ātmānaṃ pari dade svāhā

bṛhaspatirmā viśvairdevairūrdhvāyā diśaḥ pātu tasmin krame tasmiṃ chraye tāṃ puraṃ praimi /
sa mā rakṣatu sa mā gopāyatu tasmā ātmānaṃ pari dade svāhā

19.18
agniṃ te vasuvantamṛcchantu /
ye māghāyavaḥ prācyā diśo'bhidāsān

vāyuṃ te'ntarikṣavantamṛcchantu /
ye māghāyava etasyā diśo'bhidāsān

somaṃ te rudravantamṛcchantu /
ye māghāyavo dakṣiṇāyā diśo'bhidāsān

varuṇaṃ ta ādityavantamṛcchantu /
ye māghāyava etasyā diśo'bhidāsān

sūryaṃ te dyāvāpṛthivīvantamṛcchantu /
ye māghāyava pratīcyā diśo'bhidāsān

apasta oṣadhīmatīrṛcchantu /
ye māghāyava etasyā diśo'bhidāsān

viśvakarmāṇaṃ te saptaṛṣivantamṛcchantu /
ye māghāyava udīcyā diśo'bhidāsān

indraṃ te marutvantamṛcchantu /
ye māghāyava etasyā diśo'bhidāsān

prajāpatiṃ te prajananavantamṛcchantu /
ye māghāyavo dhruvāyā diśo'bhidāsān

bṛhaspatiṃ te viśvadevavantamṛcchantu /
ye māghāyava ūrdhvāyā diśo'bhidāsān

19.19
mitraḥ pṛthivyodakrāmattāṃ puraṃ pra ṇayāmi vaḥ /
tāmā viśata tāṃ pra viśata sā vaḥ śarma ca varma ca yacchatu

vāyurantarikṣeṇodakrāmattāṃ puraṃ pra ṇayāmi vaḥ /
tāmā viśata tāṃ pra viśata sā vaḥ śarma ca varma ca yacchatu

sūryo divodakrāmattāṃ puraṃ pra ṇayāmi vaḥ /
tāmā viśata tāṃ pra viśata sā vaḥ śarma ca varma ca yacchatu

candramā nakṣatrairudakrāmattāṃ puraṃ pra ṇayāmi vaḥ /
tāmā viśata tāṃ pra viśata sā vaḥ śarma ca varma ca yacchatu

soma oṣadhībhirudakrāmattāṃ puraṃ pra ṇayāmi vaḥ /
tāmā viśata tāṃ pra viśata sā vaḥ śarma ca varma ca yacchatu

yajño dakṣiṇābhirudakrāmattāṃ puraṃ pra ṇayāmi vaḥ /
tāmā viśata tāṃ pra viśata sā vaḥ śarma ca varma ca yacchatu

samudro nadībhirudakrāmattāṃ puraṃ pra ṇayāmi vaḥ /
tāmā viśata tāṃ pra viśata sā vaḥ śarma ca varma ca yacchatu

brahma brahmacāribhirudakrāmattāṃ puraṃ pra ṇayāmi vaḥ /
tāmā viśata tāṃ pra viśata sā vaḥ śarma ca varma ca yacchatu

indro vīryeṇodakrāmattāṃ puraṃ pra ṇayāmi vaḥ /
tāmā viśata tāṃ pra viśata sā vaḥ śarma ca varma ca yacchatu

devā amṛtenodakrāmaṃstāṃ puraṃ pra ṇayāmi vaḥ /
tāmā viśata tāṃ pra viśata sā vaḥ śarma ca varma ca yacchatu

prajāpatiḥ prajābhirudakrāmattāṃ puraṃ pra ṇayāmi vaḥ /
tāmā viśata tāṃ pra viśata sā vaḥ śarma ca varma ca yacchatu

19.20
apa nyadhuḥ pauruṣeyaṃ vadhaṃ yamindrāgnī dhātā savitā bṛhaspatiḥ /
somo rājā varuṇo aśvinā yamaḥ pūṣāsmān pari pātu mṛtyoḥ

yāni cakāra bhuvanasya yaspatiḥ prajāpatirmātariśvā prajābhyaḥ /
pradiśo yāni vasate diśaśca tāni me varmāṇi bahulāni santu

yatte tanūṣvanahyanta devā dyurājayo dehinaḥ /
indro yaccakre varma tadasmān pātu viśvataḥ

varma me dyāvāpṛthivī varmāharvarma sūryaḥ /
varma me viśve devāḥ kran mā mā prāpatpratīcikā

19.21
gāyatryuṣṇiganuṣṭubbṛhatī paṅktistriṣṭubjagatyai

19.22
āṅgirasānāmādyaiḥ pañcānuvākaiḥ svāhā

ṣaṣṭhāya svāhā

saptamāṣṭamābhyāṃ svāhā

nīlanakhebhyaḥ svāhā

haritebhyaḥ svāhā

kṣudrebhyaḥ svāhā

paryāyikebhyaḥ svāhā

prathamebhyaḥ śaṅkhebhyaḥ svāhā

dvitīyebhyaḥ śaṅkhebhyaḥ svāhā

tṛtīyebhyaḥ śaṅkhebhyaḥ svāhā

upottamebhyaḥ svāhā

uttamebhyaḥ svāhā

uttarebhyaḥ svāhā

ṛṣibhyaḥ svāhā

śikhibhyaḥ svāhā

gaṇebhyaḥ svāhā

mahāgaṇebhyaḥ svāhā

sarvebhyo'ṅgirobhyo vidagaṇebhyaḥ svāhā

pṛthaksahasrābhyāṃ svāhā

brahmaṇe svāhā

brahmajyeṣṭhā sambhṛtā viryāṇi brahmāgre jyeṣṭhaṃ divamā tatāna /
bhūtānāṃ brahmā prathamota jajñe tenārhati brahmaṇā spardhituṃ kaḥ

19.23
ātharvaṇānāṃ caturṛcebhyaḥ svāhā

pañcarcebhyaḥ svāhā

ṣaḻṛcebhyaḥ svāhā

saptarcebhyaḥ svāhā

aṣṭarcebhyaḥ svāhā

navarcebhyaḥ svāhā

daśarcebhyaḥ svāhā

ekādaśarcebhyaḥ svāhā

dvādaśarcebhyaḥ svāhā

trayodaśarcebhyaḥ svāhā

caturdaśarcebhyaḥ svāhā

pañcadaśarcebhyaḥ svāhā

ṣoḍaśarcebhyaḥ svāhā

saptadaśarcebhyaḥ svāhā

aṣṭādaśarcebhyaḥ svāhā

ekonaviṃśatiḥ svāhā

viṃśatiḥ svāhā

mahatkāṇḍāya svāhā

tṛcebhyaḥ svāhā

ekarcebhyaḥ svāhā

kṣudrebhyaḥ svāhā

ekānṛcebhyaḥ svāhā

rohitebhyaḥ svāhā

sūryābhyāṃ svāhā

vrātyābhyāṃ svāhā

prājāpatyābhyāṃ svāhā

viṣāsahyai svāhā

maṅgalikebhyaḥ svāhā

brahmaṇe svāhā

brahmajyeṣṭhā saṃbhṛtā vīryāṇi brahmāgre jyeṣṭhaṃ divamā tatāna /
bhūtānāṃ brahmā prathamota jajñe tenārhati brahmaṇā spardhituṃ kaḥ

19.24
yena devaṃ savitāraṃ pari devā adhārayan /
tenemaṃ brahmaṇaspate pari rāṣṭrāya dhattana

parīmamindramāyuṣe mahe kṣatrāya dhattana /
yathainaṃ jarase nayājjyokkṣatre'dhi jāgarat

parīmamindramāyuṣe mahe śrotrāya dhattana /
yathainaṃ jarase nayājjyokśrotre'dhi jāgarat

pari dhatta dhatta no varcasemaṃ jarāmṛtyuṃ kṛṇuta dīrghamāyuḥ /
bṛhaspatiḥ prāyacchadvāsa etatsomāya rājñe paridhātavā u

jarāṃ su gaccha pari dhatsva vāso bhavā gṛṣṭīnāmabhiśastipā u /
śataṃ ca jīva śaradaḥ purūcī rāyaśca poṣamupasaṃvyayasva

parīdaṃ vāso adhithāḥ svastaye'bhūrvāpīnāmabhiśastipā u /
śataṃ ca jīva śaradaḥ purūcīrvasūni cārurvi bhajāsi jīvan

yogeyoge tavastaraṃ vājevāje havāmahe /
sakhāya indramūtaye

hiraṇyavarṇo ajaraḥ suvīro jarāmṛtyuḥ prajayā saṃ viśasva /
tadagnirāha tadu soma āha bṛhaspatiḥ savitā tadindraḥ

19.25
aśrāntasya tvā manasā yunajmi prathamasya ca /
utkūlamudvaho bhavoduhya prati dhāvatāt

19.26
agneḥ prajātaṃ pari yaddhiraṇyamamṛtaṃ dadhre adhi martyeṣu /
ya enadveda sa idenamarhati jarāmṛtyurbhavati yo bibharti

yaddhiraṇyaṃ sūryeṇa suvarṇaṃ prajāvanto manavaḥ pūrva īṣire /
tattvā candraṃ varcasā saṃ sṛjatyāyuṣmān bhavati yo bibharti

āyuṣe tvā varcase tvaujase ca balāya ca /
yathā hiraṇyatejasā vibhāsāsi janāmanu

yadveda rājā varuṇo veda devo bṛhaspatiḥ /
indro yadvṛtrahā veda tatta āyuṣyaṃ bhuvattatte varcasyaṃ bhuvat

19.27
gobhiṣṭvā pātvṛṣabho vṛṣā tvā pātu vājibhiḥ /
vāyuṣṭvā brahmaṇā pātvindrastvā pātvindriyaiḥ

somastvā pātvoṣadhībhirnakṣatraiḥ pātu sūryaḥ /
mādbhyastvā candro vṛtrahā vātaḥ prāṇena rakṣatu

tisro divastisraḥ pṛthivīstrīṇyantarikṣāṇi caturaḥ samudrān /
trivṛtaṃ stomaṃ trivṛta āpa āhustāstvā rakṣantu trivṛtā trivṛdbhiḥ

trīn nākāṃstrīn samudrāṃstrīn bradhnāṃstrīn vaiṣṭapān /
trīn mātariśvanastrīntsūryān goptṝn kalpayāmi te

ghṛtena tvā samukṣāmyagne ājyena vardhayan /
agneścandrasya sūryasya mā prāṇaṃ māyino dabhan

mā vaḥ prāṇaṃ mā vo'pānaṃ mā haro māyino dabhan /
bhrājanto viśvavedaso devā daivyena dhāvata

prāṇenāgniṃ saṃ sṛjati vātaḥ prāṇena saṃhitaḥ /
prāṇena viśvatomukhaṃ sūryaṃ devā ajanayan

āyuṣāyuḥkṛtāṃ jīvāyuṣmān jīva mā mṛthāḥ /
prāṇenātmanvatāṃ jīva mā mṛtyorudagā vaśam

devānāṃ nihitaṃ nidhiṃ yamindro'nvavindatpathibhirdevayānaiḥ /
āpo hiraṇyaṃ jugupustrivṛdbhistāstvā rakṣantu trivṛtā trivṛdbhiḥ

trayastriṃśaddevatāstrīṇi ca vīryāṇi priyāyamāṇā jugupurapsvantaḥ /
asmiṃścandre adhi yaddhiraṇyaṃ tenāyaṃ kṛṇavadvīryāṇi

ye devā divyekādaśa stha te devāso haviridaṃ juṣadhvam

ye devā antarikṣa ekādaśa stha te devāso haviridaṃ juṣadhvam

ye devā pṛthivyāmekādaśa stha te devāso haviridaṃ juṣadhvam

asapatnaṃ purastātpaścān no abhayaṃ kṛtam /
savitā mā dakṣiṇata uttarān mā śacīpatiḥ

divo mādityā rakṣantu bhūmyā rakṣantvagnayaḥ /
indrāgnī rakṣatāṃ mā purastādaśvināvabhitaḥ śarma yacchatām /
tiraścīn aghnyā rakṣatu jātavedā bhūtakṛto me sarvataḥ santu varma

19.28
imaṃ badhnāmi te maṇiṃ dīrghāyutvāya tejase /
darbhaṃ sapatnadambhanaṃ dviṣatastapanaṃ hṛdaḥ

dviṣatastāpayan hṛdaḥ śatrūṇāṃ tāpayan manaḥ /
durhārdaḥ sarvāṃstvaṃ darbha gharma ivābhīntsaṃtāpayan

gharma ivābhitapan darbha dviṣato nitapan maṇe /
hṛdaḥ sapatnānāṃ bhinddhīndra iva virujaṃ balam

bhinddhi darbha sapatnānāṃ hṛdayaṃ dviṣatāṃ maṇe /
udyan tvacamiva bhūmyāḥ śira eṣāṃ vi pātaya

bhinddhi darbha sapatnān me bhinddhi me pṛtanāyataḥ /
bhinddhi me sarvān durhārdo bhinddhi me dviṣato maṇe

chinddhi darbha sapatnān me chinddhi me pṛtanāyataḥ /
chinddhi me sarvān durhārdo chinddhi me dviṣato maṇe

vṛśca darbha sapatnān me vṛśca me pṛtanāyataḥ /
vṛśca me sarvān durhārdo vṛśca me dviṣato maṇe

kṛnta darbha sapatnān me kṛnta me pṛtanāyataḥ /
kṛnta me sarvān durhārdo kṛnta me dviṣato maṇe

piṃśa darbha sapatnān me piṃśa me pṛtanāyataḥ /
piṃśa me sarvān durhārdo piṃśa me dviṣato maṇe

vidhya darbha sapatnān me vidhya me pṛtanāyataḥ /
vidhya me sarvān durhārdo vidhya me dviṣato maṇe

19.29
nikṣa darbha sapatnān me nikṣa me pṛtanāyataḥ /
nikṣa me sarvān durhārdo nikṣa me dviṣato maṇe

tṛnddhi darbha sapatnān me tṛnddhi me pṛtanāyataḥ /
tṛnddhi me sarvān durhārdo tṛnddhi me dviṣato maṇe

runddhi darbha sapatnān me runddhi me pṛtanāyataḥ /
runddhi me sarvān durhārdo runddhi me dviṣato maṇe

mṛṇa darbha sapatnān me mṛṇa me pṛtanāyataḥ /
mṛṇa me sarvān durhārdo mṛṇa me dviṣato maṇe

mantha darbha sapatnān me mantha me pṛtanāyataḥ /
mantha me sarvān durhārdo mantha me dviṣato maṇe

piṇḍḍhi darbha sapatnān me piṇḍḍhi me pṛtanāyataḥ /
piṇḍḍhi me sarvān durhārdo piṇḍḍhi me dviṣato maṇe

oṣa darbha sapatnān me oṣa me pṛtanāyataḥ /
oṣa me sarvān durhārdo oṣa me dviṣato maṇe

daha darbha sapatnān me daha me pṛtanāyataḥ /
daha me sarvān durhārdo daha me dviṣato maṇe

jahi darbha sapatnān me jahi me pṛtanāyataḥ /
jahi me sarvān durhārdo jahi me dviṣato maṇe

19.30
yatte darbha jarāmṛtyu śataṃ varmasu varma te /
tenemaṃ varmiṇaṃ kṛtvā sapatnāṃ jahi vīryaiḥ

śataṃ te darbha varmāṇi sahasraṃ vīryāṇi te /
tamasmai viśve tvāṃ devā jarase bhartavā aduḥ

tvāmāhurdevavarma tvāṃ darbha brahmaṇaspatim /
tvāmindrasyāhurvarma tvaṃ rāṣṭrāṇi rakṣasi

sapatnakṣayaṇaṃ darbha dviṣatastapanaṃ hṛdaḥ /
maṇiṃ kṣatrasya vardhanaṃ tanūpānaṃ kṛṇomi te

yatsamudro abhyakrandatparjanyo vidyutā saha /
tato hiranyayo bindustato darbho ajāyata

19.31
audumbareṇa maṇinā puṣṭikāmāya vedhasā /
paśūṇāṃ sarveṣāṃ sphātiṃ goṣṭhe me savitā karat

yo no agnirgārhapatyaḥ paśūnāmadhipā asat/
audumbaro vṛṣā maṇiḥ saṃ mā sṛjatu puṣṭyā

karīṣiṇīṃ phalavatīṃ svadhāmirāṃ ca no gṛhe /
audumbarasya tejasā dhātā puṣṭiṃ dadhātu me

yaddvipācca catuṣpācca yānyannāni ye rasāḥ /
gṛhṇe'haṃ tveṣāṃ bhūmānaṃ bibhradaudumbaraṃ maṇim

puṣṭiṃ paśūnāṃ pari jagrabhāhaṃ catuṣpadāṃ dvipadāṃ yacca dhānyam /
payaḥ paśūnāṃ rasamoṣadhīnāṃ bṛhaspatiḥ savitā me ni yachāt

ahaṃ paśūnāmadhipā asāni mayi puṣṭaṃ puṣṭapatirdadhātu /
mahyamaudumbaro maṇirdraviṇāni ni yacchatu

upa maudumbaro maṇiḥ prajayā ca dhanena ca /
indreṇa jinvito maṇirā māgantsaha varcasā

devo maṇiḥ sapatnahā dhanasā dhanasātaye /
paśorannasya bhūmānaṃ gavāṃ sphātiṃ ni yacchatu

yathāgre tvaṃ vanaspate puṣṭhyā saha jajñiṣe /
evā dhanasya me sphātimā dadhātu sarasvatī

ā me dhanaṃ sarasvatī payasphātiṃ ca dhānyam /
sinīvālyupā vahādayaṃ caudumbaro maṇiḥ

tvaṃ maṇīṇāmadhipā vṛṣāsi tvayi puṣṭaṃ puṣṭapatirjajāna /
tvayīme vājā draviṇāni sarvaudumbaraḥ sa tvamasmatsahasvārādārādarātimamatiṃ kṣudhaṃ ca

grāmaṇīrasi grāmaṇīrutthāya abhiṣikto'bhi mā siñca varcasā /
tejo'si tejo mayi dhārayādhi rayirasi rayiṃ me dhehi

puṣṭirasi puṣṭyā mā samaṅgdhi gṛhamedhī gṛhapatiṃ mā kṛṇu /
audumbaraḥ sa tvamasmāsu dhehi rayiṃ ca naḥ sarvavīraṃ ni yaccha rāyaspoṣāya prati muñce ahaṃ tvām

ayamaudumbaro maṇirvīro vīrāya badhyate /
sa naḥ saniṃ madhumatīṃ kṛṇotu rayiṃ ca naḥ sarvavīraṃ ni yachāt

19.32
śatakāṇḍo duścyavanaḥ sahasraparṇa uttiraḥ /
darbho ya ugra oṣadhistaṃ te badhnāmyāyuṣe

nāsya keśān pra vapanti norasi tāḍamā ghnate /
yasmā achinnaparṇena darbhena śarma yacchati

divi te tūlamoṣadhe pṛthivyāmasi niṣṭhitaḥ /
tvayā sahasrakāṇḍenāyuḥ pra vardhayāmahe

tisro divo atyatṛṇattisra imāḥ pṛthivīruta /
tvayāhaṃ durhārdo jihvāṃ ni tṛṇadmi vacāṃsi

tvamasi sahamāno'hamasmi sahasvān /
ubhau sahasvantau bhūtvā sapatnān sahiṣīvahi

sahasva no abhimātiṃ sahasva pṛtanāyataḥ /
sahasva sarvān durhārdaḥ suhārdo me bahūn kṛdhi

darbheṇa devajātena divi ṣṭambhena śaśvadit/
tenāhaṃ śaśvato janāmasanaṃ sanavāni ca

priyaṃ mā darbha kṛṇu brahmarājanyābhyāṃ śūdrāya cāryāya ca /
yasmai ca kāmayāmahe sarvasmai ca vipaśyate

yo jāyamānaḥ pṛthivīmadṛṃhadyo astabhnādantarikṣaṃ divaṃ ca /
yaṃ bibhrataṃ nanu pāpmā viveda sa no'yaṃ darbho varuṇo divā kaḥ

sapatnahā śatakāṇḍaḥ sahasvān oṣadhīnāṃ prathamaḥ saṃ babhūva /
sa no'yaṃ darbhaḥ pari pātu viśvatastena sākṣīya pṛtanāḥ pṛtanyataḥ

19.33
sahasrārghaḥ śatakāṇḍaḥ payasvān apāmagnirvīrudhāṃ rājasūyam /
sa no'yaṃ darbhaḥ pari pātu viśvato devo maṇirāyuṣā saṃ sṛjāti naḥ

ghṛtādullupto madhumān payasvān bhūmidṛṃho'cyutaścyāvayiṣṇuḥ /
nudantsapatnān adharāṃśca kṛṇvan darbhā roha mahatāmindriyeṇa

tvaṃ bhūmimatyeṣyojasā tvaṃ vedyāṃ sīdasi cāruradhvare /
tvāṃ pavitramṛṣayo'bharanta tvaṃ punīhi duritānyasmat

tīkṣṇo rājā viṣāsahī rakṣohā viśvacarṣaṇiḥ /
ojo devānāṃ balamugrametattaṃ te badhnāmi jarase svastaye

darbheṇa tvaṃ kṛṇavadvīryāṇi darbhaṃ bibhradātmanā mā vyathiṣṭhāḥ /
atiṣṭhāya varcasādhānyāntsūrya ivā bhāhi pradiśaścatasraḥ

19.34
jāṅgiḍo'si jaṅgiḍo rakṣitāsi jaṅgiḍaḥ /
dvipāccatuṣpādasmākaṃ sarvaṃ rakṣatu jaṅgiḍaḥ

yā gṛtsyastripañcāśīḥ śataṃ kṛtyākṛtaśca ye /
sarvān vinaktu tejaso'rasāṃ jaṅgiḍaskarat

arasaṃ kṛtrimaṃ nādamarasāḥ sapta visrasaḥ /
apeto jaṅgiḍāmatimiṣumasteva śātaya

kṛtyādūṣaṇa evāyamatho arātidūṣaṇaḥ /
atho sahasvāñjaṅgiḍaḥ pra na āyūṃṣi tāriṣat

sa jaṅgiḍasya mahimā pari ṇaḥ pātu viśvataḥ /
viṣkandhaṃ yena sāsaha saṃskandhamoja ojasā

triṣṭvā devā ajanayan niṣṭhitaṃ bhūmyāmadhi /
tamu tvāṅgirā iti brāhmaṇāḥ pūrvyā viduḥ

na tvā pūrvā oṣadhayo na tvā taranti yā navāḥ /
vibādha ugro jaṅgiḍaḥ paripāṇaḥ sumaṅgalaḥ

athopadāna bhagavo jāṅgiḍāmitavīrya /
purā ta ugrā grasata upendro vīryaṃ dadau

ugra itte vanaspata indra ojmānamā dadhau /
amīvāḥ sarvāścātayaṃ jahi rakṣāṃsyoṣadhe

āśarīkaṃ viśarīkaṃ balāsaṃ pṛṣṭyāmayam /
takmānaṃ viśvaśāradamarasāṃ jaṅgiḍaskarat

19.35
indrasya nāma gṛhṇanta ṛṣayo jaṅgiḍaṃ daduḥ /
devā yaṃ cakrurbheṣajamagre viṣkandhadūṣaṇam

sa no rakṣatu jaṅgiḍo dhanapālo dhaneva /
devā yaṃ cakrurbrāhmaṇāḥ paripāṇamarātiham

durhārdaḥ saṃghoraṃ cakṣuḥ pāpakṛtvānamāgamam /
tāṃstvaṃ sahasracakṣo pratībodhena nāśaya paripāṇo'si jaṅgiḍaḥ

pari mā divaḥ pari mā pṛthivyāḥ paryantarikṣātpari mā vīrudbhyaḥ /
pari mā bhūtātpari mota bhavyāddiśodiśo jaṅgiḍaḥ pātvasmān

ya ṛṣṇavo devakṛtā ya uto vavṛte'nyaḥ /
sarvāṃstān viśvabheṣajo'rasāṃ jaṅgiḍaskarat

19.36
śatavāro anīnaśadyakṣmān rakṣāṃsi tejasā /
ārohan varcasā saha maṇirdurṇāmacātanaḥ

śṛṅgābhyāṃ rakṣo nudate mūlena yātudhānyaḥ /
madhyena yakṣmaṃ bādhate nainaṃ pāpmāti tatrati

ye yakṣmāso arbhakā mahānto ye ca śabdinaḥ /
sarvāṃ durṇāmahā maṇiḥ śatavāro anīnaśat

śataṃ vīrān ajanayacchataṃ yakṣmān apāvapat/
durṇāmnaḥ sarvān hatvāva rakṣāṃsi dhūnute

hiraṇyaśṛṅga ṛṣabhaḥ śātavāro ayaṃ maṇiḥ /
durṇāmnaḥ sarvāṃstṛdhvāva rakṣāṃsyakramīt

śatamahaṃ durṇāmnīnāṃ gandharvāpsarasāṃ śatam /
śataṃ śaśvanvatīnāṃ śatavāreṇa vāraye

19.37
idaṃ varco agninā dattamāgan bhargo yaśaḥ saha ojo vayo balam /
trayastriṃśadyāni ca vīryāṇi tānyagniḥ pra dadātu me

varca ā dhehi me tanvāṃ saha ojo vayo balam /
indriyāya tvā karmaṇe vīryāya prati gṛhṇāmi śataśāradāya

ūrje tvā balāya tvaujase sahase tvā /
abhibhūyāya tvā rāṣṭrabhṛtyāya paryūhāmi śataśāradāya

ṛtubhyaṣṭvārtavebhyo mādbhyaḥ saṃvatsarebhyaḥ /
dhātre vidhātre samṛdhe bhūtasya pataye yaje

19.38
na taṃ yakṣmā arundhate nainaṃ śapatho aśnute /
yaṃ bheṣajasya gulguloḥ surabhirgandho aśnute

viṣvañcastasmādyakṣmā mṛgā aśvā iverate /
yadgulgulu saindhavaṃ yadvāpyasi samudriyam

ubhayoragrabhaṃ nāmāsmā ariṣṭatātaye

19.39
aitu devastrāyamāṇaḥ kuṣṭho himavataspari /
takmānaṃ sarvaṃ nāśaya sarvāśca yātudhānyaḥ

trīṇi te kuṣṭha nāmāni nadyamāro nadyāriṣaḥ /
nadyāyaṃ puruṣo riṣat/
yasmai paribravīmi tvā sāyaṃprātaratho divā

jīvalā nāma te mātā jīvanto nāma te pitā /
nadyāyaṃ puruṣo riṣat/
yasmai paribravīmi tvā sāyaṃprātaratho divā

uttamo asyoṣadhīnāmanaḍvān jagatāmiva vyāghraḥ śvapadāmiva /
nadyāyaṃ puruṣo riṣat/
yasmai paribravīmi tvā sāyaṃprātaratho divā

triḥ śāmbubhyo aṅgirebhyastrirādityebhyaspari /
trirjāto viśvadevebhyaḥ /
sa kuṣṭho viśvabheṣajaḥ sākaṃ somena tiṣṭhati /
aśvattho devasadanastṛtīyasyāmito divi /
tatrāmṛtasya cakṣaṇaṃ tataḥ kuṣṭho ajāyata /
sa kuṣṭho viśvabheṣajaḥ sākaṃ somena tiṣṭhati /
hiraṇyayī nauracaraddhiraṇyabandhanā divi /
tatrāmṛtasya cakṣaṇaṃ tataḥ kuṣṭho ajāyata /
sa kuṣṭho viśvabheṣajaḥ sākaṃ somena tiṣṭhati /
yatra nāvaprabhraṃśanaṃ yatra himavataḥ śiraḥ /
tatrāmṛtasya cakṣaṇaṃ tataḥ kuṣṭho ajāyata /
sa kuṣṭho viśvabheṣajaḥ sākaṃ somena tiṣṭhati /
yaṃ tvā veda pūrva ikṣvāko yaṃ vā tvā kuṣṭha kāmyaḥ /
yaṃ vā vaso yamātsyastenāsi viśvabheṣajaḥ

śīrṣaśokaṃ tṛtīyakaṃ sadaṃdiryaśca hāyanaḥ /
takmānaṃ viśvadhāvīryādharāñcaṃ parā suva

19.40
yan me chidraṃ manaso yacca vācaḥ sarasvatī manyumantaṃ jagāma /
viśvaistaddevaiḥ saha saṃvidānaḥ saṃ dadhātu bṛhaspatiḥ

mā na āpo medhāṃ mā brahma pra mathiṣṭana /
suṣyadā yūyaṃ syandadhvamupahūto'haṃ sumedhā varcasvī

mā no medhāṃ mā no dīkṣāṃ mā no hiṃsiṣṭaṃ yattapaḥ /
śivā naḥ śaṃ santvāyuṣe śivā bhavantu mātaraḥ

yā naḥ pīparadaśvinā jyotiṣmatī tamastiraḥ /
tāmasme rāsatāmiṣam

19.41
bhadramicchanta ṛṣayaḥ svarvidastapo dīkṣāmupaniṣeduragre /
tato rāṣṭraṃ balamojaśca jātaṃ tadasmai devā upasaṃnamantu

19.42
brahma hotā brahma yajñā brahmaṇā svaravo mitāḥ /
adhvaryurbrahmaṇo jāto brahmaṇo'ntarhitaṃ haviḥ

brahma sruco ghṛtavatīrbrahmaṇā vediruddhitā /
brahma yajñasya tattvaṃ ca ṛtvijo ye haviṣkṛtaḥ /
śamitāya svāhā

aṃhomuce pra bhare manīṣāmā sutrāvṇe sumatimāvṛṇānaḥ /
imamindra prati havyaṃ gṛbhāya satyāḥ santu yajamānasya kāmāḥ

aṃhomucaṃ vrṣabhaṃ yajñiyānāṃ virājantaṃ prathamamadhvarāṇam /
apāṃ napātamaśvinā huve dhiya indriyeṇa ta indriyaṃ dattamojaḥ

19.43
yatra brahmavido yānti dīkṣayā tapasā saha /
agnirmā tatra nayatvagnirmedhā dadhātu me /
agnaye svāhā

yatra brahmavido yānti dīkṣayā tapasā saha /
vāyurmā tatra nayatu vāyuḥ praṇān dadhātu me vāyave svāhā

yatra brahmavido yānti dīkṣayā tapasā saha /
sūryo mā tatra nayatu cakṣuḥ sūryo dadhātu me /
sūryāya svāhā

yatra brahmavido yānti dīkṣayā tapasā saha /
candro mā tatra nayatu manaścandro dadhātu me /
candrāya svāhā

yatra brahmavido yānti dīkṣayā tapasā saha /
somo mā tatra nayatu payaḥ somo dadhātu me /
somāya svāhā

yatra brahmavido yānti dīkṣayā tapasā saha /
indro mā tatra nayatu balamindro dadhātu me /
indrāya svāhā

yatra brahmavido yānti dīkṣayā tapasā saha /
āpo mā tatra nayatvamṛtaṃ mopa tiṣṭhatu /
adbhyaḥ svāhā

yatra brahmavido yānti dīkṣayā tapasā saha /
brahmā mā tatra nayatu brahmā brahma dadhātu me /
brahmaṇe svāhā

19.44
āyuṣo'si prataraṇaṃ vipraṃ bheṣajamucyase /
tadāñjana tvaṃ śaṃtāte śamāpo abhayaṃ kṛtam

yo harimā jāyānyo'ṅgabhedo viṣalpakaḥ /
sarvaṃ te yakṣmamaṅgebhyo bahirnirhantvāñjanam

āñjanaṃ pṛthivyāṃ jātaṃ bhadraṃ puruṣajīvanam /
kṛṇotvapramāyukaṃ rathajūtimanāgasam

prāṇa prāṇaṃ trāyasvāso asave mṛḍa /
nirṛte nirṛtyā naḥ pāśebhyo muñca

sindhorgarbho'si vidyutāṃ puṣpam /
vātaḥ prāṇaḥ sūryaścakṣurdivaspayaḥ

devāñjana traikakuda pari mā pāhi viśvataḥ /
na tvā tarantyoṣadhayo bāhyāḥ parvatīyā uta

vīdaṃ madhyamavāsṛpadrakṣohāmīvacātanaḥ /
amīvāḥ sarvāścātayan nāśayadabhibhā itaḥ

bahvidaṃ rājan varuṇānṛtamāha pūruṣaḥ /
tasmātsahasravīrya muñca naḥ paryaṃhasaḥ

yadāpo aghnyā iti varuṇeti yadūcima /
tasmātsahasravīrya muñca naḥ paryaṃhasaḥ

mitraśca tvā varuṇaścānupreyaturāñjana /
tau tvānugatya dūraṃ bhogāya punarohatuḥ

19.45
ṛṇādṛṇamiva saṃ naya kṛtyāṃ kṛtyākṛto gṛham /
cakṣurmantrasya durhārdaḥ pṛṣṭīrapi śṛṇāñjana

yadasmāsu duṣvapnyaṃ yadgoṣu yacca no gṛhe /
anāmagastaṃ ca durhārdaḥ priyaḥ prati muñcatām

apāmūrja ojaso vāvṛdhānamagnerjātamadhi jātavedasaḥ /
caturvīraṃ parvatīyaṃ yadāñjanaṃ diśaḥ pradiśaḥ karadicchivāste

caturvīraṃ badhyata āñjanaṃ te sarvā diśo abhayāste bhavantu /
dhruvastiṣṭhāsi saviteva cārya imā viśo abhi harantu te balim

ākṣvaikaṃ maṇimekaṃ krṇuṣva snāhyekenā pibaikameṣām /
caturvīraṃ nairṛtebhyaścaturbhyo grāhyā bandhebhyaḥ pari pātvasmān

agnirmāgnināvatu prāṇāyāpānāyāyuṣe varcasa ojase /
tejase svastaye subhūtaye svāhā

indro mendriyeṇāvatu prāṇāyāpānāyāyuṣe varcasa ojase /
tejase svastaye subhūtaye svāhā

somo mā saumyenāvatu prāṇāyāpānāyāyuṣe varcasa ojase /
tejase svastaye subhūtaye svāhā

bhago mā bhagenāvatu prāṇāyāpānāyāyuṣe varcasa ojase /
tejase svastaye subhūtaye svāhā

maruto mā gaṇairavantu prāṇāyāpānāyuṣe varcasa ojase tejase /
svastaye subhūtaye svāhā

19.46
prajāpatiṣṭvā badhnātprathamamastṛtaṃ vīryāya kam /
tatte badhnāmyāyuṣe varcasa ojase ca balāya cāstṛtastvābhi rakṣatu

ūrdhvastiṣṭhatu rakṣann apramādamastṛtemaṃ mā tvā dabhan paṇayo yātudhānāḥ /
indra iva dasyūn ava dhūnuṣva pṛtanyataḥ sarvāṃ chatrūn vi ṣahasvāstṛtastvābhi rakṣatu

śataṃ ca na praharanto nighnanto na tastire /
tasminn indraḥ paryadatta cakṣuḥ prāṇamatho balamastṛtastvābhi rakṣatu

indrasya tvā varmaṇā pari dhāpayāmo yo devānāmadhirājo babhūva /
punastvā devāḥ pra ṇayantu sarve'stṛtastvābhi rakṣatu

asmin maṇāvekaśataṃ vīryāṇi sahasraṃ prāṇā asminn astṛte /
vyāghraḥ śatrūn abhi tiṣṭha sarvān yastvā pṛtanyādadharaḥ so astvastṛtastvābhi rakṣatu

ghṛtādullupto madhumān payasvāntsahasraprāṇaḥ śatayonirvayodhāḥ /
śambhūśca mayobhūścorjasvāṃśca payasvāṃścāstṛtastvābhi rakṣatu

yathā tvamuttaro'so asapatnaḥ sapatnahā /
sajātānāmasadvaśī tathā tvā savitā karadastṛtastvābhi rakṣatu

19.47
ā rātri pārthivaṃ rajaḥ pituraprāyi dhāmabhiḥ /
divaḥ sadāṃsi bṛhatī vi tiṣṭhasa ā tveṣaṃ vartate tamaḥ

na yasyāḥ pāraṃ dadṛśe na yoyuvadviśvamasyāṃ ni viśate yadejati /
ariṣṭāsasta urvi tamasvati rātri pāramaśīmahi bhadre pāramaśīmahi

ye te rātri nṛcakṣaso draṣṭāro navatirnava /
aśītiḥ santyaṣṭā uto te sapta saptatiḥ

ṣaṣṭiśca ṣaṭca revati pañcāśatpañca sumnayi /
catvāraścatvāriṃśacca trayastriṃśacca vājini

dvau ca te viṃśatiśca te rātryekādaśāvamāḥ /
tebhirno adya pāyubhirnu pāhi duhitardivaḥ

rakṣā mākirno aghaśaṃsa īśata mā no duḥśaṃsa īśata /
mā no adya gavāṃ steno māvīnāṃ vṛka īśata

māśvānāṃ bhadre taskaro mā nṛṇāṃ yātudhānyaḥ /
paramebhiḥ pathibhi steno dhāvatu taskaraḥ /
pareṇa datvatī rajjuḥ pareṇāghāyurarṣatu

adha rātri tṛṣṭadhūmamaśīrṣāṇamahiṃ kṛṇu /
hanū vṛkasya jambhayā stenaṃ drupade jahi

tvayi rātri vasāmasi svapiṣyāmasi jāgṛhi /
gobhyo naḥ śarma yachāśvebhyaḥ puruṣebhyaḥ

19.48
atho yāni ca yasmā ha yāni cāntaḥ parīṇahi /
tāni te pari dadmasi

rātri mātaruṣase naḥ pari dehi /
uṣā no ahne pari dadātvahastubhyaṃ vibhāvari

yatkiṃ cedaṃ patayati yatkiṃ cedaṃ sarīsṛpam /
yatkiṃ ca parvatāyāsatvaṃ tasmāttvaṃ rātri pāhi naḥ

sā paścātpāhi sā puraḥ sottarādadharāduta /
gopāya no vibhāvari stotārasta iha smasi

ye rātrimanutiṣṭhanti ye ca bhūteṣu jāgrati /
paśūn ye sarvān rakṣanti te na ātmasu jāgrati te naḥ paśuṣu jāgrati

veda vai rātri te nāma ghṛtācī nāma vā asi /
tāṃ tvāṃ bharadvājo veda sā no vitte'dhi jāgrati

19.49
iṣirā yoṣā yuvatirdamūnā rātrī devasya saviturbhagasya /
aśvakṣabhā suhavā saṃbhṛtaśrīrā paprau dyāvāpṛthivī mahitvā

ati viśvānyaruhadgambhiro varṣiṣṭhamaruhanta śraviṣṭhāḥ /
uśatī rātryanu sā bhadrābhi tiṣṭhate mitra iva svadhābhiḥ

varye vande subhage sujāta ājagan rātri sumanā iha syām /
asmāṃstrāyasva naryāṇi jātā atho yāni gavyāni puṣṭyā

siṃhasya rātryuśatī pīṃṣasya vyāghrasya dvīpino varca ā dade /
aśvasya bradhnaṃ puruṣasya māyuṃ puru rūpāṇi kṛṇuṣe vibhātī

śivāṃ rātrimanusūryaṃ ca himasya mātā suhavā no astu /
asya stomasya subhage ni bodha yena tvā vande viśvāsu dikṣu

stomasya no vibhāvari rātri rājeva joṣase /
asāma sarvavīrā bhavāma sarvavedaso vyucchantīranūṣasaḥ

śamyā ha nāma dadhiṣe mama dipsanti ye dhanā /
rātrīhi tān asutapā ya steno na vidyate yatpunarna vidyate

bhadrāsi rātri camaso na viṣṭo viṣvaṅgorūpaṃ yuvatirbibharṣi /
cakṣuṣmatī me uśatī vapūmṣi prati tvaṃ divyā na kṣāmamukthāḥ

yo adya stena āyatyaghāyurmartyo ripuḥ /
rātrī tasya pratītya pra grīvāḥ pra śiro hanat

pra pādau na yathāyati pra hastau na yathāśiṣat/
yo malimlurupāyati sa saṃpiṣṭo apāyati /
apāyati svapāyati śuṣke sthāṇāvapāyati

19.50
adha rātri tṛṣṭadhūmamaśīrṣāṇamahiṃ kṛṇu /
akṣau vṛkasya nirjahyāstena taṃ drupade jahi

ye te rātryanaḍvāhastīkṣṇaśṛṅgāḥ svāśavaḥ /
tebhirno adya pārayāti durgāṇi viśvahā

rātriṃrātrimariṣyantastarema tanvā vayam /
gambhīramaplavā iva na tareyurarātayaḥ

yathā śāmyākaḥ prapatann apavān nānuvidyate /
evā rātri pra pātaya yo asmāmabhyaghāyati

apa stenaṃ vāsayo goajamuta taskaram /
atho yo arvataḥ śiro'bhidhāya ninīṣati

yadadya rātri subhage vibhajantyayo vasu /
yadetadasmān bhojaya yathedanyān upāyasi

uṣase naḥ pari dehi sarvān rātryanāgasaḥ /
uṣā no ahne ā bhajādahastubhyaṃ vibhāvari

19.51
ayuto'hamayuto ma ātmāyutaṃ me cakṣurayutaṃ me śrotram /
ayuto me prāṇo'yuto me'pāno'yuto me vyāno'yuto'haṃ sarvaḥ

devasya tvā savituḥ prasave'śvinorbāhubhyāṃ pūṣṇo hastābhyāṃ prasūta ā rabhe

19.52
kāmastadagre samavartata manaso retaḥ prathamaṃ yadāsīt/
sa kāma kāmena bṛhatā sayonī rāyaspoṣaṃ yajamānāya dhehi

tvaṃ kāma sahasāsi pratiṣṭhito vibhurvibhāvā sakha ā sakhīyate /
tvamugraḥ pṛtanāsu sasahiḥ saha ojo yajamānāya dhehi

dūrāccakamānāya pratipāṇāyākṣaye /
āsmā aśṛṇvann āśāḥ kāmenājanayantsvaḥ

kāmena mā kāma āgan hṛdayāddhṛdayaṃ pari /
yadamīṣāmado manastadaitūpa māmiha

yatkāma kāmayamānā idaṃ kṛṇmasi te haviḥ /
tan naḥ sarvaṃ samṛdhyatāmathaitasya haviṣo vīhi svāhā

19.53
kālo aśvo vahati saptaraśmiḥ sahasrākṣo ajaro bhūriretāḥ /
tamā rohanti kavayo vipaścitastasya cakrā bhuvanāni viśvā

sapta cakrān vahati kāla eṣa saptāsya nābhīramṛtaṃ nvakṣaḥ /
sa imā viśvā bhuvanānyañjatkālaḥ sa īyate prathamo nu devaḥ

pūrṇaḥ kumbho'dhi kāla āhitastaṃ vai paśyāmo bahudhā nu santam /
sa imā viśvā bhuvanāni pratyaṅkālaṃ tamāhuḥ parame vyoman

sa eva saṃ bhuvanānyābharatsa eva saṃ bhuvanāni paryait/
pitā sann abhavatputra eṣāṃ tasmādvai nānyatparamasti tejaḥ

kālo'mūṃ divamajanayatkāla imāḥ pṛthivīruta /
kāle ha bhūtaṃ bhavyaṃ ceṣitaṃ ha vi tiṣṭhate

kālo bhūtimasṛjata kāle tapati sūryaḥ /
kāle ha viśvā bhūtāni kāle cakṣurvi paśyati

kāle manaḥ kāle prāṇaḥ kāle nāma samāhitam /
kālena sarvā nandantyāgatena prajā imāḥ

kāle tapaḥ kāle jyeṣṭhaṃ kāle brahma samāhitam /
kālo ha sarvasyeśvaro yaḥ pitāsītprajāpateḥ

teneṣitaṃ tena jātaṃ tadu tasmin pratiṣṭhitam /
kālo ha brahma bhūtvā bibharti parameṣṭhinam

kālaḥ prajā asṛjata kālo agre prajāpatim /
svayaṃbhūḥ kaśyapaḥ kālāttapaḥ kālādajāyata

19.54
kālādāpaḥ samabhavan kālādbrahma tapo diśaḥ /
kālenodeti sūryaḥ kāle ni viśate punaḥ

kālena vātaḥ pavate kālena pṛthivī mahī /
dyaurmahī kāla āhitā

kālo ha bhūtaṃ bhavyaṃ ca putro ajanayatpurā /
kālādṛcaḥ samabhavan yajuḥ kālādajāyata

kālo yajñaṃ samairayaddevebhyo bhāgamakṣitam /
kāle gandharvāpsarasaḥ kāle lokāḥ pratiṣṭhitāḥ

kāle'yamaṅgirā devo'tharvā cādhi tiṣṭhataḥ /
imaṃ ca lokaṃ paramaṃ ca lokaṃ puṇyāṃśca lokān vidhṛtīśca puṇyāḥ /
sarvāṃllokān abhijitya brahmaṇā kālaḥ sa īyate paramo nu devaḥ

19.55
rātriṃrātrimaprayātaṃ bharanto'śvāyeva tiṣṭhate ghāsamasmai /
rāyaspoṣeṇa samiṣā madanto mā te agne prativeśā riṣāma

yā te vasorvāta iṣuḥ sā ta eṣā tayā no mṛḍa /
rāyaspoṣeṇa samiṣā madanto mā te agne prativeśā riṣāma

sāyaṃsāyaṃ gṛhapatirno agniḥ prātaḥprātaḥ saumanasasya dātā /
vasorvasorvasudāna edhi vayaṃ tvendhānāstanvaṃ puṣema

prātaḥprātargṛhapatirno agniḥ sāyaṃsāyaṃ saumanasasya dātā /
vasorvasorvasudāna edhīndhānāstvā śataṃhimā ṛdhema

apaścā dagdhānnasya bhūyāsam /
annādāyānnapataye rudrāya namo agnaye /
sabhyaḥ sabhāṃ me pāhi ye ca sabhyāḥ sabhāsadaḥ

tvāmindrā puruhūta viśvamāyurvyaśnavan /
aharaharbalimitte haranto'śvāyeva tiṣṭhate ghāsamagne

19.56
yamasya lokādadhyā babhūvitha pramadā martyān pra yunakṣi dhīraḥ /
ekākinā sarathaṃ yāsi vidvāntsvapnaṃ mimāno asurasya yonau

bandhastvāgre viśvacayā apaśyatpurā rātryā janitoreke ahni /
tataḥ svapnedamadhyā babhūvitha bhiṣagbhyo rūpamapagūhamānaḥ

bṛhadgāvāsurebhyo'dhi devān upāvartata mahimānamicchan /
tasmai svapnāya dadhurādhipatyaṃ trayastriṃśāsaḥ svarānaśānāḥ

naitāṃ viduḥ pitaro nota devā yeṣāṃ jalpiścaratyantaredam /
trite svapnamadadhurāptye nara ādityāso varuṇenānuśiṣṭāḥ

yasya krūramabhajanta duṣkṛto'svapnena sukṛtaḥ puṇyamāyuḥ /
svarmadasi parameṇa bandhunā tapyamānasya manaso'dhi jajñiṣe

vidma te sarvāḥ parijāḥ purastādvidma svapna yo adhipā ihā te /
yaśaśvino no yaśaseha pāhyārāddviṣebhirapa yāhi dūram

19.57
yathā kalāṃ yathā śaphaṃ yathā rṇaṃ sannayanti /
evā duṣvapnyaṃ sarvamapriye saṃ nayāmasi

saṃ rājāno aguḥ samṛṇāmyaguḥ saṃ kuṣṭhā aguḥ saṃ kalā aguḥ /
samasmāsu yadduṣvapnyaṃ nirdviṣate duṣvapnyaṃ suvāma

devānāṃ patnīnāṃ garbha yamasya kara yo bhadraḥ svapna /
sa mama yaḥ pāpastaddviṣate pra hiṇmaḥ /
mā tṛṣṭānāmasi kṛṣṇaśakunermukham

taṃ tvā svapna tathā saṃ vidma sa tvaṃ svapnāśva iva kāyamaśva iva nīnāham /
anāsmākaṃ devapīyuṃ piyāruṃ vapa yadasmāsu duṣvapnyaṃ yadgoṣu yacca no gṛhe

anāsmākastaddevapīyuḥ piyārurniṣkamiva prati muñcatām /
navāratnīn apamayā asmākaṃ tataḥ pari /
duṣvapnyaṃ sarvaṃ dviṣate nirdayāmasi

19.58
ghṛtasya jūtiḥ samanā sadevā saṃvatsaraṃ haviṣā vardhayantī /
śrotraṃ cakṣuḥ prāṇo'chinno no astvachinnā vayamāyuṣo varcasaḥ

upāsmān prāṇo hvayatāmupa prāṇaṃ havāmahe /
varco jagrāha pṛthivyantarikṣaṃ varcaḥ somo bṛhaspatirvidhattā

varcaso dyāvāpṛthivī saṃgrahaṇī babhūvathurvarco gṛhītvā pṛthivīmanu saṃ carema /
yaśasaṃ gāvo gopatimupa tiṣṭhantyāyatīryaśo gṛhītvā pṛthivīmanu saṃ carema

vrajaṃ kṛṇudhvaṃ sa hi vo nṛpāṇo varmā sīvyadhvaṃ bahulā pṛthūni /
puraḥ kṛṇudhvamāyasīradhṛṣṭā mā vaḥ susroccamaso dṛṃhata tam

yajñasya cakṣuḥ prabhṛtirmukhaṃ ca vācā śrotreṇa manasā juhomi /
imaṃ yajñaṃ vitataṃ viśvakarmaṇā devā yantu sumanasyamānāḥ

ye devānāmṛtvijo ye ca yajñiyā yebhyo havyaṃ kriyate bhāgadheyam /
imaṃ yajñaṃ saha patnībhiretya yāvanto devāstaviṣā mādayantām

19.59
tvamagne vratapā asi deva ā martyeṣvā /
tvaṃ yajñeṣvīḍyaḥ

yadvo vayaṃ pramināma vratāni viduṣāṃ devā aviduṣṭarāsaḥ /
agniṣṭadviśvādā pṛṇātu vidvāntsomasya yo brāhmaṇāmāviveśa

ā devānāmapi panthāmaganma yacchaknavāma tadanupravoḍhum /
agnirvidvāntsa yajātsa iddhotā so'dhvarāntsa ṛtūn kalpayāti

19.6
vāṅma āsan nasoḥ prāṇaścakṣurakṣṇoḥ śrotraṃ karṇayoḥ /
apalitāḥ keśā aśoṇā dantā bahu bāhvorbalam

ūrvorojo jaṅghayorjavaḥ pādayoḥ /
pratiṣṭhā ariṣṭāni me sarvātmānibhṛṣṭaḥ

19.61
tanūstanvā me sahe dataḥ sarvamāyuraśīya /
syonaṃ me sīda puruḥ pṛṇasva pavamānaḥ svarge

19.62
priyaṃ mā kṛṇu deveṣu priyaṃ rājasu mā kṛṇu /
priyaṃ sarvasya paśyata uta śūdra utārye

19.63
uttiṣṭha brahmaṇaspate devān yajñena bodhaya /
āyuḥ prāṇaṃ prajāṃ paśūn kīrtiṃ yajamānaṃ ca vardhaya

19.64
agne samidhamāhārṣaṃ bṛhate jātavedase /
sa me śraddhāṃ ca medhāṃ ca jātavedāḥ pra yacchatu

idhmena tvā jātavedaḥ samidhā vardhayāmasi /
tathā tvamasmān vardhaya prajayā ca dhanena ca

yadagne yāni kāni cidā te dārūṇi dadhmasi /
sarvaṃ tadastu me śivaṃ tajjuṣasva yaviṣṭhya

etāste agne samidhastvamiddhaḥ samidbhava /
āyurasmāsu dhehyamṛtatvamācāryāya

19.65
hariḥ suparṇo divamāruho'rciṣā ye tvā dipsanti divamutpatantam /
ava tāṃ jahi harasā jātavedo'bibhyadugro'rciṣā divamā roha sūrya

19.66
ayojālā asurā māyino'yasmayaiḥ pāśairaṅkino ye caranti /
tāṃste randhayāmi harasā jātavedaḥ sahasraṛṣṭiḥ sapatnān pramṛṇan pāhi vajraḥ

19.67
paśyema śaradaḥ śatam

jīvema śaradaḥ śatam

budhyema śaradaḥ śatam

rohema śaradaḥ śatam

pūṣema śaradaḥ śatam

bhavema śaradaḥ śatam

bhūṣema śaradaḥ śatam

bhūyasīḥ śaradaḥ śatam

19.68
avyasaśca vyacasaśca bilaṃ vi ṣyāmi māyayā /
tābhyāmuddhṛtya vedamatha karmāṇi kṛṇmahe

19.69
jīvā stha jīvyāsaṃ sarvamāyurjīvyāsam

upajīvā sthopa jīvyāsaṃ sarvamāyurjīvyāsam

saṃjīvā stha saṃ jīvyāsaṃ sarvamāyurjīvyāsam

jīvalā stha jīvyāsaṃ sarvamāyurjīvyāsam

19.70
indra jīva sūrya jīva devā jīvā jīvyāsamaham /
sarvamāyurjīvyāsam

19.71
stutā mayā varadā vedamātā pra codayantāṃ pāvamānī dvijānām /
āyuḥ prāṇaṃ prajāṃ paśuṃ kīrtiṃ draviṇaṃ brahmavarcasam /
mahyaṃ dattvā vrajata brahmalokam

19.72
yasmātkośādudabharāma vedaṃ tasminn antarava dadhma enam /
kṛtamiṣṭaṃ brahmaṇo vīryeṇa tena mā devāstapasāvateha